Luk 22
22
Lɛkpaaĩa Yesuzi
(Mat 26.1-16; Maa 14.1-11; Zãa 11.45-53)
1Kaaso dikpɛ pɔ wì mɛ Gɛ̃amusu#Bɔa 12.1-11 kà kãi. 2Sa'onkiaɔ ń Mɔizi ikoyãdanɛdeɔ lɛ́ zɛwɛɛlɛ lá wa kɛ wà Yesu bɔlia asii guu, asa aalɛ vĩakɛ gbɛ̃́ɔnɛɛ. 3Ɔ̃ Setãu dì Yudasi pɔ wì mɛ Isaliɔtiɛ. Yesu iwa gbɛ̃ɔn kuɛplaɔ doɛ. 4Ɔ̃ à gɛ̀, à lɛkpàaĩ ń sa'onkiaɔ ń Lua ua dɔ̃anaɔ gbɛ̃zɔ̃ɔɔ, lá á kɛ à Yesu kpamá. 5An pɔ kɛ̀ na, ɔ̃ aa lɛdoũkɛ̀ wà ɔ̃a kpawà. 6À zɛ̀ò, ɔ̃ àlɛ zɛwɛɛlɛ à Yesu kpamá bila saɛ.
Gɛ̃amusu blɛblea
(Mat 26.17-30; Maa 14.12-26; Zãa 13.21-30; 1 Kln 11.23-25)
7Kaaso dikpɛgɔɔ kà, gɔɔ pɔ wì Gɛ̃amusu sã kolokpa. 8Ɔ̃ Yesu Piɛɛ ń Zãao gbàɛ à mɛ̀: À gɛ́ Gɛ̃amusu blɛ sɔukɛiwɛ̃ɛ. 9Ɔ̃ aa aà là aa mɛ̀: Ń ye wà kɛ má ni? 10Ɔ̃ a wèmá à mɛ̀: Tó a gɛ̃ wɛ̃lɛdau, á kpaaũ ń gɔ̃ɛo í sɛa lo guu. Àɔ tɛaazi e ua pɔ a gɛ̃u, 11í o uabeleɛ, Mɛtulu lɛ́ gu pɔ a Gɛ̃amusu blɛ bleu ń a iwaɔ gbɛa. 12A kpɛdiakɔ̃a kpɛa zɔ̃ɔ pɔ wa kɛ̀kɛ ɔlɔɛ́, í pɔblea yã kɛkɛ we. 13Kɛ́ aa gɛ̀, aa è lá Yesu ònɛ́wa, ɔ̃ aa Gɛ̃amusu blɛ sɔukɛ̀ we.
14Kɛ́ a gɔɔ kà, Yesu mɔ̀ zɔ̃̀lɛ we ń a zĩnaɔ sãnu. 15Ɔ̃ a ònɛ́: Gɛ̃amusu blɛɛ bee bleaánɔ ni ma dɛ maamaa e màɔ gɛ́ taasikɛi, 16asa malɛ oɛ́, má ble lɔo e kpala pɔ Lua kpà gɛ bɔò gupuau, dikpɛ sĩana i pa. 17Kɛ́ à imibɔ sɛ̀, à saaukpà, ɔ̃ à mɛ̀: À si à dɔdɔkɔ̃ɛ, 18asa malɛ oɛ́, za gbã má vɛ̃ɛbɛ'i mi lɔo e kpala pɔ Lua kpà gɛ mɔò. 19Kɛ́ à kàa sɛ̀, ɔ̃ à saaukpà, a ɛ̀ a kpàmá à mɛ̀: Kɛ́ beeá ma mɛ pɔ malɛ kpá á yãiɛ. Àliɔ bee kɛ ma yã dɔaágu yãi. 20Kɛ́ aa pɔblè aa làa, à imibɔ sɛ̀ màa lɔ à mɛ̀: Íɛ beeá ma au pɔ a bɔlɛɛ́ɛ. Lua bàa kuańnɔ tia auɛ.#Zel 31.31-34 21Ma ɔ ku ta doũ ń ma kpamadeoɛ,#Soũ 41.10 22asa Gbɛ̃nazĩn Nɛ a kpagui lá Lua dìlɛɛwaɛ. Waiyoo gbɛ̃́ pɔ a aà kpamápi. 23Ɔ̃ aa nà kɔ̃lalaawa aalɛ mɛ: Wá demɛ a yãpi kɛi?
Yesu lɛdaa a iwaɔwa
(Mat 26.31-35; Maa 14.27-31; Zãa 13.36-38)
24Ɔ̃ lɛkpaa fɛ̀lɛ ń guu, kɛ́ aa ye wà dɔ̃ ń guu gbɛ̃́ pɔ dɛńla.#Luk 9.46 25Ɔ̃ Yesu ònɛ́: Busu kiaɔ ì ikokɛmá mɛ́ gbãadeɔ ì ńzĩa tɔbɔ, 26ãma ásuli kɛ màao. À kũ̀ á gbɛ̃zɔ̃ɔ líɔ dɛ gbɛ̃́ pɔ kɛ̃sãaázi ũɛ. À kũ̀ á dɔaana líɔ dɛ á zĩkɛna ũɛ. 27Blɛblena ń blɛzĩkɛnao, an demɛ zɔ̃ɔi? Blɛblena nolo? Mapi sɔ̃ má ku á guu lan gbɛ̃́ pɔ lɛ́ zĩkɛɛ́wa. 28Gbɛ̃́ pɔ zɛ̀manɔ ma taasikɛa guuɔn á ũ. 29Lá ma Mae ma kpa kpalau, màa sɔ̃ ma á kpá kpalau, 30kɛ́ àɔ blɛblemanɔ àɔ imimanɔ ma taabũnu musu ma kpalau, íɔ zɔ̃lɛzɔ̃lɛa báawa àɔ yãkpalɛkɛ ń Isaili bui kuɛplaɔ.
31Simɔ, Simɔ, ma. Setãu gbɛ̀a à á fãfã lá wì pɔwɛna fãfãwa. 32Ɔ̃ ma wabikɛ̀nɛ, kɛ́ ma naai pɔ ń vĩ su kɛ̃sãmao. Tó n ɛa n sua, ǹ n gbɛ̃́ɔ gba gbãa. 33Piɛɛ òɛ̀: Dii, má sì wà ma dakpɛunnɔ, mí gannɔ. 34Yesu òɛ̀: Piɛɛ, malɛ onɛ, e ko àɔ lɛzu gbã, ńyɔ̃ lelekpamazi gɛ̃n aaɔ̃ ǹ mɛ ń ma dɔ̃o.
35Ɔ̃ à ń lá à mɛ̀: Kɛ́ ma á zĩ́ mɔkpɛ ń babalabɔɔo ń kyaleɔ sai,#Luk 9.3 pɔe kɛ̃̀sãwáe? Ɔ̃ aa mɛ̀: Aawo. 36Ɔ̃ a ònɛ́: Tiasa gbɛ̃́ pɔ mɔkpɛ vĩ, aà sɛ́. Màaɛ lɔ ń gbɛ̃́ pɔ babalabɔɔ vĩo. Gbɛ̃́ pɔ fɛ̃nda vĩ sɔ̃o, aà a ula yia, i lú. 37Malɛ oɛ́, sema yã pɔ wa kɛ̃̀ ma musu papa wà mɛ̀: Wà aà dìlɛ doũ ń daakɛnaɔ.#Isa 53.12 Asa yã pɔ wa kɛ̃̀ ma musu mɛ́ lɛ́ papa. 38Aa mɛ̀: Dii, fɛ̃nda gwa kɛ mɛn pla. Ɔ̃ a ònɛ́: Bee mɔ̀.
Yesu kũa
(Mat 26.47-56; Maa 14.43-50; Zãa 18.3-11)
39Yesu bɔ̀ gɛ̀ Kukpɛ sĩsĩpɔlɛu lá ì kɛwa. Aà iwaɔ tɛaazi. 40Kɛ́ à kà gu pɔ àlɛ gɛ́u, a ònɛ́: À wabikɛ kɛ́ ásu fu yɔ̃awao yãi. 41Ɔ̃ à kɛ̃̀má à kà lan gbɛzulɛlɛa taawa. Ɔ̃ à kùlɛ we, àlɛ wabikɛ 42à mɛ̀: Baa, tó ń yei, to kɛɛonaɛ bee zãkũmanɔ, ãma asu kɛ ma pɔeã ũo, sema n pɔ. 43Ɔ̃ malaika bɔ̀ luabɛ à mɔ̀wà, à aà gbà gbãa. 44Ń nɔsɛyaao aà wabikɛa lɛ́ dɛdɛ, ɔ̃ aà isima lɛ́ tɔ̃́ tɔɔlɛ lan autonaɔwa. 45Kɛ́ à wabikɛ̀ a làa, à fɛ̀lɛ gɛ̀ a iwaɔ kĩi, à ń lé, aalɛ i'o ń pɔsiao. 46Ɔ̃ a ònɛ́: Bɔyãi álɛ i'oi? À fɛlɛ à wabikɛ, kɛ́ ásu fu yɔ̃awao yãi.
47Kɛ́ àlɛ yã'o, ɔ̃ wà kà dasidasi. Gbɛ̃́ pɔ wì mɛ Yudasi, aà iwa gbɛ̃ɔn kuɛplaɔ do mɛ́ dɔaaanɛ́. Kɛ́ à sɔ̃̀aazi lɛpɛiwà, 48ɔ̃ Yesu òɛ̀: Yudasi, lɛpɛaa guu ɔ̃ ńyɔ̃ Gbɛ̃nazĩn Nɛ kpaòmáa? 49Kɛ́ gbɛ̃́ pɔ aa ku ń Yesuoɔ yã pɔ lɛ́ mɔ́ è, aa mɛ̀: Dii, wà ń gbɛ̃gbɛ̃ ń fɛ̃ndao yã? 50Ɔ̃ an gbɛ̃do sa'onkia zĩkɛna lɛ̀, à aà ɔplaa swã gò. 51Ɔ̃ Yesu mɛ̀: À bee tó. À ɔkã̀ aà swãwa à aà gbã̀gbã. 52Ɔ̃ a ò sa'onkiaɔ ń Lua ua dɔ̃anaɔ ń gbɛ̃zɔ̃ɔ pɔ aa mɔ̀waɔnɛ: A mɔa ń fɛ̃ndaɔ ń goɔ lan kpãiwɛliwɛn ma ũwaa? 53Lagulɛdɔ miɔ kuánɔ Lua ua,#Luk 19.47 i ɔkãao. Ãma gɔɔɛ bee dɛ á pɔ ũɛ, gusia ikokɛgɔɔɛ.
Piɛɛ lelekpaa Yesuzi
(Mat 26.57-58, 26.69-75; Maa 14.53-54, 14.66-72; Zãa 18.12-18, 18.25-27)
54Kɛ́ aa Yesu kũ̀ sùò, aa gɛ̀aanɔ sa'onkia bɛ. Piɛɛ bɛ zã̀zã. 55Kɛ́ wà tɛkà ua guo, wà kàlɛ wà lìai, ɔ̃ Piɛɛ mɔ̀ sɔ̀lɔ ń guu. 56Nɔɛ zĩkɛnae aà è, ɔ̃ à wɛbìiwà à mɛ̀: Gbɛ̃́ɛ bee kuaanɔ sɔ̃ɛ. 57Ɔ̃ à lelekpà à mɛ̀: Nɔɛ, má aà dɔ̃o. 58Yɔɔnnɔ gɔ̃̀ɔ ɔ̃ gbɛ̃pãle aà è, ɔ̃ à mɛ̀: Mpi sɔ̃ ń dɛ an gbɛ̃do ũɛ. Ɔ̃ Piɛɛ ò gɔ̃ɛpiɛ: Mamɛo. 59Kɛ́ lɛɛlu do taa gɛ̃̀, gbɛ̃pãle giiyèwà à mɛ̀: Sĩanaɛ, gbɛ̃́ɛ bee kuaanɔɛ, asa Galile gbɛ̃́ɛ. 60Ɔ̃ Piɛɛ mɛ̀: Mi dɔ̃ lá nlɛ oo. Wegɔ̃ɔ kɛ́ àlɛ yã'o, ɔ̃ ko lɛzù. 61Kɛ́ Dii lìli à Piɛɛ gwà, ɔ̃ yã pɔ a ò dɔ̀ Piɛɛgu, kɛ́ à mɛ̀ e ko àɔ lɛzu gbã, a lelekpaazi gɛ̃n aaɔ̃. 62Ɔ̃ Piɛɛ bɔ̀ bàasi, à ɔɔlɔ̀ à kɛ̀ wɛ̃na.
63Gbɛ̃́ pɔ aalɛ Yesu dɔ̃́aɔ aa aà kɛ̀ pɔɔpɔɔ, ɔ̃ aa aà gbɛ̃̀. 64Aa pɔ yèɛ̀ a wɛ́wa, ɔ̃ aalɛ aà lala aalɛ mɛ: Ãnabikɛkɛ ǹ o, demɛ n lɛi? 65Dɔɛaaanɔ guu aa yã pãleɔ òɛ̀ dasi lɔ.
66Kɛ́ gu dɔ̀, Yuda gbɛ̃zɔ̃ɔɔ kɔ̃kã̀aa, sa'onkiaɔ ń Mɔizi ikoyãdanɛdeɔ pii. Ɔ̃ aa Yesu sɛ̀ gɛ̀ò ń yãkpalɛkɛkĩi. 67Ɔ̃ aa aà là aa mɛ̀: Tó Mɛsin n ũ, owɛ̃ɛ. A wèmá à mɛ̀: Tó má òɛ́, á sío. 68Tó ma yãe làwá sɔ̃, á weo. 69Za tia Gbɛ̃nazĩn Nɛ aɔ zɔ̃lɛa Lua gbãade ɔplaai.#Soũ 110.1 70Ɔ̃ gbɛ̃pii mɛ̀: Asi Lua Nɛn n ũa? Ɔ̃ a wèmá à mɛ̀: Lá a dɔ á lɛ́uwa, mamɛ má aà ũ. 71Ɔ̃ aa mɛ̀: Wá bàa ũma ń seeladeo lɔi? Wá mà aà lɛ́u kɔ̀.
നിലവിൽ തിരഞ്ഞെടുത്തിരിക്കുന്നു:
Luk 22: Boo2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Boko Bible © SIM International, 2024.