CHISƆSI 'A SƆ MƆƐ NU 13
13
Chɔchi mɔɛ nu Andiɔki, an‑na Banabasi sɔ an fea Sɔɔ a
1Mɔɛ n ni wan nɔ Andiɔki duu ɔ, miin ni Yataa 'a gbonka chɛ mɔɛ n na, a basan a 'a kan chɛ mɔɛ n na. Banabasi ni an mɔɛ chɛ n dɔndɔ an na, ni Simiyɔn bɛɛ, an ni min chee, an dɔ, Simiyɔn finɛ. A yɛ to, Sɔɔ wɛɛ, ni Dusiɔsi, min ka‑a Sayini duu ɔ, an fea Manaɛn na, min bɔ‑a a ɔ chen dɔndɔɛ a, an fea Mansa Ɛdɔdi Andipasi a. 2Tee dɔndɔ a, an ni kɛn sun bia a, an mbe ta‑a Mansa Yataa fai‑a, Yataa Nyina‑a a fɔ wan an ye, a ɔ, “Wo a ma n ye, Banabasi, an fea Sɔɔ a, an ni ma tenchen wai chɛ ko a, n‑na an chee min chɛ koe a.”
3Mbɛ an ban‑da sun bia‑a, a basan samun chɛ a, an‑na an boo bun fan an ma, an‑na an dua, mbɛ an‑na an na ta.
Banabasi, an fea Sɔɔ a, an ta‑a Saipɔsi yii tinɛ ɔ
4-5Mbɛ Yataa Nyina chɛ‑a Banabasi sɔ kɛn, an fea Sɔɔ a, ta koe a baa kɔ, an yii‑a wan Sɛdusia duu ɔ. An bɛ an ta‑a Chɔn Maki a, basan koe a an ma an 'na wai chɛ koe a. An ka‑a wan nɔ, mbɛ an‑na yii tɛ dɛndɛ ɔ Saipɔsi yii tinɛ ɔ. An che‑a wan Sadamisi duu ɔ, an don‑da Chu n na samun chɛ chenɛ a, mbɛ an‑na Yataa bai ɔ yian mɔɛ n na.
6An‑na an tinɛ chɛ gbɛɛ ɔ ban kɛn, benbenɛ a, aan a che Pafɔsi duu ɔ, an‑na nkofo kamin dɔndɔ tan fan. A tɔ ni Baa Chisɔsi. A ni Chu mɔɛ an na, min ni fania fɔɛ a, mbɛ Yataa 'a gbonka chɛ mɔɛ mu a a. 7An nkofo chɛ, a dia nyɔɛ an nii nɛ kɔfana a nɔ, an yii tin chɛ ɔ. An kɔfana chɛ tɔ ni Sachɔsi Pɔdɔsi, min yiima tɛen ni kaka. A‑a Banabasi chee wan, an fea Sɔɔ a, Yataa bai a min koe a an na. 8Chɛɛ nkofo chɛ, min tɔɛ dɔndɔɛ ni Ɛdimasi (a tɔɛ chɛ fɔɛ an nii nɛ, nkofo tɔɛ), a‑a Banabasi n kɔɔsa bia wan kaka. A nii ma to ni, kɔfana chɛ ni dan bai chɛ n na, an ni min fɔ tena a si Chisɔsi ma. 9Chɛɛ Yataa Nyina bea‑a wan Sɔɔ fɛ gban, min tɔɛ dɔndɔɛ ni Pɔɔ. A‑a a ya gbangban fan nkofo chɛ a, 10mbɛ a ɔ, “I wan, Sitana 'a denɛ. Ko chɛndɛ kan kɔ kan chɛɛ ma nyɔɛ mu i a. Chɛwɛɛ yama yama gbɛɛ ɛ i ɔ, mɔɛ n bun koe a. A sin, e butuin chɛ tena wan tima ɔ tima, i ni Mansa Yataa 'a tea mun fania a. 11Mbɛ a yen ko gbɛ sanche, Mansa Yataa‑a a boo bun i ma. I ya a ɛ pimbi‑a wan tee kuunden ko a.”
A ya kɔɔɛ a, mbɛ dingbii bun‑da Ɛdimasi ya a, a don‑da pimbi ɔ, mbɛ a bun‑da a boo mɛmɛ‑a. A toen ni, mɔɛ ni a bia a boo ma, a ni ta a a. 12Kɔfana chɛ‑a a ɔ yen kɛn koe min ma‑a, a‑a a kai fa wan Chisɔsi a. Koe min na mu, a da ɔ gbaa‑a wan kan chɛ a, a si Mansa Chisɔsi ma.
Pɔɔ n fea ta‑a Banabasi a, Pisidia chɛnyɛ ɔ
13Mbɛ Pɔɔ n bɛ a bɔɛ n na, an si‑a dɛndɛ ɔ, mbɛ an bɔ‑a Pafɔsi duu ɔ, an ta‑a Paaka duu ɔ, min ni Panfidia chɛnyɛ ɔ. An che‑a kɛn nɔ, Chɔn Maki‑a an to wan, mbɛ a yɛ‑a Chuusaɛn duu ɔ. 14Chɛɛ an‑na an 'na tachɛ a tun fan a ma, a ka Paaka, a ta Andiɔki duu dɔ mende ɔ, min ni Pisidia chɛnyɛ ɔ. A sin, Chu n 'na suin tee ma, an don‑da wan Chu n 'na samun chenɛ a, mbɛ an si‑a. 15Mbɛ mɔɛ ban‑da sawa gboo chɛ kan‑da, Mosisi na‑a min nyɛn, a basan bai n na, Yataa 'a gbonka chɛ mɔɛ na‑a min nyɛn. Mbɛ ya ɔ sɔɛ chɛ nu, Chu n 'na samun chɛ chen chɛ a, an‑na sakana a ta Pɔɔ n tena, an dɔ te, “Nn suun ma nyɔɛ nu, ni bai ɔ bai ɛ wan wo da a, a fɔ koe, min mbe mɔɛ n faa ma nande, wo e ka a fɔ‑a.”
16Mbɛ Pɔɔ‑a a kɔɔ sɔ, a‑a a boo a sɛ an too ma sɔ koe a, mbɛ a bun‑da koɔ‑a. A ɔ, “N bɔ Isɔɛɛ mɔɛ nu, wo wo too ma sɔ, wo wɛn bɛɛ ma Chu mɔ a, wo wo too ma sɔ n ma. 17Mmɔ wan Isɔɛɛ mɔɛ n mbe Yataa min fai, an‑na a boo sɔ nn bemba n ta bemba n ma, ma koe a a ta mɔɛ n na. Mbɛ a‑a a ma, an da a koa‑a, tima min na, an ni sondaya a Ichipi chɛnyɛ ɔ. Yataa 'a gbasaya, an‑na a ma to, an bɔ‑a Ichipi chɛnyɛ chɛ ɔ. 18Mbɛ a sin, san bi naanin chɛ gbɛɛ ko a, an ni tima min na fuinɛ ma, an 'na ko yama gbɛɛ bɛn‑da wan a ma. 19Yataa‑a chɛnyɛ mɔ kun wɔnfea n kasaa wan, Kenaan chɛnyɛ ɔ. Mbɛ a‑a a ma, a 'a mɔɛ nu, Kenaan chɛnyɛ chɛ ma‑a an ta a. 20Koe chɛ n gbɛɛ ma‑a san chɛmɛ naanin, ni san bi duu an tɛ ɔ.
“Chɛ gbakɔ, a‑a a ma wan, an‑na ya ɔ sɔɛ n ma sɔn, miin ni an kun ma fɛn, aan Yataa 'a gbonka chɛ mɔɛ Samɛɛ ta tima che‑a. 21Mbɛ an‑na Yataa ɔ tisa, min mbe a ma, a ni mansa be an ma. Yataa‑a Sɔɔ be wan an ma, min ni kai Kisi 'a denɛ a. A bɔ‑a Bɛnchamin 'na dambi an dɔ. A ni wan mansaya chɛ ɔ, san bi naanin ko a. 22Yataa‑a Sɔɔ bɔ kɛn mansaya chɛ ma, a‑a a boo sɔ wan Defidi ma, ma koe a mansa a, Sɔɔ gba ɔ. Yataa‑a bai chɛ an fɔ a si Defidi ma, a ɔ, ‘Defidi wakoe‑a n ya fa, Chɛsi 'a den chɛ. Koe min na mu, n‑na a ɔ yen, mbɛ ɛ kun fan n faa ma koe ma‑a, yɔ n toen mu a a buɛ min dɔ.’ 23Defidi chɛ, a 'a dambi ɔ mu, Yataa‑a a ma, mmɔ‑a baun mɔɛ ma sɔn, min mu Chisɔsi a. A‑a Isɔɛɛ mɔɛ n too ɔ dia an na. 24Chisɔsi e na to a 'a wai kuu sɔ‑a dunya chɛ ɔ, Chɔn‑na Yataa bai sa wan Isɔɛɛ mɔɛ n gbɛɛ tena, an kan kɔ sɔ koe a, an 'na ko yama n na, a ni yii chɛ an kunɛ ɔ, Yataa chia a. 25A sin, Chɔn ni kɛn gbɛ a 'a wai a ban tena dunya chɛ ɔ, a‑a a fɔ wan, a ɔ, ‘Ɛ wo yii ma, mbɛ nyɔn mu n na? N fan ma mɔɛ chɛ a, wo yii na chiien mu min na. Chɛɛ wo wo too ma sɔ, a ɛ na tena n gbaa chia a. Kɔɔwa gbu wɛɛ a chenɛ a, n mbe ee che a yuu wɛɛ fuin koe a.’
26“N suun ma nyɔɛ nu, wo wɛn mu Ebeami cheeya n na, ni wo wɛɛ, wo wɛn ma Chu mɔ a, chɛɛ wo wɛn mbe kooya be Yataa ma, wo chɛ a min. Sakana bai chɛ, min mbe na bauncha a, a naen mu mmɔ gbɛɛ an ko a. 27Chɛɛ mɔɛ miin mbe Chuusaɛn duu ɔ, an bɛ an ya ɔ sɔɛ n na, an nii ma a wakoe ɔ gbɛ ni. An nii ma Yataa 'a gbonka chɛ mɔɛ chɛ n 'na bai n nan fan bɛɛ ɔ gbɛ ni, an ni min kan Chu n 'na samun chɛ chenɛ a, suin tee kan kɔ kan ma. Chɛɛ an‑na kaa a tɛ wan, a wakoe ma, a ni fa, Yataa 'a gbonka chɛ mɔɛ chɛ n da a kuiɛ bɔ koe a a. 28An nii ma chia ɔ chia sɔn ni kaa a tɛ koe a, a fa koe ma. Chɛ gbɛɛ ɔ, an‑na Kɔfana Padeti ɔ tisa wan, a ni a ma, an ni a fa. 29An sin ban‑da wan koe chɛ n gbɛɛ a tachɛ‑a Chisɔsi a, yɔ a na‑a a fɔ buɛ min dɔ, a si a ma Yataa 'a gboo ɔ. Mbɛ an‑na a a yii kɔn chɛ ma, an‑na a tɔn. 30Chɛɛ Yataa‑a a kɔɔ sɔ wan, a ka saya ɔ, 31a sin, tee sɛsɛ ko a, a ni bɔ wan mɔɛ chɛ n ya a, an bɛ ni ta miin na chia a a ka Kadidi chɛnyɛ ɔ, a sɛ Chuusaɛn duu ɔ. An fan mu sanche sii n na, a wan Chisɔsi ko a, mɔɛ n tena. 32A sin, nn mbe ka nɛ, min mbe a ma, nn ni sakana bai chɛndɛ chɛ ɔ yian wo a. Mbɛ Yataa na‑a tooɔdia min chɛ mmɔ bemba n ta bemba n na, 33a‑a an chɛ ka mmɔ ye, mmɔ wɛn mu an cheeya n na. Koe min na mu, a‑a Chisɔsi kɔɔ sɔ wan, a ka saya ɔ. A‑a chɛ ma wan, yɔ a nyɛnden mu buɛ min dɔ si fean bɔɛ chɛ ɔ, Yataa tando si gboo ɔ. A‑a a fɔ wan a ɔ, a ɔ,
‘N 'na denɛ mu i a.
N ma‑a i fa a bi.’
34Yataa sin‑na Chisɔsi a sɔɛ min chɛ ka, a ka saya ɔ, a ee a ma‑a a gboo ni tui kuɔ fɔ ko a. Yataa na‑a a fɔ ka wan a 'a gboo ɔ, a ɔ,
‘Dua min mbe ee bea duu ma, n mbe a chɛ‑a wan wo a,
n na‑a Mansa Defidi too ɔ dia min na.’
35Chɛ an fɛ mu, a‑a a fɔ wan to si dɔ mende ɔ, Yataa tando si gboo chɛ ɔ, a ɔ,
‘E ee dɔn‑da i 'a wai chɛ mɔɛ chɛ, n fɛn‑na n fandi be i ma,
n su ni tui kamba ɔ.’
36Defidi tana, a ta tima a, a na‑a ban fan wai chɛ‑a Yataa ye, a chia ma yɔ a ɔ na‑a bɛn buɛ min dɔ. Mbɛ saya‑a a boo kana bia, a sin sa‑a a bemba n kaa a, mbɛ a gboo tui‑a kamba ɔ. 37Chɛɛ chɛ nii ma ma ni mɔɛ chɛ a, Yataa‑a min na sɔ, a ka saya ɔ. 38Chɛ an fɛ mu, n suun ma nyɔɛ nu, a nyin wo ni chɛ ɔ gbɛ. Mbɛ Chisɔsi chɛ an ko a mu, Yataa ɛ a boo bɔ mmɔ 'a ko yama n dɔ. 39A sin, a wan ko a mu to, mɔ ɔ mɔ min mbe a kai fa‑a a a, Yataa ɛ a ya‑a wan mɔ tandenɛ a a tena. Ɛ a boo bɔ‑a wan an mɔɛ chɛ a ko yama gbɛɛ ɔ. Ko yama chɛ nu, an mɔɛ chɛ kun mbe ee che bɔ‑a miin dɔ, Mosisi 'a sawa kɔɔ. 40Chɛ an fɛ mu, wo wo kun ma fɛn, min mbe a ma, Yataa 'a gbonka chɛ mɔɛ n na‑a bai min fɔ, a ma na wo tan. An na‑a a fɔ wan Yataa 'a gboo ɔ, an dɔ te,
41‘Wo a yen, bai yama sa mɔɛ nu, a si Yataa da a bai n ma.
N mbe na tena wan koe ma‑a bi tee chɛ kɔɔ,
wo ee dan‑da min na kuɔ fɔ,
mɔɛ ni a ɔ yian bɛɛ wo a.
Chɛ an fɛ mu, wo da a ɔ gbaa‑a wan, mbɛ wo fa‑a.’ ”
42Pɔɔ n ni kɛn bɔ‑a Chu n 'na samun chɛ chen chɛ a, mɔɛ chɛ n‑na an disa wan. An dɔ, suin tee min ni na tena, an ni koe chɛ n dɔ yian to an na. 43Mbɛ mɔɛ chɛ n gbɛɛ, an ban‑da bɔ‑a Chu n 'na samun chɛ chen chɛ a. Chɛɛ Chu mɔɛ nu, ni an sɛsɛ miin boo fea sien ni Chu n 'na Yataa fai chia kɔɔ, an sɛsɛ‑a a sɔ wan Pɔɔ fɛ, an fea Banabasi a. An koɔ‑a wan mɔɛ chɛ n tena, an‑na a ma din an tena, mbɛ an ma an kan kɔ sɔ to Yataa 'a koadia deman chɛ a.
44Suin tee dɔndɔɛ chɛ che‑a kɛn, ɛnden fan to‑a, mɔɛ n gbɛɛ an duu chɛ ɔ, an ni kuɛn, na koe a, an too ma sɔ‑a Mansa Yataa 'a bai ma. 45Chu mɔɛ chɛ nu, an‑na fanka wa chɛ yen kɛn, toomaya‑a an faa fa wan gban. Mbɛ an‑na Pɔɔ da a bai gbɛɛ kɔɔsa bia, an yɛ‑a to, an‑na a main. 46Chɛɛ a tima gbu a ni gbɛ, Pɔɔ, an fea Banabasi a, an‑na bai sa faagbɛa a. An dɔ, “A ni nyin, nn ni Yataa da a bai chɛ ɔ yian wo pɛn na. Chɛɛ wo‑a wo boo sɔ wan a ya ɔ, wo‑a a ɔ yian wo sɔnɛ ɔ, mbɛ a ma nyin, wo ni kuɔ fɔ fɔɛ chɛ ma sɔn. A yen ko gbɛ, nn bɛɛ, nn‑na nn ya a yɛ chɛ n ma, miin ma Chu mɔ a. 47Koe min na mu, Mansa Yataa‑a a fɔ ka wan nn ye, a ma koe a. A‑a a fɔ wan a 'a gboo ɔ, a ɔ,
‘N‑na wo ma manɛ a, chɛ n ko a, miin ma Chu mɔ a.
Chɛ ni a ma, wo ni na bauncha a dunya tɔnkɔnɛ gbɛɛ ɔ.’ ”
48A sin, mɔɛ chɛ nu, miin nii ma Chu mɔ a, an‑na bai chɛ a min kɛn, an bu ɔ dia‑a wan, an bun‑da Yataa tando‑a, a 'a bai ko a. Mɔ sɛsɛ sin, Yataa na‑a a boo sɔ miin ma, kuɔ fɔ fɔɛ ma sɔn koe a, an‑na an kai fa wan Chisɔsi a.
49Mbɛ bai chɛ, a si Mansa Chisɔsi ma, a fasan‑da wan a ɔ gbɛɛ an tanda chɛ ɔ ben‑da. 50Chɛɛ musu gbakoo nu an duu chɛ ɔ, miin ni kooya be Yataa ma, an bɛ nɔ mɔ kaima gbakoo n gbɛɛ a, Chu mɔɛ chɛ n‑na an gbɛɛ a sɛ wan Pɔɔ n ma. An‑na ko ma gbaaenɛ sa wan Pɔɔ ma, an fea Banabasi a, mbɛ an gbu‑a an gbain an tanda gbu ɔ. 51Chɛ ma‑a kɛn, Pɔɔ n‑na an chen 'na fifii a gbɔngbɔn fan an chenɛ a, ma koe a dasi a, an duu chɛ ɔ mɔɛ n ko a. Mbɛ an bɔ‑a nɔ, an ta‑a Ikoniɔn duu ɔ. 52A sin, Chisɔsi fɛ mɔɛ chɛ n gbɛɛ nɔ, buɔdia koa‑a wan an dɔ, Yataa Nyina wɛɛ sin ni wan an fɛ gban.
Одоогоор Сонгогдсон:
CHISƆSI 'A SƆ MƆƐ NU 13: KONONT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
New Testament in Kono © The Bible Society of Sierra Leone, 2006.
CHISƆSI 'A SƆ MƆƐ NU 13
13
Chɔchi mɔɛ nu Andiɔki, an‑na Banabasi sɔ an fea Sɔɔ a
1Mɔɛ n ni wan nɔ Andiɔki duu ɔ, miin ni Yataa 'a gbonka chɛ mɔɛ n na, a basan a 'a kan chɛ mɔɛ n na. Banabasi ni an mɔɛ chɛ n dɔndɔ an na, ni Simiyɔn bɛɛ, an ni min chee, an dɔ, Simiyɔn finɛ. A yɛ to, Sɔɔ wɛɛ, ni Dusiɔsi, min ka‑a Sayini duu ɔ, an fea Manaɛn na, min bɔ‑a a ɔ chen dɔndɔɛ a, an fea Mansa Ɛdɔdi Andipasi a. 2Tee dɔndɔ a, an ni kɛn sun bia a, an mbe ta‑a Mansa Yataa fai‑a, Yataa Nyina‑a a fɔ wan an ye, a ɔ, “Wo a ma n ye, Banabasi, an fea Sɔɔ a, an ni ma tenchen wai chɛ ko a, n‑na an chee min chɛ koe a.”
3Mbɛ an ban‑da sun bia‑a, a basan samun chɛ a, an‑na an boo bun fan an ma, an‑na an dua, mbɛ an‑na an na ta.
Banabasi, an fea Sɔɔ a, an ta‑a Saipɔsi yii tinɛ ɔ
4-5Mbɛ Yataa Nyina chɛ‑a Banabasi sɔ kɛn, an fea Sɔɔ a, ta koe a baa kɔ, an yii‑a wan Sɛdusia duu ɔ. An bɛ an ta‑a Chɔn Maki a, basan koe a an ma an 'na wai chɛ koe a. An ka‑a wan nɔ, mbɛ an‑na yii tɛ dɛndɛ ɔ Saipɔsi yii tinɛ ɔ. An che‑a wan Sadamisi duu ɔ, an don‑da Chu n na samun chɛ chenɛ a, mbɛ an‑na Yataa bai ɔ yian mɔɛ n na.
6An‑na an tinɛ chɛ gbɛɛ ɔ ban kɛn, benbenɛ a, aan a che Pafɔsi duu ɔ, an‑na nkofo kamin dɔndɔ tan fan. A tɔ ni Baa Chisɔsi. A ni Chu mɔɛ an na, min ni fania fɔɛ a, mbɛ Yataa 'a gbonka chɛ mɔɛ mu a a. 7An nkofo chɛ, a dia nyɔɛ an nii nɛ kɔfana a nɔ, an yii tin chɛ ɔ. An kɔfana chɛ tɔ ni Sachɔsi Pɔdɔsi, min yiima tɛen ni kaka. A‑a Banabasi chee wan, an fea Sɔɔ a, Yataa bai a min koe a an na. 8Chɛɛ nkofo chɛ, min tɔɛ dɔndɔɛ ni Ɛdimasi (a tɔɛ chɛ fɔɛ an nii nɛ, nkofo tɔɛ), a‑a Banabasi n kɔɔsa bia wan kaka. A nii ma to ni, kɔfana chɛ ni dan bai chɛ n na, an ni min fɔ tena a si Chisɔsi ma. 9Chɛɛ Yataa Nyina bea‑a wan Sɔɔ fɛ gban, min tɔɛ dɔndɔɛ ni Pɔɔ. A‑a a ya gbangban fan nkofo chɛ a, 10mbɛ a ɔ, “I wan, Sitana 'a denɛ. Ko chɛndɛ kan kɔ kan chɛɛ ma nyɔɛ mu i a. Chɛwɛɛ yama yama gbɛɛ ɛ i ɔ, mɔɛ n bun koe a. A sin, e butuin chɛ tena wan tima ɔ tima, i ni Mansa Yataa 'a tea mun fania a. 11Mbɛ a yen ko gbɛ sanche, Mansa Yataa‑a a boo bun i ma. I ya a ɛ pimbi‑a wan tee kuunden ko a.”
A ya kɔɔɛ a, mbɛ dingbii bun‑da Ɛdimasi ya a, a don‑da pimbi ɔ, mbɛ a bun‑da a boo mɛmɛ‑a. A toen ni, mɔɛ ni a bia a boo ma, a ni ta a a. 12Kɔfana chɛ‑a a ɔ yen kɛn koe min ma‑a, a‑a a kai fa wan Chisɔsi a. Koe min na mu, a da ɔ gbaa‑a wan kan chɛ a, a si Mansa Chisɔsi ma.
Pɔɔ n fea ta‑a Banabasi a, Pisidia chɛnyɛ ɔ
13Mbɛ Pɔɔ n bɛ a bɔɛ n na, an si‑a dɛndɛ ɔ, mbɛ an bɔ‑a Pafɔsi duu ɔ, an ta‑a Paaka duu ɔ, min ni Panfidia chɛnyɛ ɔ. An che‑a kɛn nɔ, Chɔn Maki‑a an to wan, mbɛ a yɛ‑a Chuusaɛn duu ɔ. 14Chɛɛ an‑na an 'na tachɛ a tun fan a ma, a ka Paaka, a ta Andiɔki duu dɔ mende ɔ, min ni Pisidia chɛnyɛ ɔ. A sin, Chu n 'na suin tee ma, an don‑da wan Chu n 'na samun chenɛ a, mbɛ an si‑a. 15Mbɛ mɔɛ ban‑da sawa gboo chɛ kan‑da, Mosisi na‑a min nyɛn, a basan bai n na, Yataa 'a gbonka chɛ mɔɛ na‑a min nyɛn. Mbɛ ya ɔ sɔɛ chɛ nu, Chu n 'na samun chɛ chen chɛ a, an‑na sakana a ta Pɔɔ n tena, an dɔ te, “Nn suun ma nyɔɛ nu, ni bai ɔ bai ɛ wan wo da a, a fɔ koe, min mbe mɔɛ n faa ma nande, wo e ka a fɔ‑a.”
16Mbɛ Pɔɔ‑a a kɔɔ sɔ, a‑a a boo a sɛ an too ma sɔ koe a, mbɛ a bun‑da koɔ‑a. A ɔ, “N bɔ Isɔɛɛ mɔɛ nu, wo wo too ma sɔ, wo wɛn bɛɛ ma Chu mɔ a, wo wo too ma sɔ n ma. 17Mmɔ wan Isɔɛɛ mɔɛ n mbe Yataa min fai, an‑na a boo sɔ nn bemba n ta bemba n ma, ma koe a a ta mɔɛ n na. Mbɛ a‑a a ma, an da a koa‑a, tima min na, an ni sondaya a Ichipi chɛnyɛ ɔ. Yataa 'a gbasaya, an‑na a ma to, an bɔ‑a Ichipi chɛnyɛ chɛ ɔ. 18Mbɛ a sin, san bi naanin chɛ gbɛɛ ko a, an ni tima min na fuinɛ ma, an 'na ko yama gbɛɛ bɛn‑da wan a ma. 19Yataa‑a chɛnyɛ mɔ kun wɔnfea n kasaa wan, Kenaan chɛnyɛ ɔ. Mbɛ a‑a a ma, a 'a mɔɛ nu, Kenaan chɛnyɛ chɛ ma‑a an ta a. 20Koe chɛ n gbɛɛ ma‑a san chɛmɛ naanin, ni san bi duu an tɛ ɔ.
“Chɛ gbakɔ, a‑a a ma wan, an‑na ya ɔ sɔɛ n ma sɔn, miin ni an kun ma fɛn, aan Yataa 'a gbonka chɛ mɔɛ Samɛɛ ta tima che‑a. 21Mbɛ an‑na Yataa ɔ tisa, min mbe a ma, a ni mansa be an ma. Yataa‑a Sɔɔ be wan an ma, min ni kai Kisi 'a denɛ a. A bɔ‑a Bɛnchamin 'na dambi an dɔ. A ni wan mansaya chɛ ɔ, san bi naanin ko a. 22Yataa‑a Sɔɔ bɔ kɛn mansaya chɛ ma, a‑a a boo sɔ wan Defidi ma, ma koe a mansa a, Sɔɔ gba ɔ. Yataa‑a bai chɛ an fɔ a si Defidi ma, a ɔ, ‘Defidi wakoe‑a n ya fa, Chɛsi 'a den chɛ. Koe min na mu, n‑na a ɔ yen, mbɛ ɛ kun fan n faa ma koe ma‑a, yɔ n toen mu a a buɛ min dɔ.’ 23Defidi chɛ, a 'a dambi ɔ mu, Yataa‑a a ma, mmɔ‑a baun mɔɛ ma sɔn, min mu Chisɔsi a. A‑a Isɔɛɛ mɔɛ n too ɔ dia an na. 24Chisɔsi e na to a 'a wai kuu sɔ‑a dunya chɛ ɔ, Chɔn‑na Yataa bai sa wan Isɔɛɛ mɔɛ n gbɛɛ tena, an kan kɔ sɔ koe a, an 'na ko yama n na, a ni yii chɛ an kunɛ ɔ, Yataa chia a. 25A sin, Chɔn ni kɛn gbɛ a 'a wai a ban tena dunya chɛ ɔ, a‑a a fɔ wan, a ɔ, ‘Ɛ wo yii ma, mbɛ nyɔn mu n na? N fan ma mɔɛ chɛ a, wo yii na chiien mu min na. Chɛɛ wo wo too ma sɔ, a ɛ na tena n gbaa chia a. Kɔɔwa gbu wɛɛ a chenɛ a, n mbe ee che a yuu wɛɛ fuin koe a.’
26“N suun ma nyɔɛ nu, wo wɛn mu Ebeami cheeya n na, ni wo wɛɛ, wo wɛn ma Chu mɔ a, chɛɛ wo wɛn mbe kooya be Yataa ma, wo chɛ a min. Sakana bai chɛ, min mbe na bauncha a, a naen mu mmɔ gbɛɛ an ko a. 27Chɛɛ mɔɛ miin mbe Chuusaɛn duu ɔ, an bɛ an ya ɔ sɔɛ n na, an nii ma a wakoe ɔ gbɛ ni. An nii ma Yataa 'a gbonka chɛ mɔɛ chɛ n 'na bai n nan fan bɛɛ ɔ gbɛ ni, an ni min kan Chu n 'na samun chɛ chenɛ a, suin tee kan kɔ kan ma. Chɛɛ an‑na kaa a tɛ wan, a wakoe ma, a ni fa, Yataa 'a gbonka chɛ mɔɛ chɛ n da a kuiɛ bɔ koe a a. 28An nii ma chia ɔ chia sɔn ni kaa a tɛ koe a, a fa koe ma. Chɛ gbɛɛ ɔ, an‑na Kɔfana Padeti ɔ tisa wan, a ni a ma, an ni a fa. 29An sin ban‑da wan koe chɛ n gbɛɛ a tachɛ‑a Chisɔsi a, yɔ a na‑a a fɔ buɛ min dɔ, a si a ma Yataa 'a gboo ɔ. Mbɛ an‑na a a yii kɔn chɛ ma, an‑na a tɔn. 30Chɛɛ Yataa‑a a kɔɔ sɔ wan, a ka saya ɔ, 31a sin, tee sɛsɛ ko a, a ni bɔ wan mɔɛ chɛ n ya a, an bɛ ni ta miin na chia a a ka Kadidi chɛnyɛ ɔ, a sɛ Chuusaɛn duu ɔ. An fan mu sanche sii n na, a wan Chisɔsi ko a, mɔɛ n tena. 32A sin, nn mbe ka nɛ, min mbe a ma, nn ni sakana bai chɛndɛ chɛ ɔ yian wo a. Mbɛ Yataa na‑a tooɔdia min chɛ mmɔ bemba n ta bemba n na, 33a‑a an chɛ ka mmɔ ye, mmɔ wɛn mu an cheeya n na. Koe min na mu, a‑a Chisɔsi kɔɔ sɔ wan, a ka saya ɔ. A‑a chɛ ma wan, yɔ a nyɛnden mu buɛ min dɔ si fean bɔɛ chɛ ɔ, Yataa tando si gboo ɔ. A‑a a fɔ wan a ɔ, a ɔ,
‘N 'na denɛ mu i a.
N ma‑a i fa a bi.’
34Yataa sin‑na Chisɔsi a sɔɛ min chɛ ka, a ka saya ɔ, a ee a ma‑a a gboo ni tui kuɔ fɔ ko a. Yataa na‑a a fɔ ka wan a 'a gboo ɔ, a ɔ,
‘Dua min mbe ee bea duu ma, n mbe a chɛ‑a wan wo a,
n na‑a Mansa Defidi too ɔ dia min na.’
35Chɛ an fɛ mu, a‑a a fɔ wan to si dɔ mende ɔ, Yataa tando si gboo chɛ ɔ, a ɔ,
‘E ee dɔn‑da i 'a wai chɛ mɔɛ chɛ, n fɛn‑na n fandi be i ma,
n su ni tui kamba ɔ.’
36Defidi tana, a ta tima a, a na‑a ban fan wai chɛ‑a Yataa ye, a chia ma yɔ a ɔ na‑a bɛn buɛ min dɔ. Mbɛ saya‑a a boo kana bia, a sin sa‑a a bemba n kaa a, mbɛ a gboo tui‑a kamba ɔ. 37Chɛɛ chɛ nii ma ma ni mɔɛ chɛ a, Yataa‑a min na sɔ, a ka saya ɔ. 38Chɛ an fɛ mu, n suun ma nyɔɛ nu, a nyin wo ni chɛ ɔ gbɛ. Mbɛ Chisɔsi chɛ an ko a mu, Yataa ɛ a boo bɔ mmɔ 'a ko yama n dɔ. 39A sin, a wan ko a mu to, mɔ ɔ mɔ min mbe a kai fa‑a a a, Yataa ɛ a ya‑a wan mɔ tandenɛ a a tena. Ɛ a boo bɔ‑a wan an mɔɛ chɛ a ko yama gbɛɛ ɔ. Ko yama chɛ nu, an mɔɛ chɛ kun mbe ee che bɔ‑a miin dɔ, Mosisi 'a sawa kɔɔ. 40Chɛ an fɛ mu, wo wo kun ma fɛn, min mbe a ma, Yataa 'a gbonka chɛ mɔɛ n na‑a bai min fɔ, a ma na wo tan. An na‑a a fɔ wan Yataa 'a gboo ɔ, an dɔ te,
41‘Wo a yen, bai yama sa mɔɛ nu, a si Yataa da a bai n ma.
N mbe na tena wan koe ma‑a bi tee chɛ kɔɔ,
wo ee dan‑da min na kuɔ fɔ,
mɔɛ ni a ɔ yian bɛɛ wo a.
Chɛ an fɛ mu, wo da a ɔ gbaa‑a wan, mbɛ wo fa‑a.’ ”
42Pɔɔ n ni kɛn bɔ‑a Chu n 'na samun chɛ chen chɛ a, mɔɛ chɛ n‑na an disa wan. An dɔ, suin tee min ni na tena, an ni koe chɛ n dɔ yian to an na. 43Mbɛ mɔɛ chɛ n gbɛɛ, an ban‑da bɔ‑a Chu n 'na samun chɛ chen chɛ a. Chɛɛ Chu mɔɛ nu, ni an sɛsɛ miin boo fea sien ni Chu n 'na Yataa fai chia kɔɔ, an sɛsɛ‑a a sɔ wan Pɔɔ fɛ, an fea Banabasi a. An koɔ‑a wan mɔɛ chɛ n tena, an‑na a ma din an tena, mbɛ an ma an kan kɔ sɔ to Yataa 'a koadia deman chɛ a.
44Suin tee dɔndɔɛ chɛ che‑a kɛn, ɛnden fan to‑a, mɔɛ n gbɛɛ an duu chɛ ɔ, an ni kuɛn, na koe a, an too ma sɔ‑a Mansa Yataa 'a bai ma. 45Chu mɔɛ chɛ nu, an‑na fanka wa chɛ yen kɛn, toomaya‑a an faa fa wan gban. Mbɛ an‑na Pɔɔ da a bai gbɛɛ kɔɔsa bia, an yɛ‑a to, an‑na a main. 46Chɛɛ a tima gbu a ni gbɛ, Pɔɔ, an fea Banabasi a, an‑na bai sa faagbɛa a. An dɔ, “A ni nyin, nn ni Yataa da a bai chɛ ɔ yian wo pɛn na. Chɛɛ wo‑a wo boo sɔ wan a ya ɔ, wo‑a a ɔ yian wo sɔnɛ ɔ, mbɛ a ma nyin, wo ni kuɔ fɔ fɔɛ chɛ ma sɔn. A yen ko gbɛ, nn bɛɛ, nn‑na nn ya a yɛ chɛ n ma, miin ma Chu mɔ a. 47Koe min na mu, Mansa Yataa‑a a fɔ ka wan nn ye, a ma koe a. A‑a a fɔ wan a 'a gboo ɔ, a ɔ,
‘N‑na wo ma manɛ a, chɛ n ko a, miin ma Chu mɔ a.
Chɛ ni a ma, wo ni na bauncha a dunya tɔnkɔnɛ gbɛɛ ɔ.’ ”
48A sin, mɔɛ chɛ nu, miin nii ma Chu mɔ a, an‑na bai chɛ a min kɛn, an bu ɔ dia‑a wan, an bun‑da Yataa tando‑a, a 'a bai ko a. Mɔ sɛsɛ sin, Yataa na‑a a boo sɔ miin ma, kuɔ fɔ fɔɛ ma sɔn koe a, an‑na an kai fa wan Chisɔsi a.
49Mbɛ bai chɛ, a si Mansa Chisɔsi ma, a fasan‑da wan a ɔ gbɛɛ an tanda chɛ ɔ ben‑da. 50Chɛɛ musu gbakoo nu an duu chɛ ɔ, miin ni kooya be Yataa ma, an bɛ nɔ mɔ kaima gbakoo n gbɛɛ a, Chu mɔɛ chɛ n‑na an gbɛɛ a sɛ wan Pɔɔ n ma. An‑na ko ma gbaaenɛ sa wan Pɔɔ ma, an fea Banabasi a, mbɛ an gbu‑a an gbain an tanda gbu ɔ. 51Chɛ ma‑a kɛn, Pɔɔ n‑na an chen 'na fifii a gbɔngbɔn fan an chenɛ a, ma koe a dasi a, an duu chɛ ɔ mɔɛ n ko a. Mbɛ an bɔ‑a nɔ, an ta‑a Ikoniɔn duu ɔ. 52A sin, Chisɔsi fɛ mɔɛ chɛ n gbɛɛ nɔ, buɔdia koa‑a wan an dɔ, Yataa Nyina wɛɛ sin ni wan an fɛ gban.
Одоогоор Сонгогдсон:
:
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
New Testament in Kono © The Bible Society of Sierra Leone, 2006.