DOWLLO 11

Pitor ri Jerusalemki Rinlop hin Pau mdo Son

1Tunva ktlok chati rek rukva Isowr pauna marlaan chaak inna tdit kenyee rek leh Judia tha ka am mu u mnao rekki aryaada. 2Ava leiji Pitor ri Jerusalem tha mhan thungta vunmor kreen lop rekki mkho the chlamda, 3the lamda, “Talu leiji vunmor kreen kma rek hin chetti then ado maal ṭhi lamda?” 4Pdainu Pitor ri parnaak jikda mhin inni kpau pṭhunda: 5“Neiji Joppa khuwpii thung ngi ṭhil chnu; ungta mik kleng khatti deinu, buwklinpa dum khat hepdaat, parwaanki markil plii thung ngi arjung ṭumda, ungu nei kihin arjung kṭum do khat deinu. 6Knai tekki neiji suw rimnu plung kpurdun slii thungta, saarek, downkhaal rek, plung ngi kundowt khauṭit khaujaar, kjuwng puwa rek deinu. 7Ungta, ‘Kardel Pitor; a eayoura achaa,’ dida kihin kthe krowl khat neiji aryaanu. 8Pdainu neiji thenu, ‘Eme, Mukpu; mleija kbuwr mata kartleu kma do khat lee kner thung ngi junglut mlai.’ 9Pdainu parwaanki krowl ava ngi mvei knit nangi kihin arthawngda, ‘Isowr do partleu dok ava nang ngi kbuwr pi ado dit ronime.’ 10Hava vei kdum chak thung ngi thuwkda, ungu mkheng ngi parwaan tha arjuk ṭen dok nowlda. 11Mpha ava kat thung ngi nei kihin mdosii Kaisaria ki miilai kdummi neen ka am ndaat in inn ava thlung lamda. 12Ungta kipjiir kma ngi mmaan kdo vanṭoi lam nra pthla ngi kihin theda. Ungta ku u knao rek hava miilai truk rukva mhai kurthlo ṭhi chlamda, ungta neenni mii ava inn thung ngi lut innu. 13Ungta mma ngi tak heppi mdee tdit ki pau songda, mleija Waan tamsii ngi inn thung ripda theda, Joppa tha mii haisira Pitor mdodit Simon arvan ṭhi; 14mma ngi nang ruk ungta aphungka mkheng ngi kartlen kcha ado phaak nraan paumin khat akparyaam pik chraan.’ 15Neiji kpau kupṭhun thungta, nen ntuwn ni chodu chodilli kurjung ava lulu ngi pthla kchiir mleen thaanni arjungda. 16Ungta, ‘Johon va diitu kilṭhi ngi baptis aptlot inda, pdainu naanna pthla kchiir ri baptis akuptlot raan,’ dida Mukpu ngi tak heppi mthe tdit pauna neiji bin phaak chnu. 17Ava mkurthutbi Mukpu Jisu krin changi Isowr va mmaan hin ruk nen nhin ruk kinṭim chakki chla ava mitpiik inbi, neia ku kurthuwk nu Isowr ava mat nikda?” 18Mmaanni hava maryaak in thungta rim kdi am chlamda. Ungta Isowr panpaak lamda the lamda, “Ktlok chati rek hin rukva rinkhu mdo phaak chaak nraan Isowr ri rot pikda.”

Antia ki Rinlop

19Tunva Stiphan leenni kja kakham mthuw leiji kinṭheu tir kcharek ava ngi ku khat lee hin kma Jihudia rek hin daatti pauna ava Phonesia, ungta Kupras, ungu Antia kpha dekki lamkla ngi chet lamda the lamda. 20Pdainu mmaan arlakki mii angṭhe Antia tha kthleng Kupras leh Kurini mii rek rukva Grik mii rek hinni Mukpu Jisu paryaam lamda. 21Ungta Mukpu khutti kurthlo ṭhi lamda, ungu mii msing knempokki plung pinle da Mukpu hin rin chda. 22Hava pauren ava Jerusalem ki rinlop knaa thlungda, ungbi mmaanni Antia tha Barnabas sii lamda. 23Mma ngi arvangda Isowr plungnee mdee thungta, mma kanpa chda; mmaan mkheng ngi plung knetti Mukpu hin mdo rin chaak nraan, ksop lamda. 24Mleija mma kṭha miilai khat, pthla kchiir leh krin changi dim chda. Ungta lop klin langlang ngi Mukpu hin tpom chlamda. 25Ava leiji Barnabas ava Soul ksuwra Tarsas tha vangda. 26Ungu mma ngi mkurdut ṭhi thungta Antia tha arvan ṭhida. Mleija mmaanni kum khat lik thung ngi rinlop kurthlo ṭhi lamda, ungu lop klinpa hin purchuk lamda; ungta Antia thung ngi siikhu rek ava rukri verki khristen di lamda.

27Tunva hava nit rek thung ngi Jerusalem ki khulpu rekka Antia tha arjung lamda. 28Ungta mmaan thungki khat mmiing Agabas ava ngi ripda, ungu dultipaam mkheng thung ngi poitham klin langlang kthuwkra dida pthla ngi theda; ungu hava Kloudia mpha thu kurthuwk. 29Ungta Judia thung ngi ka am mu u mnao rek hinni mii pum ktaiji mma mma dopchaan ni mdo purdon pik chaak nra, siikhu rekki pau rip lamda. 30Ungta mmaanni anto tlo lamda, Barnabas leh Soul khut thung ngi kver rek sii lamda.

Одоогоор Сонгогдсон:

DOWLLO 11: LAMKBSI

Тодруулга

Хуваалцах

Хувилах