Yohanes 17
17
I Yesus mando’aang palola’a
1Maminna barik manjaruma dinen, i Yesuspi mulai dinen bado’a maningara’ inait. “Ama’e,” ingka kenang manjaruma, “mamin mondok bayana. Jaji di’en paitangko barik lo’a tauen kamaamanna Anaku, mainto’ iakpi barik kupaitang bua kamaamannu lo’a tauen,” ingka kenang. 2“Kole’a de’i maminko mameang kuasa lo’ku’ ibona gulungan ambata mantuariin. Kuasaku’ dinen mainto’ kusuro’a lo’da’ tio’ salaun-launna. Intain poang yang isuro’angen iko ilalam tanganku’, dinen yang kusuro’ tio’,” ingka kenang. 3“Jaji ratina tauen tio’ salaun-launnaan, kole’a mangilalana lo’u, yang jangka’a seraan tau mangkamen. Kole’a mangilalana bea lo’ku’ Yesus Kristus yang isuro’en iko lo’a duniaan,” ingka kenang.
4“Na, mamin kupayoang kamaamannu lo’a tau duniaan. Akaus mamin ambata karajaan yang isuro’angen iko lo’ku’. Dinen lalo yang mamayoangen kamaamannu lo’a tauen. 5Awandi’en, Ama’e, paitangko barik lo’a tauen kamaamanku’ inang nannu. Paitang kamaamanku’ yang andianen memen nannu nampina ipola duniaan.
6“Na, ira dinenpi, Ama’e, yang ira isuro’angen iko lo’ku’, mamin bea kujarumangko lo’da’. Daikona ampunaan memen, isuro’ang bapi iko lo’ku’. Jaji ira dinenpi barik malola’ani jarumu. 7Datamu barik kole’a samuana yang jalu isuro’angen iko lo’ku’ barasal kausa dari nannu. 8Jaji ambata jarum yang isuro’angen iko lo’ku’, mamin kujarumang lo’da’. Dasialoi bua kole’da’. Datamu jaji mondokku’ dari nannu, isuro’ iko tador lo’a duniaan,” ingka kenang.
9Jaji barik manjarum i Yesus lo’a Amana, “Na, okan tau duniaan yang kudo’aangen. Ira dinen yang isuro’angen iko lo’ku’, dinen yang kudo’aangen kole’a ikona lalo ampunaan. 10Jaji ira di’en yang tau nanku’, daiko ampunaan lalo. Yang tau daikoon ampunaan, daiakpi ampunaak bea. Jaji mamin bea dapayoang kamaamanku’ malaloi lo’da’. 11Jaji daiak di’en to’ mole’ak lo’u. Ira dinen lalo yang lalako’en di duniaan. Daiak na’anak lagi’ lalako’ indi’ang. O Ama’ku’ yang bareseen, iko manyagaien lo’da’, atas kuasana asannu yang idunjukang iko dinen lo’ku’. Manyagai lo’da’ mainto’ ira dinen rabarik dapat ipasera, mainto’ serana rabarik sama awan iki’. 12Daiak launna sarilao’ku’ nanda’, iak manyagaien lo’da’, atas kuasana asannu, yang idunjukangen iko lo’ku’ dinen. Kosan inyapen. Suma sera poang antarada’ inyapen mainto’ adarina baya yang datulisangen ilalam Jarumu. Tau manujuun lo’a kamateanen dinen, ia poang inyapen,” ingka kenang. Msm. 41:10; Yoh. 13:18.
13“Jaji Ama’e,” ingka i Yesus lo’a Amana, “awandi’en barik to’ mole’ak lo’u. Ambata jarumku’ di’en kujarumangen lo’da’ indi’angen, mainto’ sasauna nyawada’ sama awan iak. Mainto’ kosan kakuranganna. 14Mamin lalo kurantangang jarumu lo’da’. Rabarik dakalibakang ira kole’a tau duniaan kole’a okanna lagi’ sama nanda’. Sabangon bua nanku’. Okan sama nanda’, silaan barik. 15Jaji daiak di’en okan kusuro’ angkatang lo’da’ malaanangen lo’a tau duniaan. Yang kupitaan, kusuro’ manyagai lo’da’ lo’a kuasana i Pangabo yang jalu ajau’en dinen,” ingka kenang.
16“Daiak okan sama nanda’ tau duniaan. Daira palola’ku’pi okan bea, sabangon bua nanku’,” ingka kenang manjaruma i Yesus lo’a Amana. 17“Jarumu dinen, yang jalu tapaten, dinen pakai iko itiang pasilaanang palola’ku’ nanna tau duniaan. Palola’ku’ laanang itiang lo’u Ama’e. 18Ira di’en kusuro’ malamba’i tau duniaan, sama awan iko manyuro’en lo’ku’ lo’a tau duniaan. 19Daiak di’en kupasilaanang diri’ku’ itiang lo’u Ama’e. Okan poang itiang lo’u, itiang lo’a palola’ku’ bua, mainto’ ira dinenpi barik dapasilaanang bua itiang lo’u.
20“Jaji okan ira poang yang kudo’aangen. Kudo’aang bea ira yang parasaya’en lo’ku’ di ona’en, yang to’ parasaya’ kole’a jaruma palola’ku’ yang isuro’angen lo’da’. 21Kudo’aang ira mainto’ ipaserana, Ama’e. Mainto’ sarilao’a nanka’ sama awan iki’. Arung ipasera mainto’ andian mole’a rabarik, mainto’ parasaya’a tau duniaan rabarik kole’a ikona lalo yang manyuro’en lo’ku’. 22Daiak kutawa’i lo’da’ kamaaman yang imeangen iko lo’ku’ mainto’ ira dinen ipasera bua sama awan iki’. 23Iak sarilao’en nanda’, daikopi sarilao’en nanku’, mainto’ ipasera jaji. Mainto’ datamuna barik kole’a tau duniaan kole’a iko lalo yang manyuro’en lo’ku’. Mainto’ datamuna kole’a daiko mangasaangko lo’a palola’ku’ sama awan mangasaangu lo’ku’.
24“Jaji Ama’e, kamainya’anku’, ira di’en yang idunjukangen iko lo’ku’, disa kosanku’, arung inang bea kosanda’ ira dinen. Mainto’ dakitana kamaamanku’ yang dari nannu, yang imeangen iko lo’ku’. Kole’a nampina ipolaan duniaan mangasaangko memen lo’ku’. 25O Ama’ku’, iko lalo yang baloloken. Pal. 34:6-7; Rm. 2:4; 2Tim. 2:24-26; 2Ptr. 3:9. Na’anko dakilala kole’a tau duniaan di’en. Poangsi daiak kukilalako. Datamu bua ira di’en kole’a iko manyuro’en lo’ku’. 26Mamin kujarumangko lo’da’. To’ kujarumangko lapoang lo’da’ mainto’ mangasaangu dinen yang lo’ku’ pandeen barik mangasi lo’da’ manyuro’ tio’ sikasaang, mainto’ daiakpi sarilao’ku’ bua nanda’,” ingka kenang manjaruma i Yesus lo’a Amana.
നിലവിൽ തിരഞ്ഞെടുത്തിരിക്കുന്നു:
Yohanes 17: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
