Shiyanso 4
4
UKayini nu Abeli
1Lino, uAdamu wámuvejeela uHawa umudala waakwe, woope wásumula ulwanda, wámusava uKayini. UHawa wáaja, “UMutwa uNguluvi wánitanga naasava umwana mudiimi.” 2Paanyuma khanji wásumula ulwanda wámusava uAbeli, wáava munangʼana wa Kayini.
Vaganile kikula uAbeli wáava mudimaaji, uKayini wáava mulimaaji. 3Uluhaavi lumonga, uKayini wáahumya kwa Mutwa uNguluvi isadaakha isa nkungulo kihuma ku mugunda gwakwe. 4UAbeli woope wáahumya kwa Nguluvi ishadanda, insawa sa wutasi sina sineneepe. UNguluvi wánojelwa nu Abeli ni shadanda shaakwe. 5Leelo, asikhanojeelwe nu Kayini ni sadaakha yaakwe. Lino uKayini wákhalala mandu, uweeni waakwe wagonjana.
6Baheene uNguluvi wámujova uKayini, “Kwashi wakhalala? Kwashi uweeni waakho wugonjeene? 7Shiyooli, nda ugahe wunofu usiyiitikhwe! Leelo nda ugahe fivi, umanyaje kiija uwunansi wukutegeeme, woope wukikudobokha, leelo wisakulwa uwumene.”
UKayini ikimubuda uAbeli
8Ilijuva limonga uKayini wámujovile umunangʼana waakwe uAbeli, “Shokho ku magunda.” Pina vakhandi ku magunda ukho, uKayini wámuyalushila uAbeli wámubuda.
9Baheene uMutwa uNguluvi wámuposa uKayini, “Ali kwi umunangʼana waakho?” UKayini wáaja, “Maanyi! Kwani one nili muyangalilaaji wa munangʼana wangu?”
10UNguluvi wáaja, “Waagaha shi? Puliisa! Idanda ya munangʼana waakho yikinikhoolela kihuma mu nyi! 11Lino, nakuyiijila owe mu nyi yina yaangʼwa idanda ya munangʼana waakho yuna wamubuda. 12Pina ukhayilima inyi usikhakungula. Ukhava muunu wa kiyulutikha mu nyi, ugaya wiikhasi.”
13UKayini wámujovela uNguluvi, “Amalava gangu makhome mandu, nisikwiliile kigugumila. 14Puliisa! Iminsiyaano ukinidaga kihuma mu nyi, one nisiifihwe kutali noowe. Lino, nisiive muunu wa kiyulutikha, nisiiva nisingamala mu nyi. Umuunu yoyoona yuna akhanyaaga, akhanibuda.”
15Leelo uNguluvi wámujovela, “Ndaali! Umuunu yuna akhakubuda owe, akhahombesewa mala fungati.” Apo, uNguluvi wámuviikha uKayini ishimanyilo, kiija umuunu yoyoona yuna akhamwaga asikhamubudaga. 16Baheene uKayini wáwuukha pa Mutwa uNguluvi, wáaluta kikhala ku nyi ya Nodi,#4:16 Nodi: Litaawa lya Shihebulaniya. Uluganulo lwakwe, kiyulutikha. ulubali lwa kunena lwa Edeni.
Avaana va Kayini
17UKayini wámuvejeela umudala waakwe, wásumula ulwanda wámusava uHenoki. Uluhaavi ulo, uKayini akhandi isenga ilijumbi, baheene wálitambulila Henoki, ilitaawa lya mwanaakwe. 18UHenoki wámusavile uIladi, uIladi wámusavile uMehuyaheli, uMehuyaheli wámusavile uMetushayeli, uMetushayeli wámusavile uLameki.
19ULameki wátoolaga vadala vavili, umudala wa wutasi akhandi itambulwa Ada, umudala uwa wuvili akhandi itambulwa Sila. 20UAda wámusavile uYabali. UYabali uyu yumwene linsina lya vala vina viikhala mu matinga na kidiima ifidiimwa. 21Ulukholo lwakwe wa Yabali akhandi itambulwa Yubali. UYubali uyu yumwene linsina lya vala vina viitova iligombo ni mbaasi. 22USila woope, wámusavile uTubali Kayini. Uyo akhandi muponda fyuma wa nkhonkholo sa shuuma ni shaaba. Uwulumbu wa Tubali Kayini akhandi itambulwa Naama.
23ULameki wávajovela avadala vaakwe,
“Ada nu Sila nipuliisi one!
Omwe vadala vangu, mupulisaaje amaswi gangu.
Namubudaga umugosiivaha kwa kiiva wánilemasaaga,
khanji namubudaga umudiimi kwa kinitesa.
24UKayini nda akhahombesewa mala fungati,
shiyooli, uLameki akhahombesewa mala mashumi fungati ni fungati!”
USeeti nu Enoshi
25Khanji uAdamu wámuvejeelaga umudala waakwe uHawa. UHawa wámusava umwana umudiimi, wámutambulila ilitaawa lya Seeti,#4:25 Seeti: Litaawa lya Shihebulaniya. Uluganulo lwakwe, uNguluvi wániyimiilila. iijova, “UNguluvi wánipeela umwana uyunji, wápyanisa pa Abeli yuna wábudwagwa nu Kayini.” 26USeeti woope wámusava umwana, wámutambulila ilitaawa lya Enoshi. Uluhaavi ulo, avaanu vayansa kimufuunya uNguluvi kwa litaawa lyakwe ilya Mutwa.
നിലവിൽ തിരഞ്ഞെടുത്തിരിക്കുന്നു:
Shiyanso 4: Shisangu
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2020, Wycliffe Bible Translators, Inc. All rights reserved.