Jɛ́nɛ́sì 15
15
Wuɖu ɓɛ́ Gèɖèpɔ́ɔ̀ kè Éébànà dè ma kɛ
1Sɔ̀ìn ɓóɛ gboɛɛ, Bounɓoɔ̀ wóɖóìn ma Éébànà dyí ɖé dyí-tɛ̀mɛ̀ìn-ɖɛ̀ mú, ké ɔ cɛ̃ɛ ma ɔ gbo, ké ɔ ɖá, “Éébànà, mɔ̀ǔn ɖá ɓɛ́ m̀ ké fɛ̃̀ìn, sepóɛɖé mɔ̄ mɔ̀ nì dyí-gmɔ̀-nyɔ̀ kà dyí-zĩ̀ìn-ɖɛ̀ nìà kɛ. Ké ní mu m̀ mana kɔ̃ poùn mìɔ.”
2Kɛɛ Éébànà cɛ̃ɛ ma, ké ɔ ɖá, “Bounɓo Gèɖèpɔ́ɔ̀, ɖɛ́ mɔ̀ kpáná ɖò ɓɛ́ ɖɛ nì muà ḿ nyíìn nyɛɛ mu ḿ dyí nyuùn wɛ̃́? Dyéɛ, kà ḿ se dyú ɖò ɓéɖé kɛ. Ɔ jèɛɛ, ní gbo-nì-dyù Ɛ̀ɖìɛ́zɛ̀ mɔ̀à Dìmásìkɔ̀-nyɔ̀ nìà kɛɛ mɔ̀ nyɔ mu ḿ dúí sèìn. 3M̀ se ḿ dyú ɖò nyí jèɛɛ, ní gbo-nì-dyù nìà ɖé ní gbǒɔ̀ múɛɛ mu ní dúí-sè-nyɔ̀ jǔùn.”
4Hwɛ̀ ké Bounɓoɔ̀ cɛ̃ɛ ma ɔ gbo, ké ɔ ɖá, “Nyɔ nìà kɛ se nì dúí-sè-nyɔ̀ɔ̀ jǔɛ mu, kɛɛ dyú ɓɛ́ ɔ mu wóɖóùn ɖé m̀ mìɔùn xwíníín nyɛɛ mɔ̀ nyɔ mu nì dúí-sè-nyɔ̀ɔ̀ jǔùn.” 5Ké ɔ síìn ma Éébànà píé, ké ɔ ɖá, “Gmɔ̀ ɖé dyɔɔ̀ dyí ɓó kàǔn, ɓɛ́ m̀ ké dɛ̀nɛ̀ mɛ́nɛ́ɛ́ ɓěɔ̀ zɛɖɛ, ɔ jǔ ké m̀ dyi wa zɛɖɛɛ ɓɛ́ìn ní. Kǎà nì xwíníín-dyù ɓě mu jĩ̀ìn.”
6Ké Éébànà taɓa ma Bounɓoɔ̀ hwìɖǐǐ, ké Bounɓoɔ̀ ɖáìn ma ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.
7Ké ɔ cɛ̃ɛ ma Éébànà gbo ɖe, ké ɔ ɖá, “Mɔ̄ mɔ̀ Bounɓoɔ̀. Mɔ̄ mɔ̀ nyɔ zà ma kà ɖé m̀ Ɔ́ɔ̀ ɓɛ́ ɔ mɔ̀à Kàdíà-nyɔ̀ ɓěɔ̀ ɓíɖí-hwɔ̀ɖɔ̀ɔ̀ kɛɛ mú, ɓɛ́ ḿ kéà m̀ ɓóɖó nìà kɛ nyí, ɓɛ́ ɔ kéà nì kɔ̃̀ɔ̀-ɖɛ̀ jǔ kɛ̀.”
8Kɛɛ Éébànà ɖá, “Bounɓo Gèɖèpɔ́ɔ̀, xwɛ̌ ní muɛ dyuòɛ̀ nyuùn kà ɔ mu ní kɔ̃̀ɔ̀-ɖɛ̀ jǔùn wɛ̃ɛ kɛ́?”
9Ké Bounɓoɔ̀ cɛ̃ɛ ma ɔ gbo, ké ɔ ɖá, “Dyà ḿ ɓìɖǐ nyɔ́nɔ́ gmɔ̀ ɖò kè wiɖi nyɔ́nɔ́ ɖò kè ɓáɖáá ɓíɔ́ ɖò ɓɛ́ wa nyuá zɔ̃ tã kɛ kè gbúɛ́ ɖò ɔ kè póo-póo gmɔ̀ ɖò.” 10Ké Éébànà dyà ma wa ɔ gbo. Ké ɔ fá ma wa pĩ́á sɔ̃́-sɔ̃́ mú, ké ɔ po pĩ́á ɖò-ɖò wáká ɖò-ɖò kɔ̃. Kɛɛ ɔ se ma naà ɓěɔ̀ mú fá. 11Ké ti ɓɛ́ naà ɓě dyi ma ɓíɖíi ɓó suaɖɛ̀-kù ɓěɔ̀ kɔ̃ kɛɛ, Éébànà kúmú ma ɓó wa dyi.
12Ti ɓɛ́ dyóɖóɔ̀ nìǎ ma dyi kpáuń wɛ̃ɛ, Éébànà kpá ma nyíɔ vɛ̀nɛ̀ ɖò mú, ké fã̀à nyu ma ɔ mìɔ cá ɖé dya-dya mú. 13Hwɛ̀ ké Bounɓoɔ̀ cɛ̃ɛ ma ɔ gbo, ké ɔ ɖá, “M̀ mɛ dyuòɛ̀ dyí jǎà jɛ́ɛ́ kà nì xwíníín-dyù ɓě mu ɖéè jǔùn ɖé ɓóɖó kà kò ɖò kɔ̃ kɛ. Ké ɓóɖó-dù kà kò ɖòɛ̀ nyɔ ɓěɔ̀ mu wa gǐì mú nyuùn, ké wa mu wa dyi pĩ́àùn ɓó zɔ̃ hɔ̃dɛ̀ɖɛ̀ hĩinyɛ xwíníín. 14Kɛɛ ní mu ɓóɖó kɔ̃̀ gǐì ɓɛ́ wa muà jǔùn wɛ̃ɛ gǎ dyéìn. Ké sɔ̀ìn ɓóɛ gboɛɛ, wa mu ɖé sɔ̀ùn, ké wa mu ɖé kɔ̃̀ɔ̀-ɖɛ̀ ɓáún-ɓáún zàùn. 15Kɛɛ ɓó mɔ̀ùn bììɛɛ, nì mu m̀ ɓǎ ɓěɔ̀ gbo muùn ɖé gìɖìǐ mú. Wa mu m̀ dyóɖóún zàùn ɖé nì nyɔ-sùà-tìɔ̀ mú, sepóɛɖé nì mu nyɛìn mìɔ hwɛ̀ m̀ ké mɛ́. 16Ké nì xwíníín-dyù ɓěɔ̀ se nɔ̄ ɓóɖóɛ̀ kɔ̃ ɖe dyiɛ́ mu, ɓɛ́ ɔ ké waà xwéɖé-dù deìn dúún hĩinyɛ nììnɔ̀ dyɛ̀ìn hwɛ̀, sepóɛɖé Ámɔ̀-nyɔ̀ ɓěɔ̀ séè nàmàǔn jĩ̀ kà wa dyi nyu ní, ḿ kéà wa ɓóɖóɔ̀ kɔ̃ zà kɛɛ nyu ke.”
17Ti ɓɛ́ dyóɖóɔ̀ ɖǎ ma dyi kpá, ké tíe ɖǎ ma kpɔ̃ɛɛ, nyɛ-mú-po-ɖɛ̀ nì ɓúɛń ɖò kè dɔ̀ɔ̀-kpà nì wãuń ɖò wóɖó ma xwáɖáún, ké wa zĩ̀ìn ma ɓó suaɖɛ̀-pĩ̀à ɓěɔ̀ pṹa.#15:17 Gèɖèpɔ́ɔ̀ mìɔùn nì ma nyɛ-mú-po-ɖɛ̀ nì ɓúɛńɔ̀ kè dɔ̀ɔ̀-kpà nì wãuń ɓɛ́ wa zĩ̀ìn ma kà ɓó suaɖɛ̀-pĩ̀à ɓěɔ̀ pṹa kɛɛ mú. Nyɛ-mú-po-ɖɛ̀ɔ̀ mɔ̀ jìà ɖò ɓɛ́ wa ɓéɖéìn nyɛ mú kɛ. Ɔ kè zũɛ-kù ɓɛ́ à mɔ̀ùn ɓéɖéìn nyɛ múɛɛ hwɔìn ní. 18Ɓó wéa ɓaɖaa, Bounɓoɔ̀ kè Éébànà dè ma wuɖu, ké Bounɓoɔ̀ ɖá, “Ní mu ɓóɖó nìà kɛ nì xwíníín-dyù ɓěɔ̀ nyíìn. Ɔ mɔ̀ ɓóɖó ɓɛ́ ɔ sɔ̀àìn ɖé Íjè-nìɔ̀ wĩín, ké ɔ nyinià ɖé Dyùféɖétì-nì vɛ̀nɛ̀ɔ̀ wĩín nyɛ. 19Ɔ mɔ̀ Kénɛ̀-nyɔ̀ ɓěɔ̀ kè Kɛ́nà-nyɔ̀ ɓěɔ̀ kè Kámɔ̀-nyɔ̀ ɓěɔ̀ 20kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Wɛ́ɖɛ́fà-nyɔ̀ ɓěɔ̀ 21kè Ámɔ̀-nyɔ̀ ɓěɔ̀ kè Kénà-nyɔ̀ ɓěɔ̀ kè Gígà-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɓóɖóɔ̀.”
നിലവിൽ തിരഞ്ഞെടുത്തിരിക്കുന്നു:
Jɛ́nɛ́sì 15: ƁB02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bassa Bible © Bible Society Liberia, 2002.