ရှာန်လုကာ 4
4
အခန်း (၄)
လှည့်စားသဘင်းနာတေခံသထှာဘင်း
(ရှာန်မဿဲ ၄:၁-၁၁။ ရှာန်မာကု ၁:၁၂-၁၃)
1စီးမှါခ့်ခါ ကိုယ်တော်ယေရှုကား ဉာဏ်အလင်းတော်ယောက် အတူတူငှါနင်းဘန်းနာ ဂျော်ဒန်မြစ်ဟက် ဒီဟာန်းဘန်း ဉာဏ်အလင်းတော် ဦးဆောင်သဘန်းနာ သမီဆာထုတ်လားစစ်ပင်းအရပ်ပါ လာန်ဘဲမှာ။ 2အန်ဘင်းနေရာဘေ ကိုယ်တော်ယေရှုကား မာရ်နတ်လှည့်စားသဘင်းတေ မာန်းရာတ်ဆီနူထုတ်ကွန်း ခံဒီထှာမှာ။ အန်ဘင်းမာန်းရာတ်အတွာန်းဘေ ကိုယ်တော်ယေရှုကား ဟမာန်ကစဲ အယုတ်ညယ်နင်းဘင်းအတွာတ် အန်ဘင်းမာန်းရာတ်ဆွန်မှါခ့်ခါ အကြီးကျယ်ယုတ်ခေါ့ပ်နီမှာ။
3မာရ်နတ်ကား ကိုယ်တော်တေ “နာန်ကား ဘုရားရှာန်ဘင်းဆာထှာဘန်းကား အဘင်းလုံးကရှီတေ ပေါင်မုန့်ထှာကွန်း ငှေါရာန်” ညယ် ငှေါရာန်မှာ။
4အန်၌မှါခ့်ခါ ကိုယ်တော်ရီးဒါး “ကျမ်းကျိန်းဘေ ‘သမီဆာကား ယုတ်တင်စားနူဆယောက် အဆာတ်စာနင်းလားအချီရား’ ညယ် ရေးသကာပဲမှာ” ညယ် မိန့်တော်မူသမှာ။
5စီးမှါခ့်ခါ မာရ်နတ်ကား ကိုယ်တော်ဒေ အကြီးကျယ်မြန့်သဘင်း ကယာစောက်ပါကော်လာန်ဘဲဘန်း ကမ္ဘာစောက်ပေငှါဘင်းနိုင်ငံအားလုံးတေ ခဏဆရောက် ကာရာန်မှာ။ 6စီးမှါခ့်ခါ မာရ်နတ်ကား ကိုယ်တော်ဒေ “အဘင်းနိုင်ငံအားလုံးတေ အုပ်ချုပ်သရန်ဘင်း အခွာမ်းအာဏာယောက် စည်းစိမ်ဥစ္စာတေဒေ နာန်တေ ငါအီကူ။ ဟမာန်တွာတ်ငှေါဘန်းတာတ်ငှေါ အန်ဘင်းနာတေကား ငါတေ အီပဲစီးဘန်းထှာဘင်းအတွာတ် ငါအီကာတ်ပင်း ဟာဟမဲဒေစါန်းငှေါဒီ ငါအီရန်မှာ။ 7အမှာတွာတ် ငါတေဟလာန်းငုတ်ပန်း ဝိုင်သဘန်းကား အဘင်းနာတေဒေ နာန်နင်းအီကူ” ညယ် ငှေါမှာ။
8အန်နိမ်စါန်းငှေါဒီ ကိုယ်တော်ကား “ကျမ်းကျိန်းနောင်းဘေ ‘နာန်အရှာန်ထှာဘင်း ဘုရားရှာန်တစ်ပါးတည်းတေ၌ဆာ ဝိုင်သထှာဘန်း ဟိန်အမှုတေဒေ၌ဆာ အွန်ထှာကူ’ ညယ် ရေးသကာပဲမှာ” ညယ် မာရ်နတ်တေ ပြန်သဘန်းငှေါရာန်မှာ။
9ပန်းနူ မာရ်နတ်ကား ကိုယ်တော်ဒေ ဂျေရုဆလင်မြို့ဘေငှါဘင်း ဗိမာန်တော်အမြာန့်တုံန်းပါ ကော်လာန်ဘဲဘန်း “နာန်ကား ဘုရားရှာန်ဘင်းဆာထှာဘန်းကား အဘင်းဟက် ဝါးအက်နာန်။ 10ကျမ်းကျိန်းနောင်းဘေ
‘ဘုရားရှာန်ကား နာန်တေ စောင့်ရှောက်သဒင် ဟိန်ဘင်းမဲဘင်းဟမန်းတေဒေ အမိန့်အီကူ။
11နာန်တာတေဒေ လုံးကရှီတေယောက် အထိသကွန်း
အန်တာတ်သဟူးယောက် ဖင်ပဲကြီးကလား’ ညယ် ရေးသပဲဘင်းအတွာတ် နာန်ကား ကနာကလားအချီရား” ညယ် ငှေါမှာ။
12အန်၌မှါခ့်ခါ ကိုယ်တော်ယေရှုရီးဒါး “ကျမ်းကျိန်းနောင်းဘေ ‘နာန်အရှာန်ထှာဘင်း ဘုရားရှာန်ဒေ အစမ်းသပ်သလူဝါး’ ညယ် ရေးသပဲမှာ” ညယ် မိန့်တာန်မှာ။
13မာရ်နတ်ရီးဒါး ကိုယ်တော်ဒေ နည်းမျိုးစုံယောက် ဖြားယောင်းသွေးဆောင်သဘန်း စီးမှါခ့်ခါ ကိုယ်တော်ဟက် ပူလာန်ဘဲဘန်း ပန်းနူအခွာမ်းအရေး လူဟာန်းကူဘင်းတေ ဒဲဘန်းနင်းဟာန်းမှာ။
ကိုယ်တော်ကား ဂါလိလဲပြေဘေ စသဘန်းအမှုတော်အွန်ဘင်း
(ရှာန်မဿဲ ၄:၁၂-၁၇။ ရှာန်မာကု ၁:၁၄-၁၅)
14စီးမှါခ့်ခါ ကိုယ်တော်ယေရှုကား ဉာဏ်အလင်းတော် လမ်းကာဘင်းအတွာတ် ဂါလိလဲပြေပါ ပြန်သဘန်းကြွသဟာန်းမှာ။ ဟိန်ဘင်း ဆတာန်းတေရီးဒါး နေရာအနှံ့ ပြန့်သနင်းမှာ။ 15ကိုယ်တော်ယေရှုကား ဓမ္မာရုံတေဘေ#4:15 ဓမ္မာရုံ - ဓမ္မာရုံငှေါဘင်းနာကား ဂျူးသမီဆာတာတ် စုသဘန်း ဆုစိန်တင်၊ ကျမ်းကျိန်းကျယ်တင်၊ အန်တာတ်ယုံကြည်သဘင်းတေဒေ ဆွောန်သကာဒင်ယောက် ဘုရားရှာန်ဒေ ဝိုင်သဘင်း အဆောက်အအုံတုံန်းထှာမှာ။ ငှေါကာဆွောန်သကာအီမှါခ့်ခါ သမီဆာတာတ်ကား ဟိန်ဒေ အကြီးကျယ်ချီးမွမ်းသကြီးမှာ။
နာဇရက်မြို့ဆားတာတ်ကား ကိုယ်တော်ဒေငြာမ်းပယ်သဘင်း
(ရှာန်မဿဲ ၁၃:၅၃-၅၈။ ရှာန်မာကု ၆:၁-၆)
16စီးမှါခ့်ခါ ကိုယ်တော်ယေရှုကား ဟိန်တုံန်းရီဘင်း နာဇရက်မြို့ပါ ဒီဟာန်းမှာ။ ဥပုသ်မာန်းရာတ်ပေ ကိုယ်တော်ကား ဓမ္မာရုံပါ ဟိန်လာန်နေကြအတိုင်း လာန်ဘန်း ကျမ်းကျိန်းဒေ ကျယ်ကူညယ် စပ်နာန်မှာ။ 17စီးမှါခ့်ခါ ကိုယ်တော်နင်း ပရောဖက်ဟေရှာယ ကျမ်းကျိန်းဟလောက်တေ အီရာန်မှာ။ ကိုယ်တော်ကား ကျမ်းကျိန်းဟလောက်တေ ဖွာမ်းတာန်မှါခ့်ခါ အန်နိမ်ရေးသပဲဘင်း ကျမ်းကျိန်းဒေ ကတုံန်ငါန်မှာ။ 18စီးမှါခ့်ခါ ကိုယ်တော်ကား
“ဆာန်းရဲဆားတာတ်နင်း ဆတာန်းမလဲတေ ငှေါကာဒင် ငါတေဘုရားရှာန်ကား မယ်ပဲဘင်းအတွာတ်
အရှာန်ဘင်း ဉာဏ်အလင်းတော်ကား ငါယောက်အတူတူငှါဘန်းနင်းမှာ။
ဘုရားရှာန်ကား အကျဉ်းအက်နင်းဘင်းဆိတ်တာတ်တေ လွောပ်သစိန်းဒင်၊
မိတ်တူရှီအကတုံန်ဘင်းဆိတ်တာတ် ပြန်သဘန်းကတုံန်စိန်းဒင်ယောက်
ဒုက္ခထုတ်ပန်းနင်းဘင်းဆိတ်တာတ် လွောပ်သကြီးဘန်းငှေါဘင်းတေ
ဟောသကာဒင် ငါတေတာတ်နီလားထှာမှာ။
19အရှာန်ကား ဟိန်ဘင်းသမီဆတာတ်တေ ကရုဏာတော်ကာကူဘင်း
အချိန်ထှာမှာငှေါဘင်းတေ ကြေငြာသဒင် ငါတေတာတ်နီလားထှာမှာ” ညယ် ထှာမှာ။
20စီးမှါခ့်ခါ ကိုယ်တော်ယေရှုကား အန်ဘင်းကျမ်းကျိန်းဒေ ဟလောက်ပန်း ဓမ္မာရုံတာဝန်ခံနင်း အီစီးဘန်းနာ ထုံးရာန်မှာ။ ဓမ္မာရုံနောင်းဘင်း သမီဆာတေရီးဒါး ကိုယ်တော်ယေရှုတေ ယူစိန်စာတ်ပန်း နင်းကြီးရာန်မှာ။ 21စီးမှါခ့်ခါ ဟိန်ကား အန်တာတ်တေ “ဟနိမ်သက်ပူရာန်ဘင်း ကျမ်းကျိန်းတေကား အရာတ်မှါတ် အဟုတ်မလပ် ထှာရီဘန်း” ညယ် မိန့်သမှာ။ 22ကိုယ်တော်ယေရှု အံ့ဩသထာတ်မဲဘင်း တူးတေအတွာတ် မာန်ဒါတ်မိသနင်းကြီးရာန်မှာ။ အန်တာတ်ကား “အဘင်းဆိတ်ကား ယောသပ်ဆာအချီနော်” ညယ် အချန်းချန်း ငှေါကြီးမှာ။
23အန်၌မှါခ့်ခါ ကိုယ်တော်ရီးဒါး “‘အုပ်ဆရာကြီးကား ဟိန်ကိုယ်တိုင်အရာန် ကုသထှာကူ’ ငှေါဘင်းတူးနိမ် ‘ကပေရနောင်မြို့ဘေ နာန်အွန်နီဘင်းတေ အလေသက်ပူရီဘင်းအတိုင်း နာန်မြို့ထှာဘင်း အဘင်းဘေရီး အွန်’ ညယ် ဟနိမ်ကား ငါတေ အဟုတ်မလပ်ငှေါကြီးကူ” ညယ် မိန့်သမှာ။
24ကိုယ်တော်ကား ဆာတ်သဘန်း “ဟနိမ်တေ ငါချီလားတေငှေါထှာဘန်းကား၊ ဟာဘင်းပရောဖက်တာတ်တေဆဲ ကိုယ့်မြို့ဘင်း သမီဆာတာတ်ကား အလက်ခံသကြီးရား။ 25ငါပြန်သဘန်း ချီလားတေ ငှေါထှာဘန်းကား ပရောဖက်ဧလိယလာတ်ထာတ်မှါခ့်ခါ ဆွန်းပီးပိုင်း ဟလာန်းခေါင်သဘင်းအတွာတ် တစ်ပြေလုံး အငတ်ဘေးဒုက္ခ ခံသကြီးရီထှာမှါခ့်ခါ အစ္စရေးပြေဘေ မုဆိုးမတေ ကလောင်းတုံန်းငှါရီမှာ။ 26အန်နိမ်စါန်းငှေါဒီ ဘုရားရှာန်ကား ဧလိယတေ အစ္စရေးပြေဘေငှါဘင်း မုဆိုးမတေပါ ကူညီသဒင် တာတ်ထှာကူဘင်းအစား ဇိဒုန်ပြေဘေငှါဘင်း ဇရတ္တမြို့ဘေငှါဘင်း ဂျူးသမီဆာအချီဘင်း မုဆိုးမဟော်ဝါပါ၌ဆာ ကူညီသဒင် တာတ်နာန်မှာ။ 27ပရောဖက် ဧလိရှဲခေတ်မှါခ့်ခါရီးဒါး အစ္စရေးပြေဘေ ကမာတုံန်းရောဂါဆယ်တေ ကလောင်းတုံန်းငှါရီမှာ။ အန်နိမ်စါန်းငှေါဒီ ဧလိယကား အန်တာတ်နောင်းဟက် ဟာဟမဲတေစဲ အကုသအီရီညယ် ဆီးရီးယားပြေဘေငှါဘင်း ဂျူးသမီဆာအချီဘင်း နေမန်ဟော်ဝါ တေ၌ဆာ ကုသအီမှာ” ညယ် မိန့်သမှာ။
28ကိုယ်တော်ယေရှု ငှေါဘင်းတူးတေဒေ သက်ပူကြီးမှါခ့်ခါ ဓမ္မာရုံနောင်းဘင်း သမီဆာတေကား အကြီးကျယ်တင်းဟော့ပ်ကြီးမှာ။ 29အမှာတွာတ် အန်တာတ်ကား ရဲဘန်း ကိုယ်တော်ဒေ မြို့ပြာန်ပါ ငါတ်ပူကြီးဘန်း ချောက်ကမ်းပါးစောက်ဟက် နူအက်တင် မြို့တည်သပဲဘင်း ကယာပိုင်းပါ ကော်လာန်ဘဲကြီးမှာ။ 30အန်နိမ်စါန်းငှေါဒီ ကိုယ်တော်ယေရှုကား သမီဆာအုပ်နောင်းဟက် ဖြတ်သဘန်း ကြွသလာန်ဘဲမှာ။
အမဲဘင်းနနူဒေငါတ်ပူဘင်း
(ရှာန်မာကု ၁:၂၁-၂၈)
31စီးမှါခ့်ခါ ကိုယ်တော်ကား ဂါလိလဲပြေဘေငှါဘင်း ကပေရနောင်မြို့ပါ လာန်ဘန်းနာ ဥပုသ်မာန်းရာတ်မှါ့ခ်ခါ ဓမ္မာရုံဘေ ဆွောန်သကာ ဟောသကာဘန်းနင်းမှာ။ 32ကိုယ်တော်ကား အခွာမ်းအာဏာတေယောက် ဟောသကာ ဆွောန်သကာဘင်းအတွာတ် သမီဆတာတ်ကား ဟိန်ဆွောန်သကာ အီဘင်းနာတေဒေ အံ့ဩသဘန်း ချီးမွမ်းသကြီးမှာ။
33အန်ဘင်းဓမ္မာရုံနောင်းဘေ အမဲဘင်းနနူကပ်ပန်းနင်းဘင်း သမီဆာဟော်ဝါငှါမှာ။ အန်ဘင်းဆိတ်ကား ကိုယ်တော်ဒေ 34“ဟေး၊ နာဇရက်မြို့ဆားယေရှု၊ နာန် အလေတေ ဟာနိမ်အွန်ကူတေ။ အလေတေ ဖြတ်ဆီးသကူညယ်ဒီလားရယ်။ နာန် ဟာဟမဲငှေါဘင်းနာဒေ ငါမိန်းရှာတ်ခါမှာ။ နာန်ကား ဘုရားရှာန်ဘင်း မြင့်မြတ်သဘင်းဆားတော် ထှာမှာ” ညယ် ဆကလားဝါတ်ဆလာတ်တုံန်းယောက် ဟာတ်ပန်းငှေါရာန်မှာ။
35အန်၌မှါခ့်ခါ ကိုယ်တော်ကား အမဲဘင်းနနူဒေ “ယူရှီရှီဆာ ဟိန်ဟက်ပူလာန်ဘဲ” ညယ် အမိန့်အီရာန်မှာ။ စီးမှါခ့်ခါ ချတ်ချန်း အမဲဘင်းနနူကား အန်ဘင်းသမီဆာဒေ သမီဆာတာတ်မန်းဘင်း ကာစောက်ပေလပေါ်ဘန်း ဟိန်ဒေအကနာစိန်းညယ် ပူလာန်ဘဲမှာ။
36သမီဆာတာတ်ရီးဒါး အံ့ဩသကြီးဘန်း “အဘင်းကား ဟာနိမ်တူးတေဒမား။ ဟိန်အမိန့်အီရာန်မရောက် အမဲဘင်းနနူတေကား ပူလာန်ဘဲထှာဘင်း တန်ခိုးအာဏာတေကား ဟိန်ဘေ ငှါဘန်းနင်းသကား” ညယ် အချန်းချန်း ငှေါနင်းကြီးမှာ။ 37စီးမှါခ့်ခါ ကိုယ်တော်ယေရှုဘင်း ဆတာန်းတေရီးဒါး နေရာအနှံ့ ပျံ့သလာန်ဘဲမှာ။
အနင်းမဲဘင်းသမီဆတာတ်တေ ကုသအီဘင်း
(ရှာန်မဿဲ ၈:၁၄-၁၇။ ရှာန်မာကု ၁:၂၉-၃၄)
38ကိုယ်တော်ကား ဓမ္မာရုံဟက်ပူဘန်း ရှိမုန်ကျေမ်းပါ လာန်မှါခ့်ခါ ရှိမုန်မယ်စောင်ကား အကြီးကျယ်ကနာဟာနင်းဘင်းအတွာတ် သမီဆာတာတ်ကား ဟိန်ဒေ ကုသအီဒင် ကိုယ်တော်ဒေ လျှောက်တာန်သကြီးမှာ။ 39အမှာတွာတ် ကိုယ်တော်ကား အီးရှီပိုက်ပါလာန်ဘန်း ကနာဟာနင်းဘင်းနာတေ ကယာစိန်းဒင် အမိန့်အီရာန်မှာ။ စီးမှါခ့်ခါ အီးရှီရီးဒါး ချတ်ချန်းရဲဘန်းနာ အန်တာတ်နင်း ယုတ်တင်အူဒင်တေ စသဘန်းပြာန်ဆာန်သအီမှာ။
40စမိတ်ဆာန်မှါခ့်ခါ ရောဂါအမျိုးမျိုးထှာဘန်း ကနာနင်းဘင်း သမီဆာတာတ်တေဒေ ကိုယ်တော်ယေရှုပါဘေ ကော်ကြီးရီမှာ။ စီးမှါခ့်ခါ ဟိန်ကား ကနာနင်းဘင်း သမီဆာဟော်ဝါစီလာန်စောက်ပေ သဟူးဒေတာန်သဘန်းနာ ရောဂါတေဒေ ကုသအီမှာ။ 41အမဲဘင်းနနူတာတ်ရီးဒါး ဆာန်ဘန်းနင်းဘင်း သမီဆတာတ်ဟက် “နာန်ကား ဘုရားရှာန်ဘင်းဆားတော်ထှာမှာ” ညယ် ဟာတ်ပန်း ပူလာန်ဘဲကြီးမှာ။ အမဲဘင်းနနူတာတ်ကား ကိုယ်တော်ယေရှုတေ မေရှိယအရှာန် ထှာဘင်းနာတေ မိန်းရှာတ်ခါကြီးဘင်းအတွာတ် ကိုယ်တော်ယေရှုကား အန်တာတ်တေ တူးအသပေါက်စိန်းငှါး။
ဓမ္မာရုံတေဘေဟောသကာဆွောန်သကာဘင်း
(ရှာန်မာကု ၁:၃၅-၃၉)
42နောက်မာန်းရာတ် ဟလာန်းယားမှါခ့်ခါ ကိုယ်တော်ကား သမီဆာထုတ်လားစစ်ပင်းအရပ်ပါဘေ ပူလာန်ဘဲမှာ။ အန်နိမ်စါန်းငှေါဒီ သမီဆာတာတ်ကား ကိုယ်တော်ဒေနေရာတိုင်းဘေ သာန်ကြီးဘန်း ကတုံန်ရာန်ဘင်းအတွာတ် ကိုယ်တော်ဒေ အန်တာတ်ဟက် အပူလာန်ဘဲကွန်း တောင်းပါန်သကြီးမှာ။ 43အန်နိမ်စါန်းငှေါဒီ ကိုယ်တော်ကား “ငါကား တခြားဘင်း မြို့တေဒေရီးဒါး ဘုရားရှာန်ဘင်းသာသနာတော်အကြောင်း#4:43 သာသနာတော်အကြောင်း - ဘုရားရှာန်ဘင်းသာသနာတော်ငှေါဘင်းနာကား ကမ္ဘာစောက်ပင်း ဘုရားရှာန်ဘင်း အုပ်စိုးသလားတေ ရည်ညွှန်းသလားထှာမှာ။ အုပ်စိုးသမှာငှေါဘင်းကား တိုင်းပြေတေဒေ အုပ်စိုးသလားအချီရား။ အန်ဘင်းအစား ဘုရားရှာန်ကား ကိုယ်တော်ယေရှုတေ ယုံကြည်သဘင်းဆိတ်တာတ်ပင်း အဆေင်ယောက် ဘဝတေ အုပ်စိုးသလားထှာမှာ။ ဆတာန်းမလဲဒေ ဟောသကာအီထှာယုတ်ကူ။ ဟမာန်တွာတ်ငှေါဘန်းတာတ်ငှေါ အာနိမ်ဟောသကာဒင် ဘုရားရှာန်ကား ငါတေတာတ်နီမှာ” ညယ် မိန့်တော်မူသမှာ။ 44စီးမှါခ့်ခါ ကိုယ်တော်ကား ယုဒပြေတစ်ပြေလုံးဘင်းဓမ္မာရုံဘေတေ ဆာတ်သဘန်း ဟောသကာ ဆွောန်သကာမှာ။
നിലവിൽ തിരഞ്ഞെടുത്തിരിക്കുന്നു:
ရှာန်လုကာ 4: ZKD
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kadu Bible by Beyond Translation is licensed under Creative Commons Attribution-ShareAlike 4.0 License.
ရှာန်လုကာ 4
4
အခန်း (၄)
လှည့်စားသဘင်းနာတေခံသထှာဘင်း
(ရှာန်မဿဲ ၄:၁-၁၁။ ရှာန်မာကု ၁:၁၂-၁၃)
1စီးမှါခ့်ခါ ကိုယ်တော်ယေရှုကား ဉာဏ်အလင်းတော်ယောက် အတူတူငှါနင်းဘန်းနာ ဂျော်ဒန်မြစ်ဟက် ဒီဟာန်းဘန်း ဉာဏ်အလင်းတော် ဦးဆောင်သဘန်းနာ သမီဆာထုတ်လားစစ်ပင်းအရပ်ပါ လာန်ဘဲမှာ။ 2အန်ဘင်းနေရာဘေ ကိုယ်တော်ယေရှုကား မာရ်နတ်လှည့်စားသဘင်းတေ မာန်းရာတ်ဆီနူထုတ်ကွန်း ခံဒီထှာမှာ။ အန်ဘင်းမာန်းရာတ်အတွာန်းဘေ ကိုယ်တော်ယေရှုကား ဟမာန်ကစဲ အယုတ်ညယ်နင်းဘင်းအတွာတ် အန်ဘင်းမာန်းရာတ်ဆွန်မှါခ့်ခါ အကြီးကျယ်ယုတ်ခေါ့ပ်နီမှာ။
3မာရ်နတ်ကား ကိုယ်တော်တေ “နာန်ကား ဘုရားရှာန်ဘင်းဆာထှာဘန်းကား အဘင်းလုံးကရှီတေ ပေါင်မုန့်ထှာကွန်း ငှေါရာန်” ညယ် ငှေါရာန်မှာ။
4အန်၌မှါခ့်ခါ ကိုယ်တော်ရီးဒါး “ကျမ်းကျိန်းဘေ ‘သမီဆာကား ယုတ်တင်စားနူဆယောက် အဆာတ်စာနင်းလားအချီရား’ ညယ် ရေးသကာပဲမှာ” ညယ် မိန့်တော်မူသမှာ။
5စီးမှါခ့်ခါ မာရ်နတ်ကား ကိုယ်တော်ဒေ အကြီးကျယ်မြန့်သဘင်း ကယာစောက်ပါကော်လာန်ဘဲဘန်း ကမ္ဘာစောက်ပေငှါဘင်းနိုင်ငံအားလုံးတေ ခဏဆရောက် ကာရာန်မှာ။ 6စီးမှါခ့်ခါ မာရ်နတ်ကား ကိုယ်တော်ဒေ “အဘင်းနိုင်ငံအားလုံးတေ အုပ်ချုပ်သရန်ဘင်း အခွာမ်းအာဏာယောက် စည်းစိမ်ဥစ္စာတေဒေ နာန်တေ ငါအီကူ။ ဟမာန်တွာတ်ငှေါဘန်းတာတ်ငှေါ အန်ဘင်းနာတေကား ငါတေ အီပဲစီးဘန်းထှာဘင်းအတွာတ် ငါအီကာတ်ပင်း ဟာဟမဲဒေစါန်းငှေါဒီ ငါအီရန်မှာ။ 7အမှာတွာတ် ငါတေဟလာန်းငုတ်ပန်း ဝိုင်သဘန်းကား အဘင်းနာတေဒေ နာန်နင်းအီကူ” ညယ် ငှေါမှာ။
8အန်နိမ်စါန်းငှေါဒီ ကိုယ်တော်ကား “ကျမ်းကျိန်းနောင်းဘေ ‘နာန်အရှာန်ထှာဘင်း ဘုရားရှာန်တစ်ပါးတည်းတေ၌ဆာ ဝိုင်သထှာဘန်း ဟိန်အမှုတေဒေ၌ဆာ အွန်ထှာကူ’ ညယ် ရေးသကာပဲမှာ” ညယ် မာရ်နတ်တေ ပြန်သဘန်းငှေါရာန်မှာ။
9ပန်းနူ မာရ်နတ်ကား ကိုယ်တော်ဒေ ဂျေရုဆလင်မြို့ဘေငှါဘင်း ဗိမာန်တော်အမြာန့်တုံန်းပါ ကော်လာန်ဘဲဘန်း “နာန်ကား ဘုရားရှာန်ဘင်းဆာထှာဘန်းကား အဘင်းဟက် ဝါးအက်နာန်။ 10ကျမ်းကျိန်းနောင်းဘေ
‘ဘုရားရှာန်ကား နာန်တေ စောင့်ရှောက်သဒင် ဟိန်ဘင်းမဲဘင်းဟမန်းတေဒေ အမိန့်အီကူ။
11နာန်တာတေဒေ လုံးကရှီတေယောက် အထိသကွန်း
အန်တာတ်သဟူးယောက် ဖင်ပဲကြီးကလား’ ညယ် ရေးသပဲဘင်းအတွာတ် နာန်ကား ကနာကလားအချီရား” ညယ် ငှေါမှာ။
12အန်၌မှါခ့်ခါ ကိုယ်တော်ယေရှုရီးဒါး “ကျမ်းကျိန်းနောင်းဘေ ‘နာန်အရှာန်ထှာဘင်း ဘုရားရှာန်ဒေ အစမ်းသပ်သလူဝါး’ ညယ် ရေးသပဲမှာ” ညယ် မိန့်တာန်မှာ။
13မာရ်နတ်ရီးဒါး ကိုယ်တော်ဒေ နည်းမျိုးစုံယောက် ဖြားယောင်းသွေးဆောင်သဘန်း စီးမှါခ့်ခါ ကိုယ်တော်ဟက် ပူလာန်ဘဲဘန်း ပန်းနူအခွာမ်းအရေး လူဟာန်းကူဘင်းတေ ဒဲဘန်းနင်းဟာန်းမှာ။
ကိုယ်တော်ကား ဂါလိလဲပြေဘေ စသဘန်းအမှုတော်အွန်ဘင်း
(ရှာန်မဿဲ ၄:၁၂-၁၇။ ရှာန်မာကု ၁:၁၄-၁၅)
14စီးမှါခ့်ခါ ကိုယ်တော်ယေရှုကား ဉာဏ်အလင်းတော် လမ်းကာဘင်းအတွာတ် ဂါလိလဲပြေပါ ပြန်သဘန်းကြွသဟာန်းမှာ။ ဟိန်ဘင်း ဆတာန်းတေရီးဒါး နေရာအနှံ့ ပြန့်သနင်းမှာ။ 15ကိုယ်တော်ယေရှုကား ဓမ္မာရုံတေဘေ#4:15 ဓမ္မာရုံ - ဓမ္မာရုံငှေါဘင်းနာကား ဂျူးသမီဆာတာတ် စုသဘန်း ဆုစိန်တင်၊ ကျမ်းကျိန်းကျယ်တင်၊ အန်တာတ်ယုံကြည်သဘင်းတေဒေ ဆွောန်သကာဒင်ယောက် ဘုရားရှာန်ဒေ ဝိုင်သဘင်း အဆောက်အအုံတုံန်းထှာမှာ။ ငှေါကာဆွောန်သကာအီမှါခ့်ခါ သမီဆာတာတ်ကား ဟိန်ဒေ အကြီးကျယ်ချီးမွမ်းသကြီးမှာ။
နာဇရက်မြို့ဆားတာတ်ကား ကိုယ်တော်ဒေငြာမ်းပယ်သဘင်း
(ရှာန်မဿဲ ၁၃:၅၃-၅၈။ ရှာန်မာကု ၆:၁-၆)
16စီးမှါခ့်ခါ ကိုယ်တော်ယေရှုကား ဟိန်တုံန်းရီဘင်း နာဇရက်မြို့ပါ ဒီဟာန်းမှာ။ ဥပုသ်မာန်းရာတ်ပေ ကိုယ်တော်ကား ဓမ္မာရုံပါ ဟိန်လာန်နေကြအတိုင်း လာန်ဘန်း ကျမ်းကျိန်းဒေ ကျယ်ကူညယ် စပ်နာန်မှာ။ 17စီးမှါခ့်ခါ ကိုယ်တော်နင်း ပရောဖက်ဟေရှာယ ကျမ်းကျိန်းဟလောက်တေ အီရာန်မှာ။ ကိုယ်တော်ကား ကျမ်းကျိန်းဟလောက်တေ ဖွာမ်းတာန်မှါခ့်ခါ အန်နိမ်ရေးသပဲဘင်း ကျမ်းကျိန်းဒေ ကတုံန်ငါန်မှာ။ 18စီးမှါခ့်ခါ ကိုယ်တော်ကား
“ဆာန်းရဲဆားတာတ်နင်း ဆတာန်းမလဲတေ ငှေါကာဒင် ငါတေဘုရားရှာန်ကား မယ်ပဲဘင်းအတွာတ်
အရှာန်ဘင်း ဉာဏ်အလင်းတော်ကား ငါယောက်အတူတူငှါဘန်းနင်းမှာ။
ဘုရားရှာန်ကား အကျဉ်းအက်နင်းဘင်းဆိတ်တာတ်တေ လွောပ်သစိန်းဒင်၊
မိတ်တူရှီအကတုံန်ဘင်းဆိတ်တာတ် ပြန်သဘန်းကတုံန်စိန်းဒင်ယောက်
ဒုက္ခထုတ်ပန်းနင်းဘင်းဆိတ်တာတ် လွောပ်သကြီးဘန်းငှေါဘင်းတေ
ဟောသကာဒင် ငါတေတာတ်နီလားထှာမှာ။
19အရှာန်ကား ဟိန်ဘင်းသမီဆတာတ်တေ ကရုဏာတော်ကာကူဘင်း
အချိန်ထှာမှာငှေါဘင်းတေ ကြေငြာသဒင် ငါတေတာတ်နီလားထှာမှာ” ညယ် ထှာမှာ။
20စီးမှါခ့်ခါ ကိုယ်တော်ယေရှုကား အန်ဘင်းကျမ်းကျိန်းဒေ ဟလောက်ပန်း ဓမ္မာရုံတာဝန်ခံနင်း အီစီးဘန်းနာ ထုံးရာန်မှာ။ ဓမ္မာရုံနောင်းဘင်း သမီဆာတေရီးဒါး ကိုယ်တော်ယေရှုတေ ယူစိန်စာတ်ပန်း နင်းကြီးရာန်မှာ။ 21စီးမှါခ့်ခါ ဟိန်ကား အန်တာတ်တေ “ဟနိမ်သက်ပူရာန်ဘင်း ကျမ်းကျိန်းတေကား အရာတ်မှါတ် အဟုတ်မလပ် ထှာရီဘန်း” ညယ် မိန့်သမှာ။ 22ကိုယ်တော်ယေရှု အံ့ဩသထာတ်မဲဘင်း တူးတေအတွာတ် မာန်ဒါတ်မိသနင်းကြီးရာန်မှာ။ အန်တာတ်ကား “အဘင်းဆိတ်ကား ယောသပ်ဆာအချီနော်” ညယ် အချန်းချန်း ငှေါကြီးမှာ။
23အန်၌မှါခ့်ခါ ကိုယ်တော်ရီးဒါး “‘အုပ်ဆရာကြီးကား ဟိန်ကိုယ်တိုင်အရာန် ကုသထှာကူ’ ငှေါဘင်းတူးနိမ် ‘ကပေရနောင်မြို့ဘေ နာန်အွန်နီဘင်းတေ အလေသက်ပူရီဘင်းအတိုင်း နာန်မြို့ထှာဘင်း အဘင်းဘေရီး အွန်’ ညယ် ဟနိမ်ကား ငါတေ အဟုတ်မလပ်ငှေါကြီးကူ” ညယ် မိန့်သမှာ။
24ကိုယ်တော်ကား ဆာတ်သဘန်း “ဟနိမ်တေ ငါချီလားတေငှေါထှာဘန်းကား၊ ဟာဘင်းပရောဖက်တာတ်တေဆဲ ကိုယ့်မြို့ဘင်း သမီဆာတာတ်ကား အလက်ခံသကြီးရား။ 25ငါပြန်သဘန်း ချီလားတေ ငှေါထှာဘန်းကား ပရောဖက်ဧလိယလာတ်ထာတ်မှါခ့်ခါ ဆွန်းပီးပိုင်း ဟလာန်းခေါင်သဘင်းအတွာတ် တစ်ပြေလုံး အငတ်ဘေးဒုက္ခ ခံသကြီးရီထှာမှါခ့်ခါ အစ္စရေးပြေဘေ မုဆိုးမတေ ကလောင်းတုံန်းငှါရီမှာ။ 26အန်နိမ်စါန်းငှေါဒီ ဘုရားရှာန်ကား ဧလိယတေ အစ္စရေးပြေဘေငှါဘင်း မုဆိုးမတေပါ ကူညီသဒင် တာတ်ထှာကူဘင်းအစား ဇိဒုန်ပြေဘေငှါဘင်း ဇရတ္တမြို့ဘေငှါဘင်း ဂျူးသမီဆာအချီဘင်း မုဆိုးမဟော်ဝါပါ၌ဆာ ကူညီသဒင် တာတ်နာန်မှာ။ 27ပရောဖက် ဧလိရှဲခေတ်မှါခ့်ခါရီးဒါး အစ္စရေးပြေဘေ ကမာတုံန်းရောဂါဆယ်တေ ကလောင်းတုံန်းငှါရီမှာ။ အန်နိမ်စါန်းငှေါဒီ ဧလိယကား အန်တာတ်နောင်းဟက် ဟာဟမဲတေစဲ အကုသအီရီညယ် ဆီးရီးယားပြေဘေငှါဘင်း ဂျူးသမီဆာအချီဘင်း နေမန်ဟော်ဝါ တေ၌ဆာ ကုသအီမှာ” ညယ် မိန့်သမှာ။
28ကိုယ်တော်ယေရှု ငှေါဘင်းတူးတေဒေ သက်ပူကြီးမှါခ့်ခါ ဓမ္မာရုံနောင်းဘင်း သမီဆာတေကား အကြီးကျယ်တင်းဟော့ပ်ကြီးမှာ။ 29အမှာတွာတ် အန်တာတ်ကား ရဲဘန်း ကိုယ်တော်ဒေ မြို့ပြာန်ပါ ငါတ်ပူကြီးဘန်း ချောက်ကမ်းပါးစောက်ဟက် နူအက်တင် မြို့တည်သပဲဘင်း ကယာပိုင်းပါ ကော်လာန်ဘဲကြီးမှာ။ 30အန်နိမ်စါန်းငှေါဒီ ကိုယ်တော်ယေရှုကား သမီဆာအုပ်နောင်းဟက် ဖြတ်သဘန်း ကြွသလာန်ဘဲမှာ။
အမဲဘင်းနနူဒေငါတ်ပူဘင်း
(ရှာန်မာကု ၁:၂၁-၂၈)
31စီးမှါခ့်ခါ ကိုယ်တော်ကား ဂါလိလဲပြေဘေငှါဘင်း ကပေရနောင်မြို့ပါ လာန်ဘန်းနာ ဥပုသ်မာန်းရာတ်မှါ့ခ်ခါ ဓမ္မာရုံဘေ ဆွောန်သကာ ဟောသကာဘန်းနင်းမှာ။ 32ကိုယ်တော်ကား အခွာမ်းအာဏာတေယောက် ဟောသကာ ဆွောန်သကာဘင်းအတွာတ် သမီဆတာတ်ကား ဟိန်ဆွောန်သကာ အီဘင်းနာတေဒေ အံ့ဩသဘန်း ချီးမွမ်းသကြီးမှာ။
33အန်ဘင်းဓမ္မာရုံနောင်းဘေ အမဲဘင်းနနူကပ်ပန်းနင်းဘင်း သမီဆာဟော်ဝါငှါမှာ။ အန်ဘင်းဆိတ်ကား ကိုယ်တော်ဒေ 34“ဟေး၊ နာဇရက်မြို့ဆားယေရှု၊ နာန် အလေတေ ဟာနိမ်အွန်ကူတေ။ အလေတေ ဖြတ်ဆီးသကူညယ်ဒီလားရယ်။ နာန် ဟာဟမဲငှေါဘင်းနာဒေ ငါမိန်းရှာတ်ခါမှာ။ နာန်ကား ဘုရားရှာန်ဘင်း မြင့်မြတ်သဘင်းဆားတော် ထှာမှာ” ညယ် ဆကလားဝါတ်ဆလာတ်တုံန်းယောက် ဟာတ်ပန်းငှေါရာန်မှာ။
35အန်၌မှါခ့်ခါ ကိုယ်တော်ကား အမဲဘင်းနနူဒေ “ယူရှီရှီဆာ ဟိန်ဟက်ပူလာန်ဘဲ” ညယ် အမိန့်အီရာန်မှာ။ စီးမှါခ့်ခါ ချတ်ချန်း အမဲဘင်းနနူကား အန်ဘင်းသမီဆာဒေ သမီဆာတာတ်မန်းဘင်း ကာစောက်ပေလပေါ်ဘန်း ဟိန်ဒေအကနာစိန်းညယ် ပူလာန်ဘဲမှာ။
36သမီဆာတာတ်ရီးဒါး အံ့ဩသကြီးဘန်း “အဘင်းကား ဟာနိမ်တူးတေဒမား။ ဟိန်အမိန့်အီရာန်မရောက် အမဲဘင်းနနူတေကား ပူလာန်ဘဲထှာဘင်း တန်ခိုးအာဏာတေကား ဟိန်ဘေ ငှါဘန်းနင်းသကား” ညယ် အချန်းချန်း ငှေါနင်းကြီးမှာ။ 37စီးမှါခ့်ခါ ကိုယ်တော်ယေရှုဘင်း ဆတာန်းတေရီးဒါး နေရာအနှံ့ ပျံ့သလာန်ဘဲမှာ။
အနင်းမဲဘင်းသမီဆတာတ်တေ ကုသအီဘင်း
(ရှာန်မဿဲ ၈:၁၄-၁၇။ ရှာန်မာကု ၁:၂၉-၃၄)
38ကိုယ်တော်ကား ဓမ္မာရုံဟက်ပူဘန်း ရှိမုန်ကျေမ်းပါ လာန်မှါခ့်ခါ ရှိမုန်မယ်စောင်ကား အကြီးကျယ်ကနာဟာနင်းဘင်းအတွာတ် သမီဆာတာတ်ကား ဟိန်ဒေ ကုသအီဒင် ကိုယ်တော်ဒေ လျှောက်တာန်သကြီးမှာ။ 39အမှာတွာတ် ကိုယ်တော်ကား အီးရှီပိုက်ပါလာန်ဘန်း ကနာဟာနင်းဘင်းနာတေ ကယာစိန်းဒင် အမိန့်အီရာန်မှာ။ စီးမှါခ့်ခါ အီးရှီရီးဒါး ချတ်ချန်းရဲဘန်းနာ အန်တာတ်နင်း ယုတ်တင်အူဒင်တေ စသဘန်းပြာန်ဆာန်သအီမှာ။
40စမိတ်ဆာန်မှါခ့်ခါ ရောဂါအမျိုးမျိုးထှာဘန်း ကနာနင်းဘင်း သမီဆာတာတ်တေဒေ ကိုယ်တော်ယေရှုပါဘေ ကော်ကြီးရီမှာ။ စီးမှါခ့်ခါ ဟိန်ကား ကနာနင်းဘင်း သမီဆာဟော်ဝါစီလာန်စောက်ပေ သဟူးဒေတာန်သဘန်းနာ ရောဂါတေဒေ ကုသအီမှာ။ 41အမဲဘင်းနနူတာတ်ရီးဒါး ဆာန်ဘန်းနင်းဘင်း သမီဆတာတ်ဟက် “နာန်ကား ဘုရားရှာန်ဘင်းဆားတော်ထှာမှာ” ညယ် ဟာတ်ပန်း ပူလာန်ဘဲကြီးမှာ။ အမဲဘင်းနနူတာတ်ကား ကိုယ်တော်ယေရှုတေ မေရှိယအရှာန် ထှာဘင်းနာတေ မိန်းရှာတ်ခါကြီးဘင်းအတွာတ် ကိုယ်တော်ယေရှုကား အန်တာတ်တေ တူးအသပေါက်စိန်းငှါး။
ဓမ္မာရုံတေဘေဟောသကာဆွောန်သကာဘင်း
(ရှာန်မာကု ၁:၃၅-၃၉)
42နောက်မာန်းရာတ် ဟလာန်းယားမှါခ့်ခါ ကိုယ်တော်ကား သမီဆာထုတ်လားစစ်ပင်းအရပ်ပါဘေ ပူလာန်ဘဲမှာ။ အန်နိမ်စါန်းငှေါဒီ သမီဆာတာတ်ကား ကိုယ်တော်ဒေနေရာတိုင်းဘေ သာန်ကြီးဘန်း ကတုံန်ရာန်ဘင်းအတွာတ် ကိုယ်တော်ဒေ အန်တာတ်ဟက် အပူလာန်ဘဲကွန်း တောင်းပါန်သကြီးမှာ။ 43အန်နိမ်စါန်းငှေါဒီ ကိုယ်တော်ကား “ငါကား တခြားဘင်း မြို့တေဒေရီးဒါး ဘုရားရှာန်ဘင်းသာသနာတော်အကြောင်း#4:43 သာသနာတော်အကြောင်း - ဘုရားရှာန်ဘင်းသာသနာတော်ငှေါဘင်းနာကား ကမ္ဘာစောက်ပင်း ဘုရားရှာန်ဘင်း အုပ်စိုးသလားတေ ရည်ညွှန်းသလားထှာမှာ။ အုပ်စိုးသမှာငှေါဘင်းကား တိုင်းပြေတေဒေ အုပ်စိုးသလားအချီရား။ အန်ဘင်းအစား ဘုရားရှာန်ကား ကိုယ်တော်ယေရှုတေ ယုံကြည်သဘင်းဆိတ်တာတ်ပင်း အဆေင်ယောက် ဘဝတေ အုပ်စိုးသလားထှာမှာ။ ဆတာန်းမလဲဒေ ဟောသကာအီထှာယုတ်ကူ။ ဟမာန်တွာတ်ငှေါဘန်းတာတ်ငှေါ အာနိမ်ဟောသကာဒင် ဘုရားရှာန်ကား ငါတေတာတ်နီမှာ” ညယ် မိန့်တော်မူသမှာ။ 44စီးမှါခ့်ခါ ကိုယ်တော်ကား ယုဒပြေတစ်ပြေလုံးဘင်းဓမ္မာရုံဘေတေ ဆာတ်သဘန်း ဟောသကာ ဆွောန်သကာမှာ။
നിലവിൽ തിരഞ്ഞെടുത്തിരിക്കുന്നു:
:
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kadu Bible by Beyond Translation is licensed under Creative Commons Attribution-ShareAlike 4.0 License.