Surgujia -WBT (NT) Drama

Surgujia -WBT (NT) Non Drama

“सवाचेती रहा! तुमन मईनसे मन कर आगू में ओमन ला देखाए बर, भलाई कर काम झईन करा, नहीं तो तुमन अपन सरग कर दाऊ ले कांहीच इनाम नई पईहा।”
“एकरले जब तुमन कोनो दीन दुखी मईनसे ला दान देथा, त ओकर ढिंढोरा झईन पिटवावा, जेकस कि ढोंगी मईनसे मन धरम सभा कर घर अऊ गली मन में करथें, तेमेकि मईनसे मन ओमन कर बड़ाई करें। मंए तुमन ला फूरोंच कहथों कि ओमन एकर पूरा इनाम आगूच ले पाए गईन हवें। बकिन जब तुमन दीन दुखी मईनसे मन ला दान देथा, त तुमन कर डेरी हाथ हर झईन जाएन पाए कि तुमन कर जवनी हाथ हर का करत हवे। तेमेकि तुमन कर दान देवाई हर लुकाल रहे। तब तुमन कर सरग कर दाऊ, जेला तंए लुकाए के करथस ओहू ला देखथे, ओहर तुमन ला इनाम देही।”


“जब तुमन पराथना करथा, त ढोंगी मईनसे मन कस झईन करा, काबरकि मईनसे मन ला देखाए बर, धरम सभा कर घर अऊ गली कर चौंक मन में ठड़होए के पराथना कराई, ओमन ला बढ़ियां लागथे। मंए तुमन ला फूरोंच कहथों कि ओमन अपन पूरा इनाम पाए गईन हवें। बकिन जब तुमन पराथना करथा, त अपन बईंगरा में जा अऊ केंवारी ला ढांएक के अऊ बिगर कोनो ला देखाए, अपन दाऊ जेहर सरग में रथे ओकर जग पराथना करा, जेहर नई दिखे। तब तुमन कर दाऊ जेहर लुकाए के करल कामोच ला देखथे, तुमन ला इनाम देही।”
“अऊ जब तुमन पराथना करथा, त गैर यहूदी मन कस बेमतलब कर बात मन ला बार-बार झईन दोहरावा, काबरकि ओमन सोंचथें कि ओमन कर ढेर गोठियाए कर चलते, परमेस्वर हर ओमन कर सुनही। एकर बर तुमन ओमन कस झईन बना, काबरकि तुमन कर मांगे कर आगू तुमन कर दाऊ, जेहर सरग में रथे ओहर जानथे कि तुमन ला का चीज कर जरूरत हवे।”
“तुमन ए नियर पराथना करा,
‘ए हमर दाऊ, तंए जेहर सरग में हवस,
तोर नांव हर पबितर मानल जाए,
तोर राएज आवे,
जेकस तोर ईछा सरग में पूरा होथे,
ओईसनेच धरतीयोच में पूरा होए।
हमके ला आएज भेर कर खाना दे,
हमर पाप ला छमा कएर दे,
जेकस हमरे ओमन ला छमा करे हन,
जेमन हमर बिरोध में कसेर करीन हवें।
हमके ला पाप में गिरे झईन दे,
बकिन बुराई ले बचा,
(काबरकि राएज अऊ पराकरम अऊ महिमा हमेसा तोर हवे। आमीन।)’”
“अगर तुमन मईनसे मन ला छमा करीहा, जेमन तुमन कर बिरोध में कसेर करीन हवें, त तुमन कर सरग में रहोईया दाऊओच हर तुमन कर पाप ला छमा करही। बकिन कहों तुमन मईनसे मन ला छमा नई करीहा, त तुमन कर सरग कर रहोइया दाऊ हर तुमन कर पाप ला छमा नई करही।”

“जब तुमन उपास करथा, त तुमन अपन चेहरा ला उदास झईन देखावा, जेकस कि ढोंगी मन करथें, काबरकि ओमन अपन चेहरा ला लोरमाए रथें, तेमेकि मईनसे मन देखें कि ओमन उपास में हवें। मंए तुमन ला फूरोंच कहथों कि ओमन अपन सबेच इनाम ला पाए चुकीन। बकिन जब तुमन उपास करथा, त अपन मुड़ में तेल चुपरा अऊ मूंह ला धोआ। अईसना करे ले मईनसे मन नई जानहीं कि तुमन उपास करत हवा, बकिन सिरीप तुमन कर दाऊ हर जाने, जेहर नई दिखे। अऊ तुमन कर दाऊ जेहर लुकाए के करल सब काम ला देखथे, तुमन के ओकर इनाम देही।”


“अपन बरीक ए धरती में धन झईन जुटावा, जिहां कीरा अऊ मूरचा एला नास करथे अऊ चोर मन सेंध फोएर के चोराए लेथें। बकिन अपन बर सरग में धन जुटावा, जिहां कीरा अऊ मुरचा एला नास करे बर नई सके, अऊ चोर मन सेंध फोएर के चोराए बर नई सकें। काबरकि जिहां तुमन कर धन हवे, उहां तुमन कर मनोच हर लगे रही।”


“देंह कर दिया आंएख हर हवे, अगर तुमन कर आंएख हर बढ़िहां हवे, त तुमन कर सबेच देंह हर इंजोर ले भएर जाही। बकिन अगर तुमन कर आंएख हर बुरा हवे, त तुमन कर सबेच देंह हर अंधार ले भएर जाही। एकरे चाड़हे ओ इंजोर जेहर तुमन में हवे, अगर अंधार होए जाथे, त ओहर केतना बड़खा अंधार होही।”
“कोनोच मईनसे हर दुई झन मालीक कर सेवा नई कएर सके, चाहे तो ओहर एक झन ले नफरत करही अऊ दूसर झन ले मया, चाहे फेर ओहर एक झन ले मिले रही अऊ दूसर झन ला तुछ जानही। तुमन परमेस्वर अऊ धन दुनों कर सेवा नई कएर सका।”


तेकर ले मंए तुमन ला कहथों कि अपन जिनगी कर चिंता झईन करा कि का खाबो, चाहे का पीबो अऊ अपन देंह कर बारे में चिंता झईन करा कि का पहिरबो। का जिनगी हर खाना ले ढेरेच बईड़ के नईए अऊ देंह हर ओढ़ना ले बएढ़ के नईए? अगास कर चराई मन ला देखा! ओमन नई बुनें अऊ नई लूएं अऊ कोठी में नई राखें, तबो ले तुमन कर सरग कर रहोईया दाऊ हर ओमन ला खवाथे। का तुमन कर कीमत हर ओकर बरीक तो ओ चराई मन ले बगरा नईए? तुमन में ले कोन हर चिंता कएर के अपन जिनगी में एकोच घरी बड़हाए सकथे? तुमन ओढ़ना बर काबर चिंता करथा? खेत कर जंगली फूल मन ला देखा कि ओमन कईसे बाढ़थें, ओमन तो मेहनत नई करें अऊ ओढ़ना नई बिनें। तबो ले मंए तुमन ला फूरोंच में कहथों, राजा सुलेमानोच हर अपन सबेच धन संपती रहीयो के, ए फूल मन ले ककरो कस सुघर सफरे बर नई सकीस। एकरे ले जब परमेस्वर हर खेत कर घांस मन ला, जेहर आएज हवे अऊ काएल आगी में लेस देहल जाही, एतना बढ़िहां ओढ़ना पहिराथे, त ए थोरहें बिसवास करोईया मन, परमेस्वर हर तंहूच मन ला एकरो ले बढ़िहां पहिराही!
एकरे ले तुमन ए कहिके चिंता झईन करा कि का खाबो, चाहे का पीबो, चाहे का पहिरबो? काबरकि गैर यहूदी मन ए सब जाएत कर खोज में रथें। तुमन कर सरग कर दाऊ हर जानथे कि तुमन ला ए सब जाएत कर जरूरत हवे। एकरले तुमन सबले आगू परमेस्वर कर राएज अऊ ओहर का चाहथे, ओकर खोज करा, तब ए सबेच जाएत हर तुमन के देहल जाही। एकरे बर काएल कर चिंता झईन करा, काबरकि काएल कर दिन हर अपन चिंता खुद कएर लेही। आएज कर दुख हर आएज बरिक ढेरेच हवे।

കേൾക്കുക मत्ती 6