Ket timmacderda amin ket impanda iti sangoanan ni Pilato.
Ket rinugianda nga impulong a cuncunada: Daytoy nasaracanmi a daddadaelenna ti ilimi ket iparitna ti mangted ti buis ken Cesar ket cuncunana nga isu ni Cristo, nga Ari.
Ket ni Pilato inintuudna kencuana a cunana: Sica ti Ari dagiti Judio? Ket isu simmungbat ket kinunana: Casta ti cunam.
Ket ni Pilato kinunana cadagiti turayen dagiti papadi ken cadagiti tattao: Awan ti bassol a masaracac itoy a tao.
Ngem ipapilitda laeng a cuncunada: Riribukenna dagiti umili, a mangisursuro iti isu-amin a Judea, ket mangrugi idiay Galilea agingga ditoy.
Ket ni Pilato, idi a mangngegna daytoy, inintuudna no di tao taga Galilea.
Ket apaman a naammoanna a casacupan ni Herodes, isu imbaonna ken Herodes nga adda met sadi Jerusalem cadagidi nga aldaw.
Ket ni Herodes, idi makitana ni Jesus, nagragsac iti napalalo, ti nabayagen a tartarigagayanna nga makita; ta isu adu ti nangnangngegna kencuana, ket ninamnamana ti macakita ti maysa a datdatlag nga aramidenna,
Ket nagintuudanna iti adu; ngem isu saanna a sinungbatan.
Ket addada dagiti turayen dagiti papadi ken dagiti escriba nga ipulpulongda a napalalo.
Ket ni Herodes agraman dagiti guardiana linaisda ket nagang-angawanda nga pinel-lesanda ti maysa a napateg a pagananay; ket pinaisublina ken Pilato.
Ket naggayyemda da Pilato ken Herodes iti daydi met la nga aldaw, ta idi damo aggurangurada.
Ket ni Pilato inurnongna dagiti turayen dagiti papadi, dagiti agtuturay ken dagiti umili.
Ket kinunana cadacuada: Insaclangyo caniac daytoy a tao a cas la mangdaddadael cadagiti umili; ket adtoy siac sinukimatco iti sangoananyo ket awan ti basol a nasaracac kencuana cadagiti pangipulonganyo.
Ket uray pay ni Herodes ta imbaoncayo kencuana: ket adtoy, nga awan ti inaramidna a maicari iti pannacapapatay.
Isu wayawayaacto ngarud calpasan pannacasaplitna.
(Ta adda rebbengna cadacuada a mangibbet ti maysa a balud iti tunggal rambac)
Ngem nagickisda amin a nagmaymaysa, a kinunada: Pucawem daytoy, ket ibbatam cadacami ni Barrabas:—
Isu a naibel-leng iti pagbaludan gapu iti maysa nga yaalsa a naaramid iti ciudad, ken gapu iti maysa a panangpapatay.
Ket ni Pilato kinasaona manen ida a tartarigagayanna nga ibbatan ni Jesus;
Ngem nagickisda a cuncunada: Pailansam, pailansam iti cruz.
Ket kinunana cadacuada iti maicatlo a daras: Apayapay, ania aya ti dakes nga inaramid daytoy a tao? Awan ti nasaracac kencuana a pacaigapuan ti ipapatay: dusaecto laeng, ket ibbatacton.
Ngem ipapilitda iti dacdackel a timec a dawdawatenda a mailansa coma iti cruz. Ket dagiti ickisda pumigpigsa.
Ket ni Pilato inkeddengna a maaramid ti dawatda.
Ket inibbatanna cadacuada daydi naipisoc iti pagbaludan gapu iti yaalsa ken panangpapatay isu a dinawatda ngem inyawatna ni Jesus iti pagayatanda.

Ket idi impanda ti tiniliwda ti maysa a managan Simon, a taga Cirene a naggapu iti away ket impabaclayda kencuana ti cruz, tapno isurotna ken Jesus.
Ket simmursurot ti dackel a caadu ti umili, ken babbai, isuda a mangsangsangit ken mangdungdung-aw kencuana.
Ngem ni Jesus, idi a timmaliaw cadacuada, kinunana: Babbai nga annac ti Jerusalem, saandac a sangitan, ngem sangitanyo ketdi ti bagiyo met laeng, ken dagiti annacyo.
Ta adtoy nga umayda dagiti aldaw a cuncunadanto: Nagasat dagiti lupes, ken dagiti tian, a di naganac, ken dagiti barucong a di nagpasuso.
Iti dayta rugiandanto ti agsao cadagiti banbantay: Agtinnagcayo cadacami: ket cadagiti turod: Gaburandacami.
Tao no iti cayo a nalangto aramidenda dagitoy a banag, Ania ti aramidendanto iti nagango?

Ket impacuyogda met kencuana ti dua a tulisan, tapno mapapatayda.
Ket idi macagtengda iti disso a managan ti Bangabanga, isu inlansada idiay iti cruz ken dagiti tulisan; maysa iti macanawan, ket ti sabali iti macatigid.
Ket ni Jesus kinunana: Ama, pacawanem ida, ta dida ammo ti aramidenda. Ket nagbibingayanda a naggiginnasatanda dagiti pagananayna.
Ket dagiti umili sitatacderda nga agbuybuya; ket dagiti agtuturay a naicuyog cadacuada inuyunganda, a cuncunada: Dagiti sabsabali isalacanna: isalacanna ngad coma met ti bagina, no isu ti Cristo a pinili ti Dios.
Ket casta met dagiti soldado, rinabrabngisda met nga umasidegda ket igaygayatda kencuana ti suca.
Ket cuncunada: no sica ti Ari dagiti Judio, isalacanmo ta bagim met laeng.
Ket adda met iti oloanna ti maysa a galad a naisurat: DAYTOY ISU TI ARI DAGITI JUDIO.
Ket maysa cadagidi tulisan nga adda a nailansa iti cruz rabrabngisenna, a cuncunana: No sica ni Cristo isalacanmo ta bagim met laeng ken dacami.
Ngem simmungbat di maysa ket binabalawna a kinunana: Uray sica dica pay cabuteng ti Dios idinto nga addaca ngaruden iti pannacadusa?
Ket data, kinapudnoanna, a rebbengta nga awaten ti maitutop cadagiti araramidta; ngem daytoy awan ti dakes nga inaramidna.
Ket kinunana: Jesus, laglagipennac inton umayca iti pagariam.
Ket kinunana kencuana. Pudno cunac kenca. Ita nga aldaw makipagiancanto caniac idiay Paraiso.
Ket idin cas la horas a maicanem, nagsipnget iti rabaw ti amin a daga agingga iti horas a maicasiam.
Ket ti init nagsipnget. Ket ti abbong ti Templo napigis iti tengngana.
Ket ni Jesus immawag iti dackel a timec, ket kinunana: Ama, cadagita imam ti pangitalcac itoy cararuac. Ket idi a nasaonan nauyusanen.
Ket idi nakita ti centurion ti naaramid, indaydayawna ti Dios, a kinunana; Kinapudnona a daytoy a tao nalinteg.
Ket amin dagiti adu a tao a naguurnong iti daytoy a buyaen, idi nakitada daydi a naaramid, nagawidda a dandanugenda dagiti barucongda.
Ket amin dagidi amammona ken dagiti babbai a simmursurot kencuana nanipud Galilea, nagtactacderda iti adayu nga agbuybuya cadagitoy a naaramid.

Ket adtoy ti maysa a tao a managan Jose, consejero, lalaki a naimbag ken nalinteg,
(Isu dina inanamungan ti nagnunumoan ken aramidda), taga Arimatea, ili dagiti Judio, isu nga agpadpadaan met idi ti pagarian ti Dios:
Daytoy napan ken Pilato ket dinawatna ti bagi ni Jesus.
Ket idi imbabana binungonna iti maysa nga ules ket incabilna iti maysa a tanem a bato a kinungcungan isu nga awan pay ti naitanem.
Ket aldaw idi ti Panagsagana ket nganngani aglawag iti aldaw a pannaginana.
Ket dagiti babbai a naicuyog kencuana a naggapu sadi Galilea, simmurotda met, ket nakitada ti tanem ken no casano ti pannacaicabil ti bagina.
Ket nagawidda ket nagsaganada ti bangbanglo ken sapsapo; ket naginanada iti aldaw a panaginana cas ti bilin.

കേൾക്കുക LUCAS 23