लूका 4
4
ईसु रआ परीछा
(मती 4:1–11; मरकुस 1:12–13)
1अरो ईसु पबितर रावा एते पेड़ेच केते, जरदन गाड़ा एते रुवाड़ेनाय, तोब पबितर रावा सनसुन बुरु रे इदी एदेयाय 2अरो सयतान उनी के ओन्डो चालीस सिंगी तक परीछा चित तहिएनाय। इमिन रे ईसु ता जहन्नाः काय जोम लाःआय अरो चलीस हिलोः पुरावेना दो उनी के रेंगेच एदेया।
3तोब सयतान ता उनी के गामवादेयाय, “अगर आम परमेसर रिई होपोन तेः हेरेल हेकेम रेदो नुवां दिड़ी एते गाम्मी चि पिठा बाय कोःका।”
4 #
नियम 8:3
ईसु ता जबाब एमाःदेयाय, “पबितर पोथी रे ओल्लेकाना, ‘मनवा सिरीफ पिठा एते जुवेत काकु तहिना।’”
5तोब सयतान उनी के चेतान रे इदी एदेयाय अरो उनी के इमिताः गी दुनिया रआ सुबिन राइज उदुःवादेयाय, 6अरो सयतान गामवादेयाय “इञ आम के नियां सुबिन राइज रआ हक अरो ठाट-बाट एमामिञ। नुवां सुबिन इञ के एम एकावादेञाय अरो इञ जेके चहाः कनिञ उनी के एमाय कनिञ, 7इनाते अगर आम इञ रआ आराधनाय रेदोम नुवां सुबिन आम रआ होयुःआ।”
8 #
नियम 6:13
ईसु ता सयतान के जबाब एमाःदेयाय “पबितर पोथी रे ओल एकाना, ‘आम परभु अपन परभु परमेसर रआ आराधनायमी अरो सिरीफ इनी किगी सुसार एयमी।’”
9तोब सयतान ता ईसु के पबितर चट्टी जरुसलेम रआ मरंग बिनती ओड़ाः रआ चेतान चुटी रे तिंगु एदेयाय अरो ईसु के गामवादेयाय “अगर आम परमेसर रिई होपोन तेः हेरेल हेकेम रेदो नोन्डो एते चुड़िर जोनमी। 10#सिरिञ 91:11,12चिलिमेनचि पबितर पोथी रे ओल्लेकाना आम रआ बबेत रे ‘अपन सोवारागदूतकु के परमेसर हुकूम एमाकुवाय चि उनकु आम के लोका केमाकु, 11अरो आम के अकु रआ ती एते लोका केमाकु, आर आम के दिड़ी रे काकु थोसड़ाव इरीवामा।’”
12 #
नियम 6:16
ईसु ता उनी के जबाब एमाःदेयाय “नुवां हों ओल एकाना आम अपन परभु परमेसर के ओलोम परखाविया।”
13नियां लेका सुबिन रकम रआ परीछा अगु रआ तयोम सयतान थोड़ घरीक कथिर ईसु ठिनुः एते तोराया।
ईसु रआ सुसार कामि रआ एटेच
(मती 4:12–17; मरकुस 1:14–15)
14अरो ईसु पबितर रावा रआ सोमोर्थ एते पेड़ेच केते गलील रे रुवाड़ेनाय, अरो उनी रआ चरचा हेनात-जपाः रे सुबिन पोरदेस रे फयलावेना। 15नुवां उनी रआ बिनती ओड़ाः रे सिखाव चित तहिएनाय अरो सुबिन उनी रआ बड़ाय चित तहिएनाकु।
नासरत रे ईसु रआ बेमाइन
(मती 13:53–58; मरकुस 6:1–6)
16अरो ईसु नासरत चट्टी रे हेच्चेनाय, जे ठिनुः हराबुरु केनाय अरो अपन रिति-रिवाज रआ मोताबिक जहुदी रआ जिराः हिलोः बिनती ओड़ाः रे सेन केते पड़हाः कथिर तिंगु एनाय। 17जसायाह परमेसर सोझ एते नधनी वनीः रआ पोथी उनी के एमाः एदेयाकु अरो उनी ता पोथी राड़ा केते उना ठिनुः पलटावेताय जे ठिनुः ओल एकाना,
18 #
जसा 61:1,2 “परभु रआ रावा इञ रे हेनाःआं
इनाते चि उनी ता रेंगेच-रबंङइकु के बुगिन खभेर परचार कथिर इञ के सला एकाःदेञाय,
अरो इञ के इनाते कुल एकाःदेञाय चि तोल इकु के छोड़ाव रआ
अरो अंधरा इकु के मेत नेनेल रआ बुगिन खभेर उदुःइञ
अरो नबर-दुबर वनकु के बिरीतकुञ,
19परभु रआ दया रआ समेय परचार कथिर कुल एकाःदेञाय।”
20तोब ईसु पोथी ता हरुप केते सुसारवान रआ ती रे एमाःकुवाय अरो दुरुप एनाय अरो बिनती ओड़ाः रे सुबिन होरकु ता ईसु के नेल ढिठ एकाःदेयाकु। 21तोब उनी, उनकु एते गागाम हेलावेनाय, “तिहिञ गी नुवां पबितर पोथी रे ओल अनाः, अपे रआ सामने पुरावेना, जे लेका चि नुवां अयुम एतापे।”
22सुबिन ता उनी के सहराव एदेयाकु अरो जे दया रआ गानाम उनी रआ मोचा एते उडुङ केना, उनी एते चकरीत एनाकु अरो गापाम हेलावेनाकु, “चिलि नोय जुसूफ रिई होपोन बंङ हेकेय?”
23ईसु उनकु के गामवाःकुवाय, “अपे निचित गी इञ के नियां कहावत गामवाञापे चि ए बैध, ‘आम अपन-अपन एते बुगी नोःमी’ कफरनहूम रे जहन्नाःहोय एकाना आले उना रआ बबेत रे ओनावेकाःआले, उना सुबिन अपन चट्टी रेहों करावेम,” 24#जोह 4:44अरो उनी ता गाम्मेताय, “इञ अपे एते सच गामवापे कनिञ जहय परमेसर सोझ एते नधनी वनीः अपन चट्टी रे इजात-कदर काय नाम कनाय, 25#1 राजा 17:1इञ आम एते सच गाम वमकानिञ चि एलियाह रआ हिलोः रे जोब साड़हे तीन बरीस तक सिरमा एते दाः काय गामा लाःआय, नोन्डो तक चि सुबिन दिसुम रे मरंग अकाल पोड़ाव केना उना समेय इसराइल रे बेचोट एते रड़ियाही तहिकेनाकु। 26#1 राजा 17:8–16आर एलियाह उनकु रे एते जहय ठिनुः काय कुलकेनाय, सिरीफ सयदा चट्टी इलाका रआ सारफत रे मिहोर रड़ियाही ठिनुः। 27#2 राजा 5:1–14अरो एलिसा परमेसर सोझ एते नधनी वनीः रआ समेय इसराइल रे बेचोट एते कोढ़ रोगी तहिकेनाकु सीरिया बोसिंदा नामान के बागी केते उनकु रे एते जहय काकु सुध केना।”
28नुवां गानाम ओनाव तागी चिमिनुः बिनती ओड़ाः रे तहिकेनाकु सुबिन कोरोध एते पेड़ेच एनाकु। 29अरो बिरीत केते उनी के चट्टी एते टांड़ी उडुङ एदेयाकु अरो जे टोंगरी रे उनी रआ चट्टी बोसाव केना उना दोड़ोम पखा रे इदिया चि उनी के ओन्डो एते उयुः काया। 30मगर उनी, उनकु रआ ताला रे एते उडुङ केते तोराया।
मुवां रावा कयल वनीः होर के बुगी एदेयाय
(मरकुस 1:21–28)
31ईसु गलील पोरदेस रआ कफरनहूम चट्टी रे हेच एनाय, अरो जिराः हिलोः होरकु के सिख एएम हेलावेनाय। 32#मती 7:28,29उनी रआ सिखाव एते चकरीत एनाकु चिलिमेनचि उनी हक सहित उनकु के सिखाव कुकनकेनाय। 33बिनती ओड़ाः रे मिहोर होर तहिकेनाय जे छुतका घिन रावा रआ कबजा रे तहिकेनाय उनी जोड़ राव एते कुर्री एताय, 34“नासरत रिई ईसु आले के आम एते चिलि कामि? चिलि आम आले के नास कथिर हेच एकानाम? इञ आम के सारी मिकानिञ आम ओकोय हेकेम? आम परमेसर रिई पबितर होर हेकेम।”
35ईसु ता उनी के डपटाव केते गामवादेयाय, “हपे तहीःमी अरो उनी एते उडुङ जोनमी।” तोब मुवां रावा उनी के तावाः एदेयाय अरो उनी रआ जहन हानि कराव बिना उनी, उनी एते टांड़ी उडुङ एनाय।
36जे नुवां घटना ता नेल एकेनाकु सुबिन चकरीत एनाकु, अरो उनकु अकु-अकु रे गापाम तहिएनाकु “नुवां चिलि बचन हेके? उनी हक अरो सोमोर्थ एते घिन रावा केहों हुकूम एमाकुकानाय, अरो उनकु उडुङ उतारोः कनाकु।” 37अरो ईसु रआ चरचा उना इलाका रे चइरो कोना फयलावेना।
हासु इकु के बुगी वेःकुवाय
(मती 8:14–17; मरकुस 1:29–34)
38उनी बिनती ओड़ाः एते उडुङ केते सिमोन रआ ओड़ाः तोराया। सिमोन रिई हनहरतेः रुवाः केनाय अरो उनकु, उनी कथिर ईसु के गोहराव एदेयाकु चि उनी के ईसु बुगीयाय। 39ईसु उनी रआ हेनात तिंगु केते रुवा ता डपटाव एताय अरो रुवा अरगुना, अरो उनी एनेनगी बिरीत केते उनकु रआ सेवा-सुसार हेलावेनाय।
40सिंगी बोंगा डुबाः बेरा जेकर-जेकर ठिनुः सुबिन रकम रेन हासु-रुवा एते कयल तहिकेनाकु उनकु के ईसु ठिनुः अगुवेःकुवाकु अरो उनी ता मिमीः होर रे ती दोहो केते उनकु के बुगी वेःकुवाय। 41अरो मुवां रावा हों किर्राव अरो नुवां गामवाते चि, “आम परमेसर रिई होपोन हेरेल हेकेम,” बेचोट रे एते उडुङएनाकु।
उनी डपटाव अरो काय गापाम इरीवाकुकेनाय चिलिमेनचि मुवां रावा सारी केनाकु चि नोय मसी हेकेय।
ईसु सुबिन चट्टी रे परचार एताय
(मरकुस 1:35–39)
42जोब अंगाना दो ईसु उडुङ केते मियाः सनसुन ठांव रे तोराया, उनकु दंड़ा-दंड़ा उनी ठिनुः हेच्चेनाकु अरो अरजी चित तहिनाकु चि उनी उनकु के बागी केते अलोय सिनुःकाय। 43मगर उनी ता उनकु के गामवाःकुवाय “इञ के एटाः चट्टी रेहों परमेसर रआ राइज रआ बुगिन खभेर उदुः जरुरेत हेनाःआं, इनाते परमेसर इञ के कुल एकाःदेञाय।”
44अरो नुवां जहुदिया पोरदेस रआ सुबिन बिनती ओड़ाः रे परचार चित तहिएनाय।
നിലവിൽ തിരഞ്ഞെടുത്തിരിക്കുന്നു:
लूका 4: BIY
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
