ማቶሳ 2
2
ኣዋይፊ ዶሊያ ባጋፔ ዬዳ ፆሊንቲያ ፓይዲያ ኣሳቱዋ
1ዬሱሲ ዪሁዳ ጋዲያን ቤቴሊሄሜ ጌቴቲያ ካታማን ሄሮዲሴ ካዉቲዴ ዴዒያ ዎዴ ዬሌቴዳ፤ ሄዋፔ ጉዪያን፥ ፆሊንቲያ ፓይዲያ ኣሳይ #2፡1 ፆሊንቲያ ፓይዲያ ኣሳ ጉሳይ፥ ኤሬቴዳ ማራ ቢሌን ኤራንቻ ኣሳቱዋ ጉሳ። ኣዋይፊ ዶሊያ ባጋፔ ዬሩሳላሜ ዪዴ፥ 2«ኣዪሁዳ ካቲያ ጊዳናው ዬሌቴዳ ናዓይ ሃቃን ዴዒ? ኑኒ ኣዋይፊ ዶሊያ ባጋና ኬሴዳ ኣ ፆሊንቲያ ቤዒዴ፥ ኣው ጎዪናናው ዬዶ» ያጊዴ ኦቼዲኖ።
3ካቲያ ሄሮዲሴ፥ ሄዋ ሲሲዴ ዳጋሜዳ፤ ዬሩሳላሜን ዴዒያ ኣሳይ ኡባይካ ዎዛና ባዬዲኖ። 4ሄሮዲሴ ቄሳቱዋ ካፓቱዋ ኡባቱዋኔ ሙሴ ሂጊያ ታማሪሲያዋንታ ፄሲዴ፥ «ኪሪስቶሲ ሃቃን ዬሌታንዴሻ?» ያጊዴ ኦቼዳ።
5-6ኡንቱንቱ ዛሪዴ፥ «ዪሁዳ ጋዲያን ቤቴሊሄሜ ካታማን ዬሌታናዋ። ናቢ፥
‹ዪሁዳ ጋዲያን ዴዒያ ቤቴሊሄሜ፥
ኔኒ ዪሁዳ ጋዲያን ዴዒያ ዎሊቃማ ካታማቱዋፔ ላፋካ።
ኢስራዔሊያ ሞዲያዌ ኔፔ ኬሳናዋ›
ጊዴ ፃፌዳ» ያጌዲኖ። #ሚክ 5፡2
7ሄዋፔ ካላ፥ ሄሮዲሴ ኣዋይፊ ዶሊያ ባጋፔ ዬዳ ኣሳቱዋ ጌማን ፄሲዴ፥ ፆሊንቲ ኡንቱንቶ ቤቴዳ ዎዲያ ኡንቱንቱፔ ጌሺዴ ኤሬዳ። 8ያቲዴ ቤቴሊሄሜ ኡንቱንታ ዬዲዴ፥ «ቢዴ ናዓ ሎይ ኮዪቴ፤ ኣ ዴሜዳ ዎዴ ታኒካ ባዴ ኣው ጎዪናናዳን፥ ታናካ ኤሪሲቴ» ያጌዳ።
9ኡንቱንቱ ካቲ ጌዳዋ ሲሲ ቢዴ ኦጊያን ኣዋይፊ ዶሊያ ባጋና ኡንቱንቱ ካሴ ቤዔዳ ፆሊንቲያ ቤዔዲኖ፤ ናዓይ ዴዒያሳ ጋኪዴ ኤቃና ጋካናው፥ ፆሊንቲ ኡንቱንታ ካሌዳ። 10ኡንቱንቱ ሄ ፆሊንቲያ ቤዔዳ ዎዴ፥ ዛዋይ ባይና ዳሮ ናሼቻ ናሼቴዲኖ። 11ጎሌ ጌሊዴ፥ ናዓይ ባሬ ዳዪ ማይራሚና ዴዒያዋ ቤዔዲኖ፤ ጉልባቲዴ ኣው ጎዪኔዲኖ፤ ሄዋፔ ካላ፥ ባሬንቱ ሳፂኒያ ዶዪዴ፥ ዎርቃ፥ ኢፃናኔ ካዋራ #2፡11 ኢፃናኔ ካዋራ፡ ኢፃናይ፥ ማዲያ ሊያ ጊዲዴ፥ ታማን ዬጊያ ዎዴ ሳዋናሳ፤ ካዋራይካ ሳዎ ማዲያ ሊያ ጊዲዴ ሺቱዋዳን ማዴ። ኣው ኢሞታ ሺሼዲኖ።
12ኡንቱንቱ ሄሮዲሳኮ ሲሜና ማላ፥ ፆሳይ ኣኩሙዋን ኡንቱንታ፥ «ሂንቴና ኤሪቴ» ጊና ሃራ ኦጊያና ባሬንቱ ጋዴ ሲሜዲኖ።
ጊብፄ ቤቱሳ
13ኡንቱንቱ ቤዳዋፔ ጉዪያን፥ ጎዳ ኪታንቻይ ኣኩሙዋን ዮሴፎ ቤቲዴ፥ «ሄሮዲሴ ናዓ ዎናው ኮዪያ ዲራው፥ ዴንዳዴ ናዓኔ ኣ ዳዮ ኣካዴ ጊብፄ ጋዲያ ቤታ፤ ታኒ ኔው ኦዳና ጋካናው፥ ያኒ ዴዓሻ» ያጌዳ።
14-15ዮሴፎ ቃማ ዴንዲዴ፥ ናዓኔ ኣ ዳዮ ኣኪዴ፥ ጊብፄ ጋዲያ ቤዳ፤ ጎዳይ ናቢያ ባጋና፥ «ታኒ ታ ናዓ ጊብፄ ጋዲያፔ ፄሳዲ» ያጌዳዌ ፖሌታና ማላ፥ ሄሮዲሴ ሃይቃና ጋካናው ኢ ያኒ ዴዔዳ። #ሆስ 11፡1
ሄሮዲሴ ቄሪ ናና ዎሴዳ
16ሄዋፔ ጉዪያን፥ ሄሮዲሴ ኣዋይፊ ዶሊያ ባጋፔ ዬዳዋንቱ ባሬና ጪሜዳዋ ኤሬዳ ዎዴ፥ ዳሮ ሃንቄቲዴ፥ ፆሊንቲ ካሴ ቤቴዳ ዎዲያ ኡንቱንቱፔ ሲሴዳዋዳን፥ ዎታዳራቱዋ ዬዲዴ፥ ቤቴሊሄሜኒኔ ዩሹዋን ዴዒያ ላዑ ላይ ኣቱማ ናናኔ ላዑ ላይፔ ጋርሳና ዴዒያ ኣቱማ ናና ኡባ ዎሴዳ።
17-18ናቢያ ኤርሚያሲ፥
«ዬኩኔ ዚላሳይ ራማ ጌቴቲያ ካታማን ሲሴቴዳ፤
ራሄላ ባሬ ናናው ዬካው።
ኡንቱንቱ ሃይቂዲጎ ዲራው፥
ኣጋ ጊና፥ ኣጌናን ኢፃዱ»
ጊዴ ኦዴዳዌ ፖሌቴዳ። #ኤርም 31፡15
ጊብፄፔ ሲማ
19ሄሮዲሴ ሃይቄዳዋፔ ጉዪያን፥ ጎዳ ኪታንቻይ ጊብፄን ዮሴፎ ኣኩሙዋን ቤቲዴ 20ኣ፥ «ዴንዳ፤ ናዓኔ ኣ ዳዮ ኣካዴ፥ ኢስራዔሊያ ጋዲያ ሲማ። ናዓ ዎናው ኮዪያዋንቱ ሃይቂዲጌዲኖ» ያጌዳ። 21ዮሴፎ ዴንዲዴ፥ ናዓኔ ኣ ዳዮ ኣኪዴ፥ ኢስራዔሊያ ሲሜዳ።
22ሺን ዮሴፎ ኣርኬላዎሲ ባሬ ኣዉዋ ሄሮዲሳ ኦይዲያን ዪሁዳ ጋዲያን ካዉቴዳዋ ሲሴዳ ዎዴ፥ ያ ባናው ያዬዳ፤ ፆሳይ ኣው ኣኩሙዋን ሂንቴና ኤሪቴ ጊና፥ ጋሊላ ጋዲያ ቤዳ። 23ናባቱ፥ «ኣሳይ ኣ፥ ‹ናዚሬቲያ ኣሳ› #2፡23 ሃዋ ጌዳዌ ኦኔንቶ ኤሬቴና። ጊዴ ፄሳና» ያጌዳዌ ፖሌታና ማላ፥ ናዚሬቴ ጌቴቲያ ካታማ ቢዴ ዴዔዳ። #ማር 1፡24፤ ሉቅ 2፡39፤ ዮህ 1፡45
Селектирано:
ማቶሳ 2: dwrENT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2011, Wycliffe Bible Translators, Inc. All rights reserved.
Дознај повеќе за Ooratha Caaquwaa