Mat 16
16
Farisianɛatɔ ni Zadukianɛ batɔ beʋi linugutseboe dɔni Yesu klɔ ɔ
1Farisianɛatɔ ni Zadukianɛ batɔ bɛba Yesu klɔ, lɛ bɛpɛ si, bɛɛpunu yɛ. Lɛ beʋi i dɔni yɛ klɔ si ɔbitɛ linugutseboe ki ba tɔ ɔkɔ ɔbasɛ si Aya akpɛ yɛ ɛ. 2Lɛ Yesu ebu le onu si, “Xegi liwo le liiku u, xe kana mɛ kɛ zã ɛ, kɔ mlɔ si, ‘Kana mɛ kɛtrapɛ keletitia mɛ.’ 3Lɛ livlɛ lɛ ɛ, mlɔ si ‘Dzeni ye atrádɔ lɛ ese linu si ayɛɛ mɛ azã lɛ aplɛ la ɛzi kana mɛ. ‘Xegi mlɛzɛtani kana mɛ kumɔ gyesi i, kitɛ xe mlátratani eboa la gi ɛɛtrɛ la aʋa abla ɛ, kumɔ ogyesi i?” 4Mlɔ abla bebi ba mlɛnyani, lɛ kumɔziŋa kyɛ kuli mlɔ mɛ ɛ! Linugutseboe mleeʋi na a? Mlatrámɔ litɔtɔ ɛ sani Yona yɛ linugutseboe le ko o.”
Lɛ ayurɔ ba xe asɛ ɛ.
Farisianɛ ma ni Zadukianɛ ma bidɔ basɛbasɛ ʋɛ
5Agi badɔkpasi ba ni Yesu bɛtsà Galilea limu ne e trɛ ní oge lɔ kɔlɔ ɛ, bedze bákɔ aklãa tɔtɔ evu u. 6Lɛ Yesu asi ba si, “Mledi mumɔ; mleze ni aŋu ní Farisianɛ ma ni Zadukianɛ ma kunyasi yɔ su u.”
7Lɛ bekpese yɛ eboe la kuta odi ní ba tsali kusi i, “Apani eboa la klɔ lɛ ese linu si kúmani aklã a tɔtɔ ɔ.”
8Yesu ete eboa la gi bɛzɛpani i, lɛ eʋi ba si, “Ege lɛ loso mlegyo edi ní mlɔ kusi si mlámani liklã ɛtɔtɔ na a? Mlɔ kuziŋaa kúsrɛ koŋ! 9Kɔ mlaʋínu eboe la ese kɔna ni abla na a? Kidze mledze si mayaʋi aklã tetsu akí benyime akpe tietsu na a? Kusɔʋi tusɛ mɛ mlɛkpɛ agɔgɔ la na? 10Lɛ kitɛ mlenu aklã tegloele la gi maki benyime akpe tiene ba ese e? Kusɔʋi tusɛ mlɛhali i? 11Lɛ ege lɛ loso mlénu le ese si aní aklã su mazeegu kunugu yo aki mlɔ ɛ? Mlakpɛ isu lixaŋu ní Farisianɛ ma ni Zadukianɛ ma ba binyasi dɔ mɛ su!”
12Able ko yɛ badɔkpasi ba benu le ese si ɔzɛsi ba si bezeni aŋu ní aklã mɛ binyasi dɔ mɛ su, boŋu i azɛɛpani ní Farisianɛ ma ni Zadukianɛ ma bidɔbasɛbasɛ ʋɛ su.
Petro adra Yesu su
13Agi Yesu atrɛ ní Kaisarea Filipi kesea mɛ ɛ, eʋi yɛ badɔkpasi ba si, “Nyaŋwɛ banima bizedo si Ɔnɔɛ Yebi ye onu na a?”
14Lɛ bebu le onu si, “Banɔatɔ si Yohanes kuni yo ɔkpɛkpɛɛ; lɛ batɔ fɛ si Eliya, banɔatɔ fɛ si Yeremya, loo Aya yɛ beboedoplɛ ba mɛ ɔtɔ.”
15Lɛ Yesu eʋi ba si, “Nyaŋwɛ mlɔ pɔ̀ mlɛɛsɛ si menu na a?”
16Lɛ Simon Petro ebu le onu si, “Wɔ wonu Kristo ye, Aya gi ɔlɛ ligbã nɛ Yebinyime e!”
17Lɛ Yesu apani si “Isami iku wo, Simon Yona yɛ obinyimee! Anukwarɛɛ liɛ klɔ ɔ́dɔ ɔnɔ gbagbe ɔtɔtɔ kɔ ɔ, pɔ̀ mɔka ní lifunu ne e, yɛ ebu le abasi wɔ. 18Lɛ loso e mɛɛsi wɔ Petro si wɔ linyine ese linu si liklakpɔ, lɛ liklakpɔɛ lɛ ya aʋa maadu mɛ ɔsɔli ha lɔ ɔ, lɛ kutseo fɛ kútratani lɔ aʋa kuŋa a. 19Maakɔ lifunu ne Kaʋaŋaa safi ʋa aki wɔ. Liboe kakaa gi wɔanya ní kesea aʋa ɛ, bianya nɛ ní lifunu ne, lɛ kidɔ kakaa gi wɔable ni kesea aʋa ɛ, biable ke ní lifunu ne.”
20Lɛ Yesu akpɛ ɔsã aki yɛ badɔkpasi ba si, bakísi ɔnɔnɔ si yɛ yenu Kristo ye.
Yesu apani ní yɛ kinimɔmɔ ɛ ni yɛ kutseo su u
21Dɔnɔ ní lipoe lɛ klɔ aʋa ɛ, Yesu ekpese lɛ mɛ kudra aki yɛ badɔkpasi ba si, “Linu si mitrɛ ní Yerusalem tɔ mizɛɛmɔ kini gagla ní kusumu yo baka ba ni Ɔsã nɔ badɔbasɛ ba iwla mɛ. Biaye me, pɔ̀ ní liwe tanɛ nɛ aʋa ɛ, Aya aayɔ ni mɛ gi maadzi ligbã a. 22Lɛ Petro ebu Yesu kuka xe atɛni yɛ si, “Liwewe Ɔkaɛ, Aya otini le ɔzanɔ ni wɔ su” 23Lɛ Yesu ekyi kyɔŋ lɛ aka aŋu mɛ akí Petro si, “Wɔ Satana! Sɛ ní mɛ su! Woetsi kude ɛki mɛ; lɛ ese linu si wɔ begyodi ba ya ɛ, bádɔ Aya kɔ ɔ; keleme banɔ begyodi benu.” 24Lɛ Yesu asi yɛ badɔkpasi ba si, “Xe ɔnutɔ apɛ si yizeni mɛ kude e, lilɛ si odze yɛ isu ya, tɔ otu yɛ osetsase lo, atɔ okuni mɛ kude. 25Ɔniliɛ klɔ gi apɛ si yibu yɛ ligbã nɛ ɛ, aalila lɛ; pɔ̀ ɔniliɛ klɔ gi aalila yɛ ligbã nɛ kɔ kpɛ mɛ loso e, aamɔ nɛ. 26Libi woli liaze lɛ mɛ ki ɔnɔ xe kelea mɛ kedzì yɛ kanɛ ɛ, pɔ̀ aalila yɛ esobo la na a? Owo! Ɔ́tramɔ kididɔ kura! Lɛ ege kɛ akɔ atsrɛ yɛ ligbã nɛ na a? 27Lɛ Ɔnɔɛ Yebi ye e, adziba ní yɛka kusudraa mɛ nì Aya yɛ baxwɛdzɛ ba, lɛ atrátsa liʋɛ ɛki ɔnɔ kakaa ní yɛ axwɛwawa la onu. 28Matrɔ likla ní lɛ aʋa aki mlɔ si banɔatɔ bali blɔ kusi niya gi bátratse e, kɔzɛna ni lipoe lɛ klɔ gi biamɔ Ɔnɔɛ Yebi ye yɛ kibabaɛ mɛ ŋwisi Okusi kinɛ ɛ.”
നിലവിൽ തിരഞ്ഞെടുത്തിരിക്കുന്നു:
Mat 16: avn
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc