uYoohani 3
3
UYeesu akupanga nu Nikodeemo
1Kwáli umupiti wumo uwa Vhayuuda kufuma mu mpuga iya Vhafalisaayi we izina lyakwe vhahatinji uNikodeemo. 2Isiku limo uvhusiku, uNikodeemo ahasogola kwa Yeesu, ahamuvhuuzya ahati, “We Musambiilizi, tumanyile kuuti iwe we Musambiilizi we uMulungu akusonteleziizye, mwe pe ataliipo umuntu we angavhomba ivilolesyo vwe ukuvhomba inga uMulungu atali pooka nawo.” 3UYeesu ahamwamula ahati, “Nalyoli nkukuvhuuzya kuuti, ataliipo umuntu we anginjila mu vhumwene uvhwa Mulungu,#3:3 Uvhumwene uvhwa Mulungu: Vhaazya mu Ntantiho izya Mazwi aMajeni. inga atapafwilwe ulwa vhuvhili.” 4UNikodeemo ahamuvhuziilizya uYeesu ahati, “Vhuli, umuntu umugoosi angapaapwa vhuli ulwa vhuvhili?#3:4 Kupaapwa ulwa vhuvhili kwe kuvha we mwana wa Mulungu. Vhaazya uYoohani 1:13. Vhuli, anginjila havhili mu lwanda ulwa nyina inga apaapwe?” 5UYeesu ahamwamula ahati, “Nalyoli nkukuvhuuzya kuuti, ataliipo umuntu we anginjila mu vhumwene uvhwa Mulungu inga atapafwilwe kwi idala ilya minzi ni lya Mupepo uwa Mulungu. 6Avhapaafi vhakupaapa avhaana vhaavho nu muvhili, ileelo uMupepo uMufinjile we akupaapa avhantu vhupwa, inga vhavhe nu vhulanzi uvhwa shiima. 7Utasukumilaje zye nakuvhuuzya kuuti, ‘Mukwanzilwa mupaapwe ulwa vhuvhili.’ 8Inkungu yikuvugula kusogola kwonti kwe yikwanza. Ungiivwa lwe yikuvugula, ileelo utakumanya kwe yikufuma na kwe yikusogola. Izi vwe zili poosye na kwa muntu wonti we apafwilwe nu Mupepo uMufinjile.”
9UNikodeemo ahamuvhuziilizya uYeesu ahati, “Vhuli, izi zingavha inza vhuli?” 10UYeesu ahamwamula ahati, “Iwe we musambiilizi uwa vhantu avha mu nsi iya Isilayeeli we ukushindikwa, utazimanyile vhuli zyonti izi? 11Nalyoli nkukuvhuuzya kuuti, iswe tuzimanyile zye tukuyanga, havhili tukuhomeshezya ziila zye tuzivhwenyi, ileelo imwe mutakwitiha zye tukuvhavhuuzya. 12Nkuvhavhuuzya zye zikuvhombeha mu nsi umu, ileelo imwe mutakwitiha, pe mungiitiha inza vhuli inga navhavhuuzya zye zikuvhombeha ku mwanya? 13Ataliipo umuntu wonti we ahasogola ku mwanya, ileelo ine ne Mwana wa Aadamu ne nkinza kufuma ku mwanya.
14“Yeenya, aVhaisilayeeli lwe vhali mu luugwa, uMoose ágomvile ishiholanyo isha njoha iya shaaba#3:14 Injoha iya shaaba: UMoose ávhomvile vhwevhulo, inga avhaposhe aVhaisilayeeli mu mbiivhi zyavho. Vhaazya iMbaazyo 21:4-9. nu kushizuvwa mwi ikwi. Niine ne Mwana wa Aadamu nkwanzilwa vhanzuvwe pa shihovhenkanyo, 15inga mbape uvhulanzi uvhwa shiima avhantu vhe vhakuniitiha. 16UMulungu ávhakunzite nkaani avhantu avha mu nsi umu, ye nongwa ánsonteleziizye ne Mwana waakwe imozi, kwinza mu nsi umu inga umuntu wonti we akuniitiha atahateeje, nkandi avhwaje uvhulanzi uvhwa shiima. 17Yeenya, uMulungu atánsonteleziizye ne Mwana waakwe kuvhalonga avhantu avha mu nsi umu, nkandi kuvhapoha.
18“UMulungu atakumulonga umuntu we anitisile ne Mwana waakwe, ileelo umuntu we atanitisile alonziilwe, mwe pe atanitisile ne Mwana waakwe imozi. 19Uvhu vhwe vhulonzi, uvhuzelu vhwinzile mu nsi umu, ileelo avhantu vhasungwilwe kuvha mu shiisi kuluusya kuvha mu vhuzelu, mwe pe imbombo zyavho mbiivhi. 20Avhantu vhonti vhe vhakuvhomba imbiivhi, vhakuvhuviitilwa uvhuzelu uvhwo. Havhili vhatakwanza kusogola kwe uvhuzelu vhuli, vhakuvhomba isho inga imbiivhi zyavho zitahaloleshe apazelu. 21Ileelo avhantu vhonti vhe vhakuvhomba izya nalyoli vhakusogola ku vhuzelu uvhwo, inga imbombo zyavho ziloleshe apazelu kuuti zikuvhombwa inza vwe uMulungu akwanza.”
UYoohani uMwozyi akupanga izya Yeesu
22Lwe ahavhaliilizyo hatuuha hansi, uYeesu na vhasundikwa vhaakwe vhahasogola mu nsi iya Yudeeya. Vhahatendama ku havhaliilizyo hamo mu nsi iyo, umwo ahozyaga avhantu. 23Ahavhaliilizyo hehaala, woope uYoohani uMwozyi ahozyaga avhantu mu nkaaya iya Ayinooni, papiipi ni nkaaya iya Saleemu, mwe pe ukwo kwámile aminzi aminji. Avhantu avhinji vhahasogolaga ku kwakwe, inga avhoozye. 24Ahavhaliilizyo iho uYoohani uMwozyi ápezile ashiili kulemwa nu kukungwa mu jeela.
25Isiku limo, avhasundikwa vhamo avha Yoohani uMwozyi vhahanda kudalinkana nu Muyuuda wumo izya maata aga kuyizelufwa. 26Pe vhahasogola kwa Yoohani uMwozyi, vhahamuvhuuzya vhahati, “We musambiilizi, umuntu we waamile nawo kwi isyila ilya ijenje uYoolodaani, we waatuvhuziizye inongwa zyakwe, woope akwozya avhantu. Havhili avhantu avhinji vhakusogola ku kwakwe kuluusya ku kwaho.” 27UYoohani ahavhaamula ahati, “Umuntu atangavha ni shintu, inga uMulungu atamupiiye. 28Imwe mweneemwe mwe vhahoome vhaane, ku zye nkuyanga kuuti, ‘Ine te ne Chilisiti,’ uMulungu ánsonteleziizye, inga ndongolele pilongolela lyakwe. 29Umulindu we akwimalwa akwanzilwa kusogola kwa mulume waakwe. Ine indi inza umumanyani uwa mulume we akumwimala umulindu uyo, nkwimiilila pa luvhazu pa we akwimala, nkuseshela lwe nkwivwa izwi lyakwe. 30Yikwanzilwa umuntu uyo avhe mupiti nkaani, ileelo ine imbe ne munsi nkaani.”
31Uweene we afumile ku mwanya ali na maha kuluusya avhantu vhonti. Umuntu wonti we afumile pa nsi, wa pa nsi, havhili akuyanga izya pa nsi panaapa. Ileelo we afumile ku mwanya ali na maha kuluusya avhantu vhonti. 32Umuntu uyo akuhomeshezya zye azivhwenyi nu kuzyivwa kufuma kwa Mulungu, ileelo avhantu vhansi vhweleele vhe vhakwitiha kuuti zye akuyanga zya nalyoli. 33Umuntu wonti we akumwitiha uweene, akuhomeshezya kuuti zye uMulungu akuyanga zya nalyoli, 34mwe pe uMulungu ámusonteleziizye uYeesu kuyanga amazwi aga Mulungu. UMulungu ámupiiye uYeesu uMupepo uMufinjile ishisita ishipimo. 35UTaata uMulungu amukunzite uMwana waakwe, havhili amupiiye amaha aga kukonzya ivintu vwonti. 36Umuntu wonti we akumwitiha uMwana wa Mulungu, ali nu vhulanzi uvhwa shiima, ileelo umuntu wonti we akumuhaana, atali nu vhulanzi uvhwa shiima, mwe pe uvhuhalazu uvhwa Mulungu vhukuvha kwa muntu uyo shiima.
നിലവിൽ തിരഞ്ഞെടുത്തിരിക്കുന്നു:
uYoohani 3: nih
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2021 Wycliffe Bible Translators, Inc.