Yohanes 8
8
I Yesus dasuro’ mamutusi lo’a babainye yang sisiuken, dala manyari akal kole’da’ to’ manuntut sala’a i Yesus
1Jaji barik maminna tauen mole’, i Yesuspi dinen lamba’ lo’a ukit Saitun, samalam. 2Imbar asona dinen mole’ bua lo’a saona Alatala. Inang barik aduduka majar lo’a tau babangkulungen ibiringa. 3Jaji barik andian tau daawa lo’a i Yesus kole’a gulungan toa adaten nanna tau Parisiin, babainyeen. Babainye dinen datingkam di sisiuka nanna laki tauen. Jaji dasuro’ akadeng di arona tau bayu’en. 4Jaji manjarum ira lo’a i Yesus, “O Pa’ Guru,” ingka, “babainye di’en de’i itingkam di sisiuka nanna laki tauen. 5Na, di Ukuma baki’ Musa dasuro’ lo’ka’, babainye balu’a di’en arung iparati nanna batuun sampai mate,” ingka kenang. Im. 20:10; Ul. 22:22-24. “Jaji ai lo’a daiko kaputusannu?” 6ingka kenang jarumda’ lo’a i Yesus mainto’ timbula andianna sala’a i Yesus. Akaus ateda’ to’ mangilalaien lo’a i Yesus.
Jaji barik i Yesus dinen boboko’ang poang kalena manulis di tana’en nanna tunjuka. 7Jaji i Yesus manulis inang, tauen na’an sangari mangatoanina lo’a i Yesus. Jaji akadeng bapi i Yesus manjarum, “Pande iparati nanna batuun. Intain poang na’anen kala’ badosa, dinen mamaratiin tajolo nanna batuun,” ingka kenang. 8Jaji mamin barik manjarum awan dinen, boboko’ang kalena bapi manulis di tana’en.
9Maminna barik dadalinga kole’da’ dinen jaruma i Yesus, daira dinen akaus mole’, kosan tau barani mamarati lo’a. Mole’ tajolo yang atoaan, yang bokanenpi akaus mole’. Jaji i Yesus dinen arantang nanna babainye dinen dua-dua. 10Jaji akadeng i Yesus bapi manjarum lo’a babainye dinen, “Disasi dinen ira? Angkosan te’ tau manuntuten lo’u?” ingka kenang.
11“Kosan Ama’e,” ingka kenang dinen babainyeen lo’a i Yesus.
Jaji barik manjarum bapi i Yesus lo’a babainye dinen de’i, “Na’anak bea daiak manuntut lo’u,” ingka kenang i Yesus lo’a babainyeen dinen. “Mole’ko. Poang tadangi basannu badosaan,” ingka kenang i Yesus lo’a babainye dinen.
I Yesus asan kalena marawangi duniaan
12Jaji manjarum bapi i Yesus lo’a tau Parisiin, “Daiak lalo di’en yang marawangiin lo’a tau duniaan. Intain malola’en lo’ku’, dinen yang andianen jalu arawangen nanna yang manyuro’ tio’en. Daia na’an barik lamba’ di jalu araunen,” ingka kenang manjaruma i Yesus lo’da’. Mat. 5:14; Yoh. 9:5.
13Jaji barik dasauti kole’a ira dinen, “Daiko saksi kalenu. Saksinu dinen kosan ratina,” ingka kenang dinen ira lo’a. Yoh. 5:31.
14Jaji barik dasauti kole’a i Yesus, “Kapisi kusaksi kaleku’, ti’ tapat. Saksiku’ dinen, dinen lalo yang jalu tapaten kole’a kutamuna asalku’. Kutamu bea daiak palamba’ku’. Poangsi daikin dinen na’an itamu ikin asalku’, na’an itamu palamba’ku’,” ingka kenang. 15“Daikin ati’enkin mamutusi, pikiran yang ipakaien ikin, dinen pikiran diri’in. Sabalika daiak na’anak mamutusi lo’a tauen,” ingka kenang lo’da’. 16“Poangsi daiak, ati’enak mamutusi lo’a tauen, kaputusanku’ dinen pasti mandua’, kole’a okan kakaleku’ poang mamutusiin. Andian bea nanku’ Ama’ku’ yang manyuro’en lo’ku’,” ingka kenang lo’da’. 17“Na, daikin di adatin ati’en andian dua tau panyaksiin, ati’en sikule’ jarumda’, baru’ ianggap tapat jarumda’. 18Na, daiak di’en saksi kaleku’. Ama’ku’pi yang manyuro’en lo’ku’, daia manyaksi bea mangamuroang lo’ku’,” ingka kenang manjaruma i Yesus lo’da’.
19Jaji barik manjarum tau Parisiin lo’a i Yesus, “Disasi daiko Amanu?” ingka kenang ira lo’a.
Jaji barik manyauti i Yesus lo’da’, “Na’ankin mangilala lo’ku’, na’ankin bea mangilala lo’a Ama’ku’. Ati’en ikilalaak ikin, pastikin mangilala bua lo’a Ama’ku’,” ingka kenang i Yesus lo’da’ manjaruma. 20Jaji gulungan jarum dinen de’i dajarumang di nanga majara i Yesus di saona Alatala, inang di kosan tau manaro’ duiten. Kosan bea tau maningkam lo’a, kole’a nampi mondok lo’a bayana.
Na’an pande ira dinen tamba nanna i Yesus
Pal. 3:14
21Jaji barik manjarum i Yesus lo’da’, “Na, daiak di’en to’ inyapak. Daikin ona’ to’ manyarikin lo’ku’, poangsi daikin ona’ pasti matekin mananggung dosanin. Na’ankin pande malola’ lo’ku’ lo’a kosanku’ dinen,” ingka kenang.
22Jaji barik manjarum ira gulungan toa Yahudiin, “Ai dinen na’anka’ kakaru’ dapat malola’ lo’a lo’a kosanna? Ai kenanga manjaruma, to’ uno’ kalenaaka?” ingka kenang sijarumanda’.
23Jaji manjarum bapi i Yesus lo’da’, “Daikin asal dari inyaungkin indi’ang, asal duniaan. Daiak asalku’ okan dari duniaan, dari iaset daiak asalku’,” ingka kenang. 24“Dinen lalo ratina jarumku’ dinen de’i, ona’ matekin mananggung dosanin. Kole’a ati’enkin na’an parasaya’ lo’a jarumku’ di’en jarumangen kaleku’ di’en, asan kaleku’ Iak Lalo di’ Iak, ati’ na’ankin parasaya’ pastikin mate ona’ mananggung dosanin,” ingka kenang i Yesus lo’da’. Pal. 3:14.
25Jaji barik manjarum ira, “Intainkosi daiko dinen?” ingka kenang ira lo’a i Yesus.
Jaji dasauti barik kole’a i Yesus, “Maminna memenjo kujarumang kaleku’ lo’in. 26Bayu’ daiak jarumku’ yang pandeen manuntut lo’in. Poangsi okan jarum diri’ku’ kupakaien. Tau yang manyuro’en lo’ku’, daia dapat iparasaya’i. Jaji yang kudalingaan dari nanna, jangka’a dinen yang kujarumangen lo’a tau duniaan,” ingka kenang i Yesus lo’da’.
27Jaji ira dinen na’an manamu ratina jaruma i Yesus dinen. Na’an manamu kole’a yang dakenangiin, Amana lalo yang manyuro’en lo’a. 28Jaji i Yesus manjarum bapi lo’da’, “Ona’ itamuna jaji ikin kole’a Iak Lalo di’ Iak. Ti’ maminak Anak Mantuariin iangkatang ikin, baru’ itamu ikin. Ka’ bea itamuna kole’a kosan basaku’ mamakai kuasa diri’ku’. Samuana kulola’ani poang, kujarumang poang awan yang dasuro’angen lo’ku’ kole’a Ama’ku’,” ingka kenang lo’da’. 29“Jaji tau manyuro’en lo’ku’ andian bea nanku’. Na’anak darantang unjang kole’a, kole’a kuanuna lapoang jalu yang pasasauiin nyawana,” ingka kenang manjaruma i Yesus lo’da’. 30Jaji maminna jarum dinen barik bayu’ tau manaantalingaan dinen parasaya’ barik lo’a.
Tau yang manyuliin lo’a Alatala, dinen poang yang anaka Alatala
31Jaji barik i Yesus manjarum lo’da’ yang parasaya’en lo’a de’i, “Ati’enkin malola’ pangajaranku’, baru’kin tapat-tapat palola’ku’. 32Jaji ati’en ilola’ani, itamu barik ikin jalu tapaten. Panamunin dinen barik yang malapasangen lo’in,” ingka kenang i Yesus lo’da’.
33Jaji dasauti kole’da’, “Daikam di’en anak kanturunanna baki’ Abrahamkam. Na’ankam kala’ pangkam tau,” ingka kenang ira dinen lo’a i Yesus. “Asi lo’a jarumu daiko dinen awan dinen, to’ dalapasangam iko’en kakaru’?” ingka kenang ira lo’a i Yesus. Mat. 3:9; Lk. 3:8.
34Jaji dasauti bapi kole’a i Yesus, “Jarumku’ di’en saja tapat. Intain tau badosaan, dinen lalo pangkam dosaan,” ingka kenang lo’da’. 35“Poangsi kapi bea lalo mamin dala itiang pangkam dosaan. Pangkamen okan daia sarilao’ nanna tau malaan lo’a sampai salaun-launna. Okan awan anak tapata yang inang salaun-launnaan. Pande bea ipasutang dari karaja pangkam. 36Jaji ati’en mamin Anaka Alatala malapasangen lo’in dari karajanin awan pangkam dosaan, baru’kin alapas tapat,” ingka kenang i Yesus lo’da’. 37“Kutamu bua tutulannin kole’a daikin lalo kanturunanna baki’ Abraham. Poangsi kapi poang kanturunanna baki’ Abraham, to’ mauno’kin bua lo’ku’, kole’a alibakkin lo’a jarumku’,” ingka kenang. 38“Daiak jalu kukitaan nanna Ama’ku’, dinen lalo yang kujarumangen lo’in. Poangsi daikin laan. Yang ilola’aniin ikin, ialalo jaruma amanin,” ingka kenang i Yesus manjaruma lo’da’.
39Jaji barik manyauti ira lo’a i Yesus, “Daikam amanam baki’ Abraham,” ingka kenang.
Jaji barik dasauti kole’a i Yesus, “O’, daikin lalo kanturunanna baki’ Abraham poangsi ati’en atenin tapat-tapat manyuli lo’a baki’ Abraham, pastikin malola’ani basana. 40Jao’ alit daikin manikom to’ mauno’ lo’ku’ yang tau manjarumangen jalu tapaten kudalingaan dari nanna Alatala. Baki’ Abraham na’an kenang basana!” ingka kenang i Yesus lo’da’. 41“Basanin dinen malola’ani basana amanin, dinen lalo manu jalu balu’aan dinen,” ingka kenang i Yesus lo’da’.
Jaji barik manyauti ira lo’a i Yesus, “Daikam amanam jangka’a dinen Alatala,” ingka. “Kosan amanam bayu’,” ingka kenang.
42Jaji barik manjarum i Yesus lo’da’, “Ti’en amanin Alatala, tentukin mainya’ mangasaang lo’ku’,” ingka kenang i Yesus lo’da’. “Kole’a daiak pamondokku’ di’en, tarangkatak dari nanna Ama’ku’ mondok lo’a di’en. Okanak di’en mondok mamakai kuasa diri’ku’. Ia yang manyuro’en lo’ku’,” ingka kenang lo’da’. 43“Mai na’anna itamu ikin ratina jarumku’? Kole’a alibakin lalo mandalinga lo’a dongo yang kujarumangen. Ialalo na’anna itamu ikin ratina. 44Daikin manyuli lo’a amanin i Pangabo dinen. Panamuna amanin lalo yang ilola’aniin ikin. Dari akata memen, daia dinen tau pauno’en. Na’an kala’ daia mangamuroang lo’a jalu tapaten kole’a kosanna jalu tapaten nanna. Daia panganung-nganunga, saja kenang lalo. Ialalo pulikanna tau panganung-nganungen, ialalo amana gulungan jalu pako-akoon. Gulungan jalu pako-akoon tulak kausa nanna i Pangabo dinen,” ingka kenang lo’da’. 45“Daiak jalu kujarumangen dinen, dinen lalo yang jalu tapaten. Ialalo alibakin parasaya’ lo’ku’. 46Intainkin pandeen mawa saksi lo’a dosaku’? Ati’ kosan, ati’en tapat lapoang jarumku’, maikin na’annin parasaya’ lo’ku’?” ingka kenang lo’da’. 47“Intain poang anaka Alatala, dinen yang mainya’en manaantalinga lo’a jaruma Alatala. Poangsi daikin dinen okan anaka Alatala, ialalo alibakin manaantalinga,” ingka kenang i Yesus lo’da’.
Nampina baki’ Abraham, i Yesus andianna memen
48Jaji barik manjarum gulungan tau Yahudiin lo’a i Yesus, “Na, jarumam dinen, na’an te’ tapat iasannu ikam tau Samariaan yang dasarung jalu ajau’en!” ingka kenang ira lo’a i Yesus.
49I Yesus barik manyauti lo’da’, “Daiak na’anak dasarung jalu ajau’en,” ingka kenang i Yesus lo’da’. “Daiak di’en mawa pudiak lo’a Ama’ku’. Poangsi daikin rabarik pajau’kin lo’ku’. 50Okanak di’en to’ mala ipudi tau. Poangsi andian bua yang bainginen mainto’ ipudiku’ kole’a tauen. Ia bua yang mamutusiin mangamuroangen lo’ku’,” ingka kenang. 51“Jaji di’en yang kujarumangen lo’in saja tapat. Intain mainya’en malola’ani lo’a pangajaranku’, daia barik na’an to’ mate sampai salaun-launna,” ingka kenang i Yesus lo’da’.
52Jaji barik manjarum ira lo’a i Yesus, “Itamu barik ikam, daiko di’en tapat-tapatko dasarung jalu ajau’en,” ingka kenang dinen ira lo’a. “Arabakinam baki’ Abraham mamin mate. Gulungan panjaruma Alatala mamin bea mate. Daikopi rabarik iasan iko kakaru’ tau malola’ani pangajarannu na’an to’ mate sampai salaun-launna,” ingka kenang ira. 53“Arabakinam baki’ Abraham ijoloon mamin mate. Ai daiko dinen to’ paraa kalenu lo’a baki’ Abraham? Gulungan panjaruma Alatala mamin bea mate. Sampai bagapu dinen!” ingka kenang ira lo’a i Yesus.
54Jaji barik i Yesus manyauti lo’da’, “Ati’enak pudi kaleku’ kosan ratina,” ingka kenang i Yesus lo’da’. “Yang mamudiin lo’ku’, dinen lalo Ama’ku’ yang iasanen ikin Alatalanin. 55Daia dinen na’an ikilala ikin, na’ankin sitamu nanna,” ingka kenang i Yesus lo’da’. “Poangsi daiak mangilalaak. To’ asan kaleku’ na’an mangilala, jaji pako-akoak. Sabangon pako-akoku’ nannin,” ingka kenang i Yesus lo’da’. “Poangsi kukilala bua lo’a, gulungan jaruma kulola’ani kausana. 56Arabakinin baki’ Abraham dinen baingin. Sasau nyawana mamikira to’ mamele lo’a pamondokku’. Jaji dakita lalo, sasau nyawana mamelena,” ingka kenang i Yesus lo’da’.
57Jaji barik manjarum ira lo’a i Yesus, “Umuru nampi kule’ lima pulo’ taun. Ai maminko maita lo’a baki’ Abraham?” ingka kenang ira lo’a i Yesus.
58Jaji barik manjarum i Yesus, “Di’en yang kujarumangen lo’in saja tapat. Nampina baki’ Abraham, andianak memen. Iak Lalo di’ Iak,” ingka kenang manjaruma i Yesus lo’da’. 59Jaji barik ira manaantalingaan dinen de’i, ira pakokoloan manjaput batu to’ mamarati lo’a i Yesus. Jaji i Yesus barik sadinga poang inyapa marantang saona Alatala dinen.
Селектирано:
Yohanes 8: EBE
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Copyright New Tribes Mission 1997