लूका 16
16
चलक भंडारी
1अरो ईसु ता चेलाकु तय केहों गामवाःकुवाय, “जहय धनगार रिई मिहोर भन्डारी तहिकेनाय, अरो होरकु ता उनी रआ लहा उनी रे नुवां दोस लगावेताकु, चि उनी आम रआ सम्पति उड़ाव कनाय। 2इनाते उनी ता उनी के होहोकेते गामवादेयाय, ‘नुवां चिलिकाः हेके जे इञ आम रआ बबेत रे अयुम कनिञ? अपन भन्डारी कामि रआ हिसाब एम्माम, चिलिमेनचि आम लहा भन्डारी कम तही दड़िवाता।’ 3तोब भन्डारी सोंचाः हेलावेनाय, ‘निमीःइञ चिलियिञ? चिलिमेनचि इञ रिई मुवार निमीः भन्डारी रआ कामि इञ एते रेच कनाय। खेत रे कामि रआ बोल इञ रे बनुःआं, अरो भीख कोकोय रे इञ के लाज हिजुःका। 4हें सोमझाव निञ चि चिलियिञ ताकि जोब इञ के भन्डारी रआ कामि एते उडुङ इञाय, रेहों गी होर इञ के अपन ओड़ाः रे सोवागत इञाकु।’
5“तोब उनी ता अपन मुवार के, रीन अगु वनकु के, मिमीः होर केते होहोवेःकुवाय, अरो पहिल एते कुलिएदेयाय, ‘आम रे इञ रिई मुवार रआ चिमिनोः रिन हेनाःआं?’ 6उनी ता गामवादेयाय, ‘साव मोन सुनूम’ तोब भन्डारी ता उनी एते गामवादेयाय, ‘अपन खाता बही इदिकेते, अरो दुरुप केते एनेन गी पचास मोन सुनूम ओलकाम।’ 7अरो उनी ता एटाःइकु एते कुलिएदेयाय, ‘आम रे चिमिनोः रीन हेनाःआं?’ उनी ता गामवादेयाय, ‘साव मोन गोहोंम,’ तोब भन्डारी ता उनी एते गामवादेयाय, ‘अपन खाता बही अगु केते अस्सी मोन गोहोम ओलकाम।’ 8मुवार ता उनी अधरमी भन्डारी के सहराव एदेयाय चि उनी ता चलक एते कामि एकाःआय, चिलिमेनचि नुवां दुनिया रेन होर अपन समेय रेन होरकु लोः अकु-अकु रआ लेन-देन परमेसर रेन होरकु एते बेचोट चलक हेनाकुवा।”
9अरो ईसु ता गाम्मेताय, “इञ आम एते गाम कनिञ चि अधरम रआ धन एते अपन कथिर गाति बायकुम, ताकि जोब उना धन सिनुः आरे दो, का मुडूः तहीः ठांव रे आम के परमेसर सोवागत माय। 10जे हुडिञ एते हुडिञ गानाम रे भोरोसा लाइख हेनाया, उनी मरंग गानाम रेहों भोरोसा लाइख हेनाया, अरो जे हुडिञ एते हुडिञ गानाम रे बयमान हेनाया, उनी मरंग गानाम रेहों बयमान मेनायां। 11अगर आम अधरम रआ धन रे बिसवास कम ठहरावकेना, दो सचा धन आम के ओकोय एमामाय? 12अरो जदि आम एटाः धन रे भोरोसा लाइख कम ठहरावकेना, दो जे आम रआ हेनाःआं, उना आम के ओकोय एमामाय?
13 #
मती 6:24
“जहय धंगोर बारया मुवार रआ सेवा-सुसार काय दड़िवा:आय; चिलिमेनचि उनी दो मिहोर एते बइर इयाय; अरो मिहोर एते दुलार इयाय, बङ रेदो मिहोर एते मिलाव तहिनो:ओय अरो एटाः के तुछ इयाय। अपे परमेसर अरो धन बनार रआ सेवा-सुसार कपे दड़िवाःआ।”
ईसु रआ एटाः-एटाः सिकछा
(मती 11:12–13; 5:31,32; मरकुस 10:11,12)
14फरीसी जे लोभी तहिकेनाय, नोकु सुबिन गानाम अयुम केते ईसु के लेचेड़ रे उड़ाव हेलावेनाकु 15ईसु ता उनकु एते गामवाःकुवाय, “अपे दो मनवांकु रआ लहा अपन-अपन एते धरमी ठहराः कनापे, मुदा परमेसर अपे रआ मोन सारीइ कनाय। चिलिमेनचि जे जिनिस मनवांकु रआ नजेर रे महान हेनाःआं, उना परमेसर रआ हेनात घिनाहा हेनाःआं। 16#मती 11:12,13मूसा रआ नियम, परमेसर सोझ एते नधनी वनकु अरो जोहन रआ समेय तक तहिकेना, उना तयोम परमेसर रआ राइज रआ बुगिन खभेर ओनाव वकु कनाकु अरो सुबिन उना रे बोलोः कथिर बेचोट परयास कनाकु। 17#मती 5:18लिकिन नियम रआ मियाः हुडिञ अकछर टलाव वोः एते सिरमा अरो ओते टलाव वोः सहाज हेनाःआं।
18 #
मती 5:32; 1 कुरु 7:10,11 “जहय अपन एरा के बागी केते एटाः एते बपलाःआय, उनी बेलाजकामि कनाय, अरो जहय नुंकान बागी वनीः एरा के बपलायय, उनी हों बेलाजकामि कनाय।
धनगार मनवां अरो लाजर
19“मिहोर धनगार मनवां तहिकेनाय, जे कुदा रंग रआ किचरीः होरोः ओःकेनाय अरो रोज हिलोः सुख-बिलास अरो मोज-मसती एते तहीः केनाय। 20लाजर लुतूम रिई मिहोर रेगेंच वनीः घाव एते पेड़ेच वनीः उनी रआ ओड़ाः रआ हाता दुवेर ठिनुः बागी काय केनाकु। 21नोन्डो तक चि सेता हों हेचकेते उनी रआ घाव जाल एकेनाकु। अरो उनी चहाः केनाय चि धनगार रआ बनचाव वनाः जुठा-कठा एते अपन लहिच पेड़ेच्चीञ। 22अरो उनी लाजर गोच्चेनाय, अरो सोवारागदूत दूतकु ता उनी के अबराहम ठिनुः इदी एदेयाकु। उनी धनगार हों गोच्चेनाय, अरो तोपा कदेयाकु, 23अधोलोक रे उनी ता तकलिब रे पोड़ाव हेलावेनाय। अरो चेतान नेल्लेताय, अरो संगिञ एते अबराहम ठिनुः लाजर के नेलेःदेयाय। 24तोब उनी ता होहो केते गामवादेयाय, ‘ए आबा अबराहम इञ रे दया केते लाजर के कुल कायमी, ताकि उनी आच रआ अंगुर रआ पोर दाः रे लोहोत केते, इञ रआ अलांङ ता रेयाड़ इयाय चिलिमेनचि इञ नुवां अधोलोक रआ सेंगेल रे तड़पाः कनिञ।’ 25मुदा अबराहम ता गामवादेयाय, ‘ए होपोन ओयहर एम चि आम अपन जीव रे सुबिन बुगिन जिनिस अगु चुकाव एकाःआम, अरो इनका गी लाजर सुबिन कठिक जिनिस रे तहिकेनाय, मुदा निमीः नोन्डो लाजर डिढ़ नाम कनाय, अरो आम तड़पाः कनाम। 26नुवां सुबिन गानाम ता बागी केते, आले अरो अपे रआ ताला मियाः मरंग गाड़हा ठहराव एकाःआय, चि जे नोन्डो एते उना परोम आम ठिनुः सिनुः चहाःआय, उनकु काकु सेन दड़िवाःआ, अरो ना जहय ओन्डो एते नुवां परोम अलिञ ठिनुः हेच दड़िवाःआय।’ 27धनगार ता गामवादेयाय, दो ‘ए आबा! इञ आम के गोहराव मिकानिञ चि आम लाजर के इञ रिई आबा रआ ओड़ाः कुलकाय, 28चिलिमेनचि इञ रेन पांच बोयहा हेनाकुवा, उनी सेन केते चेताव कुवाय, नुंका ओलो होयुःका चि उनकु हों नुवां तकलिब रआ ठांव रे हिजुःका।’ 29अबराहम ता उनी के गामवादेयाय, ‘मूसा अरो परमेसर सोझ एते नधनी वनकु रआ पोथी उनकु ठिनुः हेनाःआं, उना रआ ओनाव वेकाकु अरो मनाव वेकाकु।’ 30धनगार ता गाम्मेताय बङा, ‘ए आबा अबराहम, लिकिन जदि जहय गोच वनकु रे एते जुवेत केते उनी ठिनुः हिजुःआकु दो उनकु मोन रुवाड़ इयाकु।’ 31मुदा अबराहम ता उनी के गामवादेयाय, ‘जोब उनकु मूसा अरो परमेसर सोझ एते नधनी वनीः रआ गानाम काकु ओनाविया, जदि मुरदा रे एते जहय जुवेत बिरीत अकु, दो उनकु उनी रआ गानाम तहों काकु मनाव वोःओ।’”
നിലവിൽ തിരഞ്ഞെടുത്തിരിക്കുന്നു:
लूका 16: BIY
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
