uMataayi 4
4
UYeesu akulingwa nu Mukwalanzi
(uMaaliko 1:12-13; uLuuka 4:1-13)
1Pe uMupepo uMufinjile ahamulongola uYeesu kusogola mu luugwa, inga uMukwalanzi amulinje. 2UYeesu ahamala insiku 40 uvhusiku nu musanya she akuyiima kulya.#4:2 Akuyiima kulya: Vhaazya kuyiima kulya mu Ntantiho izya Mazwi aMajeni. Pisinda, inzala yihamuluma. 3Pe uMukwalanzi ahinza kumulinga, ahamuvhuuzya ahati, “Inga we Mwana wa Mulungu,#4:3 UMwana wa Mulungu: Vhaazya mu Ntantiho izya Mazwi aMajeni. gavhuuzye amavhwe iga gagalunkane gavhe makaati.” 4UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umuntu atangalandila kwe ku shaakulya sheeka vhweleele, nkandi akulandila kwi izwi lye likufuma kwa Mulungu.’#4:4 iNkumbushizyo izya Ndajizyo 8:3”
5Pe uMukwalanzi ahamutwala uYeesu pa nkaaya imfinjile iya Yelusaleemu, ahamuvhiiha pamwanya nkaani pa Nyumba iMfinjile.#4:5 INyumba iMfinjile: Vhaazya mu Ntantiho izya Mazwi aMajeni. 6Ahamuvhuuzya ahati, “Inga iwe we Mwana wa Mulungu, yisumbe pansi, mwe pe yisimviilwe mu Vhusimbe uVhufinjile kuuti, ‘UMulungu kwe avhalajizye avhahavhizya vhaakwe, kuuti vhakutone mu nyoovhe zyavho, inga utahabumile ishinama pi ivhwe nu kuvwalala.’#4:6 iZabuuli 91:11-12”
7UYeesu woope ahamuvhuuzya ahati, “Yisimviilwe havhili mu Vhusimbe uVhufinjile kuuti, ‘Utamulingaje uMWENE waaho uMulungu.’#4:7 iNkumbushizyo izya Ndajizyo 6:16”
8Pe uMukwalanzi ahamutwala uYeesu pi igamba pamwanya nkaani, ahamulanga uvhumwene vhwonti uvhwa mu nsi zyonti pooka nu vhushindamu vhwakwe, 9ahamuvhuuzya ahati, “Kwe nkupe vwonti ivi, inga wansugamilila nu kumpuuta.” 10UYeesu woope ahamwamula ahati, “Yeepa ipa, we Seetano! Yisimviilwe mu Vhusimbe uVhufinjile kuuti, ‘Umupuutaje uMWENE waaho uMulungu weeka, havhili, umuvhombelaje wuuyo weeka vhweleele.’#4:10 iNkumbushizyo izya Ndajizyo 6:13”
11Pe uMukwalanzi ahamuleha uYeesu pepaala, naluvhiilo avhahavhizya avha Mulungu vhahinza kumuvhombela.
UYeesu akutaliha imbombo iya kulumbiilila ku Galilaaya
(uMaaliko 1:14-15; uLuuka 4:14-15)
12Pe lwe uYeesu ayiivwa kuuti uYoohani uMwozyi vhamukunzile mu jeela,#4:12 uMataayi 14:3-12 aheepa mu Yudeeya, ahasogola mu shigavho isha nsi isha Galilaaya. 13Lwe uYeesu ali mu Galilaaya, aheepa mu nkaaya iya Naazaleeti, ahasogola kutendama mu nkaaya iya Kapelanawuumu. IKapelanawuumu nkaaya ye yili mu luvhazu mwa sumbi uwa Galilaaya, ku luvhazu ulwa nsi iya Zaabulooni ni ya Naafutaali. 14Zyávhombesile vhwevhulo, inga izwi lilunjishe lye uMulungu áyanzile kwi idala ilya mukuvhwi uYisaayi kuuti,
15“Insi iya Zaabulooni ni ya Naafutaali,
zili mwi idala ilya kusogola kwa sumbi,
kwi isyila ilya ijenje uYoolodaani.
Zili mu Galilaaya muula mwe vhakutendama vhe te Vhayuuda.
16Avhantu vhaala vhe vhakutendama mu shiisi,#4:16 Vhakutendama mu shiisi kwe kuuti vhakutendama mu vhutalamalandu.
vhavhulola uvhuzelu uvhupiti.
Vhoope vhe vhakutendama mu shiisi isha vhufwe,#4:16 Mu shiisi isha vhufwe kwe kuuti uvhufwe vhwe kwe kulehaana nu Mulungu.
uvhuzelu vhwavhahozezya.”#4:15-16 uYisaayi 9:1-2
17Kufuma ahavhaliilizyo iho, uYeesu ahataliha kukumusya kuuti, “Mupindushe uvhutalamalandu vhwinyu, mwe pe uvhumwene uvhwa Mulungu vhupalamiiye!”
UYeesu akuvhasaavhula avhasundikwa avha kwanda
(uMaaliko 1:16-20; uLuuka 5:1-11)
18Lwe uYeesu akujenda mu luvhazu mwa sumbi uwa Galilaaya, ahavhalola avhavuvhi avha nswi vhavhili, uSiimoni we izina ilyamwavho vhahatinji uPeeteli nu munine waakwe uAndeleeya. Vhahasumbilaga inyeelo zyavho mwa sumbi. 19UYeesu ahavhavhuuzya ahati, “Mundandate! Niine kwe mbavhiishe kuvha mwe vhavuvhi vha vhantu.#4:19 Avhavuvhi vha vhantu vhantu vhe vhakuvhungaaniha avhantu avhanji kufuma mu vhutalamalandu vhwavho nu kuvhatwala kwa Mulungu.” 20Pepaala, vhahazileha inyeelo zyavho, vhahamulandata.
21Lwe uYeesu asogola pilongolela, ahavhalola avhanine avhamwavho vhavhili, uYaakobu nu munine waakwe uYoohani, avhaana vha Zebedaayi. Vháali mwi ivhooti pooka nu taata waavho uZebedaayi, vhahalinganyaaga inyeelo zyavho. UYeesu ahavhiita vhoope, 22pepaala vhahalileha ivhooti nu taata waavho, vhahamulandata uYeesu.
UYeesu akusambiilizya avhantu nu kuvhaponia avhavhinu
(uLuuka 6:17-19)
23UYeesu ahazyunguulaga mu shigavho isha nsi shonti isha Galilaaya. Ahinjilaga mu masinagoogi#4:23 Amasinagoogi: Vhaazya isinagoogi mu Ntantiho izya Mazwi aMajeni. gaavho, umwo ahasambilizyaga avhantu nu kukumusya Izwi iLyinza ilya vhumwene uvhwa Mulungu nu kuvhaponia amavhinu gonti nu vhuyeyevhazu uvhwa mavhiila mu mavhiila. 24Pe inongwa zyakwe zihakumuha nkaani mu nsi yonti iya Siiliya. Avhantu vhahavhatwalaga avhavhinu na vha ntamwo izya mavhiila mu mavhiila vhonti. Muli ivho, vháliipo avha mpepo inkandamanu na vhe vháali ni shinzilisi na vhe vháhataliiye. Woope ahavhaponiaga vhonti. 25Pe ivhungaana ipiti ilya vhantu lihamulandata kufuma mu ntala izya mu Galilaaya ni zya mu Dekapooli#4:25 IDekapooli: Mu Shiyunaani kwe kuuti iNkaaya 10. Avhantu avhinji vhe vhahatendamaga mu nsi iyo vhatáamile Vhayuuda. ni zya mu Yelusaleemu ni zinji izya mu nsi iya Vhayuuda ni zya mwi isyila ilya ijenje uYoolodaani.
നിലവിൽ തിരഞ്ഞെടുത്തിരിക്കുന്നു:
uMataayi 4: nih
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2021 Wycliffe Bible Translators, Inc.