ମାତିସ୍ 5
5
ଯୀଶୁସ୍ ପାର୍ତ୍ତା ମିଆଁ ଉପ୍ଦେଶ୍ ଚିଆଲ୍ଦାସ୍
(ଲୁକାସ୍ ୬:୨୦-୨୩)
1ଯୀଶୁସ୍ ଆଲାର୍ଘି ଭିଡ଼୍ବନ୍ ଏରିକିରି ପାର୍ତ୍ତା ମିଆଁ ଆର୍ଗିୟାସ୍ କେରାସ୍, ଆରୁ ଯେତ୍କବାକେନ୍ ଅକ୍କିୟାସ୍ତା ଆସ୍କି ଚେଲାଜାମାର୍ ଆସ୍କି ଚାହାଗେ ବାର୍ଚାର୍, 2ଆରୁ ଯୀଶୁସ୍ ଆବ୍ଡ଼ାରିନ୍ ଉପ୍ଦେଶ୍ ଚିୟାଗେ ଲାଗ୍ଗିୟାସ୍;
3“ଧଏନ୍ ରାନାଏ ଆବ୍ଡ଼ାର୍ ଏକାର୍ କା, ପାର୍ମେଶ୍ୱାର୍ସ୍କି ମଦେତ୍ ଜାମାବାକେନ୍ ଚାହ୍ନାଏ
ଏନ୍ଦେର୍ଗେକା ସରଗ୍ ରାଜୀଦ୍ ଆବ୍ଡ଼ାର୍ଘି ଲାଗାନ୍ ରାଇଦ୍।”
4“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ଶୋକ୍ କାମ୍ନାଏ, ଏନ୍ଦେର୍ଗେକା ଆବ୍ଡ଼ାର୍ଗେ ପାର୍ମେଶ୍ୱାର୍ସ୍ ଦିଲାସା ଚିୟସ୍।”
5“ଧଏନ୍ ରାନାଏ ଆବ୍ଡ଼ାର୍ ଏକାର୍ଘି ମନ୍ ନରମ୍ ରାଇ, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ପୁରା ଦୁନିଆଁନ୍ତା ଅଧିକାରୀ ବାନାବସ୍।”
6“ଧଏନ୍ ରାନାଏ ଆବ୍ଡ଼ାର୍, ଏକାର୍ କା ପାର୍ମେଶ୍ୱାର୍ସ୍କି ନଜର୍ନୁ ଏକାଦ୍ ସତ୍ତୁ ରାଇ ଆବନ୍ କାମାଗେ ମୁରୁକ୍ ଇଚ୍ଛା କାମ୍ନାଏ, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ଇଚ୍ଛାବନ୍ ପୁରା କାମସ୍।”
7“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ଦାୟାଲୁ ରାନାଏ, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଦାୟା କାମସ୍।”
8“ଧଏନ୍ ରାନାଏ ଆବ୍ଡ଼ାର୍ ଏକାର୍ଘି ମନ୍ ସାଫା ରାଇଦ୍, ଆବ୍ଡ଼ାର୍ ପାର୍ମେଶ୍ଵାର୍ସିନ୍ ଏରର୍।”
9“ଧଏନ୍ ରାନାଏ ଆବ୍ଡ଼ାର୍, ଏକାର୍ କା ମେଲ୍ମିଲାପ୍ କାମ୍ତାନାଏ, ଆବ୍ଡ଼ାର୍ ପାର୍ମେଶ୍ଵାର୍ସ୍କି ହାଦ୍ଦୁବଚ୍ଚର୍ ବୁଲି ଆହାକର୍।”
10“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ପାର୍ମେଶ୍ୱାର୍ସ୍କି ନଜର୍ନୁ ଏକାଦ୍ ସତ୍ତୁ ରାଇ ଆବନ୍ କାମ୍ନାଘି ଲାଗାନ୍ ସାତାବାକାନାଏ, ସରଗ୍ ରାଜୀଦ୍ ଆବ୍ଡ଼ାର୍ଘି ଲାଗାନ୍ ରାଇଦ୍।”
11“ଧଏନ୍ ରାଦାର୍ ନିମ୍, ଯେତ୍କବାକେନ୍ ଆଲାର୍ ଏଙ୍ଘାଲାଗାନ୍ ନିହ୍ମା ନିନ୍ଦା କାମର୍, ଆରୁ ସାତାବର୍ ଆରୁ ଝୁଟ୍ଟୁ ତେଙ୍ଗିକିରି ନିହ୍ମାଏ ବିରୁଦ୍ଧ୍ନୁ ଜାମା ରକମ୍ଘି ଖାରାପ୍ କାତ୍ଥା ତେଙ୍ଗର୍।” 12ଆଙ୍ଗେନ୍ ଲୀଝ୍ରା ଆରୁ ଖୁସୀମାନାବା, ଏନ୍ଦେର୍ଗେକା ନିହ୍ମା ଲାଗାନ୍ ସରଗ୍ନୁ ବାଡ଼୍କା ଫଲ୍ ହାଖ୍ଖର। ହନ୍ନେନ୍ ତା ଆବ୍ଡ଼ାର୍ ନିହ୍ମାଏ ଆଘ୍ଲିନ୍ତା ନାବୀରିନ୍ ସାତାବାଚ୍କାଚାର୍।
ବେକୁ ଆରୁ ବିଲ୍ଲୀଘି ନମୁନା
(ମାର୍କୁସ୍ ୯:୫୦; ଲୁକାସ୍ ୧୪:୩୪,୩୫)
13“ନିମ୍ ଦୁନିଆଁନ୍ତା ବେକୁର୍; ଲେକିନ୍ ଯଦି ବେକୁଘି ଏମ୍ବାଦ୍ ବାଗ୍ଡ଼ାରକୋ ହାଲେ, ଆବନ୍ ଆରୁ ଏନ୍ଦେର୍ ଜିନିଷ୍ତି ଏମ୍ବା କାମାକୋ? ଆଦ୍ ଏନ୍ଦେର୍ହି ନାଲ୍ଖୁନୁ ମା ବାରି, ହୁଦ୍ଘିଲାଗାନ୍ ଇବନ୍ ବାହ୍ରି ଖେବ୍ଡ଼ାକୋ ଆରୁ ଆଲାର୍ଘି ହେଡ୍ଡୁ କିୟାଁ ତିର୍ହା ନାବାକୋ।” 14ନିମ୍ ଦୁନିଆଁନ୍ତା ବିଲ୍ଲୀର୍। ଏକା ସହର୍ ପାର୍ତ୍ତା ମିଆଁ ରାଇଦ୍ ଆଦ୍ ନୁହୁରା ପଲ୍ଲୀ। 15ଆରୁ ଆଲାର୍ ବିଲ୍ଲୀ ଦାଗିକିରି ଆଉଡ଼୍କା କିୟାଁ ଡାବିକିରି ମା ଉଇନାଏ ଲେକିନ୍ ବିଲ୍ଲୀନ୍ ବାଚ୍ଛିନୁ ଉଇୟା କାଇ, ହାଲେ ଆଡ଼୍ପାନ୍ତା ଜାମା ଆଲାର୍ଘି ଲାଗାନ୍ ବିଲ୍ଲୀ ଏଥ୍ରି। 16ହନ୍ନେନିନ୍ ନିହ୍ମାଏ ବାନେ ନାଲ୍ଖୁଦ୍ ଆଲାର୍ଘି ଆଘ୍ଲି ଏଥ୍ର୍ନାଦ୍ ଏସ୍କେ କା ଆବ୍ଡ଼ାର୍ ନିହ୍ମାଏ ବାନେ ନାଲ୍ଖୁନ୍ ଏରିକିରି ନିହ୍ମାଏ ସରଗ୍ତା ବାଙ୍ଗ୍ସ୍କି ସ୍ତୁତି ମାହିମା କାମର୍।
ନିୟମ୍ଘି ବାରେନୁ ଶିକ୍ଷା
17“ଇବନ୍ ଆମା ସୋଚା କା, ଏନ୍ ନିୟମ୍ ଚାହେ ନାବୀଜାମାର୍ଘି ପାବିତାର୍ ଶାସ୍ତ୍ରବନ୍ ନାଶ୍ କାମାଗେ ବାର୍ଚ୍କାଦାନ୍, ଆବ୍ଡ଼ାନ୍ ନାଶ୍ କାମାଗେ ମାଲ୍ଲା, ଲେକିନ୍ ପୁରା କାମାଗେ ବାର୍ଚ୍କାଦାନ୍।” 18ଏନ୍ଦେର୍ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା, ଯେତ୍କତକ୍ ଆକାଶ୍ ଆରୁ ଧାନ୍ତାରୀ ରଦ୍, ହତ୍କତକ୍ ପାର୍ମେଶ୍ୱାର୍ସ୍କି ଜାମା ନିୟମ୍ଦ୍ହି ରଦ୍ ଆଦ୍ କାଟେହି ମା ବାଦ୍ଲାରିଦ୍, ପାର୍ମେଶ୍ୱାର୍ସ୍କି ନିୟମ୍ ଦ୍ୱାର୍ନୁ ଆସ୍ ଏକାନ୍ କାମା ବେଦ୍ଦାଲ୍ଦାସ୍ ଆବନ୍ ପାର୍ମେଶ୍ୱାର୍ସ୍ ପୁରା କାମସ୍, ହତ୍କତକ୍ ପାର୍ମେଶ୍ୱାର୍ସ୍କି ନିୟମ୍ଦ୍ ରଦ୍। 19ହୁଦ୍ଘିଲାଗାନ୍ ନେଦିନ୍ ପାର୍ମେଶ୍ୱାର୍ସ୍କି ହୁକୁମ୍ସ୍ତି ଛୋଟେନ୍ତି ଛୋଟେ ହୁକୁମ୍ବନ୍ ହି ତୋଡ଼ର୍ ଆରୁ ହନ୍ନେନ୍ ଆଲାରିନ୍ ଶିଖାବର୍, ଆବ୍ଡ଼ାର୍ ସରଗ୍ ରାଜୀନୁ ଜାମାର୍ଘିନ୍ତି ଛୋଟେ ବୁଲି ତେଙ୍ଗାକର୍; ଲେକିନ୍ ନେଦ୍ ଆ ହୁକୁମ୍ବନ୍ ମାନର୍ ଆରୁ ଆଲାରିନ୍ ଆବନ୍ ଶିଖାବର୍, ଆବ୍ଡ଼ାର୍ ସରଗ୍ ରାଜୀନୁ ବାଡ଼୍କା ବୁଲି ତେଙ୍ଗାକର୍। 20ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ କା, ଯଦି ନିହ୍ମାଏ ଧାର୍ମିକ୍ତା ପଣ୍ତିତ୍ ଆରୁ ଫାରିସୀ ଜାମାର୍ଘି ଧାର୍ମିକ୍ତାନ୍ତି ବାଗ୍ଗେ ମା ମାନଦ୍ତା, ନିମ୍ ସରଗ୍ ରାଜୀନୁ ଏକ୍ଲାହି କରାଗେ ପଲ୍ଲଦାର୍।
ଖୀସାରାନା ଆରୁ ପିଟ୍ଟନା
21“ନିମ୍ ମେନ୍ଚ୍କାଦାର୍ କା, ଆଘ୍ଲି ଯୁଗ୍ତା ଆଲାରିନ୍ ତେଙ୍ଗାକେର୍କିଚା ଆଲାରିନ୍ ଆମା ପିଟା, ଆରୁ ନେଦିନ୍ ଆଲାରିନ୍ ପିଟର୍ ଆବ୍ଡ଼ାର୍ କୋଟ୍ କାଚେରୀନୁ ଦଣ୍ଡ୍ଘି ହକ୍ଦାର୍ ମାନର୍, 22ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ଏକାସ୍ ନିଜର୍ ଭାଇସିନ୍ ଖୀସାରସ୍, ଆସ୍କେ ପାର୍ମେଶ୍ୱାର୍ସ୍ ଦଣ୍ଡ୍ ଚିୟସ୍, ଆରୁ ଏକାସ୍ ନିଜର୍ ଭାଇସିନ୍ ବୋକାବସ୍ ଆସ୍ ପାର୍ମେଶ୍ୱାର୍ସ୍କି ମାହାସାଭାନୁ ଦଣ୍ଡ୍ଘି ଲାଇଗ୍ ମାନସ୍; ଆରୁ ଏକାସ୍ ତେଙ୍ଗସ୍ ‘ଆରେ ମୁରୁଖ୍’ ଆସ୍ ନରକ୍ ଗାଡ୍ଡିନ୍ତା ଚିଚ୍ଚୁନୁ ଦଣ୍ଡ୍ଘି ଲାଇଗ୍ ମାନସ୍।”
23“ହୁଦ୍ଘିଲାଗାନ୍ ଯଦି ନିମ୍ ନିଜର୍ ଭେଁଟ୍ବନ୍ ବେଦୀସାନ୍ ଅନ୍ଦର୍ନା ବାକେନ୍, ଆସାନ୍ ନିହ୍ମାଏ ମନେ ଖାତ୍ରୋ କା ନିହ୍ମା ଭାଇସ୍କି ମନ୍ନୁ ନିହ୍ମା ଲାଗାନ୍ ଏନ୍ଦ୍ରିନ୍ ଖୀସ୍ ରାଇଦ୍, 24ତା ନିହ୍ମା ଭେଁଟ୍ବନ୍ ଆସାନ୍ ବେଦୀଘି ଚାହାନୁ ଆମ୍ବାଚା, ଆରୁ କାଇକିରି ଆଘ୍ଲି ନିହ୍ମା ଭାଇସ୍ ଗାନେ ମେଲ୍ମିଲାପ୍ କାମା ଆନ୍ତିନ୍ ବାରିକିରି ନିଜର୍ ଭେଁଟ୍ବନ୍ ଚାଢ଼ାବା।” 25“ଯେତ୍କବାକେନ୍ ନିମ୍ ନିଜର୍ ବିରୋଧିର୍ଘି ସାଙ୍ଗେ ପାବୁନୁ ରର୍ତା, ଆସ୍ଗାନେ ଚାଁଣେ ମେଲ୍ମିଲାପ୍ କାମା ଏକାସାନ୍ ଏନ୍ନେ ମା ମାନ୍ନାଦ୍ କା ନିହ୍ମା ବିରୋଧିସ୍ ନିମାନ୍ ନ୍ୟାୟ କାମୁର୍ଘି ହେଖ୍ଖାନୁ ସୋଁପଚସ୍, ଆରୁ ନ୍ୟାୟ କାମୁସ୍ ନିମାନ୍ ସିପାହୀଜାମାର୍ଘି ହେଖ୍ଖାନୁ ସୋଁପଚସ୍, ଆରୁ ନିମାନ୍ ଜେହେଲ୍ନୁ ଗୁଡ଼ର୍ଚର୍। 26ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଯେତ୍କତକ୍ ନିମ୍ କାଉଡ଼ି-କାଉଡ଼ି ମା ଛୁଟର୍ ଆତ୍କତକ୍ ଆସ୍ତି ଉର୍ଖା ପଲ୍ଲଦାର୍।”
ବେଭିଚାର୍ଘି ବାରେନୁ ଶିକ୍ଷା
27“ପାର୍ମେଶ୍ୱାର୍ସ୍କି ଇ ହୁକୁମ୍ ନିମ୍ ମେନ୍ଚ୍କାଦାର୍ କା, ‘ବେଭିଚାର୍ ଆମା କାମା।’ 28ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ଏକାସ୍ ଏକିନ୍ ମାଏକିନିଆଁବନ୍ ଖାରାପ୍ ନଜର୍ନୁ ଏରସ୍ତା ଆସ୍ ଆଦ୍ଘିଗାନେ ମନ୍ମନ୍ନୁ ବେଭିଚାର୍ କାମ୍ଚେଇ ଚିଚ୍କାଦାସ୍। 29ଯଦି ନିଙ୍ଘାଏ ତିନା ହାନ୍ନୁଦ୍ ନିଙ୍ଘା ପାପ୍ଘି କାରଣ୍ ମାନଦ୍ତା, ଆବନ୍ ଅଥ୍ରା ଆରୁ ଖେବ୍ଡ଼ାଚା; ଏନ୍ଦେର୍ଗେକା ନିଙ୍ଘା ପୁରା ମେଦୁବନ୍ ନରକ୍ନୁ ଖେବ୍ଡ଼ାନ୍ତି ନିଙ୍ଗାଗେ ଇଦ୍ ବାନେ ମାନଦ୍ନେ କା ନିଙ୍ଘା ମେଦୁନ୍ତି ଅଣ୍ଟା ଅଙ୍ଗବଦ୍ ବର୍ବାଦ୍ ମାନକୋ। 30ଯଦି ନିଙ୍ଘାଏ ତିନା ହେଖ୍ଖାଦ୍ ନିଙ୍ଘାଲାଗାନ୍ ପାପ୍ଘି କାରଣ୍ ମାନଦ୍ତା, ଆବନ୍ ଛପିକିରି ଖେବ୍ଡ଼ାଚିୟା; ଏନ୍ଦେର୍ଗେକା ନିଙ୍ଘା ପୁରା ମେଦୁବନ୍ ନରକ୍ନୁ ଖେବ୍ଡ଼ାନ୍ତି ନିଙ୍ଘା ମେଦୁନ୍ତା ଅଣ୍ଟା ଅଙ୍ଗବଦ୍ ବର୍ବାଦ୍ ମାନ୍ନାଦ୍ ନିହ୍ମା ଲାଗାନ୍ ବାନେ ମାନଦ୍ନେ।”
ଛାଡ଼୍ପତର୍ଘି ବାରେନୁ ଶିକ୍ଷା
(ମାତିସ୍ ୧୯:୯; ମାର୍କୁସ୍ ୧୦:୧୧,୧୨; ଲୁକାସ୍ ୧୬:୧୮)
31“ଏନ୍ନେହି ତେଙ୍କାରାଇ କା, ଏକାସ୍ ନିଜର୍ ମାଏକିନିଆଁବନ୍ ଆମ୍ବାଚାଗେ ବେଦ୍ଦସ୍ ତା ଆସ୍ ଆବନ୍ ଛାଡ଼୍ପତର୍ ଚିନାସ୍। 32ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ଏକାସ୍ ନିଜର୍ ମାଏକିନିଆଁନ୍ ବେଭିଚାର୍ବନ୍ ଆମ୍ବିକିରି ଆରୁ ନାନ୍ନା କାରଣ୍ତି ଛାଡ଼୍ପତର୍ ଚିଦାସ୍ ତା, ଆସ୍ ଆବନ୍ ବେଭିଚାର୍ କାମ୍ତାଦାସ୍; ଆରୁ ଏକାସ୍ ଛାଡ଼୍ପତର୍ ଚିଚ୍କା ମାଏକିନିଆଁବନ୍ ବେଞ୍ଜର୍ଦାସ୍ ତା ଆସ୍ ବେଭିଚାର୍ କାମ୍ଦାସ୍।”
କସମ୍ ମହଁନାଘି ବାରେନୁ ଶିକ୍ଷା
33“ନିମ୍ ଆରୁହି ମେନ୍ଚ୍କାଦାର୍ କା ଆଘ୍ଲି ଯୁଗ୍ତା ଆଲାରିନ୍ ତେଙ୍ଗାକେର୍କିଚା ନିମ୍ ‘ଝୁଟ୍ଟୁ କସମ୍ ଆମା ମହାଁ, ଲେକିନ୍ ପ୍ରାଭୁସ୍କି ଲାଗାନ୍ ନିଜର୍ କସମ୍ବନ୍ ପୁରା କାମ୍କେ।’ 34ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ଏକ୍ଲାହି କସମ୍ ଆମ୍କେ ମହାଁ; ସରଗ୍ଘି କସମ୍ ଆମା ମହାଁ ଏନ୍ଦେର୍ଗେକା ଆଦ୍ ପାର୍ମେଶ୍ଵାର୍ସ୍କି ରାଜ୍ଗାଦୀଦ୍; 35ଆରୁ ଦୁନିଆଁଘି କସମ୍ ଆମା ମହାଁ, ଏନ୍ଦେର୍ଗେକା ଆଦ୍ ପାର୍ମେଶ୍ଵାର୍ସ୍କି ହେଡ୍ଡୁ ଉଇନାଘି ଆଡ୍ଡାଦ୍; ଯେରୁଶାଲେମ୍ଘି କସମ୍ ଆମା ମହାଁ ଏନ୍ଦେର୍ଗେକା ଆଦ୍ ପାର୍ମେଶ୍ୱାର୍ସ୍ ଏକାସ୍ କା ମାହାରାଜାସ୍ ଆସ୍କି ସହର୍ଦ୍। 36ନିଜର୍ କୁକ୍କୁଘି କସମ୍ ଆମା ମହାଁ ଏନ୍ଦେର୍ଗେକା ନିମ୍ କୁକ୍କୁନ୍ ତା ଅଣ୍ଟାହି ଚୁଟ୍ଟିବନ୍ ଧୋବ୍, ଚାହେ ମହଁରୋ କାମା ପଲ୍ଲଦାରିନ୍। 37ହୁଦ୍ଘିଲାଗାନ୍ ଏନ୍ଦେର୍ହି କସମ୍ ଆମା ମହାଁ ଯଦି ନେଦିନ୍ ନିମାନ୍ ଏନ୍ଦ୍ରିନ୍ ମେନର୍ ଆରୁ ନିହ୍ମା ଯାବାବ୍ ହଁ ମାନଦ୍ନେ ତା ନିମ୍ ଖାଲି ହଁନିନ୍ ତେଙ୍କେ ଆରୁ ଯଦି ନିହ୍ମା ଯାବାବ୍ ମାଲ୍ଲା ମାନଦ୍ନେ ତା ନିମ୍ ଖାଲି ମାଲ୍ଲାନିନ୍ ତେଙ୍କେ; ଏନ୍ଦେର୍ଗେକା ଇଦ୍ଘିନ୍ତି ବାଗ୍ଗେ ମାନିତା ଆଦ୍ ଶାଏତାନ୍ତି ମାନିଦ୍।”
ନେଖାହି ବାଦ୍ଲା ଆମ୍କେ ହୁଆ
(ଲୁକାସ୍ ୬:୨୯,୩୦)
38“ନିମ୍ ମେନ୍ଚ୍କାଦାର୍ କା ତେଙ୍ଗାକେର୍କିଚା, ‘ହାନ୍ନୁଘି ବାଦ୍ଲା ହାନ୍ନୁ ଆରୁ ପାଲ୍ଲୁଘି ବାଦ୍ଲା ପାଲ୍ଲୁ।’ 39ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ବଦ୍ମାସ୍ରିନ୍ ଆମା ରୋକା; ଆରୁ ନେଦିନ୍ ନିହ୍ମାଏ ତିନା ଗାଲ୍ଲେନ୍ ଚାପ୍ଡ଼ର୍ତା ନାନ୍ନା ଗାଲ୍ଲେନ୍ହି ଏଦାଚା। 40ଆରୁ ଯଦି ନେଦିନ୍ ନିହ୍ମାଗାନେ ନ୍ୟାୟଘି ଆଡ୍ଡାନୁ ନ୍ୟାୟ କାମିକିରି ନିହ୍ମା ମିର୍ଜୀବନ୍ ହୁଆଗେ ବେଦ୍ଦନାଏ ତା, ନିହ୍ମା ଚାଦର୍ବନ୍ହି ଚିଆଲାଗା। 41ଆରୁ ଯଦି ନେଦିନ୍ ନିଙ୍ଗାନ୍ ଏକ୍ କିଲୋମିଟର୍ କାଲାଗେ ତେଙ୍ଗସ୍ ତା, ନିନ୍ ଆସ୍ଗାନେ ଦୁଇ କିଲୋମିଟର୍ କାଲା। 42ଆରୁ ଏକାସ୍ ନିଙ୍ଘାସ୍ତି ନିଦାସ୍, ଆସ୍କେ ଚିଆ; ଆରୁ ଏକାସ୍ ନିଙ୍ଘାସ୍ତି ଉଧାର୍ ହୁଆଗେ ବେଦ୍ଦଦାସ୍, ଆସିନ୍ ମାନା ଆମା କାମା।”
ବିରୋଧିରିନ୍ ବାନେ ହାଖ୍ଖା
(ଲୁକାସ୍ ୬:୨୭,୨୮,୩୨-୩୬)
43“ନିମ୍ ମେନ୍ଚ୍କାଦାର୍, ଆରୁ ତେଙ୍ଗାକେର୍କିଚା, ‘ନିଜର୍ ପାଡ଼ୋଶୀରିନ୍ ବାନେ ହାଖ୍ଖା, ଆରୁ ନିଜର୍ ବିରୋଧିରିନ୍ ହାଁଣା ତୁପ୍ଫା।’ 44ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ନିଜର୍ ବିରୋଧିରିନ୍ ବାନେ ହାଖ୍ଖା ଆରୁ ନେଦ୍ ନିମାନ୍ ସାଧ୍ନାଏ ଆବ୍ଡ଼ାର୍ଗେ ବିନ୍ତି କାମା, 45ଏସ୍କେ କା ନିମ୍ ନିହ୍ମା ସରଗ୍ତା ବାଙ୍ଗ୍ସ୍କି ହାଦ୍ଦୁବଚ୍ଚ ମାନର୍କର୍, ଏନ୍ଦେର୍ଗେକା ଆସ୍ ଖାରାପ୍ ଆରୁ ବାନେ ଯୋଡ଼େର୍ଘି ଲାଗାନ୍ ତାଙ୍ଘାଏ ବିଡ଼ି ଆର୍ଗ୍ତାଦାସ୍, ଧାର୍ମିକ୍ ଆରୁ ଅଧର୍ମିୟାଁ ଦୁହି ଲୋକ୍ର୍ଘି ମିଆଁ ଚେପୁ ଚିଦାସ୍। 46ଆରୁ ନେଦ୍ ନିମାନ୍ ବାନେ ହାଖ୍ଖନାଏ ଆବ୍ଡ଼ାରିନ୍ ଖାଲି ବାନେ ହାଖ୍ଖର୍, ହାଲେ ଏନ୍ଦେର୍ ଫଲ୍ ହାଖ୍ଖର୍? ମାଲ୍ଗୁଜାରୀ ଉକ୍ରୁ ଆଲାର୍ କାଁଏ ଏନ୍ନେ ମା କାମ୍ନାଏ?”
47“ଯଦି ନିମ୍ ଖାଲି ନିହ୍ମା ଭାଇଜାମାରିନ୍ ଯୋହାର୍ କାମ୍ଦାର୍ ତା, ନିମ୍ ଏନ୍ଦେର୍ ବାଡ଼୍କା ନାଲ୍ଖୁ କାମ୍ଦାର୍? ଦୁସ୍ରା ଜାତିୟାର୍ହି କାଁଏ ଏନ୍ନେ ମା କାମ୍ନାଏ? 48ହୁଦ୍ଘିଲାଗାନ୍ ନିହ୍ମାଏ ସରଗ୍ତା ବାଙ୍ଗ୍ସ୍ ଏସ୍କେ ସିଦ୍ଧ୍ ରାଦାସ୍, ଆନ୍ନେ ନିମ୍ହି ସିଦ୍ଧ୍ ରା।”
Одоогоор Сонгогдсон:
ମାତିସ୍ 5: xis
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© (Active) Wycliffe Bible Translators, Inc. All rights reserved.