These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒪᒂᒡ ᒋᓴᔅ ᐊ ᐱᒧᑕᑦ ᐅᒋᔅᒋᓄᐊᒧᐛᑭᓇ ᐊ ᐎᒐᐛᑦ ᒋ ᐛᐱᒪᐤ ᓇᐸᐛ ᐊᑲ ᐅᒋ ᐛᐸᑎᒥᔨᒋ ᑲ ᐃᔅᐱᔅ ᐸᒋ ᐱᒪᑎᓯᔨᒋ᙮ ᐊᑯ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᑲ ᑯᒂᒋᒥᑯᑦ, “ᒋᔅᑯᑎᒪᒐᓱᐤ ᒐᒂᔪᐤ ᐛᒋ ᐃᓯᓇᑯᓯᑦ ᐅ ᓇᐸᐤ ᒋᒋᐛ ᐊᑲ ᐛᐸᑕᐧᒃ ? ᐎᔾ ᐊ ᐊᒋ ᒥᒋᑐᑕᐧᒃ ᑭᔭ ᒪᒃ ᐊᓂᔭᔪᐛ ᐅᓂᒋᐃᒂ ᐊᒋ ᒥᒋᑐᑎᒥᔨᒋ ?”
ᒋᓴᔅ ᒂ ᐎᑎᒧᐛᑦ, “ᓇᒪᔭᔪᐤ ᐎᔾ ᐅᒥᒋᑥᐅᓐ ᑭᔭ ᒪᒃ ᐅᓂᒋᐃᒂ ᐅᒥᒋᑐᑎᒧᐅᓂᔪᐤ ᑲ ᐃᑐᑕᑯᑦ ᐛᒋ ᐊᑲ ᒋ ᐛᐸᑕᐧᒃ᙮ ᒐᒋ ᐛᐸᑕᑭᓄᐎᔨᒡ ᒋᓴᒪᓂᑐᐤ ᐅᓱᐧᑲᑎᓯᐅᓐ ᐊᐅᑯᓐ ᐛᒋ ᐊᑲ ᒋ ᐛᐸᑕᐧᒃ ᐅ ᓇᐸᐤ᙮ ᒋᐸ ᐊᑐᔅᑯᐛᓄᐤ ᐊᓐ ᑲ ᐸᒋ ᐃᑎᓴᐅᑦ ᒪᒂᒡ ᐊ ᒋᓯᑲᒡ ᐛᔅ ᓴᔅ ᐎᐱᒡ ᒋᑭ ᑎᐱᔅᑲᐤ᙮ ᑕᐸ ᐊᑐᔅᒐᓄᐤ ᐊ ᑎᐱᔅᑲᒡ᙮ ᒪᒂᒡ ᐅᑕ ᐊ ᑕᔭᓐ ᐊᔅᒋᒡ ᐊᐅᒄ ᓂᔾ ᐃᔪᒡ ᐅᐛᔅᑕᐅᓄᐛᐤ᙮”
ᐃᔅᐱ ᐅᔭ ᑲ ᐃᔅᒋᔄᑦ ᒋᓴᔅ ᒋ ᓯᔅᑎᑯᐤ ᐊᓐᑕ ᐊᔅᒋᒡ ᐊᑯ ᒂ ᐊᓯᔅᒍᐛᒐᑦ ᐊᓂᔭ ᐅᓯᔅᑎᑯᐅᓐ ᐊ ᐊᐱᒋᑕᑦ᙮ ᐊᑯ ᒂ ᐊᓱᓱᓂᒺᑦ ᐅᔅᒋᓯᑯᔪᐛ ᐊᓂᔭᔪᐛ ᐊᑲ ᐛᐸᑎᒥᔨᒋ ᓇᐸᐛ ᐊᓂᔭ ᐊᓯᔅᒍᐛ ᐊ ᐊᐱᒋᐊᑦ᙮ ᐊᑯ ᒂ ᐃᑕᑦ ᐊᓂᔭᔪᐛ ᓇᐸᐛ, “ᒪᒋ ᒋᔅᑕᐸᐅᑕᒪ ᓇᑕ ᑲᐱᑲᓯᒧᓇᓄᐅᒡ ᓴᐃᓗᐊᒻ ᑲ ᐃᓯᓂᐧᑲᑕᒡ᙮” ᐊᓐ ᓴᐃᓗᐊᒻ ᐊ ᐃᓇᓄᐅᒡ “ᑲ ᐃᑎᓴᐛᑭᓄᐅᑦ” ᐅ ᐃᔅᒋᔄᒥᑭᓐ᙮ ᐊᑯ ᒂ ᒋᔅᑕᐸᐅᑕᑦ ᐊᓐ ᓇᐸᐤ ᐊᑲ ᐛᐸᑕᐧᒃ, ᒋ ᐛᐸᑎᒻ ᒪᒃ ᐃᔅᐱ ᒥᓐ ᑕᑯᓯᓂᑦ᙮
ᐊᑯ ᒂ ᐃᔅᒋᔄᔨᒋ ᐊᓂᔭᔪᐛ ᐃᔪᐛ ᑲ ᒋᔅᒐᔨᒥᑯᑦ ᑭᔭ ᐊᓂᔭ ᑲᒋ ᐛᐱᒥᑯᑦ ᐊ ᓂᑐᑎᒪᑦ ᓱᓇᔭᔪᐤ, “ᐊᐅᒄ ᐊ ᐅ ᓇᐸᐤ ᑲᒋ ᐊᐱᑦ ᐊ ᓂᑐᑎᒪᑦ ᓱᓇᔭᔪᐤ ?”
ᐱᔅᒐ ᐊᓐᒡ ᐃᔪᒡ ᒋ ᐃᑕᐅᒡ, “ᐊᐅᑯᓐ ᐊᓐ ᓇᐸᐤ᙮ ᐊᑯ ᑯᑎᑭᒡ ᑲ ᐃᔅᒋᔄᒡ, ᓇᒪᔭᐤ ᐊᓐ ᒥᒄ ᐊᐅᑯᓐ ᒐᑲᑦ ᐊ ᐃᓯᓇᑯᓯᑦ᙮” ᐊᑯ ᐊᓐ ᓇᐸᐤ ᑲ ᒥᓏᒋᐊᑭᓄᐅᑦ ᒂ ᐃᔅᒋᔄᑦ, “ᐊᐅᒄ ᐛᔅ ᐊᓐ ᓂᔾ᙮”
ᐊᑯ ᒂ ᑯᒂᒋᒪᒡ ᐊ ᐃᑕᒡ, “ᑕᓐᑕ ᐊᑯ ᑲ ᐅᒋ ᐃᔅᐱᔨᒡ ᒐᒋ ᐛᐸᑎᒥᓐ ?”
ᐊᑯ ᐊᓐ ᓇᐸᐤ ᒂ ᐃᔅᒋᔄᑦ, “ᐊᓐ ᓇᐸᐤ ᒋᓴᔅ ᑲ ᐃᓯᓂᐧᑲᓱᑦ ᓂᒋ ᒥᓏᒋᐃᒄ᙮ ᐊᓯᔅᒍᐛ ᒋ ᐸᒋ ᐊᓱᓇᐤ ᓂᔅᒋᓯᑯᒡ, ᐊᑯ ᒂ ᐃᓯᑦ ᒐᒋ ᒋᔅᑕᐸᐅᑕᐅᒡ ᐊᓐᑕ ᓴᐃᓗᐊᒻ ᑲ ᐃᓯᓂᐧᑲᑕᒡ ᑲᐱᑲᓯᒧᓇᓄᐅᒡ᙮ ᐊᑯᑕ ᑲ ᐃᑐᑕᔭᓐ᙮ ᐃᔅᐱ ᒪᒃ ᑲᒋ ᐃᓯ ᒋᔅᑕᐸᐅᑕᔭᓐ ᑎᐛᒡ ᓂᒋ ᐅᒋ ᐛᐸᑕᓐ᙮”
ᐊᑯ ᒂ ᑯᒂᒋᒪᒡ ᐊᓂᔭᔪᐛ ᓇᐸᐛ, “ᑕᓐᑕ ᑲ ᐃᑐᑕᑦ ᐊᓐ ᓇᐸᐤ ᑲ ᒥᓏᒋᐃᔅᒃ ?” ᐊᑯ ᒂ ᐃᔅᒋᔄᑦ ᐊᓐ ᓇᐸᐤ, “ᓇᒪ ᓂ ᒋᔅᒐᔨᒪᐤ ᑕᓐᑕ ᑲ ᐃᑐᑕᑦ᙮”

ᐊᑯ ᒂ ᐃᑐᑕᐊᒡ ᐊᓂᔭᔪᐛ ᓇᐸᐛ ᐊᑲ ᐅᒋ ᐛᐸᑎᒥᔨᒋ ᐊᓐᑕ ᐸᕆᓯᐊ ᐊ ᑕᔨᒋ᙮ ᒋ ᒍᐤ ᐊᔭᒥᐊᐅᒋᓯᑲᔪᐤ ᒪᒃ ᐊᓂᔭ ᒋᓴᔅ ᑲ ᐅᓯᐊᑦ ᐊᓯᔅᒍᐛ ᑭᔭ ᑲ ᒥᓏᒋᐊᑦ ᐊᓂᔭᔪᐛ ᓇᐸᐛ ᐊᑲ ᐅᒋ ᐛᐸᑎᒥᔨᒋ᙮ ᐊᑯ ᐊᓐᒡ ᐸᕆᓯᔨᒡ ᒥᓐ ᒂ ᑯᒂᒋᒪᒡ ᐊᓂᔭ ᓇᐸᐛ ᑕᓐᑕ ᐊᑯ ᐛᒋ ᐛᐸᑎᒥᔨᒋ᙮ ᒂ ᐃᑎᑯᒡ ᐊᓂᔭᔪᐛ ᓇᐸᐛ, “ᐊᓯᔅᒍᐛ ᒋ ᐊᓱᓇᐤ ᓂᔅᒋᓯᑯᒡ ᐊᑯ ᒂ ᒋᔅᑕᐸᐅᑕᔭᓐ ᐊᑯᑕ ᑲ ᐅᒋ ᐛᐸᑎᒪᓐ᙮”
ᐱᔅᒐ ᒪᒃ ᐊᓐᒡ ᐸᕆᓯᔨᒡ ᒋ ᐃᑕᐅᒡ, “ᐅ ᓇᐸᐤ ᒋᓴᔅ ᓇᒪ ᒋᓴᒪᓂᑐᐛ ᐊ ᑕᔨᒋ ᐅᒋᐤ, ᑕᐸ ᐊᐱᑕᔨᑎᒻ ᐊ ᒍᐤ ᐊᔭᒥᐊᐅᒋᓯᑲᔨᒡ᙮” ᑯᑎᑭᒡ ᒪᒃ ᒋ ᐃᑕᐅᒡ, “ᑕᓐᑕ ᒐᒋ ᐅᒋ ᒪᒥᔅᑲᒡ ᐃᑎᑦ ᐊᐛᓐ ᐊ ᒥᒋᑐᑎᒧᒂ᙮ ᒋ ᑎᐸᓂᐱᔪᒡ ᒪᒃ ᐅᔭ ᐅᒋ ?”
ᐊᑯ ᐊᓐᒡ ᐸᕆᓯᔨᒡ ᒥᓐ ᒂ ᑯᒂᒋᒪᒡ ᐊᓂᔭᔪᐛ ᓇᐸᐛ ᑲ ᒥᓏᒋᐊᑭᓄᔨᒋ ᐊ ᐃᑕᒡ, “ᑕᓐ ᐊ ᐃᑕᔨᒥᑦ ᒪᒃ ᒋᔾ ᐊᓐ ᓇᐸᐤ ᑲ ᒥᓏᒋᐃᔅᒃ ?” ᐊᑯ ᐊᓐ ᓇᐸᐤ ᒂ ᐎᑎᒧᐛᑦ ᐊ ᐃᑕᑦ, “ᐅᒋᔅᒋᐛᐃᒐᓱᐤ ᓂᑦ ᐃᑕᔨᒪᐤ᙮”
ᓇᒪ ᐅᒋ ᐎ ᑕᑈᑎᒧᒡ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋᒋᐛ ᐊᑲ ᐅᒋ ᐛᐸᑎᒥᔨᒋ ᐊᓂᔭᔪᐛ ᓇᐸᐛ ᑭᔭ ᐊ ᐛᐸᑎᒥᔨᒋ ᐊᑯ᙮ ᐊᑯ ᒂ ᐎᓴᒪᒡ ᐊᓂᔭᔪᐛ ᓇᐸᐛ ᐅᓂᒋᐃᑯᔪᐛ, ᒂ ᑯᒂᒋᒪᒡ ᐊ ᐃᑕᒡ, “ᐊᐅᒄ ᐊ ᐅ ᒋᑯᓱᐛᐤ ᑲ ᐃᔅᒋᔄᔭᒄ ᐃᔅᐱ ᑲ ᐸᒋ ᐱᒪᑎᓯᑦ ᓴᔅ ᐊᑲ ᐅᒋ ᐛᐸᑕᐧᒃ ? ᑕᓐ ᑲ ᐃᔅᐱᔨᑦ ᒪᒃ ᐛᒋ ᐛᐸᑕᐧᒃ ᐊᓄᒡ ?”
ᐅᓂᒋᐃᒂ ᒂ ᐃᓯ ᐎᑎᒥᔨᒋ, “ᓂ ᒋᔅᒐᔨᑕᓇᓐ ᐊᐅᑯᓐ ᐊᓐ ᑕᑈ ᓂᑯᓯᓇᓐ, ᑭᔭ ᓴᔅ ᐊᑲ ᐅᒋ ᐛᐸᑕᐧᒃ ᑲ ᐱᒪᑎᓯᑦ᙮ ᓇᒪ ᒪᒃ ᓂ ᒋᔅᒐᔨᒪᓇᓐ ᑕᓐᑕ ᐛᒋ ᐛᐸᑕᐧᒃ ᐊᓄᒡ, ᑭᔭ ᓇᒪ ᓂ ᒋᔅᒐᔨᒪᓇᓐ ᐊᐛᓐ ᑲ ᐃᑐᑐᐛᑦ ᒐᒋ ᐛᐸᑎᒥᔨᒋ᙮ ᑯᒂᒋᒪᒄ ᐊᐛᔪᐛ ᑲ ᒥᓏᒋᐃᑯᑦ, ᐃᔅᐱᑎᓯᐤ ᐛᔅ ᐊᓐ ᒐᒋ ᐎᑕᐧᒃ᙮” ᒋ ᑯᔅᑕᐅᒡ ᐊᓂᔭ ᒍᐤ ᐃᔪᐛ ᐅᔭ ᐛᒋ ᐃᔅᒋᔄᒡ ᐅᒡ ᐅᓂᒋᐃᑯᒪᐅᒡ᙮ ᐛᔅ ᒋ ᒋᔅᒐᔨᒪᐅᒡ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᒐ ᐎᐎᑎᓴᐛᔨᒋ ᐊᓐᑕ ᐊᔭᒥᐊᐅᒋᐛᐱᒡ ᐊᐛᔪᐛ ᒐ ᐃᔅᒋᔄᔨᒂᓂ ᙭ᑕ ᐊ ᐊᐎᔨᒋ ᐊᓂᔭᔪᐛ ᒋᓴᓴ᙮ ᐊᔪᐅᒄ ᐊᓂᔭ ᑭᔭ ᐛᒋ ᐃᔅᒋᔄᒡ “ᑯᒂᒋᒪᐧᒃ, ᐃᔅᐱᑎᓯᐤ ᐛᔅ ᐊᓐ ᒐᒋ ᐎᑎᒪᑕᒄ᙮”
ᐊᑯ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒥᓐ ᑲᐤ ᒂ ᐎᓴᒪᒡ ᐊᓂᔭᔪᐛ ᓇᐸᐛ ᐊᑲ ᐅᒋ ᐛᐸᑎᒥᔨᒋ ᐊᑯ ᒂ ᑯᒂᒋᒪᒡ, “ᒋᓴᒪᓂᑐᐤ ᐊᐅᒄ ᒪᒥᒋᒻ᙮ ᓂ ᒋᔅᒐᔨᒪᓇᓐ ᐅ ᓇᐸᐤ ᒋᓴᔅ ᐊ ᒥᒐᑎᓯᑦ᙮”
ᐊᑯ ᒂ ᐃᔅᒋᔄᑦ ᐊᓐ ᓇᐸᐤ, “ᑕᐸ ᓂ ᒋᔅᒐᔨᒪᐤ ᐊ ᒥᒐᑎᓯᒂ ᑭᔭ ᒪᒃ ᐊᑲ ᒥᒐᑎᓯᒂ ᐅ ᓇᐸᐤ ᒥᒄ ᓂ ᒋᔅᒐᔨᑕᓐ ᐊᑲ ᐅᒋ ᐛᐸᑎᒪᓐ ᑭᔭ ᐊᓄᒡ ᐊ ᐛᐸᑎᒪᓐ᙮”
ᒂ ᑯᒂᒋᒪᒡ ᐊ ᐃᑕᒡ, “ᑕᓐ ᒪᒃ ᑲ ᐃᑐᑕᔅᒃ ? ᑕᓐ ᑲ ᐃᑐᑕᐧᒃ ᒋᔅᒋᓯᒂ ᒐᒋ ᓴᓂᐱᔨᒋ ?”
ᐊᑯ ᒂ ᐃᑕᑦ, “ᓴᔅ ᔅᒋ ᐎᑎᒪᑎᓇᐛᐤ ᒥᒄ ᒪᒃ ᓇᒪ ᒋ ᐎ ᓂᑐᑕᓇᐛᐤ᙮ ᒐᒂᓐ ᐛᒋ ᓂᑐᐛᔨᒥᔭᒄ ᒥᓐ ᒐᒋ ᐃᔅᒋᔄᔭᓐ ? ᓇᒪᐎᔾ ᐊ ᒥᒄ ᑭᔭ ᒋᔨᐛᐤ ᐊ ᐎ ᓇᓴᐛᒄ᙮”
ᐊᑯ ᒂ ᒪᔭᔨᒪᒡ ᐊᓂᔭᔪᐛ ᓇᐸᐛ ᐊ ᐃᑕᒡ, “ᐊᐅᒄ ᒋᔾ ᐸᐃᒄ ᐅᒋᔅᒋᓄᐊᒧᐛᑭᓇ ᐊᓐ ᓇᐸᐤ, ᓂᔭᓐ ᐎ ᒧᓱᔅ ᐊᐅᒄ ᐛᐅᒋᔅᒋᓄᐊᒧᐛᑭᓂᑐᐎᔨᒥᑦ᙮ ᓂ ᒋᔅᒐᔨᑕᓇᓐ ᒧᓱᔅ ᐊᒋ ᐃᔨᒥᐃᑯᑦ ᒋᓴᒪᓂᑐᐛ, ᒥᒄ ᒪᒃ ᓇᒪ ᓂ ᒋᔅᒐᔨᒪᓇᓐ ᐅ ᓇᐸᐤ ᐎᔾ ᑕᓐᑕ ᐛᒋᒂ᙮”
ᐊᑯ ᐊᓐ ᓇᐸᐤ ᒂ ᐎᑎᒧᐛᑦ ᐊ ᐃᑕᑦ, “ᑕᑈ ᑭᑈ ᒥᔅᑲᑕᔨᑕᑯᓐ, ᐊᑲ ᐛᐛᒡ ᒋᔅᒐᔨᒪᒄ ᑕᓐᑕ ᐛᒋᑦ, ᒥᒄ ᒪᒃ ᑕᑈ ᐛᔅ ᐊᓐ ᓂᒋ ᐃᑐᑕᒄ ᒐᒋ ᐛᐸᑎᒧᒡ᙮ ᒋ ᒋᔅᒐᔨᑕᓇᓄᐤ ᒋᓴᒪᓂᑐᐤ ᐊᑲ ᓂᑐᑐᐛᑦ ᑲ ᒥᒐᑎᓯᔨᒋ, ᓂᑐᑐᐛᐤ ᒪᒃ ᐎᔾ ᐊᓂᔭ ᐊᐛᔪᐛ ᑲ ᐅᒋᒋᐧᑯᓂᐱᔅᑕᑯᑦ ᑭᔭ ᑲ ᐃᑐᑎᒥᔨᒋ ᑕᓐ ᐊ ᐃᓯ ᓂᑐᐛᔨᒪᑦ ᒐᒋ ᐃᑐᑎᒥᔨᒋ᙮ ᑲ ᐃᔅᐱᔅ ᑎᒂᒡ ᐅ ᐊᔅᒋᔾ, ᓇᒪ ᓂᑕ ᐅᒋ ᐸᑕᑯᓐ ᐊᐛᓐ ᒐᒋ ᐃᑐᑐᐛᑦ ᐊᐛᔪᐛ ᐊᑲ ᐛᐸᑎᒥᔨᒋ ᒐᒋ ᐛᐸᑎᒥᔨᒋ᙮ ᐊᓐ ᓇᐸᐤ ᑲ ᐃᑐᑐᐅᑦ ᒐᒋ ᐛᐸᑎᒪᓐ ᓇᒪ ᓂ ᐸᒋ ᐃᑐᑕᒄ ᒐᒋ ᐛᐸᑎᒧᒡ ᐊᑲ ᒋᓴᒪᓂᑐᐛ ᐊ ᑕᔨᒋ ᐅᒋ ᐅᒋᑯᐱᓇ᙮”
ᐊᑯ ᐊᓐᒡ ᑲ ᓂᑲᓂᔅᑯᐛᒡ ᒍᐤ ᐃᔪᐛ ᑲ ᐃᓯ ᐎᑎᒧᐛᒡ ᐊᓂᔭᔪᐛ ᓇᐸᐛ ᐊ ᐃᑕᒡ, “ᒥᒐᑎᓯᐅᓂᒡ ᔅᒋ ᐅᒋ ᐱᒪᑎᓯᓐ ᑭᔭ ᐊᓐᑕ ᒥᒐᑎᓯᐅᓂᒡ ᐊᑯᑕ ᑲ ᐃᓯ ᓂᑕᐅᒋᓂᑯᔨᓐ, ᐊ ᐃᑕᔨᑎᒥᓐ ᒪᒃ ᐃᔭᐱᒡ ᒐᒋ ᒋᔅᑯᑎᒧᐅᔭᒡ᙮” ᐊᑯ ᒂ ᐎᐎᑎᓴᐛᒡ ᒋᒋᐛ ᐊᓐᑕ ᐊᔭᒥᐊᐅᒋᐛᐱᒡ ᐊᓂᔭᔪᐛ ᓇᐸᐛ᙮

ᒋᓴᔅ ᒪᒃ ᒋ ᐸᑎᒻ ᐊᒋ ᐎᐎᑎᓴᐛᑭᓄᔨᒋ ᐊᓂᔭ ᓇᐸᐛ ᐊᑯ ᒂ ᓇᓂᑐᐛᐱᒪᑦ᙮ ᒋ ᒥᔅᑯᐛᐤ ᒪᒃ ᐊᑯ ᒂ ᐃᑕᑦ, “ᒋ ᑕᑈᔭᔨᒪᐤ ᐊ ᐃᔪᐤ ᐅᑯᓯᓴᓐ ?”
ᐊᓐ ᓇᐸᐤ ᒂ ᐎᑎᒧᐛᑦ ᒋᓴᓴ ᐊ ᐃᑕᑦ, “ᐸᒋ ᐎᑎᒧᐎ ᐊᐛᓐ ᐊᓐ ᑭᔭ ᒐ ᑕᑈᔭᔨᒥᒃ᙮”
ᒋᓴᔅ ᒂ ᐃᑕᑦ, “ᐅ ᑲ ᑭᓄᐛᐱᒥᑦ ᑲ ᐃᔨᒥᐃᔅᒃ, ᐊᐅᒄ ᐛᔅ ᐊᓐ᙮”
ᒂ ᐃᔅᒋᔄᑦ ᐊᓐ ᓇᐸᐤ, “ᒋ ᑕᑈᑕᑎᓐ ᐅᑎᐸᔨᒋᒐᐤ᙮” ᑲ ᐊᑎ ᐅᒋᒋᐧᑯᓂᐱᑦ ᐊ ᐊᔭᒥᐊᔅᑐᐛᑦ᙮
ᒋᓴᔅ ᒂ ᐃᑕᑦ, “ᓂᒋ ᐸᒋ ᑎᑯᓯᓐ ᐅᑕ ᐊᔅᒋᒡ ᒐᒋ ᑎᐸᔅᑯᓂᒐᔭᓐ ᐊᓐᑕ ᒐᒋ ᐅᒋ ᐛᐸᑕᒡ ᐊᓐᒡ ᐊᑲ ᐛᐸᑕᒡ, ᐊᑯ ᐊᓐᒡ ᑲ ᐛᐸᑕᒡ ᒐ ᐊᑲ ᒋ ᐛᐸᑕᒡ᙮”
ᐱᔅᒐ ᒪᒃ ᐊᓐᒡ ᐸᕆᓯᔨᒡ ᒋ ᑕᐅᒡ ᐊᓐᑕ ᑭᔭ ᒋ ᐸᑐᐛᐅᒡ ᐊᓂᔭ ᑲ ᐃᔅᒋᔄᔨᒋ ᐊᑯ ᑲ ᑯᒂᒋᒪᒡ ᐊ ᐃᑕᒡ, “ᒋᑦ ᐃᔅᒋᔄᓐ ᐊ ᑭᔭ ᓂᔭᓐ ᐊᑲ ᐛᐸᑎᒪᒡ ?”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᐊᑲ ᐛᐸᑎᒪᒄ ᓇᒪ ᒋᐸ ᐅᒋ ᐃᑎᑯᓇᐛᐤ ᐊ ᒥᒋᑐᑎᒪᒄ, ᒥᒄ ᒪᒃ ᐊ ᐃᔅᒋᔄᔭᒄ ᓂ ᐛᐸᑕᓇᓐ, ᐊᑯᑕ ᐛᒋ ᒋᔅᒐᔨᑕᑯᓯᔭᒄ ᐊ ᒥᒋᑐᑎᒪᒄ᙮”

Сонсох ᒠᓐ 9