Lukas 21
21
Duit pameang bainye baluun
Mk. 12:41-44
1Jaji i Yesus mamele inang, bayu’ dinen tau manaro’ duiten di panaro’an duit di saona Alatala, yang tau maamen, yang tau bayu’en jaluna. 2Jaji barik dabele, andian bea bainye baluun, tau masikinen manaro’ duit inang dua papaka yang palin akeke’en. 3Jaji manjarum i Yesus, “Manjarumak lo’in tapat-tapat,” ingka. “Babainye baluun dinen, ia yang palin bayu’ dataro’en. Daia pameanga dinen labi lo’da’ bokanen yang manaro’ duiten inang. 4Kole’a yang bokanen dinen manaro’ duit kole’a bayu’a. Poangsi dinen babainye baluun saja jangka’a duita dinen yang itiang patio’ nyawana,” ingka kenang i Yesus manjaruma lo’a palola’a.
I Yesus manjarumang arurunna Saona Alatala
Mat. 24:1-2; Mk. 13:1-2
5Jaji barik palola’a i Yesus sapa dua pasijarumang dinen saona Alatala, yang daayu’i nanna ambata batu indaan, ambata pameang tau yang daseraan dinen lo’a Alatala. Poangsi i Yesus manjarum, 6“Ambata jalu ikitaan di’en, ona’ adarina, kosan batu sitataranen ibona seraan. Itampeang kausa ona’, ararak,” ingka kenang i Yesus lo’a palola’a.
I Yesus manjarumang ambata parinsa’en yang mulakataan
Mat. 24:3-14; Mk. 13:3-13
7Jaji manjarum ira palola’a, “O Pa’ Guru,” ingka, “nanga inde ona’ adarina gulungan jalu yang ijarumangen iko dinen de’i? Ai tandana ona’ ti’ mamin mainso’ to’ adariin?” ingka kenang lo’a i Yesus.
8Jaji manjarum i Yesus, “Jaji kenang. Maam-maamkin ona’ mainto’ kosan tau mawa alingoon lo’in. Kole’a bayu’ ona’ to’ mondok mala asanku’ yang masanen, Iak lalo tau dabayaangen dinen, ingka, Mamin mainso’ to’ adariin, ingka bua. Poangsi ada’kin malola’en lo’da’. 9Andian ona’ dongo tau suno’en, tau sarantak malawanen, ada’kin atakuten. Arung adari lalo, poangsi nampi mondok katuntunganna,” ingka kenang i Yesus lo’da’.
10Jaji manjarum, “Arung banua suno’anen nanna banua bokanen. Arung kangkaman suno’an nanna kangkaman bokanen. 11To’ tatagar tana’en kole’a gempa bumiin. Kenang bea ona’ karaparan di duniaan di’en, panyakit sampar lo’din-lo’din, andian. Bayu’ bea ona’ tanda baraa’en di suanen ikitaan, manyuro’ atakut lo’a tauen,” ingka kenang lo’da’.
12“Poangsi nampina adari samuana dinen,” ingka, “to’ datingkamkin, to’ daparinsa’ikin. To’ daserakin lo’a paurus sao sambayangen, lo’a ambata sao ukumanen. Ona’ to’ daawakin di arona ambata gubernur, di arona ambata rajaan kole’a jarum iawana ikin atas asanku’, 13datiang panyaksi dinen lo’ku’,” ingka kenang. 14“Jaji daikin arung putusi kalenin memen ilalam batak nyawanin, ada’kin kalangganganna jarumin di arona paurusen. 15Kole’a to’ kumeang lo’in jarum, to’ kumeangkin panamu itiang pasitimbangang jalu ajau’en nanna jalu maamen, manyuro’ atalo dinen musunu. Sampai dinen na’an dakule’ dalawan, na’an dapat dasasalang jarumin dinen,” ingka kenang. Lk. 12:11-12. 16“Ona’ dinen to’ daaduangkin kole’a aratamatoanin, kole’a ambata arasairunnin, ambata kawannin. Daikin sapa dua ona’ to’ iduno’, 17to’ dakalibakang tau kole’a asanku’. 18Poangsi daikin dinen, maam. Kosan dampe buk di karampang ulunin yang anyapen. 19Jaji panaatkin poang, ka’ bea ikatio’a kalenin,” ingka kenang i Yesus lo’da’.
Banua Yerusalem to’ darampas
Mat. 24:15-22; Mk. 13:14-19
20“Jaji ona’ dinen ti’ mamin ikita ambata tentaraan mangulilingiin banua Yerusalem, inang itamuna mamin mainso’ adarina to’ darampas. 21Jaji ti’ ikita awan dinen, tau yang di propinsi Yudea arung rariang kalena lo’a gulungan ukiten mainto’ na’annin darambit tangkup. Tauen di banuaan arung arari minsaluan. Tau maminen insaluan, ada’ bea intamana bapi lo’a banuaan. Arari poang. 22Kole’a inang lalo adarina bayana Alatala yang datulisangen memen, mondok mamin aso to’ daukuma anak katio’anna. Hos. 9:7. 23Ona’ dinen mase’ tapat tau yang arauntingen, tau panusu’ anakaan. Lo’a tau biasaan mamin marinsa’, ai lagi’ ona’ tau manuntuani anakaan. Kole’a marinsa’ jaji ona’ banuaka’ di’en, to’ dalao’i ukum kole’a Alatala lo’a tauen di’en. Arasi tapat. 24Sapa dua to’ mate kole’a pedangen, sapa dua ona’ to’ datingkam, darariang lo’a din-lo’a din sasara banua tau. Banua Yerusalempi di’en to’ darampas jaji kole’a ambata tau okanen Yahudiin. To’ dakuasai sampai atuli asona mangkama tau okanen Yahudiin dinen awan yang maminen datujuang kole’a Alatala,” ingka kenang i Yesus.
Balu’ai ona’ pamondoka Anak Mantuariin?
Mat. 24:29-31; Mk. 13:14-19
25“Ona’ dinen to’ paita tandana jalu adariin di matasoon, di bulanen, di ambata bintangen. Ambata tau tio’en di duniaan to’ atakut. To’ kalanggangan kole’a jawaan, kole’a unyina, kole’a raana galombanga. Yes. 13:10; Yeh. 32:7; Yl. 2:31; JD. 6:12-13. 26To’ karamatean tauen lasana atakuta lo’a jalu yang to’ adariin di duniaan. Kole’a gulungan bulan matasoon bintangen di suanen to’ akaru kausana. 27Mamin dinen barik to’ dakitaak lalo kole’a tauen. To’ mondokak Anak Mantuariin di domen nanna kuasaku’ nanna kamaamanku’ yang palin arawangen. Dan. 7:13; JD. 1:7. 28Jaji ti’ mamin ikita adarina awan dinen, akadengkin barik. Maningara’kin, mamele inait. Kole’a mamin mainso’ lalo adarina to’ dalapasangin dari parinsa’en,” ingka kenang.
Tanda to’ mondoka musim sisiaken dasama’ang lo’a tanda to’ mondoka i Yesus kaduang kaliin
Mat. 24:32-35; Mk. 13:28-31
29Jaji barik dajarumang lo’da’ sama’ jarum, “Balajarkin dari soal akat araan nanna ambata kayu bokanen. 30Jaji di musim dinginen, akat araanpi dinen kosan daunna. Poangsi mainso’ to’ musim sisiak, aradaun barik gulungan akat kayuun. Jaji mamin ikita awan dinen, itamu barik iki’, tandana lalo kole’a mamin mainso’ musim sisiaken. 31Jaji gulungan jalu to’ adariin yang kujarumangen de’i ka’ kenanga. Ikita ona’ adarina jaluun dinen, tandana lalo. Itamu barik mamin mainso’ baya Alatala to’ mangkama lo’ka’,” ingka kenang i Yesus lo’da’.
32“Jaji manjarumak lo’in tapat-tapat, nampina akaus adari gulungan jalu kujarumangen dinen, nampi bua talalo inyap tau yang di tataka tau maitaan tandana dinen. 33Suanen dinen ona’ to’ talalo anyap. Duniaanpi ka’ kenanga. Poangsi gulungan jarumku’ di’en na’an mainya’ anyap, tetap adari kausana jalu kujarumangen,” ingka kenang i Yesus lo’da’.
Arungki’ manyagai
34“Jaji maam-maam mamikirin,” ingka kenang. “Ada’ki’ tama’ lolo to lo’a jalu yang manyuro’ na’anen baguna lo’ka’. Ada’ dinen akaus poang nyawaka’ lo’a dinen soal rami-ramiin, lo’a mainyumen, lo’a kalangganganen, lo’a atakuten,” ingka kenang. “Ona’ ti’ki’ tama’ lo’a jalu na’anen baguna, manyuro’ lo’ka’ na’an itamu iki’ tujuanka’, manyuro’ na’an bakamas. Awan lalo ringkapen yang malao’iin lo’a gulungan burungen, awan dinen bea na’an itamu iki’ waktu aso daurusina duniaan. Itamu na’an itamu, mamin to’ adari. 35To’ alao’ lo’a samuana inyaunga galung suanen. 36Arungkin bajaga dinen. Bado’akin mainto’ ikule’ ipanaat sampai asona akadengin di aroku’ Anak Mantuariin,” ingka kenang i Yesus lo’a palola’a.
37Jaji kiraso i Yesus dinen majara di saona Alatala. Mondok pamamalamen barik, lamba’ dinen samalam di ukit Saitun. Lk. 19:47. 38Malam-malam mondoka tauen lo’a saona Alatala to’ manaantalinga lo’a i Yesus.
നിലവിൽ തിരഞ്ഞെടുത്തിരിക്കുന്നു:
Lukas 21: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
