If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

አዳም ባረ ማቻት ሄዋንና አቄዳ፤ እዛ ሻሃሮ ዎደ አቱማ ናኣ የላዱ፤ “መና ጎዳይ ታና ማድና፥ አቱማ ናኣ ደማድ” ጋደ አ ቃዬላ ሱንዱ። ቃይ አ እሻ አቤላ የላዱ።
አቤል ዶርሳ ሄሜ፤ ቃይ ቃዬል ቢታ ጎሼ። ኡንደና ዎድያፐ ጉየ፥ ቃዬል ባረ ጋደን ዶልያ ካፐ መና ጎዳዉ ያርሹዋ ያርሼዳ፤ ሽን አቤል ባረ ዶርሳ ዉድያ ግዶን ባይራ የለቴዳ ማራቱዋፐ አክ ሹኪደ፥ ኡንቱንቱ አሹዋፐ ሞያዋ ያርሼዳ። መና ጎዳይ አቤላነ አ ያርሹዋ አኬዳ፤ ሽን ቃዬላነ አ ያርሹዋ አክቤና። ሄዋ ድራዉ፥ ቃዬል ሎይ ይሎቴዳ፤ ባረ ዴሙዋካ ምሴዳ።
ያትና መና ጎዳይ ቃዬላ፥ “አያዉ ይሎታይ? ነ ዴሙካ አያዉ ሜዴ? ኔን ሎኦባ ኦዋ ግድንቶ፥ ነ ሶምእ ፓሽከኔ? ሽን ኔን ሎኦባ ኦና ዮፐ፥ ናጋራይ ዶኣዳን ነ ፐንግያን ሙጌ፤ እ ኔና ሞዳና ኮዬ፤ ሽን ኔን አ ጾናና በሴ” ያጌዳ።
ሄዋፐ ጉየ፥ ቃዬል ባረ እሻ አቤላ፥ “አነ ደምባ ቦይተ” ያጌዳ። ኡንቱንቱ ደምባን ደእሽን፥ ቃዬል ባረ እሻ አቤላ ቦላ ደንዲደ ዎዳ።
መና ጎዳይ ቃዬላ፥ “ነ እሻይ አቤል ሀቃኔ?” ያጊደ ኦቼዳ።
ቃዬል ዛሪደ፥ “ታን ኤርከ፤ ታ እሻ ናግያዌ ታኔየ?” ያጌዳ።
መና ጎዳይ ቃዬላ፥ “ሀዋ አያዉ ኦድ? በአ፤ ነ እሻ ሱይ ቢታፐ ታኮ ዋሴ። ነ ኩሽያፐ ነ እሻ ሱ አኪደ፥ ምታናዉ ሀንጌዳ ቢታፐ ሀእ ኔን ሸቀቴዳዋ። ኔን ጎሽናካ ቢታይ ነዉ አይፈና፤ በትያዳን ኔን ሳኣ ቦላን ቶይላካታናሳ” ያጌዳ።
ቃዬል መና ጎዳ፥ “ፖራ! ኔን ታና ሙርያ ሙራይ ታን ኡባካ ዳንዳየናዋ። ሄኮ ኔን ታና ሀቼ ሀ ቢታፐ የደርሳሳ፤ ታን ነ ስንፐ ቆሰታና፤ በትያዳን ታን ሳኣ ቦላን ቶይላካታና፤ ታና ደሞዌ ኦንነ ዎና” ያጌዳ።
መና ጎዳይ አ፥ “ኔና ኦንነ ዎና፤ ዎፐ፥ ነ ሀሉዋ አን ላፑን ኩሽያ ከሳና” ያጌዳ። ሄዋ ድራዉ፥ ደሞዌ ኦንነ አ ዎናዳን መና ጎዳይ አ ቦላ ማላታ ዎዳ። ቃዬል መና ጎዳ ስንፐ ከሲደ፥ ኤደነ ባጋፐ አዋይ ዶልያ ባጋና ደእያ ኖዳ ቢታን ደኤድኖ።

ቃዬል ባረ ማቻትና አቄዳ፤ እዛ ሻሃሮ ዎደ ሄኖካ የላዱ። ቃዬል ካታማ ሄ ዎደ ኬጺደ፥ ሄ ካታማ ባረ ናኣ ሱንን “ሄኖካ” ጊደ ሱንዳ። ሄኖክ እራዳ የሌዳ፤ እራድ ማሁያኤላ የሌዳ፤ ማሁያኤል ማቱሻኤላ የሌዳ፤ ማቱሻኤል ላሜካ የሌዳ።
ላሜክ አዶነ ጺሎ ግያ ላኡ ማቻቱዋ ዳዉ አኬዳ። አዳ ያባላ የላዱ፤ ያባል መህያ ሞድያ፥ ዱንካንያን ደእያ አሳቱዋ አዉዋ። አ እሻ ሱንይ ዩባላ፤ ዩባል ቃይ ዲ ዲጽያነ ኡልዱድያ ፑንያ አሳቱዋ ኡባ አዉዋ፤ ጺላ ቃይ ቱባልቃይና ግያ ናኣ የላዱ፤ ቱባልቃይን ናሃስያፐነ ብራታፐ ዱማ ዱማ ሚሻቱዋ ቆጽያዋ። ቱባልቃይና ምቻታ ናእሞ።
እት ጋላስ ላሜክ ባረ ማቼቱዋ፥ “አዴ፥ ጺሌ፥ ስስተ፤ ታ ማቻቶ፥ አነ ታን ኦድያዋ ሀይዝተ። እት ብታኒ ታና ደቼዳ ድራዉ፥ ታን አ ዎድ፤ ኤ፥ ታን ሄ ታና ማሱንዳ ዎዳላ ዎድ። ቃዬላ ሀሉዋ ከሳናዉ ላፑን ኩሺ ኮሾፐ፥ ላሜካ ሀሉዋ ከሳናዉ ላፑን ታማነ ላፑን ኩሺ ኮሼ” ያጌዳ።

አዳመ ባረ ማቻትና ግስና ሀራ ናኣ የላደ፥ “ቃዬል ዎዳ አቤላ ድራዉ ጾሳይ ታዉ ሀራ ናኣ እሜዳ” ጋደ፥ አ ሴታ ጋደ ሱንዱ። ሴትካ አቱማ ናኣ የሌዳ፤ አ “ሄኖሳ” ጊደ ሱንዳ። አሳይ መና ጎዳ ሱን ጼሲደ ጎይንያዋ ሄ ዎደ ዶሜዳ።

г сонсох ዶመ 4