Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᐱᒋᐊᕐᓂᕐᒥ ᐅᖃᐅᓯᖅ ᑕᕝᕙᓃᓚᐅᕐᐳᖅ, ᐅᖃᐅᓯᕐᓗ ᒎᑎᒦᓚᐅᕐᐳᖅ, ᐅᖃᐅᓯᕐᓗ ᒎᑎᐅᕗᖅ. ᑖᓐᓇ ᐱᒋᐊᕐᓂᕐᒥᑦ ᒎᑎᒦᓚᐅᕐᐳᖅ; ᓱᓇᓕᒫᑦᓯᐊᑦ ᑖᑦᓱᒨᓇ ᐱᓐᖑᕐᑎᑕᐅᓚᐅᕐᓯᒪᕗᑦ; ᑖᑦᓱᒪᓗ ᐊᓯᐊᒍᑦ ᐱᓐᖑᕐᑎᑕᐅᓯᒪᔪᖃᓐᖏᓚᖅ ᐱᓐᖑᕐᑎᑕᐅᓯᒪᔪᓂᒃ. ᐃᓅᓯᖅ ᑖᑦᓱᒪᓃᓚᐅᕐᐳᖅ, ᐃᓅᓯᕐᓗ ᐃᓄᖕᓄᑦ ᑕᒤᓐᓄᑦ ᖃᐅᒻᒪᖅᑯᑕᐅᓚᐅᕐᐳᖅ. ᖃᐅᒪᔪᖅ ᖃᐅᒻᒤᕗᖅ ᑖᕐᑐᒥᒃ, ᑖᕐᑑᓪᓗ ᖃᒥᓚᐅᓐᖏᓛ.
ᒎᑎ ᑎᓕᓯᓚᐅᕐᐳᖅ ᐃᓄᖕᒥᒃ, ᔪᐊᓇᓯᒥᒃ ᐊᑎᓕᖕᒥᒃ, ᑖᓐᓇ ᑎᑭᓚᐅᕐᐳᖅ ᐅᖃᐅᓯᖃᕆᐊᕐᑐᕐᓗᓂ, ᖃᐅᒪᔪᒥᒃ ᓇᓗᓁᕐᓯᔭᕐᑐᕐᓗᓂ, ᐃᓘᓐᓇᑎᒃ ᑖᑦᓱᒨᓇ ᐅᒃᐱᓕᕐᑎᑕᐅᖁᓪᓗᒋᑦ. ᓇᖕᒥᓂᕐᓕ ᔪᐊᓇᓯ ᖃᐅᒪᔫᓐᖏᓚᖅ, ᑎᑭᓚᐅᕐᐳᕐᓕ ᓇᓗᓁᕐᓯᔭᕐᑐᕐᖢᓂ ᖃᐅᒪᔪᒥᒃ. ᓱᓕᔪᒥᒡᓕ ᖃᐅᒪᔫᕗᖅ ᑖᓐᓇ ᓯᓚᕐᔪᐊᕐᒧᑦ ᑎᑭᑦᑐᓕᒫᓂᒃ ᐃᓄᖕᓂᒃ ᖃᐅᒪᒃᓮᔪᖅ.
ᖃᐅᒪᔪᖅ ᓯᓚᕐᔪᐊᕐᒦᓚᐅᕐᐳᖅ, ᓯᓚᕐᔪᐊᕐᓗ ᑖᑦᓱᒨᓇ ᐱᓐᖑᕐᑎᑕᐅᓯᒪᕗᖅ, ᓯᓚᕐᔪᐊᕐᒥᐅᓪᓕ ᖃᐅᔨᒪᓐᖏᓛᑦ. ᓄᓇᒥᓄᑦ ᓇᖕᒥᓂᕐᒥᓄᑦ ᑎᑭᑉᐳᖅ, ᐃᓄᖁᑎᖏᑕᓕ ᓇᖕᒥᓂᖏᑕ ᐃᓚᓕᐅᓐᖏᓛᑦ. ᑖᑦᓱᒥᖓᓕ ᐃᓚᓕᐅᕆᔪᓕᒫᑦ, ᐅᒃᐱᓕᕐᓗᑎᒡᓗ ᑖᑦᓱᒪ ᐊᑎᖓᓄᑦ, ᑖᒃᑯᐊ ᕿᑐᕐᖓᑖᕆᔭᐅᔪᓐᓇᕐᓯᑎᑉᐰᑦ ᒎᑎᒧᑦ; ᑖᒃᑯᐊ ᐃᕐᓂᐊᖑᕗᑦ, ᐊᖑᒻᒥᑦ ᐱᓇᑎᒃ ᑎᒥᐅᓪᓘᓐᓃᑦ ᐱᔪᒪᔭᖓᓂᑦ, ᐃᓅᓪᓗ ᐱᔪᒪᔭᖓᓂᑦ ᐱᖕᒥᓇᑎᒃ, ᒎᑎᒥᓪᓕ ᐃᕐᓂᐊᖑᕗᑦ.
ᐅᖃᐅᓯᖅ ᑎᒥᑖᓚᐅᕐᐳᖅ ᐃᓅᖃᑎᒋᓕᓚᐅᕐᐸᕗᓪᓗ, ᓂᕐᑐᕐᓇᕐᓂᕐᔪᐊᖓ ᑕᑯᓚᐅᕐᐸᕗᑦ, ᓂᕐᑐᕐᓇᕐᓂᕐᔪᐊᖅ ᐊᑖᑕᒥᑦ ᐱᓯᒪᔭᖓ ᐃᕐᓂᑐᐊᖑᓂᕐᒥᓄᑦ; ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᓱᓕᑦᓯᐊᕐᓂᕐᒥᒡᓗ ᑕᑕᑦᑐᖅ.
ᔪᐊᓇᓯᐅᑉ ᓂᐱᖅᑯᕐᑐᓪᓗᓂ ᓇᓗᓁᓚᐅᕐᐹ ᐅᖃᕐᓗᓂ, “ᑖᓐᓇᐅᕗᖅ ᐅᖃᐅᓯᕆᓚᐅᕐᑕᕋ, ‘ᑭᖑᓂᒃᑯᑦ ᕾᓂᐊᕐᐳᖅ ᐅᕙᓐᓂᑦ ᐊᔪᖏᓐᓂᕐᓴᐅᔪᖅ, ᐃᓅᓕᓚᐅᕐᑎᓐᓇᖓ ᐃᓅᓯᒪᔪᖅ.’”
ᑖᑦᓱᒪ ᐱᑦᑎᐊᕐᓂᖓᑕ ᐱᔪᒃᓇᕐᓯᑎᑎᓂᖓ ᐊᖏᔫᓂᑯᖓᓄᑦ ᓮᒻᒪᕐᑎᑕᐅᓯᒪᔪᒥᒃ ᐃᓅᓯᖃᕐᑎᑉᐹᑎᒍᑦ ᐱᑦᑎᐊᕐᕕᐅᓂᕐᒧᑦ ᓮᒻᒪᕐᑎᑕᐅᕙᓪᓕᐊᖏᓐᓇᕐᓗᑕᓗ. ᐱᖁᔭᑦ ᒨᓯᓯᒃᑯᑦ ᑐᓂᔭᐅᓚᐅᕐᐳᑦ; ᐱᑦᓯᐊᕐᕕᐅᓂᕐᓕ ᓱᓕᑦᓯᐊᕐᓂᕐᓗ ᔩᓱᓯ ᙭ᔅᑑᓯᑯᑦ ᐱᕘᒃ. ᒎᑎᒥᒃ ᑕᑯᓯᒪᔪᖃᓐᖏᓚᖅ; ᐃᕐᓂᑐᐊᓪᓕ ᐊᑖᑕᐅᑉ ᓴᕐᓕᐊᕐᑕᖓᑕ, ᑖᑦᓱᒪ ᒎᑎ ᖃᐅᔨᔭᐅᑎᑉᐹ.


ᔫᑎᑦ ᐊᖓᔪᖅᑳᖏᑦ ᔨᕉᓴᓕᒻᒦᑦᑐᑦ ᑐᓂᕐᕈᓯᕐᑎᑦᓯᔨᓂᒃ ᓕᕔᑎᓂᒡᓗ ᔪᐊᓇᓯᒥᒃ ᐊᐱᕆᔭᕐᑐᖁᔨᕗᑦ, ᐃᒫᒃ “ᑭᓇᐅᕖᑦ?”
ᔪᐊᓇᓯᓕ ᓴᒡᓗᓇᓂ, ᐃᒻᒥᓂᒃ ᐅᖃᐅᓯᕆᕗᖅ, ᐅᖃᕐᓗᓂ, “᙭ᔅᑑᓯᐅᓐᖏᓚᖓ.”
ᑖᒃᑯᐊ ᐊᐱᕆᕚᑦ, “ᑭᓇᐅᒐᕕᓪᓖ? ᐃᓔᑦᔭᐅᕖᑦ?”
ᑭᐅᕗᖅ, “ᑍᓐᓇᐅᓐᖏᓚᖓ.”
“ᓇᓚᐅᑦᑍᔫᕖᑦ?”
ᑭᐅᕔᑦ, “ᐋᒃᑲ.”
ᑖᒃᑯᐊ ᐅᖃᕐᐳᑦ, “ᑭᓇᐅᕕᑦ? ᑭᐅᓚᐅᕐᑎᒍᑦ ᐅᕙᑦᑎᓐᓂᒃ ᑎᓕᓯᔪᓄᑦ ᐅᖃᕈᓐᓇᖁᓪᓗᑕ. ᖃᓄᖅ ᐃᓕᖕᓂᒃ ᐅᖃᐅᓯᕆᔪᓐᓇᕐᐱᑦ?”
ᔪᐊᓇᓯᐅᑉ ᑭᐅᕔᑦ,
“ᑍᓐᓇᐅᕗᖓ, ‘ᓂᐱ ᕾᒐᓛᕐᑐᖅ ᑐᓴᕐᓴᐅᔪᖅ ᐃᓄᖃᖏᑦᑐᒥ;
ᐊᑕᓂᐅᑉ ᐊᖅᑯᑎᒃᓴᖓ ᑐᑭᓕᐊᕐᓯᑎᓯᐅᒃ,’
ᓇᓚᐅᑦᑍᔪᑉ ᐂᓮᐊᓯᐅᑉ ᐅᖃᐅᓯᕆᓯᒪᔭᖓ.”
ᑖᒃᑯᐊ ᐹᕆᓯᒃᑯᓐᓂᑦ ᑎᓕᔭᐅᓯᒪᓚᐅᕐᐳᑦ, ᐊᐱᕆᓕᕆᕗᑦ, “ᓱᖕᒪᓪᓕ ᐹᑉᑎᑦᓯᖃᑦᑕᕐᐲᑦ? ᙭ᔅᑑᓯᐅᓇᒃ, ᐃᓔᑦᔭᐅᓇᒡᓗ, ᓇᓚᐅᑦᑍᔫᓇᒡᓗ.”
ᔪᐊᓇᓯᐅᑉ ᑭᐅᕔᑦ, “ᐃᒪᕐᒧᑦ ᐹᑉᑎᑦᓯᕗᖓ; ᐊᑯᓐᓇᑦᓯᓐᓂᓕ ᓇᖏᕐᑐᖃᕐᐳᖅ ᖃᐅᔨᒪᓐᖏᑕᑦᓯᓐᓂᒃ, ᑖᓐᓇ ᑭᖑᓂᒃᑯᑦ ᕾᓂᐊᕐᑐᖅ, ᓇᓗᖅᑯᑎᕗᖓ ᐊᒡᓛᑦ ᐃᑎᒐᒍᑎᖏᓐᓂᒃ ᓯᖐᑦᔮᕐᓯᔭᕆᐊᒃᓴᖅ.”
ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᐱᑕᓂᒥ ᑰᑉ ᔪᐊᕐᑕᓂᐅᑉ ᑕᓕᕐᐱᐊᓂ, ᔪᐊᓇᓯᐅᑉ ᐹᑉᑎᓯᕕᖓᓂ.

ᖃᐅᑎᓪᓗᒍ ᔪᐊᓇᓯᐅᑉ ᔩᓱᓯ ᒥᒃᓯᒧᑦ ᕾᓕᕐᑐᖅ ᑕᑯᒐᒥᐅᒃ, ᐅᖃᕐᐳᖅ, “ᑕᑯᒋᑦ, ᑕᕝᕙ ᒎᑎᐅᑉ ᓄᕐᕋᐅᔭᖁᑎᖓ, ᓄᓇᕐᔪᐊᕐᒥᐅᑦ ᐊᔪᕐᓂᖏᓐᓂᒃ ᐲᔧᔪᖅ! ᑕᕝᕙ ᐅᖃᐅᓯᕆᓚᐅᕐᑕᕋ ᐅᖃᕐᑎᓪᓗᖓ, ‘ᐊᖑᑦ ᑭᖑᓂᒃᑯᑦ ᕾᓂᐊᕐᐳᖅ ᐅᕙᓐᓂᑦ ᐊᔪᖏᓐᓂᕐᓴᐅᔪᖅ, ᐃᓅᓚᐅᕐᑎᓐᓇᖓ ᐃᓅᓯᒪᒐᒥ.’ ᓇᖕᒥᓂᕐᓕ ᖃᐅᔨᒪᓚᐅᓐᖏᓚᕋ; ᑍᒤᒻᒪᑦ ᐃᒪᕐᒧᑦ ᐹᑉᑎᑎᕆᔭᕐᑐᓚᐅᕐᐳᖓ, ᐃᓕᑕᕆᔭᐅᓕᖁᓪᓗᒍ ᐃᓴᕆᐊᓕᒥᐅᓄᑦ.”
ᔪᐊᓇᓯ ᓇᓗᓁᕐᓯᓚᐅᕐᐳᖅ ᐃᒫᒃ, “ᐊᓂᕐᓂᖅ ᕿᓚᖕᒥᑦ ᐊᖅᑲᕐᑐᖅ ᑕᑯᓚᐅᕐᐸᕋ ᑎᖕᒥᐊᑐᑦ ᑑᕕᑐᑦ, ᑖᑦᓱᒪᓃᓕᕐᓗᓂ. ᐅᕙᖓᓕ ᓇᖕᒥᓂᖅ ᖃᐅᔨᒪᓚᐅᓐᖏᓚᕋ; ᑎᓕᔨᒪᓕ ᐃᒪᕐᒧᑦ ᐹᑉᑎᑎᕆᔭᕐᑐᖁᓪᓗᖓ ᐅᖃᐅᑎᓚᐅᕐᐹᖓ, ‘ᐊᖑᒻᒧᑦ ᐊᓂᕐᓂᕐᒥᒃ ᐊᖅᑲᕐᑐᒥᒃ ᑕᑯᒍᕕᑦ ᑕᕝᕙᓃᓕᕐᑐᒥᒃ, ᑖᓐᓇᐅᕗᖅ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐹᑉᑎᑎᕆᔨ.’ ᐅᕙᖓᓗ ᓇᖕᒥᓂᖅ ᑕᑯᓚᐅᕐᐸᕋ, ᐅᖃᐅᑎᕙᑦᓯ ᑖᓐᓇᐅᕗᖅ ᑕᕝᕙ ᒎᑎᐅᑉ ᐃᕐᓂᖓ.”

ᖃᐅᑎᓪᓗᒍ ᔪᐊᓇᓯ ᓇᖏᖃᑎᖃᓚᐅᕐᐳᖅ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ; ᔩᓱᓯ ᐱᓱᒃᑐᖅ ᑕᑯᓈᕋᒥᐅᒃ, ᐅᖃᕐᐳᖅ, “ᑕᑯᒋᑦ, ᑕᕝᕙ ᒎᑎᐅᑉ ᓄᕐᕋᐅᔭᖁᑎᖓ!”
ᐃᓕᓐᓂᐊᕐᑎᖏᒃᑕᓕ ᑍᒫᒃ ᐅᖃᕐᑐᖅ ᑐᓴᕋᒥᒃᑯᒃ, ᔩᓱᓯ ᒪᓕᓕᕐᐹᒃ. ᔩᓱᓯ ᕿᕕᐊᕋᒥ, ᑕᑯᕗᖅ ᒪᓕᒃᑑᖕᓂᒃ, ᐅᖃᐅᑎᕚᒃ, “ᓱᓇᒥᒃ ᕿᓂᕐᐱᓰᒃ?”
ᑭᐅᕘᒃ, “ᕌᑉᐰ (ᑐᑭᖃᕐᐳᖅ ᐃᓕᓮᔨ), ᓇᓃᖃᑦᑕᕐᐱᑦ?”
ᔩᓱᓯᐅᑉ ᐅᖃᐅᑎᕚᒃ, “ᕾᓗᓯᒃ ᑕᑯᔭᕐᑐᕆᑦᓯᒃ.” ᑕᕝᕙ ᒪᓕᓕᕐᐹᒃ ᖃᐅᔨᓪᓗᑎᒡᓗ ᓇᓂᒥᐅᑕᐅᖕᒪᖔᑦ; ᐅᓪᓗᒥ ᑕᕝᕙᓂ ᓇᔫᑎᕘᒃ, ᐅᓐᓄᓴᐅᓕᓚᐅᕐᒪᑦ ᐃᒻᒪᖄ 4ᖃᓂᒋᔮᓂ.
ᑖᒃᑯᐊᒃ ᔪᐊᓇᓯ ᐅᖃᕐᑎᓪᓗᒍ ᑐᓴᓚᐅᕐᑑᒃ, ᔩᓱᓯᒥᒃ ᒪᓕᒃᓴᓚᐅᕐᑐᖅ ᐂᑉᐸᖓ ᐋᓐᑐᕉᖑᕗᖅ ᓮᒨᓂ ᐲᑦᑐᕉᓯᐅᑉ ᓄᑲᖓ. ᓯᕗᓪᓕᕐᐹᒥᒃ ᐊᖓᔪᒥᓄᐊᕐᐳᖅ ᓮᒨᓂᒧᑦ, ᐅᖃᐅᑎᓪᓗᒍ, “ᒥᓮᐊ ᓇᓂᕙᕗᑦ.” (ᑐᑭᖃᕐᐳᖅ “᙭ᔅᑑᓯ.”) ᐋᓐᑐᕉᑉ ᓮᒨᓂ ᔩᓱᓯᒧᐊᕈᑎᕚ.
ᔩᓱᓯᐅᑉ ᑕᑯᒐᒥᐅᒃ, ᐅᖃᐅᑎᕚ, “ᓮᒨᓂᐅᕖᑦ ᔪᐊᓇᓯᐅᑉ ᐃᕐᓂᖓ? ᓰᐸᓯᒥᒃ ᐊᑎᖃᕐᓂᐊᓕᕐᐳᑎᑦ.” (ᓰᐸᓯ ᑐᑭᖃᕐᐳᖅ ᐲᑦᑐᕉᓯ ᐅᕝᕙᓗ “ᕾᕐᑐᖅ.”)

ᖃᐅᑎᓪᓗᒍ ᔩᓱᓯ ᒐᓕᓕᐊᒧᐊᕈᒪᓕᕐᐳᖅ. ᑲᑎᓯᒐᒥ ᐱᓕᑉᐴᓯᒥᒃ ᐅᖃᐅᑎᕚ, “ᒪᓕᓐᖓ.” ᐱᓕᑉᐴᓯᓕ ᐱᑦᓮᑕᒥᐅᑕᐅᕗᖅ, ᐋᓐᑐᕉᒃᑯᒃ ᐲᑦᑐᕉᓯᒃᑯᒃ ᓄᓇᖓᓂᑦ. ᐱᓕᑉᐴᓯᐅᑉ ᓈᑕᓁ ᑲᑎᒐᒥᐅᒃ ᐅᖃᐅᑎᕚ, “ᑲᑎᓯᕗᒍᑦ ᒨᓯᓯᐅᑉ ᐱᖁᔭᖏᓐᓂ ᓇᓚᐅᑦᑍᔪᓪᓗ ᑎᑎᕋᐅᓯᕆᓚᐅᕐᑕᖓᓂᒃ, ᔩᓱᓯ ᓈᓴᕇᑎᒥᐅᒥᒃ, ᔫᓯᐱᐅᑉ ᐃᕐᓂᖓᓂᒃ.”
ᓈᑕᓁᑉ ᐊᐱᕆᕚ, “ᓈᓴᕇᑎᒥᑦ ᐱᐅᔪᒥᒃ ᓴᖅᑭᑦᑐᖃᕈᓐᓇᕐᐹ?” ᐱᓕᑉᐴᓯᐅᑉ ᑭᐅᕚ, “ᕾᓗᑎᑦ ᑕᑯᔭᕐᑐᕆᑦ.”
ᔩᓱᓯᐅᓪᓕ ᓈᑕᓁ ᒥᒃᓯᒧᑦ ᕾᓕᕐᑐᖅ ᑕᑯᒐᒥᐅᒃ, ᐅᖃᐅᓯᕆᕚ, “ᑕᑯᒋᑦ, ᑕᕝᕙ ᐃᓴᕆᐊᓕᒥᐅᑕᓪᓚᕆᒃ, ᑖᑦᓱᒪᓂᓗ ᓱᓕᖏᓐᓂᕐᑕᖃᓐᖏᓚᖅ!”
ᓈᑕᓁᑉ ᐊᐱᕆᕚ, “ᖃᓄᖅ ᖃᐅᔨᒪᕕᖓ?”
ᔩᓱᓯᐅᑉ ᑭᐅᕚ, “ᐱᓕᑉᐴᓯᒧᑦ ᕾᖁᔭᐅᓚᐅᖄᕐᑎᓐᓇᒃ, ᓇᐹᕐᑑᑉ ᐸᐅᕐᖓᓕᒃᓴᐅᑉ ᐊᑖᓂ ᐃᒃᓯᕙᑎᓪᓗᑎᑦ ᑕᑯᓚᐅᕐᐸᒋᑦ.”
ᓈᑕᓁᑉ ᑭᐅᕚ, “ᕌᑉᐰ, ᒎᑎᐅᑉ ᐃᕐᓂᕆᕚᑎᑦ! ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ!”
ᔩᓱᓯᐅᑉ ᑭᐅᕚ, “ᐅᒃᐱᓕᕐᐲᑦ ᐅᖃᖅᑲᐅᓂᕋ ᐱᓪᓗᒍ ᑕᑯᓚᐅᕐᓂᕋᕐᓗᑎᑦ ᓇᐹᕐᑑᑉ ᐸᐅᕐᖓᓕᒃᓴᐅᑉ ᐊᑖᓃᑎᓪᓗᑎᑦ? ᑕᑯᖃᑦᑕᕐᓂᐊᕐᐳᑎᑦ ᑕᒪᑐᒪᓐᖓᑦ ᐊᖏᓂᕐᓴᓂᒃ.” ᐅᖃᐅᑎᓪᓗᒋᓪᓗ, “ᓱᓕᑦᓯᐊᕐᑐᒥᒃ ᐅᖃᐅᑎᕙᑦᓯ, ᕿᓚᒃ ᐊᖕᒪᕐᑐᖅ ᑕᑯᔪᒫᕐᐸᓯ, ᒎᑎᐅᓪᓗ ᐂᖏᓕᖏᑦ ᒪᔪᕋᕐᑐᑦ ᐊᖅᑲᕐᑎᕐᑐᓪᓗ ᐃᓅᑉ ᐃᕐᓂᖓᓄᑦ.”

കേൾക്കുക ᔪᐊᓇᓯᐅᑉ ᐊᒡᓚᖏᑦ 1