സങ്കീർത്തനങ്ങൾ 19

സംഗീതപ്രമാണിക്ക്; ദാവീദിന്റെ ഒരു സങ്കീർത്തനം.

1ആകാശം ദൈവത്തിന്റെ മഹത്ത്വത്തെ വർണിക്കുന്നു;

ആകാശവിതാനം അവന്റെ കൈവേലയെ പ്രസിദ്ധമാക്കുന്നു.

2പകൽ പകലിനു വാക്കു പൊഴിക്കുന്നു;

രാത്രി രാത്രിക്ക് അറിവുകൊടുക്കുന്നു.

3ഭാഷണമില്ല, വാക്കുകളില്ല, ശബ്ദം കേൾപ്പാനുമില്ല.

4ഭൂമിയിൽ എല്ലാടവും അതിന്റെ അളവുനൂലും

ഭൂതലത്തിന്റെ അറ്റത്തോളം അതിന്റെ വചനങ്ങളും ചെല്ലുന്നു;

അവിടെ അവൻ സൂര്യന് ഒരു കൂടാരം അടിച്ചിരിക്കുന്നു.

5അതു മണവറയിൽനിന്നു പുറപ്പെടുന്ന മണവാളനു തുല്യം;

വീരനെപ്പോലെ തന്റെ ഓട്ടം ഓടുവാൻ സന്തോഷിക്കുന്നു.

6ആകാശത്തിന്റെ അറ്റത്തുനിന്ന് അതിന്റെ ഉദയവും

അറുതിവരെ അതിന്റെ അയനവും ആകുന്നു;

അതിന്റെ ഉഷ്ണം ഏല്ക്കാതെ മറഞ്ഞിരിക്കുന്നത് ഒന്നുമില്ല.

7യഹോവയുടെ ന്യായപ്രമാണം തികവുള്ളത്;

അതു പ്രാണനെ തണുപ്പിക്കുന്നു.

യഹോവയുടെ സാക്ഷ്യം വിശ്വാസ്യമാകുന്നു;

അത് അല്പബുദ്ധിയെ ജ്ഞാനിയാക്കുന്നു.

8യഹോവയുടെ ആജ്ഞകൾ നേരുള്ളവ;

അവ ഹൃദയത്തെ സന്തോഷിപ്പിക്കുന്നു;

യഹോവയുടെ കല്പന നിർമ്മലമായത്;

അത് കണ്ണുകളെ പ്രകാശിപ്പിക്കുന്നു.

9യഹോവാഭക്തി നിർമ്മലമായത്;

അത് എന്നേക്കും നിലനില്ക്കുന്നു;

യഹോവയുടെ വിധികൾ സത്യമായവ;

അവ ഒട്ടൊഴിയാതെ നീതിയുള്ളവയാകുന്നു.

10അവ പൊന്നിലും വളരെ തങ്കത്തിലും ആഗ്രഹിക്കത്തക്കവ;

തേനിലും തേങ്കട്ടയിലും മധുരമുള്ളവ.

11അടിയനും അവയാൽ പ്രബോധനം ലഭിക്കുന്നു;

അവയെ പ്രമാണിക്കുന്നതിനാൽ വളരെ പ്രതിഫലം ഉണ്ട്.

12തന്റെ തെറ്റുകളെ ഗ്രഹിക്കുന്നവൻ ആർ?

മറഞ്ഞിരിക്കുന്ന തെറ്റുകളെ പോക്കി എന്നെ മോചിക്കേണമേ.

13സ്വമേധാപാപങ്ങളെ അകറ്റി അടിയനെ കാക്കേണമേ;

അവ എന്റെമേൽ വാഴരുതേ; എന്നാൽ ഞാൻ നിഷ്കളങ്കനും

മഹാപാതകരഹിതനും ആയിരിക്കും.

14എന്റെ പാറയും എന്റെ വീണ്ടെടുപ്പുകാരനുമായ യഹോവേ,

എന്റെ വായിലെ വാക്കുകളും എന്റെ ഹൃദയത്തിലെ ധ്യാനവും

നിനക്കു പ്രസാദമായിരിക്കുമാറാകട്ടെ.

നിലവിൽ തിരഞ്ഞെടുത്തിരിക്കുന്നു:

സങ്കീർത്തനങ്ങൾ 19: MALOVBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Malayalam OV Bible - സത്യവേദപുസ്തകം

സത്യവേദപുസ്തകം OV Bible (BSI) നെക്കുറിച്ച് കൂടുതലറിയുക