Matta 27
27
Yeesu yaharaama to Bilaatus
(Markus 15.1 ; Luka 23.1-2 ; Yahayya 18.28-32)
1Ila fajiri *mawɓe aardiiɓe diina e arɗuɓe Yahuudu'en kawriti ndarvi no mbardata Yeesu. 2Ndeen ɓe kaɓɓi mo, ɓe njahari mo to *Bilaatus gomnaajo.
Maayde Yahuuda Iskariyooti
(Kuuɗe Lilaaɓe 1.18-19)
3Nde Yahuuda nyaamɗo amaana Yeesu oon yi'i ɓe taƴanii Yeesu ceri'a maayde, o voytii ɗum, o wartirani mawɓe *aardiiɓe diina e arɓe leƴƴi ceede ajurfaari talaatiin (30). 4O vi'i ɓe :
— Mi waɗii hakke nde kokkitirmi mo vi'aay waɗaay, gam waree !
Ɓe toontii mo, ɓe mbi'i :
— Minon ko waanni min ? Aan anndi !
5Yahuuda feri ceede ɗeen nder *Wuro Seniingo, hooƴi ɓoggol ɓiltii wari hoore muuɗum. 6Mawɓe aardiiɓe diina kooƴi ceede ɗeen, mbi'i :
— Ceri'a meeɗen haɗii en resgo iri ɗe'e ceede nder ndesaari *Wuro Seniingo, gam ɗum ceede war-hoore.
7Ɓaawo ɓe mbaɗii caawara, ɓe kooƴi ceede ɗeen, ɓe coodi ɗe ngesaa mahoowo gaheeje, gam ɓe uvata maayɓe jananɓe toon. 8Kanjum waɗi, gada ndeen faa wargo hannde, ngesaa kaan e noddiree « Ngesaa Ƴiiƴam ». 9Noon ko Allah vi'inoo gada e honnduko annabi Yeremiya goonɗiri, nde o vi'i :
« Ɓe kooƴii ceede ajurfaari talaatiin (30),
coggu ngu yimɓe *Isiraa'iila taƴani mo,
10ɓe coodi ɗe ngesaa mahoowo gaheeje,
kama noon no Jawmiraawo vi'inoo yam. »#27.9-10 Jakariya 11.12-13 ; Yeremiya 19.1-13 ; 32.6-15
Bilaatus ƴamii Yeesu
(Markus 15.2-5 ; Luka 23.3-5 ; Yahayya 18.33-38)
11Yeesu darii yeeso Bilaatus. Sey Bilaatus ƴami mo vi'i :
— Aan woni laamiiɗo *Yahuudu'en naa ?
Yeesu toontii mo vi'i :
— Aan vi'i ka e honnduko maaɗa.
12Ammaa nde *mawɓe aardiiɓe diina e arɗuɓe Yahuudu'en mbaɗi ga wullaago mo, o toontaaki ɓe koo ɗume. 13Kanjum waɗi Bilaatus vi'i mo :
— A nanaay wullaandu ndu ɓe ngullori maa naa ?
14Ammaa Yeesu toontaaki mo koo voliinde wo'ore. Ɗum haaynii Bilaatus korey.
Yeesu taƴanaama ceri'a maayde
(Markus 15.6-15 ; Luka 23.13-25 ; Yahayya 18.39–19.16)
15Nde *juulɗe Kuultol njaalti fuu, gomnaajo e voovi yoofango yimɓe ɓeen kaɓɓaaɗo kaso go'oto, mo ɓe ngiɗi. 16Wakkaci ɗuum, e woodi goɗɗo kaɓɓaaɗo kalluɗo anndanaaɗo, bi'eteeɗo Yeesu Barabas.
17Bilaatus ƴami yimɓe hawritɓe ɓeen vi'i :
— Moye ngiɗɗon mi yoofana on : Yeesu Barabas, nakay Yeesu bi'eteeɗo *Almasiifu ?
18Bilaatus e anndi nalwiiru tan waɗi Yahuudu'en ngullorii Yeesu to muuɗum. 19Nde Bilaatus jooɗii yaayre to waɗata ceri'a, sey debbo ma'ako liloyi to ma'ako, vi'i :
— Woor on ɗoon gorko mo waɗaay ko halli, gam hanki mi torrake korey nde koyɗumoomi.
20*Mawɓe aardiiɓe diina e arɗuɓe Yahuudu'en igii jama'aare ndeen toroo Bilaatus yoofana ɓe Barabas, wara Yeesu. 21Bilaatus ƴamtii ɓe vi'i :
— Moye ngiɗɗon mi yoofana on nder ɓe'e worɓe ɗiɗo ?
Ɓe toontii mo, ɓe mbi'i :
— Barabas !
22Bilaatus ƴamtii ɓe vi'i :
— To noon, noye ngiɗɗon mi waɗana Yeesu bi'eteeɗo Almasiifu ?
Ɓe fuu ɓe toontii mo, ɓe mbi'i :
— Ɓil mo dow *gaafagal !
23O ƴamtii ɓe, o vi'i :
— Ndeye halleende o waɗi ?
Sey ɓe ɓesdi wullugo e semmbee, ɓe mbi'i :
— Ɓil mo dow gaafagal !
24Nde Bilaatus yi'i waawataa fahamindirgo e maɓɓe, eɓe ngiɗi ummingo haɓre boo, sey o hooƴi ndiyam, o looti juuɗe ma'ako yeeso jama'aare fuu, o vi'i ɓe :
— Miin kam, walaa ko waanni yam, mi hooƴataa hakke wargo mo walaa layfi. Onon ɗum horani.
25Ɓe fuu ɓe toontii mo ɓe mbi'i :
— Hakke ƴiiƴam ma'ako yana dow ko'e amin e ɓiɓɓe amin !
26Ndeen Bilaatus yoofani ɓe Barabas, o vi'i Yeesu fiiree looci. Ɓaawo ma'ajum, o hokkitiri Yeesu ɓiloyee dow gaafagal.
Soojeeji njaltinirii Yeesu
(Markus 15.16-20 ; Yahayya 19.2-3)
27Ndeen soojeeji njahari Yeesu nder wuro Bilaatus, ɓe fuu ɓe kowi mo. 28Ɓe ɓorti mo kolte ma'ako, ɓe ɓorni mo burnus boɗeejum.#27.28 Nder jaamaniiru nduun, laamiiɓe e riskuɓe tan ɓornotoo kolte boɗeeje ɗeen, gam ɗe caɗɗe. 29Ɓaawo ma'ajum, ɓe mbami gi'e, ɓe ngiifi mo. Ɓe kokki mo sawru laamu e junngo ma'ako nyaamo.#27.28-29 Nder jaamaniiru nduun laamiiɗo tan ɓornotoo iri burnus ɗuum, o jogoo sawru laamu e junngo ma'ako nyaamo. Ɓe ndiccii yeeso ma'ako, eɓe njaltinira mo eɓe mbi'a :
— Allah sabbinane laamiiɗo *Yahuudu'en !
30Ɓe tuutani mo joode, ɓe njaɓi sawru nduun, ɓe piiri mo ndu dow hoore. 31Nde ɓe keyni jaltinirgo mo, ɓe ɓorti mo burnus ɗuum, ɓe ɓorni mo kolte ma'ako. Ndeen ɓe mburtini mo, ɓe aardini mo, gam ɓe ɓiloya mo dow *gaafagal.
Ɓileeki Yeesu dow gaafagal
(Markus 15.21-32 ; Luka 23.26-43 ; Yahayya 19.17-27)
32Nde ɓe mburtotoo si'ire ndeen, ɓe potti e goɗɗo gorko ivoyɗo si'ire Sireene bi'eteeɗo Simon. Soojeeji ndooli mo o vakkoo *gaafagal Yeesu. 33Ɓe njottii yaayre vi'eteende Golgota, waato Gumbal Hoore. 34Ɓe kokki Yeesu *innaboojam njillindiraaɗam e goɗɗum kaaɗɗum gam o yara, ammaa nde o vooɓi ɗam o salii yargo.
35Nde ɓe ɓili mo dow *gaafagal, ɓe cenndiri kolte ma'ako e waɗgo cuɓol. 36Ɓaawo ma'ajum, ɓe njooɗii ɗoon ɓe ndeeni mo. 37Ɓe mbinndi dow alluwaawal daliila ko ɓili mo, ɓe takki ɗum dow hoore gaafagal ma'ako. Raa ko ɓe mbinndi : « O'o kam woni Yeesu laamiiɗo *Yahuudu'en. »
38Ɓe ɓildi mo e wuyɓe ɗiɗo, go'oto e junngo ma'ako nyaamo, go'oto boo e nano. 39Yimɓe wutotooɓe ɗoon ndimmbi ko'e mu''en e kuɗa mo, 40e mbi'a :
— Aan biiɗo no yibbiney *Wuro Allah Seniingo, nyiɓtoo ngo nder balɗe tati, hisnu hoore maaɗa mana. To a *Ɓiɗɗo Allah, jippoya dow gaafagal !
41Noon boo mawɓe *aardiiɓe diina e *moodiɓɓe Tawreeta e arɗuɓe Yahuudu'en fuu njaltiniri mo, mbi'i :
42— O hisniino woɓɓe, ammaa o waawaay hisnugo hoore ma'ako. To kanko o laamiiɗo *Isiraa'iila, woor o jippoyoo dow gaafagal, gam faa ngoonɗinen mo. 43O hokkii hoore ma'ako e Allah. Kul Allah e yiɗi mo, no hisnu mo jo'oni ngi'en, gam o vi'ii o *Ɓiɗɗo Allah.
44Wuyɓe ɓildaaɓe e ma'ako boo, mbaɗi ga huɗrugo mo kama noon.
Maayde Yeesu
(Markus 15.33-41 ; Luka 23.44-49 ; Yahayya 19.28-30)
45Ila caka nyalawma niɓre suddi lesdi fuu, faa yahago njamndi tati ndi alaasara. 46Faro njamndi tati ndi alaasara, Yeesu towni voliinde vi'i :
— Eloy, Eloy, lama sabaktani ? Waato : « Allah am, Allah am ! Gam ɗume kibinirɗaa yam ? »
47Nde woɓɓe nder dariiɓe toon nani ɗum, ɓe mbi'i :
— Emo nodda annabi *Iliya !
48Ɗoon e ɗoon, goɗɗo nyaari hooƴoyi sooso, suuvi ɗum nder *innaboojam lammuɗam, haɓɓi ɗum e loosol, o takki ɗum e honnduko Yeesu, gam musina ɗum. 49Ammaa horiiɓe mbi'i :
— Munyee ngi'en koo maa Iliya e wara hisna mo.
50Yeesu ɓesdi wullugo e semmbee, ndeen o maayi.
51E wakkaci ɗuum, wudere wonnde nder *Wuro Allah Seniingo#27.51 E woodi wudere senndunde yaayre seniinde e yaayre ɓurnde senaago. Wudere ndeen no tekkunde korey. seeki gada dow faa lees, nde waɗi cende ɗiɗi. Lesdi dimmbii, kaaƴe pusi, 52genaale omti, seniiɓe ɗuuɗɓe maaynooɓe ummitii, 53ɓe mburtii nder genaale. Ɓaawo ummitaaki Yeesu ɓe natti si'ire seniinde, yimɓe ɗuuɗɓe ngi'i ɓe.
54Mawɗo soojeeji e darodiiɓe e muuɗum gam reengo Yeesu, nde ɓe ngi'i no lesdi dimmborii e ko laatii fuu, sey ɓe kultori ɓe mbi'i :
— Goonga, o'o neɗɗo o *Ɓiɗɗo Allah !
55Rewɓe ɗuuɗɓe warduɓe e Yeesu gada *Gaaliili e kuwana mo, ɓe ndarii to woɗɗi eɓe kollira ko laatotoo. 56Nder rewɓe ɓeen e woodi Maryaama mo Magadaaliya, e Maryaama inna Yaakuubu e Yusufu, e inna ɓiɓɓe Jabadi.
Uveeki Yeesu
(Markus 15.42-47 ; Luka 23.50-56 ; Yahayya 19.38-42)
57Nde alaasara waɗi, goɗɗo diskuɗo mo si'ire Aramaatiya bi'eteeɗo Yusufu wari. Kanko boo o tokkuɗo Yeesu. 58O yahi to Bilaatus, o torii ɗum ɓanndu Yeesu. Bilaatus jaɓi o hokkee ɓanndu nduun. 59Sey Yusufu hooƴi ɓanndu nduun, taardi ndu wudere raneere, 60o wallini ndu nder yenaande hesre nde o wasannoo hoore ma'ako nder haayre. Ndeen o talliti haayre teddunde, o omndi honnduko yenaande, o dilli. 61Maryaama mo Magadaaliya e goɗɗo Maryaama e njooɗii ha'ade ku'uci e yenaande ndeen.
Soojeeji ndeenii yenaande Yeesu
62Jonto ma'ajum, waato *nyannde-fooftiinde, mawɓe *aardiiɓe diina e *Fariisa'en kawriti to *Bilaatus, 63ɓe mbi'i mo :
— Laamiiɗo, min kiimtake nde majjinoowo yimɓe oon foofeynoo, o vi'ii to o maayii, ɓaawo balɗe tati o ummitoto. 64Gam ma'ajum, igga mbi'aa ɗum reena yenaande ndeen faa balɗe tati ɗeen nguto, gam to' almaajiri'en ma'ako ngar ngujja ɓanndu ma'ako, mbi'a yimɓe o ummitake nder maayɓe. Ndeen majjinki yimɓe cakitiiki no ɓurey arani hallugo.
65Bilaatus vi'i ɓe :
— Too, raa soojeeji reenooɓe, njahee ndeennee ɓe yenaande ndeen keerol no mbaawɗon fuu !
66Ɓe njahi yenaande, ɓe takki lammba laamiiɗo dow kaaƴa omndiraanga yenaande ndeen, ɓe ndarni soojeeji ndeena nde booɗɗum.
Одоогоор Сонгогдсон:
Matta 27: fuq
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2015, Wycliffe Bible Translators, Inc. All rights reserved.