Matyo 3

Eyɔɔ Andɛʼndim ndeere aghɛʼnji

(Mak 1:1-8; Luk 3:1-18; Eyɔ 1:19-28)

1Efwɔ enji byɛ, Eyɔɔ Andɛʼndim zeʼe efwɔ eguńked, abɛɛ abɛ Judeya, è klàda sa sɛ̀ɛrɛ̀ ega Ngwe. 2Engɔ à na sɛ̀ɛrɛ̀ kpe, “Mbɔn saara abwa bɔɔbɔɔ ndzɔn, è bɛ̀rɛ ene Ngwe mbɔʼnga ebwa m̀fɔ̀ ekere a shi mbín.” 3Eyɔɔ à ne egho wɛ Azaya Àmɛnɛkɔn Ngwe à ma gà mbɔʼ engɔ kpe,

“Etsoʼ deʼ wa zeʼe efwɔ akwânked ma gà kpe,

‘Mbɔn ndeere aghɛʼ ebe Masakɛ,

Mbɔn ndeere ǹjì me tama.’ ”

4Â ne ndèere ǹdiri Eyɔɔ ene nyɔrɔ m̀pwɔ̀ eguńked, engɔ ma koro ekwo gôb nyɛm etiri mɔ, ende ngɔ mwɔ ǹglibi mane abliʼi. 5Bɔ à zéʼ ebe engɔ nyɛ̀rɛ̀ zèʼe abɛ Jerusalɛm, efwɔ abɛɛ abɛ Judeya mane akwâ gimkpaʼ eba eji Joodan. 6Angɔ à bɛrɛ abwa bɔɔbɔɔ àmɔ̀, éngɛ Eyɔɔ ndɛʼ ndim ebe angɔ eji Joodan. 7Aŋu Eyɔɔ à zɔ́ bɔ Farisii akɛkɛ mane bɔ Sadusii e ma zeʼe ebe engɔ é nu ndim ngɛ, engɔ ga ebe angɔ kpe, “Mbɔn jwere bɔɔbɔɔ tsɔnɔ, awɛ tɛ̀ʼɛ angɔn kpe mbɔn pɛ anji tsɛrɛ esɛʼ Ngwe yɛ a ma ngo zeʼ ngɛ! 8Mbɔn kla enta é tee kpe mbɔn shi saara abwa bɔɔbɔɔ ndzɔn. 9Mbɔn ke zhuŋu kpe mbɔn ba ngo pɛ anji tsɛrɛ esɛʼ Ngwe mbɔʼnga mbɔn mwɔ bwɔ ekla Abraham bo. Shi mmɛ ga éŋwaʼa endɔn kpe, Ngwe ye né nu atye zɔnɔ ndèerè a shi bwɔ Abraham! 10Mbɔn nɛɛ kpe, edzaa a shi enji egha azɔd, éngɛ azɔd yɛ a ne ma kla enta ǹchwɔ̀ bo ngɛ, e ba ngo gbɛ̀, è beʼ ndwa edzɔwu. 11Mmɛ na ndɛ̀ʼ endɔn enjitsɔ me ndim, é tee kpe mbɔn shi kobo eleabwa bɔɔbɔɔ ndzɔn, bɛʼngɛ gho wɛ ma ngo zeʼ achim ndza ngɛ wa ngo ma ndɛʼ ndim mwɔ ene azhwɛɛrɛ pɛ mane éwu. Engɔ we fɔɔ angu. Mmɛ de ke koʼro é beʼ ebla ngɔ bo. 12Engɔ we bere akye ebwo mɔ é kùurù samara chidi abwaʼ eghob. Engɔ wa ngo shunu samara tɛʼ efwɔ aba mɔ, bɛʼngɛ engɔ wa ngo twɔ̀n eghob bɔnɔ efwɔ éwu wɛ e ne ma nyimi bo ngɛ.”

Yeso nu ndim

(Mak 1:9-11; Luk 3:21-22)

13Efwɔ antiri endzobo yɛ, Yeso wu nyɛ̀rɛ̀ zèʼe a Galilii, ngɔɔ ebe Eyɔɔ eba eji Joodan kpe engɔ ndɛʼ ndim ende. 14Bɛʼngɛ, Eyɔɔ kpe mbè tɔn gɛ̀rɛ̀ ga kpe, “Na ngwo a ye ndɛ̀ʼ ndim ena, ngwo wu zeʼe kpe mmɛ ndɛʼ ndim engɛ!” 15Bɛʼngɛ Yeso gíì kpe, “Shi e mwɔ éngɛ enjitsɔ. Ene aghɛʼ zɔnɔ ntsɔ ba ngo fwɛʼ aŋu Ngwe ma ke ngɛ.” Éngɛ Eyɔɔ bɛrɛ gɛ̀rɛ̀ ndɛʼ ndim ebe engɔ. 16Aŋu Yeso à shi nu ndim sa gli efwɔ eji ngɛ, ezob fuʼ, engɔ zɔ Azhwɛɛrɛ Ngwe a ma kla zeʼe a chwâ ne ḿblɔ̂m nɔ, è bwɛn bara ato ngɔ. 17Éngɛ, sa klikɔ̀ʼ, ega deʼ zeʼe ezob kpe, “Ewùnɔ na ŋwɔ etaa ngu wɛ mmɛ me gɛnɛ angu ene engɔ ghɛʼ ngɛ.”

Одоогоор Сонгогдсон:

Matyo 3: nbt

Тодруулга

Хуваалцах

Хувилах