Matthew 6
6
Jak nol
1 “Miqtang ma takhi ma jaqhal jak somlot nak som inn. Eshimal som inn jo miq eq nim ma jaqhal ta raaq phanin, etharin mungtan na tongtey nim Wa ching wang chamtho jaksom thang kap min angnin.”
2 “Nim aa miq ma chamli lang ko inn jo, takhi eq somtey tang mal synagogue nia miq lam o takhi eq nak som inn. Ning aa miqtang jakho o rapney aqhal miq ta takhi ma irimal somlo aa. Nga nim ma batphang, ning aa jaksom thang thaji sha kap sey ta. 3Etha o tho, nim aa miq ma chamli lang kot inn jo, nim jak qhak ko eq som aa jaksom shi nim jak qhik koma nak tasam inn. 4Eshimal ang ajo jaknol sha tapu eq angna. Etho phanrip siintey nim Wa eq nim ma jaksom thang ko phanin.”
Romtam chuk
(Luke 11:2–4)
5 “Nim aa romtam chu inn jo, takhi eq somtey tang mal nak som inn. Ning aa miq ma takhi rangma, synagogue na etho miq lam kang na lang eq romtam chu aa. Nga nim ma asing batphang, ning aa jaksom thang thaji jin kap sey ta. 6Etha o tho, nim aa romtam chu inn jo, him mong khok náng wang eq, kalung sak eq, takhi moq tey nim Wa ching wang romtam chu inn. Etho phanrip siintey nim Wa eq nim ma jaksom thang kho phanin.”
7 “Nim aa romtam chu inn jo, thongking tey mal nak jap jo inn. Daqhan raaq eq chu inn jo, ning rangwa tang aa utat eq aa ta ning aa tathin aa. 8Nim ning mal nak ang inn. Chammatakoi nim aa chu wey min jakho, nim ma chamlang raa aa sha nim Wa usam eq aa. 9Nim aa irimal chu inn:
‘Mungtan na tongtey hiqtang Wa,
Ba miing asang ta cham rangka aa,
10 Ba mungtan ri cham ka pha;
Rangmungtan na mal mingkang haq ro,
ba mongtham shi cham ang aa.
11 Thaney phaksat shi í ma kot phu.
12 Í ma thaja somtey tang thima í aa tolchak i.
Irimal í ma tho tolchak phu.
13 Etho í shi tari náng nak tathok phu,
etharin Thangwa shiwang thalun phu.’”
14 “Nim ma thaja somtey tang thima nim aa tolchak inn jo, mungtan na tongtey nim Wa shey tho nim sha tho tolchak eq phanin. 15Etharin, nim ma thaja somtey tang thima nim aa tolchak min ang inn jo, nim Wa shey tho nim ngarey sha tolchak moq angna.”
Wokcham tong
16 “Nim wokcham tong inn jo, takhi eq somtey mal nak tong inn. Ning aa miq ma takhi rangma, thalkho tasang hung aa tong aa. Nga nim ma asing batphang, ning aa jaksom thang thaji jin kap sey ta. 17Etha o tho, nim wokcham tong inn jo, nim aa nim sham sha jaqhal eq mit ching etho kho sha jaqhal eq shit ching. 18Irimal ang ajo, nim wokcham tong inn ta utang miq eq tho jin sam moq angna, etharin takhi moq tey nim Wa chen sam na. Etho phanrip siintey nim Wa eq nim ma jaksom thang ko phanin.”
Mungtan na likti ngin sang
(Luke 12:33,34)
19 “Iri mingkang roq nim rangma likti ngin sang shi nak thajoq shing inn, iri likti ngin sang raa jongbal aa tashit chakna etho ram eq phakna, etho ahut miq thu eq hutchu wanna. 20Etharin mungtan na nim rangma likti ngin sang thajoq shing inn jo, iri likti ngin sang raa jongbal eq jin tashit chak moq angna, ram eq phak moq angna etho ahut miq eq tho hut chuwan moq angna. 21Chammatakoi nim lik aa ngin baro angna, nim tin tho esho hun angna.”
Hanphung wallit
(Luke 11:34–36)
22 “Nim hanphung nalpang sha nim miik. Nim miik sha aqhal ang ajo, nim hanphung thaji sha alit angna. 23Etharin nim miik sha qhal moq ang ajo, nim hanphung thaji sha rangnak na angna. Nim alit sha anak ang ajo, anak sha rapney nak na!”
Shkewa etho likti ngin sang
(Luke 16:13; 12:22–31)
24 “Utang eq tho tangtey ani qhawa ma jin ang moq angna. Piq aa ashey sha miiksuk eq na etho washey shima tinmat eq na; etha ang moq o ang ajo, piq ashey jaktáng o jaqhal eq tong na etho washey tha shingchak eq na. Nim sha Shkewa ni likti ngin sang thani qha ma jin ang min ang nin.”
25 “Ethi rangma nga nim ma batphang, chamlang ling phaksat ta nim rollung rangma nak tathin inn etho chamlang sampey ni ta nim hanphung rangma nak tathin inn. Rollung sha phaksat wang eq tho ajong, etho hanphung sha khat wang eq tho ajong. 26Wo tang ri siin inn, ning aa khey moq, etho khan moq etho thajoq shing moq; etha otho mungtan na tongtey nim Wa aa ning ma taphak sak aa. Nim thang raa ning thang wang tho ahan! 27Nim wang irimal utang aa, barey tathin eq nim rollung sha jin thalot eq nin i?”
28 “Etho nim aa kho aa khat rangma cham ma tathin inn? Jatwang pilpung tang ri siin inn; eshey chamtho som moq etho khat tho wat moq. 29Etharin nga nim ma batphang, Solomon lungwang sha rapney tanglom ang eq tho, iri pilpung mal jaqhal sampey moq angta. 30Iri pilpung raa thaney aa atharang, inap aa wal náng tak chakna, etho Shkewa hun eshima tasampey aa. Ethi mal ang ajo, Shkewa nim ma iri phey náng eq rapney aqhal tasampey pha nin. Nim kam sha rapney aming!”
31 “Iri rangma, chamlang phakshat ni etho chamlang sampey ni ta nak tathin inn. 32Thongking tang aa hun iri tinthin raa tathin tak aa. Mungtan na tongtey nim Wa eq nim ma iri tang raa ràa aa ta usam eq aa. 33Etharin nim aa jakho Shkewa mungtan ni piq asing shi bi inn; etho piq aa nim ma iri tang thaji raa kopha nin. 34Ethi rangma, inap rangma nak tathin inn. Inap rangma inap aa hun tathin na. Thaney rangma thaney tinthin sha hun lali.”
നിലവിൽ തിരഞ്ഞെടുത്തിരിക്കുന്നു:
Matthew 6: Mmmm
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
CC BY-NC-ND 4.0