uYoohani 9
9
UYeesu akumuponia untonko
1Yeenya, isiku limo lwe uYeesu akujenda mwi idala, ahamulola umuntu wumo we áamile wu ntonko kufuma kupaapwa. 2Avhasundikwa vhaakwe vhahamuvhuziilizya vhahati, “We Musambiilizi, vhutalamalandu vhwa naanu vhwe vhwámupeleeye umuntu uno kuuti apaapwe wu ntonko? Vhuli, ávhomvile wuuyo, pamo vhapaafi vhaakwe vhe vhávhomvile?”#9:2 AVhayuuda vhahitihaga kuuti uvhwantonko nu vhulemazu uvhunji vikufuma kwa Mulungu, kuzya vhutalamalandu uvhwa mulemazu, poosye uvhwa vhumo mu vhataata vhaakwe. Vhaazya Kufuma 20:5; iZabuuli 89:31-33. 3UYeesu ahavhaamula ahati, “Uvhwantonko vhwakwe vhutakufumiilana nu kuuti uweene ávhomvile uvhutalamalandu, poosye avhapaafi vhaakwe. Ápafwilwe wu ntonko, inga amaha aga Mulungu galoleshe ku vhantu kutuushila ku kwakwe. 4Tukwanzilwa kuvhomba imbombo iya Mulungu we ansonteleziizye she musanya. Uvhusiku vhukwinza vhwe umuntu nuumo atangavhomba imbombo izi. 5Lwe indi mu nsi umu, ine ne vhuzelu ku vhantu vhonti.” 6Lwe uYeesu ayanga izyo, ahaswila amati pansi, ahahanya intope, ahamupaha mu minso untonko uyo. 7Pe ahamuvhuuzya untonko uyo ahati, “Sogoola ugeeze ku minso mwi idiimi ilya Silowaamu.” Izwi ilya Silowaamu kwe kuuti we atumiilwe. Pe untonko ahasogola, ahageeza ku minso, ahavhwela mu nkaaya yaakwe akulola.
8Pe avhapalamani vhaakwe na vhanji vhe kwisinda vhahamulolaga lwe akulaavha, vhahavhuzilizanya vhahati, “Vhuli, umuntu uno te we wula we atendamaga nu kulaavha ivintu?” 9Vhamo vhahati, “Umuntu uno we wuuyo.” Avhamwavho vhahati, “Umuntu uno te wuuyo, ileelo aholiine nawo nkaani.” Ileelo uweene ahavhavhuuzya ahati, “Vwe zili, ine ne naamile ne ntonko.” 10Pe vhahamuvhuziilizya vhahati, “Inga nalyoli weewe, ishi aminso gaaho ganzite vhuli kulola?” 11Uweene ahavhaamula ahati, “Umuntu wumo we izina lyakwe wu Yeesu, aaswiliiye amati gaakwe pansi, aahanya intope, nu kumpaha mu minso gaane. Pe ambuuzya ati, ‘Sogoola ugeeze ku minso mwi idiimi ilya Silowaamu.’ Pe nasogola, nageeza, nanda kulola.” 12Pe vhahamuvhuziilizya vhahati, “Vhuli, umuntu uyo ali kwoshi?” Uweene ahavhaamula ahati, “Ine ntamanyile kwe ali.”
AVhafalisaayi vhakumuvhuziilizya we áamile wu ntonko
13Pe avhantu vhaala vhahasogola nu muntu ula we áamile wu ntonko ku Vhafalisaayi. 14Isiku lye uYeesu áhanyile intope na mati nu kumuponia untonko uyo lyáli lisiku lya Sabaato. 15Pe aVhafalisaayi vhoope vhahamuvhuziilizya umuntu uyo vhahati, “Vhuli, aminso gaaho gaanzite vhuli kulola?” Ahavhaamula ahati, “Umuntu wumo aampasile intope mu minso, nageeza nu kwanda kulola.” 16Pe aVhafalisaayi vhamo vhahati, “Umuntu uyo atafumile kwa Mulungu, mwe pe atakulandata indajizyo izya Sabaato.” Ileelo vhamo vhahati, “Vhuli, yingavha inza vhuli kwa muntu we mutalamalandu kuvhomba ivilolesyo ivwo?” Pe vhahasugaana vhuuvho vheeka.
17Pe aVhafalisaayi vhahamuvhuziilizya havhili vhahati, “Vhuli, ukuti vhuli umuntu uyo we akuponia aminso?” Uweene ahavhaamula ahati, “Ine nkulola kuuti, umuntu uyo mukuvhwi uwa Mulungu.” 18Ileelo avhalongozi avha Vhayuuda ivho vhatahiitiha kuuti umuntu uyo we ishi akulola, ku vhwandilo ápafwilwe wu ntonko. Pe vhahavhiita avhapaafi vhaakwe. 19Lwe avhapaafi vhaakwe vhaafiha, avhalongozi ivho vhahavhavhuziilizya vhahati, “Vhuli, umuntu uno mwana wiinyu? Inga ndinga mwana wiinyu, nalyoli ápafwilwe wu ntonko? Inga vwe zili, ishi atalisile inza vhuli kulola?” 20Pe avhapaafi vhaakwe vhahavhaamula vhahati, “Iswe tumanyile kuuti, uno nalyoli mwana wiitu, havhili tukuhomeshezya kuuti ápafwilwe wu ntonko. 21Ileelo tutamanyile vwe aatalisile kulola, havhili tutamumanyile umuntu we aamuponiizye aminso gaakwe. Muvhuziilizyi wuuyo, mwe pe muntu wu songo, kuuti ayanje wuuyo.” 22Avhapaafi vhaakwe vháyanzile vhwevhulo, mwe pe vhávhogofile avhalongozi avha Vhayuuda, mwe pe avheene vhítinkiine kuuti, umuntu wonti we akwitiha kuuti uYeesu wu Chilisiti, vhakumushimbizya mwi isinagoogi. 23Ye nongwa avhapaafi vhaakwe vhátili, “Muvhuziilizyi wuuyo, mwe pe muntu wu songo.”
24Pe avhalongozi avha Vhayuuda vhahamwita havhili ulwa vhuvhili umuntu we áamile wu ntonko, vhahamuvhuuzya vhahati, “Lapa kwa Mulungu, kuuti ukuyanga uvhwanalyoli! Iswe tumanyile kuuti umuntu uyo we aakuponiizye, mutalamalandu.” 25Pe ahavhaamula ahati, “Ine ntamanyile kuuti umuntu uyo mutalamalandu, nkandi imanyile lyoka vhweleele, kuuti naamile ne ntonko, ileelo ishi nkulola.” 26Pe vhahamuvhuziilizya vhahati, “Vhuli, umuntu uyo aakuvhombeeye ishooni? Aakuponiizye vhuli aminso gaaho?” 27Uweene ahavhaamula ahati, “Ine naavhavhuziizye vwe aambombeeye, ileelo mutaatejeliziizye. Shooni she mukwanza imbavhuuzye havhili? Vhuli, niimwe mukwanza kuvha mwe vhasundikwa vhaakwe?”
28Avheene vhahamusuufwa vhahati, “Iwe we we musundikwa waakwe! Ileelo iswe swe vhasundikwa vha Moose. 29Tumanyile kuuti uMulungu áyanzile nu Moose, ileelo umuntu uyo tutamanyile kwe afumile.” 30Umuntu uyo ahavhaamula ahati, “Ine nkusukumila nkaani! Imwe mutamanyile kwe afumile, ileelo uweene amponiizye aminso gaane! 31Tumanyile kuuti uMulungu atakutejeelezya impuuto izya vhatalamalandu,#9:31 uYisaayi 1:15; 59:2 ileelo akumutejeelezya umuntu wonti we akumushindiha nu kuvhomba kulandatana nu lukasamo lwakwe. 32Kufuma pe uMulungu ápezile insi, tutahiivwa naalumo kuuti aliipo umuntu we ahamuponia aminso we apafwilwe wu ntonko. 33Inga umuntu uyo atafumile kwa Mulungu, atangavhomba izyo.” 34Avheene vhahamwamula vhahati, “Iwe uhapaapwa mu vhutalamalandu. Pe ungatusambiilizya vhuli iswe?” Pe vhahamushimbizya mwi isinagoogi.
Uvhwantonko uvhwa mu mooyo
35Lwe uYeesu ayiivwa kuuti avhalongozi avha Vhayuuda vhamushimbizya umuntu ula, ahasogola kumulondola. Lwe amwaga, ahamuvhuziilizya ahati, “Vhuli, ukumwitiha uMwana wa Aadamu?” 36Umuntu uyo ahamwamula ahati, “We mwene, uMwana wa Aadamu wu naanu, inga imwitishe?” 37UYeesu ahamwamula ahati, “Iwe umuvhwenyi, havhili we akuyanga niiwe.” 38Umuntu uyo ahayanga ahati, “Nkwitisile Mwene.” Pe ahasugamila pilongolela ilya Yeesu nu kumupuuta. 39Pe uYeesu ahayanga ahati, “Ine nínzile mu nsi umu kulonga, inga avhantonko vhalolaje, havhili vhe vhakulola, vhavhe vhe vhantonko.” 40AVhafalisaayi vhamo vhe vháliipo paala, lwe vhamwivwa uYeesu akuyanga izyo, vhahamuvhuziilizya vhahati, “Vhuli, niiswe swe vhantonko?” 41UYeesu ahavhaamula ahati, “Inga mwaamile mwe vhantonko, nkandi mutali nu vhutalamalandu. Ileelo ishi muli nu vhutalamalandu, mwe pe mukuti mukulola.”
നിലവിൽ തിരഞ്ഞെടുത്തിരിക്കുന്നു:
uYoohani 9: nih
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2021 Wycliffe Bible Translators, Inc.