Matiw 5
5
Jesu satt pwooNaan sh'i bwut bwumm
1Kaarooh Jesu naah dw'uu gurum ni mwopp, bhi k'aa dum sh'i m'ee bwut bwumm, bhi tong nhighin. Zheppkamm khinyi mwopp ja kihpee nyi diy, 2bhi y'aa sh'in kamm mwopp kihh satt le,
3“Rettyit a mhi mwooh mwopp man pyaah keeru w'u dhighin riin,
p'ee dhengNaan a mhimwopp.
4Rettyit a mhi mwooh kaah maab mwasseh,
p'ee Naan p'ee p'ar ten'kihr mwopp.
5Rettyit a mhi mhi-kaahlokhomm,
p'ee a mwopp p'ee dheeh kaah yill ni.
6Rettyit a mhi mwooh kihh chakhar a shigrett,
p'ee Naan p'ee pihh nyi mwopp dhess.
7Rettyit a mhi mhi-kaahdhoonn,
p'ee Naan p'ee sh'in kaahdhoonn mwopp.
8Rettyit a mhi mwooh en mwopp noott l'uk,
p'ee mwopp p'ee naah Naan.
9Rettyit a mhi mhi-bheettnaar,
p'ee mwopp p'ee peet mwopp a zhepp khi Naan.
10Rettyit a mhi mwooh mwopp kihh le'zheell mwopp p'ee shigrett,
p'ee dhenglong khi Naan a mhimwopp.
11“Rettyit a mug'wuh kadmihh gurum mwopp kihh fullup wunn, mwopp kihh le'zheell wunn, yakhal mwopp kihh satt v'ur bii wu'bis w'u a dwungg kaah wuh lhiwaa a'n. 12Wu klihngshangg, w'u sh'in rettyit, p'ee lebhed keewu dhess pwetd kih dhengNaan, p'ee gyet mwopp le'zheell mhi-wanggshiiy w'u gyet mwopp ky'een wunn a kihhsheh zag.
Peebhangg kihh kiihn khi yill ni
(Mar 9:50; Luk 14:34-35)
13“A wunn a kiihn khi yill ni. Dhangg mhi kiihn shaall nook shangg, bhi mwopp p'ee sh'in a rangg kihh nyi tihh waa shangg dyi kop sat? Baah nyi kihh m'ee kyeenn dyi mou, dheeh mwopp p'ee kihkor nyi kihtekhell gurum mwopp lass kihh shiiy ruh.
14“A wunn a peebhangg khi yill ni. Tughuzyill w'u mwopp dyik kihdab bwum kihh mak zok sat mou. 15Yakhal baah mwopp kihh byill dlengwus mwopp kurum kong dyikihh mou; mwopp kihh dhen nyi a kih pee'dhen keera, a kihhsheh bhi kihh bhanggpee koohweeh w'u dhighin luh ni. 16A kihhsheh zag, yet tihh peebhangg keewu bhanggpee kihkyeen gurum mwopp, tihh mwopp naah dhakk'shin wu'rett keewu diy, bhi mwopp p'ee kwoob Puup wu w'u kih dhengNaan.
Kamm kaah W'aar mhi Musa
17“Tapp wu kihh naah seh wu le ih sam a p'ee t'u W'aar mhi Musa, kihh Pwoo khi Mhi-wanggshiiy mwopp mou; baah ih sam a p'ee t'u mwopp mou; ih sam a p'ee gam mwopp. 18Ih kihh satt a zeenn wunn, phikihtihngg kihh yill p'ee ji dhel, dhangg kooh reb m'ee shumm'ran kihmeh, kooh reb m'ee songg'ran dhighin W'aar mhi Musa ni p'ee la'kham mou, harr seeh kooh a meehrangg dhighin mwopp gam. 19Koohweeh w'u tep kooh a reb w'u katmett-weett dhighin w'aar ni, yakhal kamm gurum mwopp tihh wu'mwopp tep diy zag, bhi mwopp p'ee peet gwoh mhizeh ni a w'u katmett-weett dhighin dhenglong khi Naan. Dhangg koohweeh w'u kihh sh'in dhakk kihh w'aar ni, yakhal kihh kamm gurum mwopp, bhi mwopp p'ee peet nyi a wu'yon dhighin dhenglong khi Naan. 20P'ee ih kihh satt wunn, mihh dheng'pee shigrett keewu mett mhi Farisiiy mwopp kihh mhi Mhikamm-w'aar mwopp mou, bhi baah wunn p'ee cham dhel dhighin dhenglong khi Naan mou.
Kamm kaah tu'kaah
(Luk 12:57-59)
21“Wu klihng gyet mwopp satt mwooh gyetshak le, ‘Tapp ghi tu'kaah mou; koohweeh w'u mihh tu'kaah, bhi mwopp p'ee shandyeell gwoh ni.’ 22Weett kihhsheh bhi wu'an ih kihh satt wunn ih le koohweeh w'u sh'in tukhup kihh wu'nin bhi dyeell kaah nyi. Yakhal gwooh mihh satt wu'nin le, ‘Gag m'ee k'or wu'baan,’ bhi mwopp p'ee dum kihh nyi a tekhem To'ng-Mhi'nan. Dhangg gwooh mihh satt wu'nin le, ‘Gag m'ee naan'yaa!’ Bhi gwoh ni kihh mak dhel dhighin blengwus.
23“Pee'mhinyi, bhi mihh gha kaah w'us bii'zhukhum keegha kih ki'byin-bii'zhukhum, dhangg ghi kakkder rooh m'ee wu'nak kihh mee'bii kaah gha, 24bhi ghi yet bii'zhukhum keegha nhighin kihkyeen ki'byin-bii'zhukhum ni. Dum ghi bheettnaar gha kihh wu'nak dhangg ghi ji ghi w'us bii'zhukhum ni dhak.
25“Shep ghi klakk tu'dwakk shaardyeell keegha w'u kihh dum kihh gha luhdyeell bhi wu kudyi kih arr. Kihhsheh mou bhi nyi p'ee dum tupp gha sarr gudyeell, bhi gudyeell wu'nyi p'ee tupp gha sarr kwagtihb, bhi mwopp p'ee mak dum shakhat gha luh'shakhat. 26Ih kihh satt a zeenn gha, baah gha p'ee cham put luh'shakhat ni mou, seeh gha kwat kyes kwett, baah nini w'u p'ee taah dheeh.
Kamm kaah gaa
27“Wu klihng gyet mwopp satt le, ‘Tapp ghi sh'in gaa mou.’ 28Weett kihhsheh bhi wu'an ih kihh satt wunn ih le, koohweeh w'u mihh naah mat kihh chakhar gaa kihh nyi, bhi gwoh ni baa sh'in a gaa kihh mat ni dhighin phitukhup niy. 29Mihh yit gha w'u sarrsoh kihh l'e gha shigbis, bhi ghi pun ghi meng kyekk. Ai gyall ghi bhalang m'ee bheep shoopsak kihmeh, kad mihh'pee Naan kihh meng gha a kihhdihng dhighin blengwus. 30Yakhal mihh sarr gha w'u dihsoh kihh l'e gha shigbis, bhi ghi gab ghi meng kyekk. Ai gyall ghi bhalang m'ee bheep shoopsak kihmeh, kad mihh'pee Naan kihh meng gha a kihhdihng dhighin blengwus.
Kamm kaah tu'dyik
(Mat 19:9; Mar 10:11-12; Luk 16:18)
31“Mwopp kihh satt le, ‘Koohweeh w'u mihh tu'dyik mat niy, bhi ching tihh pihh ran'tudyik nyi.’#5:31 WSW 24:1 32Weett kihhsheh bhi wu'an ih kihh satt wunn ih le, koohweeh w'u tu'dyik mat niy, kadmihh baah a kaah gaa mou, bhi gwoh ni l'e tihh mat ni kihh sh'in a gaa diy. Yakhal koohweeh w'u mihh lapp mat w'u mwopp tu'dyik nyi seh bhi wu'nyi phi sh'in a gaa zag.
Kamm kaah choorbhellepp
33“A kihhsheh zag, wu klihng gyet mwopp satt mwooh gyetshak le, ‘Tapp ghi tep choorbhellepp w'u ghi sh'in mou; ghi kyeer choorbhellepp w'u ghi sh'in Naan.’ 34Weett kihhsheh bhi wu'an ih kihh satt wunn ih le, tapp wu kihh choorbhellepp maah mou, kooh lee; kooh a sh'i dhengNaan, p'ee nyi a taghamlong khi Naan; 35kooh sh'i yill ni, p'ee nyi a tagham l'e shiiy khi Naan; kooh sh'i Urshalima, p'ee nyi a khishikhitt khi Miskakhamm Wu'yon. 36Yakhal tapp ghi choorbhellepp sh'i kaah gha maah mou, p'ee baah ghi kihh mak buakhar kihh kooh shoopkaah gha kihmeh tihh dheeh wu'pyaah kooh wu'tihb diy mou. 37Yet tihh ‘Ee'h’ keewu dharr a kaah ‘Ee'h,’ yakhal ‘Haiyou’ keewu dharr a kaah ‘Haiyou.’ Kapp bii w'u mett mihhseh, bhi put a kihpee Gwoohbis diy.
Yit kop yit
38“Wu klihng mwopp kihh satt le, ‘Yit kop yit, yakhal aghaz kop aghaz.’#5:38 Put 21:24; Lev 24:20; WSW 19:21 39Weett kihhsheh bhi wu'an ih kihh satt wunn, tapp wu dharr g'u sh'in wu'bis wunn mou. Mihh menguh shud gha gihnn gha w'u sarrsoh, bhi ghi shikhir wu'zeh nyi zag. 40Yakhal mihh menguh kihh t'ang looh gha dyeell kaah bh'aar keegha, bhi ghi pihh lh'ir keegha nyi zag. 41Mihh m'ee gurum diy le'ching gha p'ee m'ang mwaan mhi kilomita kihmeh, bhi ghi dumdang nyi p'ee kilomita vel. 42Ghi pihh zhukhum gwooh dhang bii pwoo gha, yakhal tapp ghi shiih kih bii gwooh kihh t'ang lapp kaatt pwoo gha mou.
Wu wall wu'kob wuh mwopp
(Luk 6:27-28,32-36)
43“Wu klihng mwopp kihh satt le, ‘Ghi wall shaar'tong keegha; ghi shiih wu'kob ghah.’ 44Weett kihhsheh bhi wu'an ih kihh satt wunn ih le wu wall wu'kob wuh mwopp, yakhal wu kihh dhangNaan p'ee mwooh kihh le'zheell wunn. 45Mihh wu sh'in kihhsheh, bhi wunn p'ee kwed a zhepp khi Puup wu Naan w'u tihngg kih dhengg. P'ee kihh l'e tihh puus keeniy put k'aa kaah mhi-dhakk'wubis kihh mhi-dhakk'wurett, yakhal kihh l'e tihh fwan ji kaah mhi-shigrett kihh mhi-shigbis zag. 46Mihh wu kihh wall a mwooh kihh wall wunn kyekk bhi Naan diy le'wurett wunn p'ee nyi aa'? Mhi-lappwapp mwopp kihh sh'in a kihhsheh zag mou aa'? 47Yakhal mihh wu kihh togpee a kihh emnhikhin wu mwopp kyekk, bhi wu'wunn phi sh'in a mihyeh w'u mett mhi kakhar gurum mwopp? Ai kooh Seghen'gurum mwopp maah kihh sh'in a kihhsheh zag. 48Pee'mhinyi bhi yet tihh wu dhen a mhi-shin'dihhreh kaa Puup wu Naan w'u tihngg kih dhengg a gu-shin'dihreh se.”
നിലവിൽ തിരഞ്ഞെടുത്തിരിക്കുന്നു:
Matiw 5: Chakfem
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2022 Luke Initiative for Scripture Translation
Matiw 5
5
Jesu satt pwooNaan sh'i bwut bwumm
1Kaarooh Jesu naah dw'uu gurum ni mwopp, bhi k'aa dum sh'i m'ee bwut bwumm, bhi tong nhighin. Zheppkamm khinyi mwopp ja kihpee nyi diy, 2bhi y'aa sh'in kamm mwopp kihh satt le,
3“Rettyit a mhi mwooh mwopp man pyaah keeru w'u dhighin riin,
p'ee dhengNaan a mhimwopp.
4Rettyit a mhi mwooh kaah maab mwasseh,
p'ee Naan p'ee p'ar ten'kihr mwopp.
5Rettyit a mhi mhi-kaahlokhomm,
p'ee a mwopp p'ee dheeh kaah yill ni.
6Rettyit a mhi mwooh kihh chakhar a shigrett,
p'ee Naan p'ee pihh nyi mwopp dhess.
7Rettyit a mhi mhi-kaahdhoonn,
p'ee Naan p'ee sh'in kaahdhoonn mwopp.
8Rettyit a mhi mwooh en mwopp noott l'uk,
p'ee mwopp p'ee naah Naan.
9Rettyit a mhi mhi-bheettnaar,
p'ee mwopp p'ee peet mwopp a zhepp khi Naan.
10Rettyit a mhi mwooh mwopp kihh le'zheell mwopp p'ee shigrett,
p'ee dhenglong khi Naan a mhimwopp.
11“Rettyit a mug'wuh kadmihh gurum mwopp kihh fullup wunn, mwopp kihh le'zheell wunn, yakhal mwopp kihh satt v'ur bii wu'bis w'u a dwungg kaah wuh lhiwaa a'n. 12Wu klihngshangg, w'u sh'in rettyit, p'ee lebhed keewu dhess pwetd kih dhengNaan, p'ee gyet mwopp le'zheell mhi-wanggshiiy w'u gyet mwopp ky'een wunn a kihhsheh zag.
Peebhangg kihh kiihn khi yill ni
(Mar 9:50; Luk 14:34-35)
13“A wunn a kiihn khi yill ni. Dhangg mhi kiihn shaall nook shangg, bhi mwopp p'ee sh'in a rangg kihh nyi tihh waa shangg dyi kop sat? Baah nyi kihh m'ee kyeenn dyi mou, dheeh mwopp p'ee kihkor nyi kihtekhell gurum mwopp lass kihh shiiy ruh.
14“A wunn a peebhangg khi yill ni. Tughuzyill w'u mwopp dyik kihdab bwum kihh mak zok sat mou. 15Yakhal baah mwopp kihh byill dlengwus mwopp kurum kong dyikihh mou; mwopp kihh dhen nyi a kih pee'dhen keera, a kihhsheh bhi kihh bhanggpee koohweeh w'u dhighin luh ni. 16A kihhsheh zag, yet tihh peebhangg keewu bhanggpee kihkyeen gurum mwopp, tihh mwopp naah dhakk'shin wu'rett keewu diy, bhi mwopp p'ee kwoob Puup wu w'u kih dhengNaan.
Kamm kaah W'aar mhi Musa
17“Tapp wu kihh naah seh wu le ih sam a p'ee t'u W'aar mhi Musa, kihh Pwoo khi Mhi-wanggshiiy mwopp mou; baah ih sam a p'ee t'u mwopp mou; ih sam a p'ee gam mwopp. 18Ih kihh satt a zeenn wunn, phikihtihngg kihh yill p'ee ji dhel, dhangg kooh reb m'ee shumm'ran kihmeh, kooh reb m'ee songg'ran dhighin W'aar mhi Musa ni p'ee la'kham mou, harr seeh kooh a meehrangg dhighin mwopp gam. 19Koohweeh w'u tep kooh a reb w'u katmett-weett dhighin w'aar ni, yakhal kamm gurum mwopp tihh wu'mwopp tep diy zag, bhi mwopp p'ee peet gwoh mhizeh ni a w'u katmett-weett dhighin dhenglong khi Naan. Dhangg koohweeh w'u kihh sh'in dhakk kihh w'aar ni, yakhal kihh kamm gurum mwopp, bhi mwopp p'ee peet nyi a wu'yon dhighin dhenglong khi Naan. 20P'ee ih kihh satt wunn, mihh dheng'pee shigrett keewu mett mhi Farisiiy mwopp kihh mhi Mhikamm-w'aar mwopp mou, bhi baah wunn p'ee cham dhel dhighin dhenglong khi Naan mou.
Kamm kaah tu'kaah
(Luk 12:57-59)
21“Wu klihng gyet mwopp satt mwooh gyetshak le, ‘Tapp ghi tu'kaah mou; koohweeh w'u mihh tu'kaah, bhi mwopp p'ee shandyeell gwoh ni.’ 22Weett kihhsheh bhi wu'an ih kihh satt wunn ih le koohweeh w'u sh'in tukhup kihh wu'nin bhi dyeell kaah nyi. Yakhal gwooh mihh satt wu'nin le, ‘Gag m'ee k'or wu'baan,’ bhi mwopp p'ee dum kihh nyi a tekhem To'ng-Mhi'nan. Dhangg gwooh mihh satt wu'nin le, ‘Gag m'ee naan'yaa!’ Bhi gwoh ni kihh mak dhel dhighin blengwus.
23“Pee'mhinyi, bhi mihh gha kaah w'us bii'zhukhum keegha kih ki'byin-bii'zhukhum, dhangg ghi kakkder rooh m'ee wu'nak kihh mee'bii kaah gha, 24bhi ghi yet bii'zhukhum keegha nhighin kihkyeen ki'byin-bii'zhukhum ni. Dum ghi bheettnaar gha kihh wu'nak dhangg ghi ji ghi w'us bii'zhukhum ni dhak.
25“Shep ghi klakk tu'dwakk shaardyeell keegha w'u kihh dum kihh gha luhdyeell bhi wu kudyi kih arr. Kihhsheh mou bhi nyi p'ee dum tupp gha sarr gudyeell, bhi gudyeell wu'nyi p'ee tupp gha sarr kwagtihb, bhi mwopp p'ee mak dum shakhat gha luh'shakhat. 26Ih kihh satt a zeenn gha, baah gha p'ee cham put luh'shakhat ni mou, seeh gha kwat kyes kwett, baah nini w'u p'ee taah dheeh.
Kamm kaah gaa
27“Wu klihng gyet mwopp satt le, ‘Tapp ghi sh'in gaa mou.’ 28Weett kihhsheh bhi wu'an ih kihh satt wunn ih le, koohweeh w'u mihh naah mat kihh chakhar gaa kihh nyi, bhi gwoh ni baa sh'in a gaa kihh mat ni dhighin phitukhup niy. 29Mihh yit gha w'u sarrsoh kihh l'e gha shigbis, bhi ghi pun ghi meng kyekk. Ai gyall ghi bhalang m'ee bheep shoopsak kihmeh, kad mihh'pee Naan kihh meng gha a kihhdihng dhighin blengwus. 30Yakhal mihh sarr gha w'u dihsoh kihh l'e gha shigbis, bhi ghi gab ghi meng kyekk. Ai gyall ghi bhalang m'ee bheep shoopsak kihmeh, kad mihh'pee Naan kihh meng gha a kihhdihng dhighin blengwus.
Kamm kaah tu'dyik
(Mat 19:9; Mar 10:11-12; Luk 16:18)
31“Mwopp kihh satt le, ‘Koohweeh w'u mihh tu'dyik mat niy, bhi ching tihh pihh ran'tudyik nyi.’#5:31 WSW 24:1 32Weett kihhsheh bhi wu'an ih kihh satt wunn ih le, koohweeh w'u tu'dyik mat niy, kadmihh baah a kaah gaa mou, bhi gwoh ni l'e tihh mat ni kihh sh'in a gaa diy. Yakhal koohweeh w'u mihh lapp mat w'u mwopp tu'dyik nyi seh bhi wu'nyi phi sh'in a gaa zag.
Kamm kaah choorbhellepp
33“A kihhsheh zag, wu klihng gyet mwopp satt mwooh gyetshak le, ‘Tapp ghi tep choorbhellepp w'u ghi sh'in mou; ghi kyeer choorbhellepp w'u ghi sh'in Naan.’ 34Weett kihhsheh bhi wu'an ih kihh satt wunn ih le, tapp wu kihh choorbhellepp maah mou, kooh lee; kooh a sh'i dhengNaan, p'ee nyi a taghamlong khi Naan; 35kooh sh'i yill ni, p'ee nyi a tagham l'e shiiy khi Naan; kooh sh'i Urshalima, p'ee nyi a khishikhitt khi Miskakhamm Wu'yon. 36Yakhal tapp ghi choorbhellepp sh'i kaah gha maah mou, p'ee baah ghi kihh mak buakhar kihh kooh shoopkaah gha kihmeh tihh dheeh wu'pyaah kooh wu'tihb diy mou. 37Yet tihh ‘Ee'h’ keewu dharr a kaah ‘Ee'h,’ yakhal ‘Haiyou’ keewu dharr a kaah ‘Haiyou.’ Kapp bii w'u mett mihhseh, bhi put a kihpee Gwoohbis diy.
Yit kop yit
38“Wu klihng mwopp kihh satt le, ‘Yit kop yit, yakhal aghaz kop aghaz.’#5:38 Put 21:24; Lev 24:20; WSW 19:21 39Weett kihhsheh bhi wu'an ih kihh satt wunn, tapp wu dharr g'u sh'in wu'bis wunn mou. Mihh menguh shud gha gihnn gha w'u sarrsoh, bhi ghi shikhir wu'zeh nyi zag. 40Yakhal mihh menguh kihh t'ang looh gha dyeell kaah bh'aar keegha, bhi ghi pihh lh'ir keegha nyi zag. 41Mihh m'ee gurum diy le'ching gha p'ee m'ang mwaan mhi kilomita kihmeh, bhi ghi dumdang nyi p'ee kilomita vel. 42Ghi pihh zhukhum gwooh dhang bii pwoo gha, yakhal tapp ghi shiih kih bii gwooh kihh t'ang lapp kaatt pwoo gha mou.
Wu wall wu'kob wuh mwopp
(Luk 6:27-28,32-36)
43“Wu klihng mwopp kihh satt le, ‘Ghi wall shaar'tong keegha; ghi shiih wu'kob ghah.’ 44Weett kihhsheh bhi wu'an ih kihh satt wunn ih le wu wall wu'kob wuh mwopp, yakhal wu kihh dhangNaan p'ee mwooh kihh le'zheell wunn. 45Mihh wu sh'in kihhsheh, bhi wunn p'ee kwed a zhepp khi Puup wu Naan w'u tihngg kih dhengg. P'ee kihh l'e tihh puus keeniy put k'aa kaah mhi-dhakk'wubis kihh mhi-dhakk'wurett, yakhal kihh l'e tihh fwan ji kaah mhi-shigrett kihh mhi-shigbis zag. 46Mihh wu kihh wall a mwooh kihh wall wunn kyekk bhi Naan diy le'wurett wunn p'ee nyi aa'? Mhi-lappwapp mwopp kihh sh'in a kihhsheh zag mou aa'? 47Yakhal mihh wu kihh togpee a kihh emnhikhin wu mwopp kyekk, bhi wu'wunn phi sh'in a mihyeh w'u mett mhi kakhar gurum mwopp? Ai kooh Seghen'gurum mwopp maah kihh sh'in a kihhsheh zag. 48Pee'mhinyi bhi yet tihh wu dhen a mhi-shin'dihhreh kaa Puup wu Naan w'u tihngg kih dhengg a gu-shin'dihreh se.”
നിലവിൽ തിരഞ്ഞെടുത്തിരിക്കുന്നു:
:
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2022 Luke Initiative for Scripture Translation