Sunwar - 2011 Editon (NT) Drama

Sunuwar

मिनु नां सोव़मेनु, ठेयब चढ़ेब, जोक्‍ब तुइक्‍बखाल्‍पा नु सास्‍त्रीपुकी, सभाम बाक्‍ब नेल्‍ल खुम्‍सीशा, सल्‍ला पामे बाक्‍त। मिनु येसु कली फ्रेंशा लाइश्‍शा, पिलातस आ गुइमी गेमे बाक्‍त। मिनु पिलातसमी येसु कली “गे यहूदी आन पिप नवे?” दे हिल्‍लो पवानु “गे आंमा देंतीनी” दे लोव़ लेत्‍ता बाक्‍त। ठेयब चढ़ेबपुकीमी शुश दोस गेमे बाक्‍त। मिनु पिलातसमी येसु कली “इ कली शुश दोस गेम्‍तेक्‍मे। गे मेको आन कली मारेइ लोव़ मलेत्‍नेवे?” दे हिल्‍लो पवा बाक्‍त। मिनु येसुमी लोव़ का यो मलेत्‍ता बाक्‍त। मिनु पिलातस छक लाक्‍माक्‍त। मर्कूस १४:६१; यसैया ५३:७
पास्‍सा नाक्‍ती पिलातसमी मुरपुकीमी प्रोंइचा, दे पुंइशो जेल्‍खानमी चोक्‍सीशो मुर का कली प्रोंइबाक्‍माक्‍त। सरकार कली मरिम्‍शो पा जेल्‍खानमी चोक्‍चा पुंइसीशो मुर आन दाते ङा बारब्‍बा माइश्‍शो का बाक्‍माक्‍त। मेकोमी मुर साइश्‍शो बाक्‍माक्‍त। मिनु मुरपुकीमी पिलातस कली “साइ रे ङा पशो खोदेंशो पा मुर का कली प्रोनीन” दे पुन्‍मे बाक्‍त। मिनु पिलातसमी “यहूदी, इन पिप प्रोंइचा दे पुंइनी?” दे हिल्‍लो पवा बाक्‍त। मारदे हना ठेयब चढ़ेबपुकीमी थुं चोशा, येसु कली ग्‍याइक्‍पदमे बाक्‍त दे रुप्‍शा, प्रोंइचा माल्‍शो बाक्‍माक्‍त। यूहन्‍ना ११:४८ तन्‍न ठेयब चढ़ेबपुकीमी मुर आन कली हुल पोक्‍शा “मेको कली मप्रोंइचा, बारब्‍बा कली प्रोंइचा, सरकार” दे पुंइपदमे बाक्‍त। मिनु पिलातसमी “गेपुकीमी यहूदी आन पिप देंशो मुर कली मार पदु मिनु?” दे हिल्‍लो पवानु “मेको कली शीमी क्‍येप्‍शा कांटी थोक्‍शा क्‍याइक्‍चा माल्‍ब” दे रेयके पचा गोव़मे बाक्‍त। मिनु पिलातसमी “मार मरिम्‍शो पवा, मार दोस गेचा” देंमेनु “शीमी क्‍येप्‍शा कांटी थोक्‍शा क्‍याइक्‍चा माल्‍ब” दे शुश रेयके पामे बाक्‍त। मिनु पिलातसमी “हुल आन दाक्‍शो पचा” दे मिम्‍शा, बारब्‍बा कली प्रोंइपदा बाक्‍त। येसु कली चहिं युक्‍पाइश्‍शा, शीमी क्‍येप्‍शा कांटी थोक्‍शा क्‍याइक्‍चा कली सिपाइ आन गुइमी गेवा बाक्‍त।

मिनु सिपाइपुकीमी येसु कली दरवार ङा सिपाइ आन बाक्‍तीके चाक्‍दीश्‍शा, आन पल्‍टन नेल्‍ल खुप्‍शा ङा मिन, आ फेक्‍शो वा प्रुइश्‍शा, पिप आन फेक्‍तीक रङ पाइश्‍शो वा फेक्‍पाइश्‍शा, चू के सिरपेच सेल्‍शा, आ पियाम गुप्‍तमे बाक्‍त। मिनु “यहूदी आन पिप, सेउ ताक्‍कीन” दे सेउ पखु पामे बाक्‍त। मिनु रेक्‍के के कोक्‍केमी आ पिया तेत्‍मे बाक्‍त। आ कुल तोक्‍तमे बाक्‍त। मिनु आ ङोंइती पोक्‍च थेक्‍शा बाप्‍शा, ठेयब सेल्‍खु पामे बाक्‍त। मिनु शुक्‍शी पचा रूशा, वा प्रुइश्‍शा, आंम आ वा फेक्‍पाइश्‍शा, ग्रुंइशा, शीमी क्‍येप्‍शा कांटी थोक्‍शा क्‍याइक्‍चा कली लदमे बाक्‍त।
मिनु लना लन बाक्‍मानु, आ गाउं रे पिशो साइरेनी ङा सिमोन ग्रुम्‍मे बाक्‍त। मेको सिमोन अलेकजन्‍डर नु रुफुस आस आफ बाक्‍माक्‍त। मेको कली ग्रुम्‍शा, येसु कली क्‍येप्‍तीक शी “लो, कुर कि कुर” दे कुरपदमे बाक्‍त। रोमी १६:१३
मिनु येसु कली गोल्‍गथामी चाक्‍दीत्‍मे बाक्‍त। गोल्‍गथा कली खप्‍परे यो देंसीब। मिनु अङगुर शांबुमी मूरे माइश्‍शो तेल कुर पशो तूतीके गेमेनु, येसुमी तूने मबिस्‍से बाक्‍त। मिनु शीमी क्‍येप्‍शा कांटी थोक्‍शा क्‍यदमे बाक्‍त। क्‍याइश्‍शा ङा मिन, सुमी ताइबा, दे तुइक्‍चा कली वा वोइश्‍शा फेन्‍टे आप्‍मे बाक्‍त। भजन संग्रह २२:१८ शीमी क्‍यदमेनु, सुनी ङा ९ बजे‍शो बाक्‍माक्‍त। “यहूदी आन पिप” दे दोस गेशा, ब्रेक्‍शो ब्रेक्‍स यो क्‍येप्‍शो बाक्‍माक्‍त। खुइ निक्‍शी आस कली यो का आ ग्‍युरा गे, का आ पेरा गे क्‍याइश्‍शा वोदमे बाक्‍त। मो पशोमी “मरिम्‍शो पाइब सुइश्‍शा, मरिम्‍शो पाइब नु काथा वोइक्‍चा पुंइसीब” दे परमप्रभु यावेमी ब्रेक्‍पाइश्‍शो लोव़ थमा दुम्‍माक्‍त। यसैया ५३:१२
मेकेर कोव़ब शुश मुर बाक्‍मा बाक्‍त। मेकोपुकीम आन पिया हिम्‍शा “परमप्रभु यावे आ खिं प्रेश्‍शा, नाक्‍त सांमी नक सेल्‍नुङ, देंते। खोइ मिनु, सेल्‍ने चबी? मर्कूस १४:५८ शीमी क्‍येप्‍शो रे प्रोंइसीशा तोंइ‍सो” दे शुक्‍शी पामे बाक्‍त। ठेयब चढ़ेब नु सास्‍त्रीपुकीमी यो शुक्‍शी पा “शुश मुर आन कली श्‍येत रे प्रोंइना प्रोंइन गाक्‍बाक्‍‍त, आंम कली चहिं प्रोंइसीने मचाप्‍बाक्‍त। इस्राएल ङा पिप, ख्रीस्‍तमी शीमी क्‍येप्‍शो रे प्रोंइसेक्‍ल। प्रोंइसीशो ताइतय हना, थमा सुइक्‍नय” देंमुमा बाक्‍त। आ ग्‍युरा नु पेरा गे वोइश्‍शो निक्‍शीमी यो शुक्‍शी पदसे बाक्‍त। मत्ती १६:१४
मिनु नाक्‍त १२ बजे नां जिक रिक्‍शा, ३ बजे सम्‍म रागी नेल्‍ल छिङछिङ दुम्‍माक्‍त। मिनु ३ बजे गे येसुमी “एली, एली, लामा असाब्‍थानी” दे वाइ ब्रेम्‍माक्‍त। आ देंशो मार रुम्‍सीब देंशा हना “आं परमप्रभु, आं परमप्रभु, मारदे प्रोंइ‍यीनी?” देंशो रुम्‍सीब। भजन संग्रह २२:२ एर ओंथ बाक्‍बपुकीमी मो देंशा वाइ ब्रेश्‍शो नेंशा “नेनीने, एलीया कली ब्रेत्‍ताक्‍व” देंमुमा बाक्‍त। मिनु का दोरशा लशा, रुवामी ग्‍युरशो तूचा थोव़क नुप्‍शा, कोक्‍केमी लिक्‍शा युप्‍चा गेशा “एलीया जाक्‍शा, प्रोंइबा कों? लो, कोव़य” देंमाक्‍त। मिनु येसु लेंशा काले वाइ ब्रेश्‍शा, नोले सोक्‍त कीशा बेक्‍माक्‍त। प्रस्‍थान २६:३१-३३; २इतिहास ३:१४ मिनु बेक्‍म नोले मार दुम्‍माक्‍त देंशा हना, परमप्रभु यावे आ खिं आगा ङा कोठामी बारेशो वा इर रे उइ सम्‍म उइक्‍थ पा जेर गाक्‍माक्‍त। मिनु येसु आ ङोंइती राप्‍शा बाक्‍शो कप्‍तानमी येसु वाइ ब्रेश्‍शा, नोले सोक्‍त कीशा बेक्‍शो तशा “थमा पा, एको मुर परमप्रभु यावे आ तौ बाक्‍माक्‍त” देंमाक्‍त।
येसु बेक्‍मेनु, शुश मीश मुरपुकीमी ङोन रे कोव़शो बाक्‍मा बाक्‍त। मोदेंशो कोव़ब का माग्‍दाला ङा मरीयम बाक्‍माक्‍त। का याकूब नु योसेस आस ममा मरीयम बाक्‍माक्‍त। का सालोमे बाक्‍माक्‍त। मेकोपुकी गालील रे यरूसलेम सम्‍म काथा गाक्‍शा, येसु कली वारच पना पन बाक्‍शो बाक्‍मा बाक्‍त। अरु यो काथा गाक्‍शा, यरूसलेम जाक्‍दीश्‍शो बाक्‍मा बाक्‍त। लूका ८:२-३

येसु बेक्‍ची नाक्‍त चहिं नाइक्‍तीक नाक्‍त आ ङोंइती नाक्‍त बाक्‍माक्‍त। मिनु नां रिक्‍मेनु, मार दुम्‍माक्‍त देंशा हना, अरीमाथीया ङा योसेफ माइश्‍शो, सभामी बाक्‍ब आन दाते ङा हिक्‍सीशो मुर का बाक्‍माक्‍त। मेको परमप्रभु यावे आ राज्‍य तांइसेक्‍ल, दे आस पा बाक्‍शो बाक्‍माक्‍त। मेको मुरुमी महिंथु, पिलातस कली ग्रुम्‍थ लशा “येसु आ बेक्‍शो रां लाइक्‍चा गेयीनी” दे पुना बाक्‍त। मिनु पिलातसमी बेक्‍म कों? मबेक्‍म दे मारेइ मतुइक्‍थु कप्‍तान कली ब्रेश्‍शा “मेको येसु माइश्‍शो बेक्‍मे?” दे हिल्‍लो पवा बाक्‍त। मिनु कप्‍तानमी “बेक्‍त” देंमेनु, लाइक्‍चा गेवा बाक्‍त। मिनु योसेफमी बुश वा ग्‍याप्‍शा चाक्‍शा, येसु आ बेक्‍शो रां रे कांटी उइश्‍शा शोल्‍शा, बुश वामी गिल्‍शा लाइश्‍शा, पुक्‍खी कामी ओंइशा वोदा बाक्‍त। मेको पुक्‍खी बेक्‍शो मुर वोइक्‍चा कली फुल्‍लु मुशा, लाप्‍चो पाइश्‍शो सेल्‍शा वोइश्‍शो बाक्‍माक्‍त। मिनु बेक्‍शो मुर ओंइशा वोइश्‍शा, फुल्‍लुमी चोक्‍शा वोदा बाक्‍त। मोपा वोइश्‍शो माग्‍दाला ङा मरीयम नु योसेस आ ममा मरीयममी ताम्‍से बाक्‍त।

കേൾക്കുക मर्कूस 15