য়হোশু 11
11
জাইপুবি পোঙাওয়া
1-2ইস্রাইলকো জিয়োওয়াকো দেরেং হাত্রং হাসরকো জাইপু য়াবীনকোতা দেরে, আকুহা মাদোনকো জাইপু য়োবাব, শিম্রোন আসা অখাপকো জাইপুবি, দ্যাম্যা কাটুকো য়্যাগ্যইকো দেশ গালীল দাব্রিকো ম্যাম্যা কাটুকো য়র্দনকো ওয়াংবোই আসা ডোরকো আবেইকো ঝাহাদিকো আরিতা নিওয়া শহরবিকো জাইপুবিহিং আকু দেরেং কাইপুয়ে। 3আকুহা য়র্দনকো নিদ্যাতা য়ুংওয়া কনানীবিহা এমোরি, হিত্তি, পরিজ্জি, য়্যাগ্যইতা য়ুংওয়া য়বুসী আসা মিস্পা দেশকো হেম্রোন য়্যাগ্যইকো ডেবেতা য়ুংওয়া হিব্বিবিহিংনে দেরেং কাইপুয়ে। 4আবিহা আপনি আপনিকো সিপাইবিহিং পারামসা ওয়াংয়ে আসা এপাজিংওয়া ইচো সিপাই জিংপুয়ে, আউতাহা ঝাহাদিকো আরিতা নিওয়া বার্পুই সেই উইসে সিপাইবি নিমি। আবিংহিংপা উইসে ও্যইংঙা গাড়ী আসা ও্যইংঙাবিরে নিমি। 5ই তাংসা জাইপুবিহা আপনি আপনিকো সিপাইবিহিংপা চিত্তা ইস্রাইলকো তোইতা লুইসুকো মেরোম হোক্রাতা তাম্বু বানাইয়ে। 6পরমপ্রভুহা য়হোশুহিংয়া জাংয়ে, “আবিহিংপা মাছুগে। জুকুং এত্রং চোইপা কাহা ইস্রাইলকো সোতা আবি তাংসাহিং স্যাপুনতেরোওয়া। নাবিহা আবিকো ও্যইংঙাকো কোকোই ওকে-ওকেপা বানাইমসা ও্যইংঙা গাড়িবি ওংপানেরোওয়া।” 7আকো সোতা য়হোশু আসা আকো তাংসা সিপাইবিহা একবিরি মেরোম হোক্রাতা আবিকো তোইতা আক্রমন জোয়ে। 8আসা পরমপ্রভুহা আবিহিংয়া ইস্রাইলবিকো খুইতা স্যইপুয়ে, আসা আবিহা আবিহিংয়া জিয়োয়ে, আসা আবিহিংয়া টেবো সিদোন চোইপা, আসা মিস্রাপদ মৈম, আসা নুব্যা কাটুকো মিস্পাকো ওয়াংবোই চোইপা ঘীপুমসা পুরায়ে, তাংসা দুসমনবি মাসিনু চোইপা লুইসুনেয়ো। 9প্রভুসেংজাকো আজ্ঞা জোমি ত্যাবাপা য়হোশুহা আবিহিংয়া জোয়ে। আবিহা আবিকো ও্যইংঙাকো কোকোইবি ঠেপুয়ে, আসা আবিকো ও্যইঙা গারিবিহা মেতা ওংপাপুয়ে। 10আত্রংহা য়হোশুহা লায়োংয়ে আসা হাসোরহিং কপ্জা জোচাপুয়ে আসা আকো জাইপুহিং স্যাপুয়ে। (আত্রং হাসোরহা আকু তাংসা রাজ্যকো প্যাকোতাহা তাংসারোমাহা সে নিওয়া নিমগা।) 11আউতা নিওয়া তাংসাহিং আবিহা স্যাপুয়ে, হাংসুহিংনে ঙাজ্যইং ম্যালাতো আসা হামোরহিংয়া ওংপাপুয়ে। 12য়হোশুহা আকু তাংসা শহরবি আসা আকো জাইপুবিহিং কব্জা জোয়ে আসা প্রভুসেংজাকো ডেইয়া মোসাকো আজ্ঞা জোওয়া সেই তাংসাহিং স্যাপুয়ে। 13আদো য়হোশুকো ওংপাপুওয়া হাসোরহিং ল্যামসা দোসরা য়্যাগ্যইতা বানাইওয়া শহরবিহিংয়া ইস্রাইলিবিহা মোওংপাতো। 14ই শহরতা নিওয়া পাংক্যইওয়া সোংসাবি আসা পিকা এতাবিহা ইস্রাইলিবিহা পারামসা আপনিকো সোতা এচাপুয়ে। আদো তাংসা দিংঙাবিহিংয়া আবিহা স্যাপুয়ে, হাংসুহিংনে ঙাজ্যইং মেয়েতো। 15পরমপ্রভুহা আপনিকো আজ্ঞাহা আপনিকো ডেইয়া মোসাহিং পিচায়ে, মোসাহা আকু আজ্ঞাহা য়হোশুহিং পিচায়ে, আসা য়হোশুহা আকো আজ্ঞা পালন জোয়ে। পরমপ্রভুহা মোসাহিং আজ্ঞা জোওয়া সেই তাংসা নুওয়াং য়হোশুহা পালন জোয়ে।
য়হোশুকো কব্জা জোওয়া দেশবি
16য়হোশুহা য়্যাগ্যইকো দেশ আসা আকো দেবেতা নিওয়া জায়গাবি, দ্যাম্যা আসা ম্যাম্যা নিহদ্যাকোসা জায়গা, গোসোনকো তাংসা এলাকা আসা ম্যাম্যা কাটুকো সেক্কোউওয়া দেশ আসা য়র্দন জোরাকো আবেইতা নিওয়া তাংসা ওয়াংবোইবিপারাং কব্জা জোপুয়ে। 17-18ম্যাম্যা কাটুকো দেশ এদোমকো আবেইকো হালাক য়্যাগ্যইসোহা দ্যাম্যা কাটুকো ভাগতা হেম্রোন য়্যাগ্যইকো ম্যাম্যা কাটুতা নিওয়া লেবনানকো আবেইতা নিওয়া বাল-গাদ চোইপা বেইপুমি নিমি। য়হোশুহা উইসে দিন চোইপা ই জায়গাবিতা য়ুংমসা জাইপুবিহিংপা লুইসুয়ে, আদো আকু তাংসাহিং কোব্জা জোপুয়ে আসা আকো জাইপুবিহিংয়া স্যাপুয়ে। 19ইস্রাইলকো দিংঙাবিহিংপা চাংসুমসা য়ুংওয়াহা ইচো শহর মেংচে গিবোন নিমি। আউতাহা হিব্বি জ্যাকো দিংঙাবি য়ুংমি নিমি। দোসরা তাংসা দেশহিংয়া ইস্রাইলিবিহা লুইসুইয়াতা জিয়োয়ে। 20প্রভুসেংজাকো উদ্দেশ্যহা নিমি, আবি তাংসা ইস্রাইলিকো বিরুদ্ধতা লুইসুকো ওয়োংকো আসা তাংসা লামতুওয়া মোতোপা নাশ জিংপুমসা সিপুকো, হেপা পরমপ্রভুহা মোসাহিং আদেশ জোমি নিমমে। 21আত্রংকো সময়তাহা য়হোশুহা হ্যামসা অনাকি তাওয়া দৈত্যবি ত্যাবাক্যইওয়া বংশবিহিং নাশ জোয়ে। আকু দৈত্যবি বেওয়া য়্যাগ্যইকো দেশতা, হেব্রোন, দবীর, অনাব, য়হুদা আসা ইস্রাইলকো তাংসা য়্যাগ্যইকো এলাকাতা য়ুংচাংমি। য়হোশুহা আবিকো আসা আবিকো শহরবিহিংয়া পুরা নাশ জোপুয়ে। 22ইস্রাইল দেশতাহা অনাকি জ্যাকো দিংঙাবিহা হাংসুরে মাবাচেতো; আদো গাজা, গাদ আসা অশ্দোদতা আস্যইস্যই মেংচে আবিহা বাচেমি নিমি। 23প্রভুসেংজাহা মোসাহিংয়া আজ্ঞা জোওয়া সেই য়হোশুহা তাংসা দেশবিহিংয়া অধিনতা জোপুয়ে। য়হোশুহা আকু দেশবিহিংয়া আপনিকো দেশ বানাইকো তামসা ইস্রাইলবিহিং পিচায়ে আসা তাংসা আপনি আপনিকো বংশ অনুসার ইচো ইচো জোমসা পোপিয়ে।
আসা দিংঙাবিহা লুইসুওয়াসো বিশ্রাম লাংয়ে।
നിലവിൽ തിരഞ്ഞെടുത്തിരിക്കുന്നു:
য়হোশু 11: TXO
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2026 Bible Society of India in association with India Evangelical Mission