Markus 15
15
Yeesu yaharaama to Bilaatus
(Matta 27.1-2,11-14 ; Luka 23.1-5 ; Yahayya 18.28-38)
1Ila fajiri *mawɓe aardiiɓe diina e arɗuɓe *Yahuudu'en e *moodiɓɓe Tawreeta e *Kawtal Sernooɓe Diina fuu, ɓe kawti ɓe mbaɗi caawara. Ɓe kaɓɓi Yeesu ɓe njahari ɗum to *Bilaatus gomnaajo. 2Bilaatus ƴami mo vi'i :
— Aan woni laamiiɗo *Yahuudu'en naa ?
Yeesu toontii mo vi'i :
— Ee, noon no mbiiɗaa.
3Mawɓe aardiiɓe diina ngullorii mo ku'uje ɗuuɗɗe. 4Sey Bilaatus ɓesdi ƴami mo vi'i :
— A walaa ka mbi'ataa naa ? A nanaay ko ɓe ngullori maa fuu naa ?
5Ammaa Yeesu vi'aay koo kaye, faa ɗum haaynii Bilaatus.
Yeesu taƴanaama ceri'a maayde
(Matta 27.15-26 ; Luka 23.13-25 ; Yahayya 18.39–19.16)
6Wakkaci *juulɗe Kuultol fuu, *Bilaatus e voovi yoofango *Yahuudu'en kaɓɓaaɗo go'oto, mo ɓe ngiɗi yoofaneego. 7E woodi goɗɗo bi'eteeɗo Barabas, kaɓɓidaaɗo e woɓɓe nder kaso, gam ɓe kaɓdii e laamu, faa ɓe mbari goɗɗo nder haɓre ndeen. 8Sey jama'aare ɗuuɗnde wari, torii Bilaatus waɗana ɓe ko o voovi waɗango ɓe. 9Bilaatus ƴami ɓe vi'i :
— On ngiɗi mi yoofana on laamiiɗo Yahuudu'en naa ?
10Bilaatus fahamii nalwiiru tan waɗi *mawɓe aardiiɓe diina ngaddiri Yeesu to muuɗum.
11Ammaa mawɓe aardiiɓe diina puufi jama'aare toroo Bilaatus yoofana ɓe Barabas, naa Yeesu. 12Bilaatus ƴami ɓe vi'i :
— Ee, noye ngiɗɗon mi waɗana o'o mo mbi'oton laamiiɗo Yahuudu'en ?
13Ɓe mbi'i e semmbee :
— War mo dow *gaafagal !
14Bilaatus ƴami ɓe vi'i :
— Ndeye halleende o waɗi ?
Ammaa ɓe ɓesdi vi'igo e semmbee :
— War mo dow gaafagal !
15Nde laatii Bilaatus e yiɗi velgo jama'aare ndeen, o yoofani ɓe Barabas. O waɗi ɗum fiiri Yeesu looci, ndeen o waɗi mo nder juuɗe soojeeji *Rooma, gam ɓe mbaroya mo dow gaafagal.
Soojeeji njaltinirii Yeesu
(Matta 27.27-31 ; Yahayya 19.2-3)
16Soojeeji njahari Yeesu fiiliire laamorde vi'eteende Firtoriyum, ɓe noddi soojeeji koriiɗi fuu ɓe kawriti ɗi. 17Ɓe ɓorni mo burnus bo'ojiteyɗum,#15.17 Nder jaamaniiru nduun, laamiiɓe e riskuɓe tan ɓornotoo kolte boɗeeje ɗeen, gam ɗe caɗɗe. ɓe mbami giifol gi'e, ɓe ngiifi mo ngol. 18Ndeen ɓe puɗɗi hinnugo mo, eɓe mbi'a :
— Allah sabbinane laamiiɗo Yahuudu'en.
19Ɓe piiri mo sawru dow hoore, ɓe tuutani mo joode, ɓe ndiccii yeeso ma'ako, ɓe cujjidani mo. 20Ɓaawo ɓe njaltinirii mo, ɓe ɓorti mo burnus bo'ojiteyɗum ɗuum, ɓe ɓorni mo kolte ma'ako. Ndeen ɓe mburtini mo, ɓe njahari mo yaasi, gam ɓe ɓiloya mo dow *gaafagal.
Ɓileeki Yeesu dow gaafagal
(Matta 27.32-44 ; Luka 23.26-43 ; Yahayya 19.17-27)
21Dow laawol ɓe potti e gorko bi'eteeɗo Simon, mo si'ire Sireene, baaba Aleksandir e Rufus, e warta gada ladde. Soojeeji ndooli mo o vakkoo *gaafagal Yeesu. 22Ɓe njahari Yeesu woɗnde yaayre vi'eteende Golgota, waato Gumbal Hoore. 23Ɓe kokki mo *innaboojam njillindiraaɗam e *miir#15.23 Miir ɗum goɗki lekki usteyki naawɗum nder ɓanndu neɗɗo. o yara, ammaa o yaraay ɗam. 24Ɓe ɓili mo dow gaafagal, ɓe cenndiri kolte ma'ako e waɗgo cuɓol, gam ɓe ngi'a ko koo moye maɓɓe heɓata. 25Wakkaci ɓe ɓili mo dow gaafagal, ɗum njamndi joveenayi ndi subaka. 26Ɓe takki alluwaawal dow hoore gaafagal ngaal, ɓe mbinndi ko ɗum wullorii mo dow ma'agal vi'igo : « Laamiiɗo *Yahuudu'en ».
27-28Kadimaa ɓe ɓili wuyɓe ɗiɗo dow gaafaaɗe ha'ade Yeesu, go'oto e junngo ma'ako nyaamo, go'oto e nano. 29Yimɓe ƴaɓɓotooɓe e kuɗa Yeesu, e ndimmba ko'e e mbi'a :
— Too, aan biiɗo no yibbiney *Wuro Allah Seniingo, nyiɓtoo ngo nder balɗe tati, 30jippoya dow gaafagal, kisnaa hoore maaɗa !
31Noon boo *mawɓe aardiiɓe diina e *moodiɓɓe Tawreeta njaltiniri mo hakkunde mu''en, ɓe mbi'i :
— O hisnii woɓɓe, ammaa o waawaay hisnugo hoore ma'ako. 32Woor kanko biiɗo no *Almasiifu laamiiɗo *Isiraa'iila o jippoyoo jo'oni dow gaafagal, gam ngi'en ngoonɗinen mo.
Wuyɓe ɓe ɗum ɓili vuttudu ma'ako boo kuɗi mo.
Maayde Yeesu
(Matta 27.45-56 ; Luka 23.44-49 ; Yahayya 19.28-30)
33Caka nyalawma, sey niɓre suddi lesdi fuu, faa yahago njamndi tati ndi alaasara. 34Njamndi tati ndiin, sey Yeesu towni voliinde vi'i :
— Eloy, Eloy, lama sabaktani ? Waato : « Yaa Allah am, yaa Allah am, gam ɗume kibinirɗaa yam ? » #15.34 Jabuura 22.1
35Nde woɓɓe nder dariiɓe yaayre ndeen nani ɗum, ɓe mbi'i :
— Nanee, emo nodda annabi Iliya.
36Sey go'oto maɓɓe nyaari soofni sooso nder *innaboojam lammuɗam, o haɓɓi ɗum e loosol, o ɓattini ɗum e honnduko Yeesu, gam o musina, o vi'i :
— Ngooree ngi'en kul Iliya no warey jippina mo.
37Yeesu wulli e semmbee, ndeen o maayi.
38Sey wudere#15.38 E woodi wudere senndunde yaayre seniinde e yaayre ɓurnde senaago. Wudere ndeen no tekkunde korey. wonnde nder Wuro Allah Seniingo seeki gada dow faa lees, nde waɗi cende ɗiɗi. 39Nde mawɗo soojeeji dariiɗo yeeso ma'ako yi'i no o maayri, o vi'i :
— Goonga, o'o neɗɗo o *Ɓiɗɗo Allah !
40Woɓɓe rewɓe e ndarii to woɗɗi e ndaara. Nder maɓɓe e woodi Maryaama mo Magadaaliya, e Saloomi, e Maryaama inna Yaakuubu pamaro e Yusufu. 41Kamɓe tokkunoo Yeesu, e kuwana mo nde o wonnoo lesdi Gaaliili. E woodi rewɓe feere ɗuuɗɓe wardoyɓe e ma'ako *Urusaliima, kamɓe maa eɓe ɗoon.
Uveeki Yeesu
(Matta 27.57-61 ; Luka 23.50-56 ; Yahayya 19.38-42)
42Ɗum alaasara siryanaago *nyannde-fooftiinde. 43Gam ma'ajum, Yusufu mo si'ire Aramaatiya semmbiɗini ɓernde muuɗum, o yahi to Bilaatus o torii ɗum hokka mo ɓanndu Yeesu. Yusufu no neɗɗo teddinaaɗo nder *Kawtal Sernooɓe Diina, kanko maa emo haaɓi o yi'a garol *laamu Allah.
44Nde Bilaatus nani Yeesu aartii maayi, ɗum haaynii mo. O noddi mawɗo soojeeji o ƴami ɗum, kul ɗum goonga Yeesu aartii maayi. 45Nde o nani ka e honnduko mawɗo soojeeji oon, o woori Yusufu hooƴa ɓanndu nduun. 46Sey Yusufu soodoyi wudere saɗnde, o waɗi ɗum jippini ɓanndu Yeesu, o taardi ndu wudere ndeen, o wallini ndu nder yenaande wasaande nder haayre. O talliti kaaƴa o omndi honnduko yenaande ndeen. 47Maryaama mo Magadaaliya e Maryaama inna Yusufu ngi'ii to ɗum wallini ɓanndu Yeesu.
Одоогоор Сонгогдсон:
Markus 15: fuq
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2015, Wycliffe Bible Translators, Inc. All rights reserved.