Мф 2
2
2 ГЛАВА
1 Кечӹ лӓкмӹ вел гӹц толшы ышан эдемвлӓ Иисуслан кымалыт. 13 Египетӹш кыргыжмаш. 16 Ирод Вифлеемӹштӹшӹ тетявлӓм пуштыкта. 19 Египет гӹц пӧртӹлмӓш.
1Ирод кугижӓлӓнӹмӹ годым Иудейӹштӹшӹ Вифлеемеш Иисус шачмыкы, кечӹ лӓкмӹ вел гӹц Иерусалимӹш ышан эдемвлӓ толыныт дӓ ядыныт: 2«Иудейвлӓн шачшы Кугижӓштӹ кышты? Вет мӓ кечӹ лӱлтмӹ велнӹ Тӹдӹн шӹдӹржӹм#2:2 «Кечӹ лӱлтмӹ велнӹ Тӹдӹн шӹдӹржӹм» – грек шамаквлӓм «Тӹдӹн шӹдӹр лӱлтмӹжӹм» манынат сӓрӓш лиэш. ужынна дӓ Тӹдӹлӓн кымалаш толынна». 3Тидӹм колмыкы, Ирод кугижӓ тыргыжланаш тӹнгӓлӹн дӓ тӹдӹн сага цилӓ Иерусалим. 4Халык лоштышы цилӓ архиерейвлӓм дӓ закон тымдышывлӓм поген, нӹнӹ гӹц ядыштын: «Христос кышак шачшашлык?» 5Нӹнӹжӹ келесенӹт: «Иудейӹн Вифлеемӹштӹ, вет пророк гач тенге сирӹмӹ:
6”Тӹнь, Вифлеем, Иудан мӱлӓндӹжӹ,
Иудан молы кого халавлӓжӹ гӹц нима донат изи ат ыл,
вет тӹнь гӹцет Мӹньӹн Израиль халыкемӹм
виден кешӹ Вуйлатышы лӓктеш”».#2:6 Мих 5:2.
7Тӹнӓм Ирод ышан эдемвлӓм ӹшке докыжы йӹвӹрт ӱжӹн дӓ нӹнӹ гӹц шӹдӹр лӓкмӹ жепӹм пӓлен нӓлӹн. 8Вара нӹнӹм Вифлеемӹш колтен дӓ келесен: «Кедӓ дӓ Тетя гишӓн цилӓ пӓлен нӓлдӓ. Тӹдӹм кӹчӓл момыкыда, мӹлӓмӓт увертӓрӹдӓ, тӹнӓм мӹнят Тӹдӹлӓн кымалаш кеем». 9Кугижӓн попымыжым колыштмыкы, нӹнӹ корныш лӓктӹнӹт. Кечӹ лӱлтмӹ велнӹ ылмышты годым ужмы шӹдӹрӹштӹ нӹнӹн анзылны кеен, а вара, Тетя турешкӹ шомыкы, цӓрнен шагалын. 10Шӹдӹрӹм ужмыкышты, ышан эдемвлӓ пиш когон сусу линӹт. 11Нӹнӹ пӧртӹш пыренӹт, Ӓзӓ дон Мария Ӓвӓжӹм ужыныт, кымык вазын, Тетялӓн кымалыныт. Вара нӹнӹ пайдаштым лыктыныт, Тетялӓн шӧртньӹм, ладыным дӓ смирнӓ ӱм пуэнӹт. 12Ирод докы пӧртӹлӓш ак кел гишӓн шижтӓрӹмӓш нӹнӹлӓн омынеш кайын, седӹндон ӹшке мӱлӓндӹшкӹштӹ вес корны доно кенӹт.
13Ышан эдемвлӓ кемӹкӹ, теве Иосифлӓн омынешӹжӹ Господьын Ангелжӹ кайын дӓ попен: «Кӹньӹл, Тетям дӓ Тӹдӹн Ӓвӓжӹм сагаэт нӓл дӓ Египетӹш кыргыж, пӧртӹлӓш шӱдӹмешкем, тӹшток ли. Ирод вет, пушташ шанен, Тетям кӹчӓлӓш тӹнгӓлеш». 14Иосиф кӹньӹлӹн, йыдым Тетям дӓ Тӹдӹн Ӓвӓжӹм сагажы нӓлӹн дӓ Египетӹш кеен. 15Ирод колымешкӹ, тӹшток ылын. Тенге пророк гач Господьын попымыжы лиӓлт шон. Пророк попен: «Мӹнь Ӹшке Эргемӹм Египет гӹц ӱжӹнӓм».#2:15 Ос 11:1.
16Ышан эдемвлӓн алталымыштым ужмыкы, Ирод когон шӹдешкен. Вифлеемӹштӹ дӓ тӹ лишнӹшӹ ӹлемвлӓштӹ кок иӓш дӓ тӹшец изирӓк цилӓ эргӓш тетям пушташ ӹшке эдемвлӓжӹм колтен. Шӹдӹр лӓкмӹ жепӹм тӹдӹ ышан эдемвлӓ гӹц пӓлен нӓлӹн. 17Тенге Иеремий пророк гач келесӹмӹ лиӓлт шон, тӹдӹ попен:
18«Рамашты юк шакта, мӓгӹрӹмӓш, урмыжмаш
дӓ ясын саслымаш.
Рахиль ӹшке тетявлӓжӹ верц мӓгӹрӓ
дӓ ӹнежӹ тырлы, вет нӹнӹ уке ылыт».#2:18 Иер 31:15.
19Ирод колымыкы, Египетӹштӹ Иосифлӓн омынешӹжӹ Господьын Ангелжӹ кайын 20дӓ попен: «Кӹньӹл, Ӓзӓм дӓ Тӹдӹн Ӓвӓжӹм нӓл дӓ Израиль мӱлӓндӹш ке, вет Тетян йӓнгжӹм нӓлӓш шанышывлӓ коленӹт». 21Иосиф кӹньӹлӹн, Тетям дӓ Тӹдӹн Ӓвӓжӹм сагажы нӓлӹн дӓ Израиль мӱлӓндӹш пӧртӹлӹн. 22Но Иудейӹштӹ Ирод вӓреш Архелай эргӹжӹ кугижӓлӓнӹмӹ гишӓн колмыкы, тӹшкӹ кеӓш лӱдӹн, а омын гач шижтӓрӹмӹкӹ, Галилей кымдемӹш кен. 23Миэн шомыкыжы, Назарет лӹмӓн халашты ӹлӓш тӹнгӓлӹн. Тенге пророквлӓ гач келесӹмӹ «Тӹдӹ Назорей маналташ тӹнгӓлеш» манмы шокталтын.
നിലവിൽ തിരഞ്ഞെടുത്തിരിക്കുന്നു:
Мф 2: УС
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Библим сӓрӹшӹ институт, Хельсинки 2014