शुरुवाती बोके
हें देशे पौराणिक कथाई अन्तर भगवाने होरे होरे अवतारे बारे लिखो असु। चहे से कलकी पुराण भो, चहे नरसिम्हा पुराण भो, या चहे से मत्स्य पुराण भो, अस हेरते कि भगवान कपले सिंह अवतार अन्तर, त कपले कच्छुआ अवतार अन्तर, होर कपले बामन अवतार अन्तर एन्ता त पापी मेह्‍णु नाश कता। होर एन्हि अवतारी के बारे पेहलाई भविष्य वाणि भुणे असी पता असा। असी ईं बि पता असा कि अवतार नेणे सोबी केआं खास बझह भो: “पापी मेह्‍णु के नाश करण”। पर धरती अन्तर कि कोई ईं मेह्‍णु बि असा ना, जेन कदी झूठ ना बुलो भोल, कदी लालच ना किओ भोल, कदी चाथि ना किओ भोल? कोई बि नेईं। त अस सोब तेस परमपिता परमेश्वरे अगर पापी भिन्थ त नाश करणे लेएक असे। त तेन्हि पौराणिक कथाई मुताविक अगर भगवाने कोई अवतार एन्ता त कि अस बच सकते ना?
पर चले, अस इस कताब पढ़ कइ तिहांणि यक अवतारे बारे पता लान्ते, जेसे भविष्य वाणि तस केआं सुआ सौ साल पेहलाई भुओ थी। इस अवतार अन्तर सुआ हैरान करणे बाड़ी बोके ई असी कि इ अवतार पापी मेह्‍णु के नाश करण जे नेईं, बल्कि तेन्हि बचाण जे असा। इस अवतार अन्तर अस हेरते कि से सच्चे सुआ ताकती बाड़ा भो। तोउं बि से अपु मर्जी जुए अपु ताकत ना हरालता। होर यक भकत चढ़णे बाड़ु किएऊ ईं लचार त कमजोर भुन्ता।
भला, से की बझह थी कि सुआ ताकती बाड़ा भोई कइ बि से किएऊ ईं भकत चढ़ा? भगवाने इस अवतारे बारे की की भविष्य वाणि भुओ थी त तेन की की कम किए? ए अवतार असी की शिचालण त समझाण चहन्ता? एन्हि सोबी सवाली के जवाब इस कताब अन्तर असे।
विषय सूची
यीशु मसीहे जमुण त शुरुवाती बोके ( 1:1—4:17 )
यीशु मसीहे कम त तसे संदेश ( 4:18—16:20 )
यीशु मसीहे बारे नियोको बोके त तसे सच्चाई ( 16:21—20:34 )
यीशु मसीहे मरुण त दुबारी जीन्ता भुण ( 21:1—28:20 )

г сонсох मत्ती शुरुवाती बोके