Lukas 1
1
I Lukas mamola laporan lo’a i Teopilus
1Jaji tutulanna lo’a ambata jalu adariin antaraka’ dinen, tutulan tio’a i Yesus, bayu’ mamin yang datulisangen kole’a tauen, dalapor maam. 2Jaji sabangon bua suratda’. Kosan silaloanen nanna ambata tutulan yang idalingaan lo’da’ ambata tau manjarumangen Dongo Maamen dinen, yang tau maitaan kadarianna dinen tulak di akata. 3Jaji kurasa labi maam manulisak bea daiak, manjarumang lo’u Pa’ Teopiluse yang terhormat. Kole’a mamin kupariksa kadarian dinen samuana, dari akata mondok lo’a akausa di’en. 4Jaji kutulis barik itiang daiko mainto’ itamuna iko saja tapat lalo ambata jalu maminen iparajarangen lo’u. Jaji kenang unyina laporanku’ di’en lo’u.
Paranakanga i Yohanes Pambaptis dabayaang memen lo’a amana
5Jaji waktu nanga dinen andian Raja Herodes mangkam di Yudea. Jaji andian tau, i Sakaria asanna. Daia dinen i Sakaria tau imamen dari golongan imamen yang daasanen Abia. Bainyena dinen i Elisabet asanna, kanturunan baki’ Harun, kanturunan imam bea. 1Taw. 24:10. 6Ira dua lakunyeen dinen saja maam tapat basana di arona Alatala. Dalola’ani tapat ambata Ukuma Paraampuanka’, ambata parintana. 7Jaji ira duaan dinen atoa bea, kosan dinen anaka. Tau tamanang dinen bainyena.
8Jaji ambata golongan imamen sisurang. Rabarik andian asona golonganna i Abia dinen karaja di Saona Alatala. Jaji i Sakariapi manu bea karaja imamen dinen di arona Alatala. 9Jaji bakarajana inang, awan atoran kirasoon, mamola tanungan ira. Jaji tanungen dinen mandua’ barik lo’a i Sakaria. Jaji ia barik intamaan lo’a kosan yang bareseen manutung kamanyanen. 10Nanga datutunga kamanyanen dinen, tau to’ manyemba dinen babangkulung insaluan bado’a lo’a Alatala.
11Jaji nanga dinen barik i Sakaria dinen maita malaikata Paraampuanen paitang kalena lo’a di katona kosan panutungan kamanyanen dinen. 12Jaji barik tatakau dinen i Sakaria, saja nyin-nyingolong atakuta. 13Jaji barik manjarum malaikat dinen, “Ada’ atakuten, Sakariae. Kole’a Alatala mamin mandalinga do’anu. I Elisabet, bainyenu dinen ona’ to’ aranak babakaan. Arung iasan barik iko i Yohanes,” ingka kenang. 14“Sasau nyawanu ona’, saja maam kole’a anaku dinen. Bayu’ ona’ tauen sasauen nyawana kole’a paranakanga anaku dinen. Yer. 1:5. 15Kole’a ona’ dinen anaku to’ baraa pangkata di arona Alatala,” ingka kenang. “Jaji anaku dinen na’an pande mainyum anggur atau jalu balasaan dinen. Daia dinen to’ dalalako’i jaji kole’a Sumangat Bareseen dari paranakanga memen. Bil. 6:3. 16Bayu’ ona’ tau banua Israel to’ daawa mole’ balik lo’a Paraampuan Alatala,” ingka kenang. 17“Anakupi dinen to’ lamba’ mangamasang ijolona Paraampuanen. To’ bakuasa. Sabangon bua nanna baki’ Elisajo kuasana. Ona’ dinen ambata babaka yang maminen ampuna anak, daawa mamikirang barik lo’a kaparuluanna araanaka. Ambata tau malawanen dinen, daawa mole’ balik lo’a panamuna tau yang tapaten. Ona’ dakamasang barik tauen lo’a pamondoka Paraampuanen,” ingka kenang jaruma malaikaten lo’a i Sakaria. Mal. 4:5-6.
18Jaji manjarum dinen barik i Sakaria lo’a malaikaten, “Ai lo’a kutamuna tapat to’ adariin? Daiakpi atoaak. Bainyeku’pi atoa,” ingka kenang manyautina.
19Jaji barik dasauti bapi kole’a malaikaten, “Daiko na’anko parasaya’. Daiak di’en i Gabriel asanku’. Daiak tumbas maroi lo’a Alatala parungi jarum manyuro’a lo’ku’. Dasuro’ak barik lo’u itiang manjarumang dongo yang maamen di’en. Dan. 8:16; 9:21. 20Jaji daiko barik na’anko dapat manjarum. Abisuko barik sampai lo’a asona adarina bayaku’. Kole’a daiko na’anko parasaya’ lo’a jarumku’. Kole’a bayaku’ di’en pasti adari ti’ mamin tuli asona,” ingka kenang malaikaten lo’a i Sakaria.
21Jaji barik tauen dinen kalanggangan marungina lo’a i Sakaria kole’a balaun ilalam Saona Alatala. 22Jaji barik minsaluan dinen barik, daia tetap abisu, na’an datamu manjarum. Jaji dabele kole’a tauen na’anna datamu manjarum, datamu barik mamin andian jalu paitang kalena lo’a ilalam Saona Alatala. Kole’a na’anna datamu manjarum, mamakai tanda poang nanna tanganna.
23Jaji barik maminna akaus tugasa dinen, i Sakariapi mole’ lo’a saona. 24-25Mamin mole’ lo’a saona, bainyenapi dinen, i Elisabet, laloang araunting. Jaji barik manjarum i Elisabet, “Di’en Paraampuanen yang manggulungiin lo’ku’, barik, yang mangamase’iin,” ingka kenang. “Awandi’en rabarik mamin paunjang bawa’ku’ di arona tauen kole’a tamanangku’jo dinen,” ingka kenang manjaruma. Rabarik dinen daia limang bulan dinen lalako’ang poang kalena ilalam saoen.
Paranakanga i Yesus dajarumang memen
26Maminna dinen i Elisabet de’i araunting, maminna anam bulan arauntinga, jaji malaikat Gabriel dinen dasuro’ kole’a Alatala lamba’ lo’a banua Nasaret propinsi Galilea. 27Jaji barik dinen daia manuju lo’a babainye bungasen, i Maria asanna. I Maria dinen mamin sitajuk nanna babaka iasanen dinen i Yusup. I Yusup dinen kanturunanna baki’ Raja Daud. Mat. 1:18. 28Jaji barik dinen manjarum malaikaten lo’a i Maria, “Mase’ko anake. Daiko mamin dauntungi tapat, kole’a andianna Paraampuanen nannu,” ingka kenang manjaruma malaikaten lo’a i Maria.
29Jaji barik maminna dataantalinga jarum malaikaten dinen kole’a i Maria, tatakau ilalam atena. Jaji barik tatakauna ilalam atena dinen, katoani kalena, “Ai ratina kenanga dinen pamase’a lo’ku’. Na’an kutamu ratina,” ingka kenang.
30Jaji manjarum bapi malaikaten, “Ada’ atakuten Maria’e,” ingka kenang. “Kole’a Alatala mamin pamondokang kamaamanna atena lo’u,” ingka kenang. 31“Daiko ona’ arauntingko. Iparanakang iko ona’ anak babakaan. Jaji arung iasan barik iko i Yesus. Mat. 1:21. 32Anaku ona’ dinen to’ baraa pakaina. To’ iasan Anaka Alatala yang palin bakuasaan. Jaji daia dinen to’ dameang kadudukan kole’a Paraampuanka’ Alatala, dapadari raja di kangkamanna arabaki’ka’jo ijoloon, Raja Daud,” ingka kenang. 33“Daia ona’ to’ mamarinta lo’a kanturunanna i Yakub dinen sampai salaun-launna. Na’an to’ akaus kangkamanna dinen,” ingka kenang dinen malaikaten lo’a i Maria. 2Sam. 7:12-13,16; Yes. 9:6.
34Jaji barik mangatoani bapi i Maria lo’a malaikaten, “Ai lo’a bisaku’ araunting aranak? Daiak di’en anak babainye bungasak,” ingka kenang manjaruma lo’a malaikaten.
35Jaji barik manjarum bapi, dasauti kole’a malaikaten dinen, “To’ mondok ona’ Sumangat Bareseen lo’u. To’ dakarungiko kole’a kuasana Tau Palin Bakuasaan. Jaji yang to’ iparanakangen iko dinen to’ iasan barik Anaka Alatala,” ingka kenang. 36“Belejo sairunnu i Elisabet dinen yang maminen atoa, dapat bua araunting. Yang tau daasanen tamanang mamin bea anam bulan arauntinga. 37Kole’a kosan jalu na’anen pande, pande kausa ti’en lo’a Alatala,” ingka kenang manjaruma malaikaten lo’a i Maria. Mul. 18:14.
38Jaji barik manjarum bapi i Maria, “Kenang mainya’. Daiak di’en lalo suro’anna Paraampuanenak,” ingka kenang barik jaruma i Maria. Jaji malaikaten dinen barik lamba’ marantang lo’a i Maria.
I Maria dinen aramen lo’a i Elisabet
39Jaji nanga dinen barik i Maria dinen tarangkat, lamba’ karuru-karuru lo’a banua daerah Yudea di gulungan ukiten. 40Jaji maminna mondok dinen intama lo’a saona i Sakaria, terus manjarum lo’a i Elisabet mameang salam, “Salam,” ingka. 41Jaji dadalinga dinen unyina jaruma i Maria kole’a i Elisabet, anaka ilalam batangapi dinen pakaji’-kaji’. Jaji i Elisabetpi dinen dakuasai barik kole’a Sumangat Bareseen. 42Jaji barik manjarum dinen i Elisabet nanna unyi baraana pamondokang jalu maamen lo’a i Maria, “Dauntungiko Maria’e, labi lo’a gulungan babainye bokanen. Anakupi dinen yang to’ iparanakangen ona’, bauntung bea,” ingka kenang. 43“Diri’ku’pi di’en dauntungiak bea, sampai iparameniak iko induna Paraampuanku’. 44Kole’a de’i maminna kudalinga jarumu, laloang anakku’ ilalam batangku’pi dinen pakaji’-kaji’ lasana sasauna nyawana. 45Bauntungko yang tau parasaya’en to’ adari bayana Paraampuanen lo’u dinen,” ingka kenang manjaruma i Elisabet lo’a i Maria.
I Maria banyanyi mamudi lo’a Alatala
46Jaji manjarum barik i Maria,
“Sasau nyawaku’. Mamudi-mudi nyawaku’ lo’a Paraampuanen.
47“Maam nyawaku’ kole’a Alatala Raja Pangatio’ku’. 48Kole’a daia dinen mangamainya’i lo’ku’ suro’an yang palin akeke’en pangkatku’. Tarangkat awandi’en rabarik turun-manurun tauen to’ masan lo’ku’ bauntung.
49“Kole’a Alatala yang Baraa’en Kuasana, baraa bea maama lo’ku’. Barese lalo asanna.
50“Intain poang tau yang paduliin lo’a, dinen bua yang dakamase’iin sampai turun-manurun.
51“Dapayoang kuasana, sampai gulungan tau paraa’en kalena ilalam atena dinen, tambor-ambor kausana rabarik.
52“Ambata gulungan rajaan, dapakeke’ pangkata. Tau yang akeke’en pangkata daangkatang rabarik, dameang pangkat.
53“Ambata tau mase’en batanga dapangkaan nanna ambata jalu maamen, sampai bosor barik angkaanna.
“Ambata tau maamen tio’a dasuro’ lamba’ kosan jalu daawaan.
54“Dagulungi bua suro’anna, ambata tau Israelen kole’a Alatala. Na’an dalilu’ pangamase’ina 55lo’a baki’ Abrahamjo. Daparandam turun-manurun, awan lalo jarum bayana lo’a arabaki’ka’ ijoloon,”
ingka kenang banyanyina i Maria. Mul. 17:7; 1Sam. 2:1-10.
56Jaji i Maria dinen kira-kira talung bulan aramenna inang nanna i Elisabet, baru’ barik mole’.
I Yohanes Pambaptis daparanakang
57Jaji barik mondok dinen bulanna, i Elisabet aranak. Jaji barik anaka dinen babaka. 58Barik datamu kole’a ambata sairunna, kole’a ambata kawanna, sasau nyawana tauen kole’a balasana maama Paraampuanen lo’a.
59Jaji barik maminna dinen nangkanak dinen umura lapan aso, mondok ambata tauen to’ manyunat. Jaji barik tauen dinen to’ masan lo’a nangkanak dinen i Sakaria, malola’ani asanna amana. Im. 12:3. 60Jaji barik, “Na’an. Asanna dinen i Yohanes,” ingka kenang dinen i Elisabet.
61Jaji manjarum bapi tauen, “Asi lo’a kenanga? Kosan sairunnin asanna i Yohanes,” ingka kenang ira lo’a i Elisabet.
62Jaji barik matoani ira dinen lo’a i Sakaria pakai kode, matoani intain asanna yang maamen lo’a nangkanak dinen. 63Jaji barik dapita dinen batu tulis kole’a i Sakaria, datulis inang, “Asanna dinen i Yohanes,” ingka kenang, manyuro’ tatakau kausa tauen. 64Laloang barik tabae’ baba’a, talapas dinen lila’a laloang mulai manjarum mamudi lo’a Alatala. 65Jaji tatakau samuana dinen kawanna. Jaji tababar barik dongo dinen sasara daerah Yudea. 66Tau mandalingaanpi dinen samuana mangatoani ilalam atena, ai ona’ yang adariin lo’a nangkanak dinen. Kole’a mamin terang andianna kuasana Paraampuanen malalako’i nangkanak dinen.
Bayana Alatala malaloi i Sakaria
67Jaji amana i Yohanes, i Sakaria dinen, dakuasai barik kole’a Sumangat Bareseen, laloang daia manjarumang bayana Alatala,
68“Ipudi Paraampuan Alatalaka’ tau Israelen. Kole’a daia mamin mondok mamonang lo’a gulungan anak katio’anna.
69“Andian barik yang daangkatang dari antarana suro’anna Alatala dinen, dari anak kanturunanna Raja Daud, arabaki’ka’ yang ijoloon. Ia yang matio’en barik lo’ka’. 70Awan dinen bua jarum bayana ijolo memen yang dapamondokang malaloi ambata panjaruma Alatala yang bareseen.
71“Alatala daia to’ matio’ lo’a urangka’ dari jalu bahayaan. Dapase’angki’ atalo kole’a ambata musuka’, ingka, kole’a ambata tau arabuluun atena lo’ka’, ingka kenang.
72“Alatala daia to’ mangamase’i lo’a arabaki’ka’, ingka, to’ parandam lo’a bayana 73yang dajarumangen lo’a arabaki’ka’ baki’ Abraham, sampai asan diri’a dala pakarasang jaruma dinen, ingka kenang.
74“To’ matio’ lo’ka’ dari tanganna musuka’, ingka. Mainto’ baranika’ rabarik malola’ani lo’a, kosan barik katakutanka’.
75“Mainto’ ilola’ani barik atoran tio’ yang bareseen, tio’ tapat di arona Alatala salangke-langke tio’ka’,”
ingka kenang i Sakaria.
Jaji manjarum bapi pamaam lo’a anaka,
76“Daikopi anakku’ to’ iasan bea panjaruma Tau yang Palin Bakuasaan. Kole’a daiko to’ lamba’ ijolona Paraampuanen mainto’ kamasa dalan mondoka. Mal. 3:1.
77“Mainto’ datamuna barik kole’a tauen ratina dalan yang manyuro’ tio’ dari ukum dosaan, ati’en mamin daamponi dosaan, mamin daurusi.
78“Kole’a Alatalaka’ mangamase’i lo’ka’, alowe’ atena lo’ka’. Ialalo to’ manyuro’ imbara asoon, itiang marawangi lo’ka’, 79mainto’ mamancara dari Surga lo’a tau yang tio’en di jalu araunen, lo’a tau yang darauni kole’a ukum kamateanen.
“To’ marawangi lamba’ka’, dauluangki’ lo’a dalan yang mawaan sikamaamanen,”
ingka kenang manjaruma i Sakaria. Yes. 9:1.
80Jaji barik anaka i Sakaria dinen insang baraa, insang mainsita mantuarina, insang maam bea atena. Jaji lalako’ di kosan ateengen sampai asona to’ mala tugasa di arona tau Israelen.
നിലവിൽ തിരഞ്ഞെടുത്തിരിക്കുന്നു:
Lukas 1: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997