متّی 1
1
یِسُوع مسِیح دا شجرہ
(رَلدا مِلدا حوالہ: لُوقا 3:23-38)
1یِسُوع مسِیح جیرھا داؤد اَتے ابرہام دی لَڑی اِچوں ہا اُوندا شجرہ اِیویں ہے۔
2ابرہام، اِضحاق دا پیِوُ ہا اَتے اِضحاق، یعقُوب دا پیِوُ ہا اَتے یعقُوب، یہُوداہ اَتے اُوندے بِھراویں دا پیِوُ ہا۔ 3اَتے یہُوداہ، فارص اَتے زارح دا پیِوُ ہا جیرھے تمر کنُوں ڄائے، اَتے فارص، حصرون دا پیِوُ ہا اَتے حصرون، رام دا پیِوُ ہا۔ 4اَتے رام، عمّینداب دا پیِوُ ہا اَتے عمّینداب، نحسون دا پیِوُ ہا اَتے نحسون، سلمون دا پیِوُ ہا۔ 5اَتے سلمون، بوعز دا پیِوُ ہا جیرھا راحب کنُوں ڄایا اَتے بوعز، عوبید دا پیِوُ ہا جیرھا رُوت کنُوں ڄایا اَتے عوبید، یَسی دا پیِوُ ہا۔ 6اَتے یَسی، داؤد بادشاہ دا پیِوُ ہا۔
اَتے داؤد، سُلیمان دا پیِوُ ہا جَیندی ماء پہلے اُورِیاہ دی ذال ہَئی۔ 7اَتے سُلیمان، رحُبعام دا پیِوُ ہا اَتے رحُبعام، اَبِیّاہ دا پیِوُ ہا اَتے اَبِیّاہ، آسا دا پیِوُ ہا۔ 8اَتے آسا، یہوسفط دا پیِوُ ہا اَتے یہوسفط، یُورام دا پیِوُ ہا اَتے یُورام، عُزِّیاہ دا پیِوُ ہا۔ 9اَتے عُزِّیاہ، یُوتام دا پیِوُ ہا اَتے یُوتام، آخز دا پیِوُ ہا اَتے آخز، حِزقیاہ دا پیِوُ ہا۔ 10اَتے حِزقیاہ، مُنسّی دا پیِوُ ہا اَتے مُنسّی، امُوس #1:10 امُوس کُجھ تَرجمیں اِچ ”امُون“ ہے کیوں جو کُجھ پُراݨے یُونانی نُسخے امُون ݙسیندِن۔دا پیِوُ اَتے امُوس، یُوسیاہ دا پیِوُ ہا۔ 11اَتے یُوسیاہ، یکونیاہ اَتے اُوندے بِھراویں دا پیِوُ ہا جیرھے اُوں ویلے ڄائے جݙّاں بابلی قوم اِسرائیلی لوکیں کُوں قیدی بݨا کرائیں اپݨے مُلک اِچ گھِن ڳئی۔
12اَتے یکونیاہ، سیالتیایل دا پیِوُ ہا اَتے سیالتیایل، زرُببابل دا پیِوُ ہا جیرھے بابلی قوم دی اِیں قید دے دوران ڄائے۔ 13اَتے زرُببابل، اَبِیہُود دا پیِوُ ہا اَتے اَبِیہُود، اِلیاقِیم دا پیِوُ ہا اَتے اِلیاقِیم، عازور دا پیِوُ ہا۔ 14اَتے عازور، صدوق دا پیِوُ ہا اَتے صدوق، اخیم دا پیِوُ ہا اَتے اخیم، الِیہُود دا پیِوُ ہا۔ 15اَتے الِیہُود، الیعزر دا پیِوُ ہا اَتے الیعزر، متّان دا پیِوُ ہا اَتے متّان، یعقُوب دا پیِوُ ہا۔ 16اَتے یعقُوب، یُوسف دا پیِوُ ہا اَتے یُوسف اُوں مریم دا پَے ہا جَیندے اِچوں یِسُوع ڄایا جَینکُوں مسِیح اَہدِن۔
17اِیویں ابرہام کنُوں داؤد تَئیِں چَوݙَاں پِیڑھیاں ہَن اَتے داؤد کنُوں بابلی قوم دی قید اِچ وَنڄن تَئیِں چَوݙَاں پِیڑھیاں ہَن اَتے اُوں قید کنُوں مسِیح تَئیِں چَوݙَاں پِیڑھیاں ہَن۔
یِسُوع مسِیح دا ڄاوَݨ
(رَلدا مِلدا حوالہ: لُوقا 2:1-7)
18ہُݨ یِسُوع مسِیح دا ڄاوَݨ اِیں تھِیا جَیں ویلے اُوندی ماء مریم دی منگݨی یُوسف نال تھئی پئی ہَئی تاں اُنہیں دے پرنیڄݨ کنُوں پہلے او خُدا دے پاکرُوح دی قُدرت کنُوں پیٹ نال تھی ڳئی۔ 19اِیں کیتے اُوندے منگیندے یُوسف جیرھا نیک ہا اَتے اُونکُوں بَدنام کرَݨ نہ چاہندا ہا، اپݨے دِل اِچ منگݨی تَروڑ ݙیوَݨ دا فیصلہ کیتا۔ 20او اِیں بارے سوچیندا پِیا ہا جو خُداوند دا فرِشتہ اُوندے خاب اِچ آیا اَتے آکھیا، ”اَے یُوسف! تُوں جیرھا داؤد دی نسل اِچوں ہَئیِں مریم نال پرنیڄݨ کنُوں نہ ݙَر کیوں جو اُوندا حمل خُدا دے پاکرُوح کنُوں ہے۔ 21اُونکُوں پُتر ڄَؤسی اَتے تُوں اُوندا ناں یِسُوع رکھیں کیوں جو او اپݨے لوکیں کُوں اُنہیں دے گُناہیں کنُوں چھُٹکارا ݙیسی۔“
22ایہ سب کُجھ اِیں کیتے تھئے جو خُداوند دی او ڳالھ پوری تِھیوے جیرھی اُوں اپݨے نبی دی راہِیں آکھی ہَئی،
23”ݙیکھو ہِک کُواری پیٹ نال تھیسی اَتے اُونکُوں پُتر ڄَؤسی اَتے اُوندا ناں عِمانُوایل رکھیسِن“ جَیندا مطلب ہے،خُدا ساݙے نال۔
24وَل یُوسف نیندر کنُوں اُٹھی پِیا اَتے اُونویں کیتا جیویں خُداوند دے فرِشتے حُکم ݙِتا ہا اَتے مریم کُوں پَرنیڄ کرائیں گھِن آیا۔ 25پَر جے تَئیِں اُونکُوں پُتر نہ ڄایا اُوندے نال نہ سُتا۔ اَتے جݙّاں او ڄایا تاں یُوسف اُوندا ناں یِسُوع رکھیا۔
Одоогоор Сонгогдсон:
متّی 1: سرائیکی
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY