مَتّی 10

10
اون ایکّی حَواری
1عیسا اون ایکّی شاگردینی اؤز یانینا چاغیردی و اوللارا اِقتدار وئردی تا شَریر روح‌لاری یازّیا چاخارتالّار و واری رَقم مَریضلیگ و ناخوشلیگی شفا وئرَلَّر. 2اون ایکّی شاگردینگ آدلاری کی ائله او اون ایکّی حَواری دیرلار، بوللاردیر: بیرینجیسی شَمعون، کی پِطرُس چاغیریلیر، و پِطرُسینگ کاکاسی آندریاس، زِبِدی‌نینگ اوغوللاری یَعقوب و یوحَنّا، 3فیلیپُس و بَرتولْما؛ توما و باج ییغَن مَتّا؛ حَلْفای اوغلو یَعقوب و تَدّای؛ 4وَطنپرست شَمعون و یَهودا اَسخَریوط کی عیسایی اَله وئردی.
حَواری‌لارینگ مأموریتی
5عیسا بو اون ایکّی نفری یوللادی و اوللارا فرمان وئردی و دئدی: «غیری‌یهودی‌لار آراسینا گئدمَینز و سامرلی‌لَر شَهرلَری‌نینگ هئچ بیری ایچینه گئدمَینز. 6بلکی تارئ خَلخی‌نینگ ایتمیش قویون‌لاری یانینا گئدینز. 7و گئتدیگینز یولدا اعلام ائدینز و دئیینز: ”گؤی پادشاه‌لیگی کی ائله تارئ پادشاه‌لیگی دیر، یاخین دیر.“ 8مَریض‌لَری شفا وئرینز، اؤلولَری دئرّیدینز، جُذاملی‌لَری شفا وئرینز و شیطانلی روح‌لاری آداملاردان یازّیا چیخارتینز. مُفت اَله گتیرمیشَینز، مُفت دا وئرینز. 9هئچ طلا، نُقره یا مِس سِکّه‌سی بئلی‌باغینزدا اؤزونز اینن گؤتورمَینز. 10و یول ایچی نه توربا گؤتورونز، نه اضافه رَخت، نه آیاق‌قابی، نه ده اَل آغاجی. چونکی فَحله‌نینگ روزیسی اؤنونگ حَقّی دیر. 11هر شَهره یا کَنده کی گئدیرَینز، اؤردا بیر امیدلی آدام بولینز و اؤردان گئدَنَنچاز، اؤردا قالینز. 12بیر ائوه گئدَنده، سالام دئیینز. 13او اوبا لایق اولسا، سلامینزینگ بَرکتی اوللار اوستونده قالار. آما لایق اولماسا، سلامینزینگ بَرکتی اؤزونزه دؤنَر. 14اگر ده کی بیر کَس سیزی یوئودمیا یا دا سیزینگ سؤزلَرینزه قولاق آسمایا، او ائودَن یا او شَهردن یازّیا چیخَنده، اؤرانینگ تورپاقینی اؤز قیچینزدَن سیلکینز تا اوللار ضدّینه بیر شهادت اولا. 15گرچَکینی سیزه دئییرم کی قیامت گؤنونده، جَزا تَحمّلی، سُدوم و غُمورَه شَهرلَری ایچی آسانتر اولور تا او شَهر ایچی.
جور و جَفا
16«باخینز، من سیزی قویون‌لار له‌یین، قوردلار آراسینا یوللاییرام. پس ایلان له‌یین هوشکار و گؤی‌اَرچین له‌یین مَعصوم اولینز. 17اؤزونزو خَلخدن گؤزله‌یینز، چونکی اوللار سیزی دادگاه‌لارا تَحویل وئره‌رلَر و عبادتگاه‌لاریندا سیزه شلّاق وورالّار، 18و سیز، منیم بالاما والی‌لار و پادشاهلار حُضورونا چَکیلَرَینز تا منیم باره‌مده، اوللارا و غیری‌یهودی‌لارا شهادت وئرینز. 19اوندا کی اوللار سیزی تَحویل وئریرلَر، نگران اولمانز کی نه‌یین دانیشاسینز و نه دئیه‌سینز، چونکی او موقعده، هَرنه‌یی کی دئیه‌سینز سیزه وئریلَر. 20چونکی دانیشان سیز ده‌ییلَینز، بلکی سیزینگ گؤیده‌کی بووآینزینگ روحو دور کی سیزینگ طَریقینزدن دانیشیر. 21کاکا، کاکایی تَحویل وئره‌ر تا اؤلومه گئده، و بووآ، اؤز اولادینی. اولادلار اؤز آنا بووآلاری‌نینگ ضدّینه تورارلار آیاقی و اوللاری اؤلومه وئره‌رلَر. 22واری‌کَس منیم آدیم خاطرینه سیزدَن نفرت وارلاری اولور، آما او آدام کی آخیرانچاز طاقت ائده، نجات توتار. 23بیر شَهرده سیزه جَفا ائدَنده، اویانداکی شَهره قَچینز. گرچَکینی سیزه دئییرم کی تا اؤز مَملکتینزینگ واری شَهرلَریندن گچمه‌میشَینز، انسان اوغلو گلَر.
24«نه شاگرد، اؤز اُستادیندان اوخاری دیر نه ده نوکر، اؤز اَربابیندان. 25شاگرد ایچی اؤز اُستادی له‌یین اولماگ و نوکر ایچی، اؤز اَربابی له‌یین اولماگ کفایت ائدیر. اگر اوبانینگ اَربابینی بِعِلزِبول کی ائله شیطان دیر، چاغیرمیشلار، ناغاد آرتیق اؤنونگ اوباسی آدامینی بَدنام ائده‌رلَر.
کیمدَن قورخاسینگ
26«پس اوللاردان قورخماینز، چونکی هئچ اؤرتولو زاد یوخدور کی آچیلمیا و هئچ پناه اولونموش زاد یوخدور کی آله‌یین اولمایا. 27اؤنو کی من قَرَنگیده سیزه دئییرم، ایشّیقده دئیینز و قولاقینزدا یوآش دئدیگی‌یی، پُشت‌باملاردان، اعلام ائدینز.
28«اوللاردان کی بَدنی اؤلدورورلَر آما روحو اؤلدوره بیلمه‌ییرلَر قورخمانز. تارئ‌دان قورخینز کی هم بَدنی، هم ده روحو جَهنّمده نابود ائده بیلیر. 29بئیه ایکّی دانا سیرچه‌نینگ قیمتی بیر قَره پولدن آرتیق دیر؟ با بو حال تا گؤیده‌کی بووآینزینگ خواستی اولمایا، اوللارینگ بیرسی ده یئره دؤشماز. 30حتّی باشینزینگ تیکی تَک تَک ساییلمیش، 31پس هئچ قورخماینز؛ سیزینگ اَرزشینز بیر هَزَره قوشدان آرتیق دیر!
32«هَرکَس خَلخ یانیندا، دیله گتیره کی منه تَعلّق واری، من ده گؤیده‌کی بووآم یانیندا دیله گتیره‌رَم کی او منه تَعلّق واری. 33آما هَرکَس خَلخ یانیندا منی حاشا ائده، من ده اؤز گؤیده‌کی بووآم یانیندا اؤنو حاشا ائده‌رَم.
عیسایا لایق اولماگ
34«گمان ائدمَینز کی من گلمیشَم تا یئر اوستونه صُلح گتیرَم. گلمه‌میشم تا صُلح، بلکی تا قیلیج گتیرَم. 35من گلمیشَم کی، اوغلو بووآسی اینان، قیزی آناسی اینان و گَلینی قاین‌آناسی اینان ضدّ ائدَم. 36و بیر آدامینگ دشمنلَری، اؤز اوباسی آدامی اولور. 37هَر کَس کی بووآسینی یا دا آناسی مَنی چوخ سئدیگیندَن آرتیق چوخ سئیه، منیم لیاقتیمی یوخو، هَر کَس ده کی اؤز اوغلونو یا دا قیزینی مَنی چوخ سئدیگیندَن آرتیق چوخ سئیه، منیم لیاقتیمی یوخو. 38هَر کَس کی اؤز صَلیبینی گؤتورمیه و منیم آردیم سورا گلمیه، منیم لیاقتیمی یوخو. 39هَر کَس کی سئیه اؤز جانینی ساخلایا، اؤنو اَلدن وئره‌ر؛ آما هَر کَس کی منیم خاطریمه اؤز جانیندان گچه، اؤنو ساخلایار.
40«هَر کَس سیزی قبول ائده، منی قبول ائدیر، و هَر کَس کی منی قبول ائده، منی یوللایانی قبول ائدیر. 41او کی بیر پیغمبری، پیغمبر اولدوگو سَبرسینه قبول ائده، بیر پیغمبر اَجرینی آلار و او کی بیر صالح آدامی، صالح اولدوگو سَبرسینه قبول ائده، بیر صالح آدامینگ اَجرینی آلار. 42و هَر کَس، منیم شاگردلَریمینگ ائنگ کوچوک‌لاری‌نینگ بیرینه، شاگرد اولدوگو سَبرسینه، حتّی بیر پایلا یَخ سو وئره، گرچَکینی سیزه دئییرم، اصلاً اَجرسیز قالماز.»

നിലവിൽ തിരഞ്ഞെടുത്തിരിക്കുന്നു:

مَتّی 10: QII

ഹൈലൈറ്റ് ചെയ്യുക

പങ്ക് വെക്കു

പകർത്തുക

None

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക