Mateo 19
19
Ma rurayibꞌel ta ri Dios chi ri achi ndujech riꞌ rikꞌin ri rixjayil
(Mr. 10:1-12; Lc. 16:18)
1Atoq ri Jesús xukꞌis rubꞌixik nojel reꞌ, xel pe pa rochꞌulew Galilea, y xbꞌa pa teq lugares chin ri rochꞌulew Judea ri ekꞌo apu jukꞌan#Jn. 10:40 ruchiꞌ ri raqen yaꞌ Jordán. 2Santienta wineq xeꞌoqan richin y chiriꞌ xerukꞌachojrisaj ri ngeyawej.
3Xejel apu jujun fariseos rikꞌin ri Jesús, y chin ta nditzaq pa kiqꞌaꞌ ndikajoꞌ, kereꞌ xkikꞌutuj razón chare: ¿Xajan kami chuwech ri Dios chi jun achi xa achike na roma ndujech riꞌ rikꞌin ri rixjayil?
4Ri Jesús xubꞌij chake: ¿Ma ibꞌanun ta kꞌa leer chupan ri rutzij ri Dios chi xe jampeꞌ pa nabꞌey, rijaꞌ chi achi chi ixaq xerubꞌen?#Gn. 1:27; 5:2 5Y ri Dios kereꞌ rubꞌiꞌin kan: Romariꞌ, ri kꞌajol ngeruyaꞌ kan rute-rutataꞌ chin ndukꞌuaj qa riꞌ rikꞌin ri rixjayil, y chi ekaꞌiꞌ xe jun ndikibꞌen.#Gn. 2:24; 1Co. 6:16; Ef. 5:29-32 6Y romariꞌ, rejeꞌ ma ekaꞌiꞌ chi ta, xa jun bꞌanun chake roma ri Dios. Romariꞌ, ri ekaꞌiꞌ ri xe jun bꞌanun chake, ma tijach kiwech koma ri wineq.
7Y rejeꞌ xkibꞌij: Si keriꞌ achel ndabꞌij, ¿achike roma ri Moisés xubꞌen mandar chi jun achi ri ndirajoꞌ ndujech riꞌ rikꞌin ri rixjayil, tuyaꞌ wuj#Dt. 24:1-4; Mt. 5:31 chare apeꞌ ndubꞌij chi xkijech kiꞌ y tirelesaj e?
8Ri Jesús xubꞌij chake: Roma rukowil#Jer. 6:16; He. 3:15 iwánima ri Moisés xuyaꞌ qꞌij chi ri achi kꞌo cheꞌel ndujech riꞌ rikꞌin ri rixjayil. Pero xe jampeꞌ pa nabꞌey, ma ja ta riꞌ rurayibꞌel ri Dios. 9Y nibꞌij chiwa chi xaxe roma ri ixaq rukanon rukꞌexel#Mt. 5:32 ri rachijil, ri achi kꞌo cheꞌel ndujech riꞌ rikꞌin. Pero si ma roma ta riꞌ ndikijech kiꞌ, y ri achi ndukꞌen chik jun ixaq, mak ndubꞌen.
10Y ri discípulos xkibꞌij chare ri Jesús: Si keriꞌ rubꞌeyal rukꞌaslen ri achi rikꞌin ri rixjayil, xa más utz man ta ndikꞌuleꞌ.#Gn. 2:18; Pr. 5:15-19; 1Co. 7:1, 2, 7-9
11Ri Jesús xubꞌij chake: Ma konojel ta ngetiker ngekꞌojeꞌ kiyon achel ndibꞌij rix, xa kin xe ri yoꞌon pe chake chi ngekꞌojeꞌ kiyon. 12Porque ekꞌo jujun kin kalaxibꞌen wi chi ma ngekꞌojeꞌ ta rikꞌin ixaq, ekꞌo chuqaꞌ jujun bꞌanun chake chi maneq modo ngekꞌojeꞌ rikꞌin ixaq, ekꞌo chuqaꞌ jujun kiyoꞌon pa kánima chi ma ngekꞌojeꞌ ta rikꞌin ixaq chin ndikibꞌen ri samaj chin ri ru-reino#1Co. 7:32, 34; 9:5, 15 ri aj chikaj Dios. Ri nditiker ndikꞌojeꞌ ruyon, tubꞌanaꞌ kꞌa.
Ri Jesús nduyaꞌ ruqꞌaꞌ pa kiwiꞌ akꞌolaꞌ
(Mr. 10:13-16; Lc. 18:15-17)
13Ja atoq riꞌ xeꞌukꞌuꞌex apu jujun akꞌolaꞌ chuwech ri Jesús chin nduyaꞌ ruqꞌaꞌ pa kiwiꞌ y ndubꞌen orar koma, pero ri discípulos xekichꞌolij ri eꞌukꞌuayon apu ri akꞌolaꞌ. 14Pero ri Jesús xubꞌij chake ri discípulos: Tiyaꞌ qꞌij chake ri akꞌolaꞌ chi ngepuꞌun wikꞌin, y ma tiqꞌet kiwech, porque ri ngeꞌok chupan ri ru-reino ri aj chikaj Dios, ja ri kibꞌanun chare ri kánima achel kánima re akꞌolaꞌ#Mt. 18:3, 4; 1P. 2:2 reꞌ.
15Y atoq xuyaꞌ yan ruqꞌaꞌ pa kiwiꞌ ri akꞌolaꞌ, xel pe chiriꞌ y xbꞌa chik jun apeꞌ.
Jun kꞌajol bꞌeyon kꞌo achike ndukꞌutuj razón chare ri Jesús
(Mr. 10:17-31; Lc. 18:18-30)
16Kꞌateꞌ ruwech xbꞌeqaqa jun kꞌajol apeꞌ kꞌo ri Jesús y kereꞌ xukꞌutuj razón chare: Tijonel, ¿achike utz ndikꞌatzin nibꞌen chin ndikꞌojeꞌ ri kꞌaslen ma ndikꞌis ta wikꞌin?#Mt. 7:14; Lc. 10:25
17Ri Jesús xubꞌij chare: ¿Achike roma ndakꞌutuj razón chuwa pa ruwiꞌ ri utz? Xa kin xe wi Jun ri utz. Pero si ndawojoꞌ ngatok chupan ri kꞌaslen ma ndikꞌis ta, tanimaj ri mandamientos#Lv. 18:5 eruyoꞌon ri Dios.
18Y ri kꞌajol kereꞌ xukꞌutuj razón chare: ¿Achike chi mandamientos riꞌ?
Y ri Jesús xubꞌij chare: Ma kakamisan,#Ex. 20:13; Dt. 5:17 ma takanoj rukꞌexel ri achoq ikꞌin rat kꞌulan, ma kateleqꞌan, ma taqꞌabꞌaj tzij chikij wineq, 19tanimrisaj kibꞌiꞌ ri ate-atataꞌ,#Ex. 20:12; Mt. 15:4; Ef. 6:1, 2 y kaꞌawojoꞌ ri wineq#Lv. 19:18; Ro. 13:9; Gá. 5:14; Stg. 2:8 achel ndawojoꞌ awiꞌ rat.
20Y ri kꞌajol kereꞌ xubꞌij chare: Nojel ri mandamientos riꞌ enuniman pe. ¿Achike más ndikꞌatzin nibꞌen?
21Ri Jesús xubꞌij chare: Si ndawojoꞌ ngatok nojel ri ndirajoꞌ ri Dios chi ngatok, kabꞌiyin, taꞌakꞌayij ri achajin#Lc. 12:33; 16:9 y ri rajel tayaꞌ chake ri maneq ok kichajin, y keriꞌ ndikꞌojeꞌ abꞌeyomal chikaj,#Mt. 6:20 y kꞌateriꞌ katzolij pe chin nganawoqaj.
22Atoq ri kꞌajol xrakꞌaxaj ri xubꞌij ri Jesús chare, ndibꞌison xbꞌa, porque kꞌiy bꞌeyomal ruchajin.
23Y ri Jesús kereꞌ xubꞌij chake ri ru-discípulos: Kin qetzij nibꞌij chiwa chi cuesta chare jun bꞌeyon#1Ti. 6:9 chi ndok chupan ri ru-reino ri aj chikaj Dios. 24Y nibꞌij chuqaꞌ chiwa, chi más ma cuesta ta ndeqꞌax jun camello chi racheq jun bꞌaq chin tꞌisoꞌ, ke chuwech xtok jun bꞌeyon pa ru-reino ri Dios.
25Atoq xkakꞌaxaj keriꞌ ri discípulos, santienta xsach kikꞌuꞌx y kereꞌ ndikibꞌilaꞌ: Si keriꞌ, ¿achike kꞌa jun xtikolotej?
26Ri Jesús xerutzutzaꞌ y xubꞌij chake: Kiyon chikiwech, ri wineq ma ngetiker ta ndikikal kiꞌ, pero chare ri Dios ma jun achike cuesta rubꞌanik.#Gn. 18:14; Job 42:2; Jer. 32:17
27Ja atoq riꞌ ri Pedro kereꞌ xubꞌij chare ri Jesús: Rat ayoꞌon cuenta chare chi roj qayoꞌon kan nojel#Lc. 14:33 y rat qoqan.#Mt. 4:20; 9:9; Mr. 1:17-20; 10:28; Lc. 5:11 ¿Achike kꞌa rajel-rukꞌexel ndiyoꞌox chaqe?
28Ri Jesús xubꞌij chake: Kin qetzij nibꞌij chiwa chi chupan ri qꞌij atoq ndibꞌan kꞌakꞌakꞌ chare nojel,#Ap. 21:5 atoq riyin ri aj chikaj ri xinuꞌalex chiꞌikajal ngitzꞌuyeꞌ pa nu-trono rikꞌin nimalej nuqꞌij, rix ri yin iwoqan ngixbꞌetzꞌuyeꞌ pa kabꞌlajuj tronos, chin ndiqꞌet tzij#1Co. 6:2; Ap. 2:26 pa kiwiꞌ ri kiy-kimam kan ri kabꞌlajuj rukꞌajol ri Israel.#Lc. 22:30 29Y xa achike na jun ri ruyoꞌon kan rachoch, ruchaqꞌ-runimal, eranaꞌ, rute-rutataꞌ, ralkꞌuaꞌl, o ruxolal woma riyin, kin ndiyoꞌox 100 mul más chare, y ndiyoꞌox chuqaꞌ ri kꞌaslen ma ndikꞌis ta chare. 30Pero ekꞌiy ri nim kiqꞌij chupan re tiempo rojkꞌo, maneq ok kiqꞌij ndekꞌojeꞌ chupan ri tiempo más chiqawech apu, y ekꞌiy ri maneq ok kiqꞌij chupan re tiempo rojkꞌo, kin nim kiqꞌij xtikꞌojeꞌ.#Mt. 20:16
Одоогоор Сонгогдсон:
Mateo 19: cakX
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2015, Wycliffe Bible Translators, Inc. All rights reserved.