Ngigua, San Marcos Tlalcoyalco - WBT Version (NT) Non-Drama

Ngigua, San Marcos Tlalcoyalco - WBT Version (NT) Drama

Are kainxin kuexiꞌin beꞌe, ubeꞌe thee Ndo Dio, ko tha jiꞌi ubeꞌe ngain ndo, ko tha jiꞌi, jaan, Ndo Dio. Ko tha ubeꞌe ngain Ndo Dio are kainxin kuexiꞌin beꞌe. Ko ixin tha mee, Ndo Dio binchechjian kain thi jii; ko ja̱ rugeꞌa tha mee, kain thi jii rukunchjianꞌa. Ko tha jiꞌi thi nchegechon kain thi kunchjian, ko thi nchegechon ni mee, inchin naa xruꞌi nchengasaan ngain chujni. Ko thi dingasaan jiꞌi nchengasaan ngain thi naxin xeꞌe, ko thi naxin xeꞌe thixinꞌa ncheganga xruꞌi jiꞌi.
Ko Ndo Dio ruaꞌan naa xii diꞌin Juan. Ko juii xa ixin runichja xa ixin xruꞌi jiꞌi ngain chujni ko rugithikaon na̱ ngain xruꞌi ixin thi jeꞌe nichja. Ko Juan jeꞌa jeꞌe thi xruꞌi nchengasaan, jeꞌe jeꞌo nichja thi ndua ixin thi xruꞌi nchengasaan mee. Ko thi ndua xruꞌi nchengasaan jiꞌi, jinchengaseꞌen kain chujni ko uchiaon jithii ngataꞌa nunthe.
Ko jeꞌe beꞌe ngain nunthe, ko nunthe kunchjian nunthe ixin jeꞌe tha, aro chujni ngataꞌa nunthe batsuanꞌa na̱ jeꞌe. Ko juii bigeꞌe ngataꞌa nunthe, aro chujni rajnee bayeꞌa na̱. Aro kain ni bayée jeꞌe ko bithikaon na̱ ngain, jeꞌe chjee na̱ juachaxin diꞌin na̱ xeꞌen Ndo Dio, ko jeꞌe na̱ jeꞌa inchin xeꞌen naa ndudaꞌa nthiꞌi ngataꞌa nunthe, ko duanꞌa na̱ inchin kain chujni, ko jeꞌa ixin naa xii juinao ixin chriꞌi runchekunkjiꞌi xeꞌen; jeꞌe na̱ xeꞌen Ndo Dio na̱ ixin jañaa juinao ndo.
Ko jeꞌe thi tha mee kjan inchin naa xii ko beꞌe ngayaa ná, ko jeꞌe anto thjueꞌe kainxin chujni ko jeꞌe thi ndua, ko jaꞌan ná bikon ná thi jié juachaxin chunda ixin jeꞌe thi nakuaxinxon Xeꞌen Ndudaa ná, ndo thjen ngajni. Juan nichja jian ixin jeꞌe, ko ndachro:
—Xii jiꞌi, thi jaꞌan bandachrjan: “Tsii naa xii icha renthe ke jaꞌan, ko jeꞌe ubeꞌe icha saꞌo ke jaꞌan.”
Ko jeꞌe chunda kain thi jian ko kain ná dayée ná thi jian kainxin nchaꞌon ixin jeꞌe nthanchaon ná. Ndo Dio binthagatsuan ná ndo ley ixin Moisés, aro ixin Jesucristo binthagatsuan ná ndo thi thjuaa ná ndo ko thi ndua. Xra xruꞌin chujni dikon Ndo Dio. Jeꞌo thi nakuaxinxon Xeꞌen ndo, thi jian chunxin ndo ko binthagatsuan ná xan jeꞌe ndo.


Jiꞌi thi banichja Juan are ni judío ruanxin na̱ rajna Jerusalén kanxion daana ko kanxion ni levita ixin ruganchiangi na̱: “¿Kensen jaꞌa?” Ko jeꞌe ndachro thi ndua:
—Jaꞌan jeꞌa Cristo na.
Kuthimejan kjan na̱ banchiangiꞌi na̱:
—¿Kensen jaꞌa remee? ¿Ajaꞌa Elías?
Ko Juan ndachro:
—Naꞌi, jeꞌa jaꞌan.
Kuthimejan banchiangiꞌi na̱:
—¿Kexreen remee? ¿Ajaꞌa thi dayeꞌe juajnee Ndo Dio?
Ko Juan ndachro:
—Naꞌi.
Kuthimejan ndache na̱:
—¿Kensen jaꞌa remee? Ixin rugunda tsjiꞌan ná juajna ngain thi chujni ruaꞌan ná nthiꞌi, ¿keꞌe rundachjejin ni ra ixin kensen jaꞌa remee?
Juan ndachro:
—Jaꞌan thi tuyao ngagaꞌa jna thi xruꞌin jii ko ndachrjan: “Nchechjian ra naa nthiꞌá nao ixin Nchaa ná”, —jañaa inchin ndachro Isaías, thi bagayée juajnee Ndo Dio.
Ko ni teꞌi kjui na̱ ixin jañaa ndachro xi fariseo ko biganchiangiꞌi na̱ Juan kain yaa. Ko jeꞌe na̱ binthendachro na̱ ngain Juan:
—Mexinxin, ja̱ jeꞌa jaꞌa thi Cristo, jeꞌa Elías ko kai jeꞌa thi dayée juajnee Ndo Dio, ¿unda nchegithe chujni?
Juan ndachro:
—Jaꞌan nthagithe chujni kunixin jinda, aro ngayaꞌa ra xro judío ra jii naa thi chunxinꞌa ra. Ko jeꞌe tsii ko seꞌe icha renthe ke jaꞌan. Ko jaꞌan jikininxinꞌa na tsunxindangaa kathee.
Ko kain jiꞌi kuꞌen nthi̱ꞌa̱ Betábara, tuenxin nda Jordán, thi banchegithexin Juan chujni.

Nduexin Juan bikon Jesús jitunchieꞌen ngain jeꞌe, ko ndachro:
—Tsjexin ra, xii jiꞌi inchin kulekue Ndo Dio ixin jeꞌe xa tsjenga xa ꞌna kain thi jianꞌa ncheꞌe chujni nthiꞌi ngataꞌa nunthe. Ixin xi jiꞌi thi jaꞌan bandachrjanxin: “Tsii naa xii icha renthe ke jaꞌan, ko jeꞌe icha saꞌo ubeꞌe ke jaꞌan.” Ko jaꞌan bechunxianꞌa xii jiꞌi, aro jaꞌan juiꞌi ixin binthagithe chujni kunixin jinda, ko jañaa kain ra satsuan ra xii jiꞌi.
Kai ndachro Juan:
—Jaꞌan bikon Espíritu Santo xinkajinxin ngajni inchin naa kunthuanajni ko bithuꞌe ba ngataꞌa xii jiꞌi. Ko jaꞌan bechunxinꞌa xii mee, aro thi kuetunna binthagithe chujni kunixin jinda, jeꞌe ndachjejin na: “Are sikon Espíritu Santo ruxinkajin ko sithuꞌe ngataꞌa naa xii, xii mee thi sinchegithe chujni kunixin Espíritu Santo.” Ko jaꞌan bikon xii mee, ko ndachrjan ixin jeꞌe xa jaan, ndua, Xeꞌen Ndo Dio xa.

Nduexin nthi̱ꞌa̱ beꞌe Juan inaa kunixin yoo ni bagakao jeꞌe. Ko are bikon Juan batho Jesús, jeꞌe ndachro:
—Tsjexin ra, jiꞌi thi kulekue Ndo Dio.
Are kayui ni bagakao Juan kuiꞌin na̱ thi ndachro jeꞌe, saruee na̱ Jesús. Jesús ngaria ko bikon ixin jiruee ni teꞌi, ko ndachro ngain na̱:
—¿Keꞌe tethjee ra?
Jeꞌe na̱ binthendachro na̱:
—Suixin ke tjaago, ¿thinoo dithuꞌa?
Jesús ndachro:
—Xrakui ra sitsjeꞌe ra.
Kuthimejan binthekji kayui ni mee ixin binthegikon na̱ thinoo beꞌe Jesús ko nthi̱ꞌa̱ tabinthegithuꞌe na̱ ngain jeꞌe ixin undakutsukjin, ko mee inchin las cuatro.
Ko Andrés, xan choo Simón Pedro, jiꞌi naa thi yoo ni binthekiꞌin thi ndachro Juan ko saruee Jesús. Andrés saꞌo bithja xan choo, xan diꞌin Simón, ko ndachro ngain xan:
—Ubinthoo ná thi Mesías —ko mee ruchro thi Cristo.
Kuthimejan Andrés bikao Simón thi jii Jesús, ko are Jesús bikon Simón, ndachro:
—Jaꞌa diꞌin Simón, xi tsiꞌi Jonás, aro jai jaꞌa siꞌin Cefas —ko Cefas ruchro Pedro.

Nduexin Jesús ndachro kjui nuntheꞌe Galilea, ko nthi̱ꞌa̱ betan Felipe, ko Jesús ndache:
—Rueꞌna.
Ko rajnee Felipe diꞌin Betsaida, ko kai mee rajnee Andrés ko Pedro. Ko Felipe bikjee Natanael ko ndache:
—Jaꞌan ná bithja ná thi xii ncheꞌe inchin dajin ley dikji̱n Moisés ko thi dikji̱n ni bagayée juajnee Ndo Dio, ko mee Jesús xi tsiꞌi José thi juixin rajna Nazaret.
Ndachro Natanael:
—¿Anchao ngain rajna Nazaret sachrjexin chrujan thi jian?
Felipe ndachro:
—Xrakui sitsjeꞌe.
Are Jesús bikon ixin Natanael jitunchieꞌen, jeꞌe ndachro:
—Nthiꞌi juii naa xii nduaxin israelita xa ko xii jiꞌi ncheyaꞌa xa.
Ko Natanael banchiangiꞌi Jesús:
—¿Kexreen chunxinxin na?
Ko Jesús ndachro:
—Icha saꞌo ke Felipe rugithja, jaꞌan ubikon are tariꞌi ngangiꞌi ntha higo.
Ko Natanael ndachro:
—Suixin ke tjaago, ¡jaꞌa thi Xeꞌen Ndo Dio ko Rey Israel!
Jesús batheꞌe ko ndachro:
—¿A bithikaon jeꞌo ixin ndathjo ixin jaꞌan bikon jaꞌa taringaꞌngi ntha higo? ¡Nduaxin jaꞌa sikon icha tsjé thi jian sikuꞌen!
Kai ndachro Jesús:
—Ndua rindathjo ra ixin jaꞌa ra sikon ra ngajni jixrangee ko angeel Ndo Dio tsajiin ko ruxinkajin thi riꞌi jaꞌan, thi Xii juixin ngajni.

Сонсох San Juan 1