जोहन 17
17
ईसु रआ पराथना
1नुवां सुबिन गाम तयोम ईसु सिरमा सोझ संगील केते गाम्मेताय, ए आबा! उना समेय हेच चुकाव एकाना अपन होपोन हेरेल रआ महिमायमी ताकि होपोन हेरेल आम रआ महिमा कराव दड़िवाःआय। 2आम उनी के सुबिन मनवा जाइत रे हक एम एकावादेयाम, जेकर एते उनी, उनकु सुबिन के का मुडूः जीवन एमाकुवय, जेके आम उनी के सोंपाव एकावादेयाम। 3उनकु, आम के मोतलोब मिहोर गी सचा परमेसर के अरो ईसु मसी के, जेके आम ता कुल एकाःदेयाम, सारी केयाकु, नेयगी का मुडूः जीवन हेकेय। 4जे कामि आम इञ के कराव कथिर एमाःदेञ केनाम, उना इञ पुराव एकाःइञ। नियां लेका इञ ता दुनिया रे आम रआ महिमा एकाःइञ। 5आबा! दुनिया रआ उपनेग एते पहिल, इञ के आम ठिनुः जे महिमा तहिकेना, निमीः इञ के आम रआ हजुरी रे उना महिमा एते महिमा एञमी।
ईसु अपन चेलाकु कथिर पराथना
6आम जेके दुनिया रे एते सला केते इञ के सोंपाव वदेञाम, उनकु रे इञ ता आम रआ लुतूम दिसतार एकावाःकुञ उनकु आमरेन गी तहिकेनाकु। आम उनकु के इञ के सोंपाव एकावादेञाम अरो उनकु आम रआ सिख रआ पालन एकाःआकु। 7निमीः दो उनकु सरिएताकु चि आम इञ के जहन्नाः एम एकावादेञाम, उना सुबिन आम एते हिजुः काना। 8आम जे बचन इञ कथिर एम एकावादेञाम, इञ उना खभेर ता उनकु के एमाःकुञ, उनकु उना तेला केते सच-सच सारी एताकु चि इञ आम ठिनुः हेच एकानिञ अरो उनकु बिसवास एताकु चि आम इञ के कुल एकाःदेञाम। 9“इञ उनकु कथिर गोहराव कनिञ, इञ दुनिया रेन कथिर बङा, मुदा उनकु कथिर गोहराव कनिञ, जेके आम ता इञ के सोंपाव एकावादेञाम, चिलिमेनचि उनकु आमरेन गी हेकेकु, 10जहन्नाः इञ रआ हेके उना आम रआ हेके अरो जे आम रआ, उना इञ रआ हेके। उनकु दोवासते इञ रआ महिमा दिसतार एना।” 11नेबरीक दो इञ दुनिया रे काइञ तहिनोःओ, मुदा उनकु दुनिया रे तहिनाकु अरो इञ आम ठिनुः हिजुः कनिञ। पबितर आबा! आम, इञ के सोंपाव एकावादेञाम, उनकु के अपन लुतूम रआ सोमोर्थ एते जोतोन कुम चि जे लेका अलांङ मीः हेनालाङा, इनका गी उनकु हों मीः तहीःकाकु। 12#सिरिञ 41:9; जोह 13:18जोब इञ उनकु लोः तहिकिनिञ, इञ आम रआ उना लुतूम रआ सोमोर्थ एते उनकु के जोतोन वेःकुञ, जेके इञ कथिर एमवादेञ केनाम। इञ जोतोन वेःकुञ अरो उनकु रे एते जहय हों काकु नठाव केना, सिरीफ मिहोर नठावेनाय#17:12 जहूदा इसकारियोति जे नठावोः वनीः तहिकेनाय। चिलिमेनचि धरम पोथी रआ ओल अनाः पुरावोःका। 13नेबरीक इञ आम ठिनुः हिजुः कनिञ। जोब तक इञ दुनिया रे हेनाञा, नुवां सुबिन गाम कनिञ, जेकर एते उनकु के इञ रआ आनाद पुरापुरी एते नामकाकु। 14इञ ता उनकु के आम रआ सिख एम एकावाःकुञ दुनिया रेन उनी एते घिनाः केनाकु चिलिमेनचि जे लेका इञ दुनिया रिई बङ हेकेञ। इनका गी उनकु हों दुनिया रेन बङ कनकु। 15इञ नुवां काइञ कुलिइ काना चि आम उनकु के दुनिया एते उडुङ ककुम बलकी नुवां चि आम उनकु रिई कुचड़ सयतान एते जोतोनेञ। 16उनकु दुनिया रेन बङ हेकेकु, इनका गी जेलेका इञ दुनिया रिई बङ हेकेञ। 17सतया रआ दोवासते उनकु के पबितर कुम। आम रआ सिख गी सतया हेनाःआं। 18जे लेका आम इञ के नुवां दुनिया रे कुल एकाःदेञाम, इना लेका गी इञ ता उनकु के दुनिया रे कुल एकाःकुञ। 19इञ उनकु कथिर अपन खुद के पबितारोः कनिञ ताकि उनकु हों सतया रआ दोवासते पबितर ओःओकु।
ईसु सुबिन बिसवासिकु कथिर पराथना
20“इञ सिरीफ उनकु कथिर गी काइञ गोहराव एयकाना, बलकी उनकु कथिर हों, जे नोकु रआ सिख ओनाव केते इञ रे बिसवास कनाकु। 21ताकि उनकु सुबिन मीः ओःकाकु। इनका गी जेलेका ए परम आबा आम इञ रे हेनामा अरो इञ आम रे। इना लेका गी उनकु हों अलांङ रे मीःवोः काकु, ताकि दुनिया बिसवासियाकु चि आम इञ के कुल एकाःदेञाम। 22उना महिमा जे इञ के एम एकावादेञाम, इञ उनकु के एम एकावाःकुञ; ताकि उनकु हों इनका गी मीः वोः दड़िवाकाकु, जेलेका अलांङ मीः गियालांग। 23इञ उनकु रे होयुःइञ अरो आम इञ रे होयुःआम, जेकर एते उनकु भोरपुर एकता ता नामकाकु अरो दुनिया सारी केयाकु चि आम इञ के कुल एकाःदेञाम अरो आम उनकु केहों इनका गी दुलार एकाःकुवाय जे लेका इञ केहों दुलार एञकनाम। 24ए परम आबा! जे होर के इञ कथिर सोंपाव एकाःकुवाम, इञ चहाः कनिञ चि जे ठिनुः इञ हेनाञा, उनकु हों इञ लोः कोःकाकु, उनकु इञ रआ उना महिमा ता नेल दड़िवाकाकु जे आम इञ के एम एकावादेञाम। चिलिमेनचि दुनिया रआ सिरजव एते हों पहिल आम इञ के दुलार एकाःदेञाम। 25ए धरमिक-आबा दुनिया रेन होर आम के काकु सरिम काना, मुदा इञ आम के सारी एकाःमिञ। अरो इञ रेन चेला सरिम कनाकु चि आम इञ के कुल एकाःदेञाम। 26इञ ता उनकु रे आम रआ लुतूम दिसतार एकाःइञ अरो दिसतार चित तहिनोःओञ, जेकर एते आम ता जे दुलार एते आम इञ के एम एकावाःदेञाम, उना दुलार उनकु रे तहीःका अरो इञ हों उनकु रे तहीः काइञ।”
നിലവിൽ തിരഞ്ഞെടുത്തിരിക്കുന്നു:
जोहन 17: BIY
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
