uMataayi 3
3
UYoohani uMwozyi akulumbiilila
(uMaaliko 1:1-8; uLuuka 3:1-18; uYoohani 1:19-28)
1Amaaha aminji gahatuuha. Pisinda, ahafumila umuntu wumo we vhahatinji uYoohani uMwozyi. Umuntu uyo áali mu luugwa ku Yudeeya ukwo, ahakumusyaga 2ahatinji, “Mupindushe uvhutalamalandu vhwinyu, mwe pe uvhumwene uvhwa Mulungu#3:2 Uvhumwene uvhwa Mulungu: Vhaazya mu Ntantiho izya Mazwi aMajeni. vhupalamiiye!” 3UYoohani uyo we umukuvhwi uYisaayi ámuyanzile átili,
“Izwi ilya muntu we akuvhila imbila mu luugwa likwivwiha kuuti,
‘Musenganizanyi uMWENE uMulungu idala,
nu kugolosya mwe kuuti atuushe.’”#3:3 uYisaayi 40:3
4UYoohani ahazwalaga amenda ge gásoniilwe na masepe aga ngamila,#3:4 Ingamila shihanu isha kusugwa she shipiti, havhili shili na masepe aminji. nu kuyipinya ni ilamba ilya ikwembe mu musana. Havhili ishaakulya shaakwe sháali vhe vhamakanta nu vhwushi. 5Avhantu avhinji kufuma mu nkaaya iya Yelusaleemu, na mu shigavho isha nsi isha Yudeeya na mu mbazu zyonti izya ijenje uYoolodaani, vhahasogolaga kwa Yoohani kumutejeelezya. 6Vhahapemulaga uvhutalamalandu vhwavho, woope ahavhozyaga mwi ijenje uYoolodaani.
7Ileelo uYoohani lwe avhalola aVhafalisaayi#3:7 AVhafalisaayi: Vhaazya mu Ntantiho izya Mazwi aMajeni. na Vhasadukaayi#3:7 AVhasadukaayi: Vhaazya mu Ntantiho izya Mazwi aMajeni. vhakwinza ku vhwinji, inga avhoozye, ahavhavhuuzya ahati, “Mwe vhaana vha njoha imwe! Wu naanu we avhasosile kuuti mushimbile uvhuhalazu uvhwa Mulungu vhwe vhukwinza? 8Ishi muvhombaje zye zikulolesya kuuti mupindusile. 9Muleshe kusiivha kuuti, ‘Tuponile, mwe pe utaata wiitu wu Aabulahamu.’ Nalyoli nkuvhavhuuzya kuuti, uMulungu ahondeeye kugalulanya amavhwe iga kuvha vhaana vha Aabulahamu! 10Ishi, isunde ilya Mulungu lifisile inza umuntu we alemile intemo nu kuyisengaanya kudiba amakwi. Ikwi lyonti lye litakuhoma amantonongwa aminza, likudibwa nu kusumbwa mu mwoto.
11“Nalyoli ine nkuvhoozya na minzi kulolesya kuuti mwatonta uvhutalamalandu vhwinyu. Ileelo akwinza mwisinda lyane we ali na maha kunduusya ine, we ine ntahondeeye poosye kuvha ne muvhomvi uwa kuvhuusya ivilyatu vwake. Uyo we kwe avhoozye nu Mupepo uMufinjile nu mwoto. 12Uweene ayisengiinye kuvhasavhulanya avhagolosu na vhatalamalandu inza umuntu we alemile ulupe, inga apemente ingana pa luvhuga. Kuluzelufwa uluvhuga, aliyivhungaaniha ingana yaakwe nu kuyivhiiha mu shanga, ileelo ilyelelo na mahambili alivipemba mu mwoto we wutakuzima.”
UYeesu akwozelwa
(uMaaliko 1:9-11; uLuuka 3:21-22)
13Pe ahavhaliilizyo iho, uYeesu ahafuma mu shigavho isha nsi isha Galilaaya, ahinza kwa Yoohani, kwi ijenje uYoolodaani, inga uYoohani amwozye. 14Ileelo uYoohani ahalinga kuhaana, ahamuvhuuzya uYeesu ahati, “Shooni she ukwinza kuli ine kuuti nkwozye? Iwe we ukwanzilwa kuuti unoozye.” 15UYeesu ahamwamula ahati, “Uvhombe isho, mwe pe tukwanzilwa tuvhombe zyonti zye uMulungu akwanza.” Pe uYoohani ahiitiha, ahamwozya.
16Lwe uYeesu ayoozelwa, ahatumpuha mu minzi nu kwimiilila. Yeenya, naluvhiilo ku mwanya kuhiiguha, ahamulola uMupepo uwa Mulungu akwiha pamwanya yaakwe ku shiholanyo isha nkunda. 17Izwi ilya Mulungu lihivwiha kufuma ku mwanya lihati, “Uno we Mwana waane#3:17 UMwana waane: Vhaazya uMwana wa Mulungu mu Ntantiho izya Mazwi aMajeni. unkundwa we nkuhondezelwa nawo.”
Одоогоор Сонгогдсон:
uMataayi 3: nih
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2021 Wycliffe Bible Translators, Inc.