സങ്കീർത്തനങ്ങൾ 56

സംഗീതപ്രമാണിക്ക്; ദൂരസ്ഥന്മാരുടെ ഇടയിൽ മിണ്ടാത്ത പ്രാവ് എന്ന രാഗത്തിൽ; ദാവീദിന്റെ ഒരു സ്വർണഗീതം; ഫെലിസ്ത്യർ അവനെ ഗത്തിൽവച്ചു പിടിച്ചപ്പോൾ ചമച്ചത്.

1ദൈവമേ, എന്നോടു കൃപയുണ്ടാകേണമേ;

മനുഷ്യർ എന്നെ വിഴുങ്ങുവാൻ പോകുന്നു;

അവർ ഇടവിടാതെ പൊരുതി എന്നെ ഞെരുക്കുന്നു.

2എന്റെ ശത്രുക്കൾ ഇടവിടാതെ എന്നെ വിഴുങ്ങുവാൻ ഭാവിക്കുന്നു;

ഗർവത്തോടെ എന്നോടു പൊരുതുന്നവർ അനേകരല്ലോ.

3ഞാൻ ഭയപ്പെടുന്ന നാളിൽ നിന്നിൽ ആശ്രയിക്കും.

4ഞാൻ ദൈവത്തിൽ അവന്റെ വചനത്തെ പുകഴും;

ഞാൻ ദൈവത്തിൽ ആശ്രയിക്കുന്നു; ഞാൻ ഭയപ്പെടുകയില്ല.

ജഡത്തിന് എന്നോട് എന്തുചെയ്‍വാൻ കഴിയും?

5ഇടവിടാതെ അവർ എന്റെ വാക്കുകളെ കോട്ടിക്കളയുന്നു;

അവരുടെ വിചാരങ്ങളൊക്കെയും എന്റെ നേരേ തിന്മയ്ക്കായിട്ടാകുന്നു.

6അവർ കൂട്ടംകൂടി ഒളിച്ചിരിക്കുന്നു;

എന്റെ പ്രാണനായി പതിയിരിക്കുമ്പോലെ അവർ എന്റെ കാലടികളെ നോക്കിക്കൊണ്ടിരിക്കുന്നു.

7നീതികേടിനാൽ അവർ ഒഴിഞ്ഞുപോകുമോ?

ദൈവമേ, നിന്റെ കോപത്തിൽ ജാതികളെ തള്ളിയിടേണമേ.

8നീ എന്റെ ഉഴൽച്ചകളെ എണ്ണുന്നു;

എന്റെ കണ്ണുനീർ നിന്റെ തുരുത്തിയിൽ ആക്കിവയ്ക്കേണമേ;

അതു നിന്റെ പുസ്തകത്തിൽ ഇല്ലയോ?

9ഞാൻ വിളിച്ചപേക്ഷിക്കുമ്പോൾ തന്നെ

എന്റെ ശത്രുക്കൾ പിന്തിരിയുന്നു;

ദൈവം എനിക്ക് അനുകൂലമെന്നു ഞാൻ അറിയുന്നു.

10ഞാൻ ദൈവത്തിൽ അവന്റെ വചനത്തെ പുകഴും;

ഞാൻ യഹോവയിൽ അവന്റെ വചനത്തെ പുകഴും.

11ഞാൻ ദൈവത്തിൽ ആശ്രയിക്കുന്നു; ഞാൻ ഭയപ്പെടുകയില്ല.

മനുഷ്യന് എന്നോട് എന്തു ചെയ്‍വാൻ കഴിയും?

12ദൈവമേ, നിനക്കുള്ള നേർച്ചകൾക്കു ഞാൻ കടപ്പെട്ടിരിക്കുന്നു;

ഞാൻ നിനക്കു സ്തോത്രയാഗങ്ങളെ അർപ്പിക്കും.

13ഞാൻ ദൈവത്തിന്റെ മുമ്പാകെ ജീവന്റെ പ്രകാശത്തിൽ നടക്കേണ്ടതിനു

നീ എന്റെ പ്രാണനെ മരണത്തിൽനിന്നും

എന്റെ കാലുകളെ ഇടർച്ചയിൽനിന്നും വിടുവിച്ചുവല്ലോ.

നിലവിൽ തിരഞ്ഞെടുത്തിരിക്കുന്നു:

സങ്കീർത്തനങ്ങൾ 56: MALOVBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Malayalam OV Bible - സത്യവേദപുസ്തകം

സത്യവേദപുസ്തകം OV Bible (BSI) നെക്കുറിച്ച് കൂടുതലറിയുക