Luk 17
17
Luanaaikɛa
(Mat 18.6-7, 18.21-22)
1Yesu ò a iwaɔnɛ: Sema yã pɔ ì to gbɛ̃́ fu àɔ ku, ãma waiyoo gbɛ̃́ pɔ a bɔ aà kĩi. 2Tó wà wisilɔgbɛ gbɛ̃̀nɛ dɔ̀ɛ̀ a nɔɛ mɛ́ wà aà zù isiu, bee maa ń adeo dɛ kɛ́ aà to nɛɛ beeɔ do fula. 3Àɔ ku ń laaio. Tó n gbɛ̃do duunakɛ̀, gɛ ǹ aà le. Tó à nɔsɛlìlɛ, suuukɛaanɔ. 4Tó à duunakɛ̀nɛ gɔɔ do gɛ̃n sopla mɛ́ à ɛ̀a ònɛ gɛ̃n sopla a nɔsɛlìlɛ, suuukɛaanɔ. 5Dii zĩnaɔ òɛ̀: Wá luanaaikɛa kãfĩwɛ̃ɛ. 6Dii mɛ̀: Tó á luanaaikɛa kà ɛfɔ wɛnawa, á o lasin líɛ beeɛ à azĩa bilɛ à gɛ́ pɛi isia guu, a á yãmaɛ.
7Tó á gbɛ̃e zɔ vĩ, àlɛ sɛ̃waɛ̀ ge àlɛ sãɔ dãɛ̀, tó à sù ń buao, aà dii a oɛ̀ aà mɔ pɔble gɔ̃̀ɔ yã? 8Aawo, a oɛ̀ aà blɛkɛɛ, aà ula lilɛ, i mɔɛ ń pɔbleao ń imiao, aapi i gbasa pɔble, i imi. 9Wì zɔ saaukpa kɛ́ à yã pɔ wa dàɛ̀ kɛ̀ yãi yã? 10Màaɛ apiɔ sɔ̃, tó a yã pɔ Lua dàɛ́ kɛ̀ pii, à mɛ: Zɔɔn wá ũ, wá kɛa wá kɛ̀.
Kusude gbɛ̃ɔn kwiɔ gbãgbãa
11Kɛ́ Yesu lɛ́ gɛ́ Yelusalɛũ, a bɛ Samali busu zɔ̃lɛu ń Galileo. 12Kɛ́ àlɛ gɛ̃ wɛ̃lɛeu, ɔ̃ gɔ̃ɛ kusude gbɛ̃ɔn kwiɔ kpàaũaanɔ. Aa zɛ kãaa, 13aa lɛzùaazi aa mɛ̀: Mae Yesu, wá wɛ̃nagwa. 14Kɛ́ a è màa, ɔ̃ a ònɛ́: À gɛ à ázĩa ɔlɔ sa'onaɔnɛ.#Lev 14.1-3 Kɛ́ aalɛ gɛ́, ɔ̃ aa gbã̀gbã. 15Kɛ́ an gbɛ̃do è a gbãgbã̀, ɔ̃ à ɛ̀a sù, àlɛ Lua saaukpa gbãugbãu. 16À wùlɛ a gbɛɛu Yesu aɛ, à fɔkpàwà. Gbɛ̃́piá Samali gbɛ̃́ɛ. 17Ɔ̃ Yesu mɛ̀: Gbɛ̃ɔn kwiɔ mɛ́ gbã̀gbão lò? Gbɛ̃ɔn kɛ̃okwiɔ ku má ni? 18An gbɛ̃e i ɛa mɔ̀ Lua saaukpaio, sema zĩloɛ beea? 19Ɔ̃ Yesu òɛ̀: Fɛlɛ ǹ tá, ma naai pɔ ń kɛ̀ mɛ́ n gbãgbã̀.
Gbɛ̃nazĩn Nɛ mɔa
(Mat 24.23-41)
20Falisiɔ Yesu là kia pɔ Lua kpà mɔgɔɔi, ɔ̃ a wèmá à mɛ̀: Kia pɔ Lua kpà a mɔ́ lá wàlɛ ewao. 21Wa o gwa kɛ ge gwa keeo. Kia pɔ Lua kpà ku á guu la.
22Ɔ̃ a ò a iwaɔnɛ: A gɔɔ lɛ́ mɔ́ kɛ́ á Gbɛ̃nazĩn Nɛ mɔgɔɔ ea nidɛ, kási á eo. 23Wa oɛ́ a ku le ge a ku la, ãma ásu gɛ́o, ásu tɛńzio. 24Lá loupilɛa ì gupu luabɛ lɛla ń a lɛleo, màa aɔ dɛ Gbɛ̃nazĩn Nɛ mɔgɔɔ. 25Sema aà taasikɛ gĩ́a maamaa, gbãgbɛ̃ɔ i giaazi. 26Lá à kɛ̀ Nɔee gɔɔ,#Daa 6.5 màa a kɛ Gbɛ̃nazĩn Nɛ mɔgɔɔzĩ lɔ. 27Wàlɛ pɔble, wàlɛ imi, wàlɛ nɔsɛ, wàlɛ zãkɛ e gɔɔ pɔ Nɔee gɛ̃̀ go'ilɛna guu, ɔ̃ í dà dũniaa, wà gàga pii.#Daa 7.6-24 28Màaɛ lɔ Lɔtu gɔɔ, wàlɛ pɔble, wàlɛ imi, wàlɛ pɔlu, wàlɛ pɔyia, wàlɛ pɔtɔ̃, wàlɛ kpɛdɔ. 29Gɔɔ pɔ Lɔtu bɔ̀ Sɔdɔũ, tɛ́ ń ĩatɛ̃gbɔ̃o bɔ̀ musu à kwɛ̀, ɔ̃ wà gàga pii.#Daa 19.24-25 30Beewa aɔ dɛ gɔɔ pɔ Gbɛ̃nazĩn Nɛ bɔ̀ gupuau.
31Gɔɔ bee gbɛ̃́ pɔ ku kpɛ́ musu su pila à gɛ̃ kpɛ́ guu a pɔɔ sɛlɛio. Màaɛ lɔ gbɛ̃́ pɔ kpɛ́ bua su ɛa bɛo. 32À to Lɔtu na yã dɔágu.#Daa 19.26 33Gbɛ̃́ pɔ ye àɔ a wɛ̃ni kũa, wɛ̃nipi a piliwà. Gbɛ̃́ pɔ ɔkpà a wɛ̃nizi sɔ̃, ade mɛ́ aɔ a zia e.#Luk 9.24 34Malɛ oɛ́, gwã bee gbɛ̃ɔn plaɔ aaɔ wulɛa gudoũ, Lua a gbɛ̃do sɛ́, i gbɛ̃do to we. 35Nɔɛ gbɛ̃ɔn plaɔ aaɔ pɔlɔ gudoũ, Lua a gbɛ̃do sɛ́, i gbɛ̃do to we. 36Gɔ̃ɛ gbɛ̃ɔn plaɔ aaɔ ku bua, Lua a gbɛ̃do sɛ́,#Mat 24.31; 1 Tɛs 4.17 i gbɛ̃do to we. 37Ɔ̃ aa aà là aa mɛ̀: Dii, makĩi ni? A wèmá à mɛ̀: Gu pɔ gɛ kuu, we yãamusuɔ kãaau.
നിലവിൽ തിരഞ്ഞെടുത്തിരിക്കുന്നു:
Luk 17: Boo2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Boko Bible © SIM International, 2024.