Lukas 15
15
Domba alingoon dala sama’ jarum
Mat. 18:12-14
1Jaji barik dinen ambata tau panarima’ sukaien nanna tau yang na’anen bayok malola’ sara agamaan, samuana babangkulung lo’a i Yesus, to’ manaantalinga lo’a. 2Poangsi ajau’ nyawana ambata tau Parisiin nanna toa adaten. “Tau di’en mainya’ tapat lo’a ambata tau badosaan,” ingka. “Daia sarilao’ angkaanen nanda’ kakaru’,” ingka kenang jarumda’ amumuten. Lk. 5:29-30.
3Jaji barik i Yesus manyauti lo’da’ tau Parisiin mamakai sama’ jaruma, 4“Jaji ai lo’a daikin pandua’angin. Yang tau mangatio’ dombaan, andian saratus ambata, sera poang inyapen, na’an te’ dasari yang inyapen dinen? Tentula dasari dombana yang seraan dinen sampai dadua’ang barik. Penting bea lo’a. Yang sumilan pulo’ sumilanen, tentu darantang inang di lapanganen,” ingka kenang lo’da’. 5“Mamin barik dadua’ang yang inyapen dinen, sasau jaji nyawana. Sampai dasan barik dinen dombana, daawa mole’. 6Mamin barik mole’ dinen, dakalong ambata kawanna, nanna ambata tau lalako’en sibiringanen dinen. Se’ tambakin sasau nyawanin nanku’, kole’a dombaku’ yang inyapen mamin kudua’ang, ingka kenang lo’a kawanna. 7Jaji manjarumak lo’in, awan dinen bua di Surga. Sera poang tau maunjangen pikiranna yang sala’en, labi rami gulungan malaikaten mangasuang nyawaan. Labi dakasuang nyawa dinen seraan dari pada sumilan pulo’ sumilanen yang kosanen paruluna kalo’a to’ tapalin pikiranna,” ingka kenang i Yesus lo’da’.
Duit sapapak yang inyapen dala sama’ jarum
8Jaji barik i Yesus mamakai sama’ jarum lo’da’, “Umpamana andian babainye sera ampuna dinen sapulo’ papaka duit pirak. Jaji sera inyapen,” ingka kenang lo’da’. “Tentu dasari barik kole’a babainye dinen de’i, dakatio’ang palita. Urait kalaut manyarina, dapopoi mainto’ dadua’ang dinen duit seraan. Nampi dadua’ang, nampi tadang. 9Mamin dadua’ang duit seseran dinen, tentu daawa ambata gulungan kawanna, ambata tau lalako’en sibiringanen nanna. Tambakin sasau nyawanin nanku’, kole’a kudua’anga mamin duitku’, ingka kenang manjaruma babainye dinen lo’a kawanna. 10Jaji awan dinen lalo sasauna nyawana ambata malaikaten di arona Alatala ti’ andian sera tau badosaan yang maunjangen pikiranna yang sala’en,” ingka kenang i Yesus majara lo’da’.
Anak yang inyapen dala sama’ jarum
11Jaji barik manjarum i Yesus, “Andian tau dinen aranaka, dua babakaan. 12Jaji anaka babaka dinen, yang imundiin dinen mamita tawa’a lo’a amana. Ama’e, ingka, tawa’iak memen dinen hartanu yang to’ arantangen ona’ lo’ku’ di matenu, ingka kenang. Jaji datawa’i barik kole’a amana dinen jaluun yang patuten datawa’ lo’a ira dua pariin dinen.
13“Mamin datawa’i kole’a amana, na’an balaun, anakapi yang imundiin dinen bakamas. Akaus daawa ambata jaluna, tarangkat dinen inyap lo’a banua bajao’en. Inang rabarik tumbas rami-rami lapoang angkaan mainyum lapoang, tio’ kakanjianen. Sampai akaus daparugi ambata kamaamanna dinen. 14Mamin barik akaus ambata kamaamanna dinen, mondok barik musim karaparanen di banua dinen. Jaji masikin barik babaka dinen, marinsa’. 15Kapanjanganna marinsa’a barik, daia dinen bakuli lo’a tau warga negara inangen, maumpan bawi barik. 16Sampai mase’a batanga. Baingin jaji nyawana lo’a umpan bawiin, to’ dakaan. Poangsi kosan tau manawa’i jalu kaan lo’a.
17“Jaji balaun barik inang, mole’ maam pikiranna barik. Asi lo’a mateku’ indiangen manggatu’! Ambata suro’anna ama’ku’pi inang, bosor bea angkaanna. Labi-labian angkaanna, ingka kenang nyawana. 18To’ mole’ak di’en lo’a ama’ku’. Daiak di’en rabarik, uka’ kenang ona’ lo’a ama’ku’, badosa’ak lo’a Alatala, badosa’ak bea lo’u, uka’ kenang. 19Suma poang barik, kujarumang ona’ lo’a ama’ku’, uka’ kenang, Na’anak lagi’ patut iaku’ anak iko. Suma iaku’ak poang suro’annu, ingka kenang ilalam nyawana anak dinen. 20Laloang barik tarangkat mole’ balik bua lo’a amana. Hak. 10:10-16.
“Jaji mole’ barik anak dinen de’i, lagi’pi bajao’pi lo’a saona amana, dakita bua mondoka kole’a amana. Ka’ mase’-mase’a mamelena lo’a. Laloang arari barik yang amanaan lo’a anaka dinen, dadakap, dasum.
21“Jaji barik mulai manjarum anaka, Daiak di’en badosa’ak lo’a Alatala, badosa’ak bea lo’u. Na’anak lagi’ patut iaku’ anak iko, ingka kenang.
22“Poangsi barik amana manjarum bapi lo’a suro’anna. Ala ikin sape yang palin maamen, pamakaiang lo’a. Meang ikin sunsumen di tanganna, meang ikin sapatuun di kakina, ingka kenang. 23Se’ ala bea ikin anak sapi yang babago’en, uno’ ikin isambeli. Se’ rami-ramiki’ 24kole’a de’i anakku’ di’en kuanggap awan lalo tau mateen yang baru’ tio’ balik, awan lalo tau alingoon baru’ kudua’ang, ingka kenang manjaruma amana lo’a ambata gulungan suro’anna. Jaji mulai barik dinen rami-rami.
25“Jaji barik maminna dinen de’i, andian anak atoaan bakarajapi di umaan. Jaji mole’ barik dinen, dadalinga unyi ambata jalu itaba’en, ambata gulungan unyi tau mandaria’en. 26Jaji dakalong barik ambata suro’anen, dakatoanang, Ai ratina dinen taba’ musiken, unyi tau yang rami-ramiin? ingka. 27Jaji barik dasauti kole’a suro’anna dinen, O tauen dinen rami-rami kole’a mole’a arinu. Jaji dasembali barik anak sapi babago’en kole’a amanu, kole’a maminna mole’ lo’a. Kosan bahaya, kosan mai, ingka kenang manyautina suro’anen.
28“Jaji barik daia dinen anaka atoaan, ajau’ nyawana. Alibak intama. Jaji barik dinen minsaluan amana kole’a alibaka intama yang anakaan dinen, dapamiya’. 29Jaji manjarum anaka dinen, Daiak bataun-taunak bakarajaan indi’angen. To’ mate-mateak bakarajaan malola’ani panamunu. Na’anak kala’ malawan. Kosanak daiak irami-ramiang balu’aan dinen. Anak kambing sesera na’anak kala’ bapesta nanna ambata gulungan kawanku’. 30Daia yang mangausangen ambata gulungan kamaamannu, akaus daanu poang kenang lo’a ambata babainye pandayangen, mole’ barik irami-ramiang. Isambeli iko anak sapi babago’en kakaru’, ingka kenang manjaruma anaka.
31-32“Jaji dasauti barik kole’a amana, Jaji kenang anake, arinu dinen patut iramiang, patut sasau nyawaka’. Kole’a arinu dinen awan lalo tau mateen baru’ tio’ balik, awan lalo tau alingoon baru’ kudua’ang. Asi lo’a na’anku’ maramiang? ingka kenang. Ada’ ajau’a nyawanu lo’a sairunnu. Daiko andianko lapoang nanku’. Samuana jaluun indi’angen di’en, daiko kausa ampunaan, ingka kenang manjaruma amana lo’a anaka,” ingka kenang sama’ jaruma i Yesus lo’a ambata tau Parisiin dinen.
Селектирано:
Lukas 15: EBE
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Copyright New Tribes Mission 1997