Matayo 7

Yesu ákangirisa era luulu se'kuchinjibusa ebanji

(Luk 6:37-38, 41-42)

1«Muténdaa mwáchinjibusa ebanji, Ongo angesha kubachinjibusa nenyu. 2Bushi kwa mwénde mwáchinjibusa ebanji, ku Ongo nai akánabachinjibusa. Kanji kwa mwénde mwárengera ebanji, ku Ongo nai akánabarengera.

3«Chi chátuma wálola kwa kaaha ke'muchi ka kàli mwa liho lya mulikenyu, si ùtalaire kwa muchi ola ulí mwa lyao? 4Nesi kute ùngabura mulikenyu mbu: ‹Íraa nyikúkule ekachi ka kalí mwa liho lyao, no'ku mwa lyao weke muchiri muchi?› 5E umutebanyi! Ukúlaa tanga emuchi ola ulí mwa liho lyao, eri walóla kubuya kwa ùngakula ekachi ka kàli mwa lya mulikenyu!

6«Muténdaa mwêresa engunda ebindu bibuya-buya singesha kubabindukira na sábaberenganga. Kanji muténdaa mwáuma engulube emikofu yenyu ye'chichiro chinene, singesha kulibatanga'i.»

Ekwema ne'kwêresibwa

(Luk 11:9-13)

7«Mundaa mwéma, eri mwèresibwa. Mundaa mwáhonda, eri mwàbona. Mundaa mwákongota, eri babáboorera elwisi. 8Bushi chira mundu ola wéma iwénde wêresibwa, no'la wáhonda iwénde wábona, no'la wákongota i'bénde báboorera elwisi. 9Nde mu mwabo ola ùngeresa emwana wai ekoi mango ámwěma emukati? 10Nesi àmwêrese enjoka mango ámwěma efi? 11Chiro àngaba mbu mutúla bandu babi, si mutúla mwìshi kwêresa ebana benyu ebindu bya bìkomire. Rero Eho wenyu ola ulí kwa nguba, kute àngafundwa kwêresa ba bénde bámwěma ebindu bya bikomire busese?

12«Byoshi bya mwáhonda ebanji bandu bàbairiraa, nenyu bi mundaa mwánabaírira. Bushi ebyera bye'Mwaso wa Musa ne'bitabo bye'barebi* bitúla bìtechire.»

Enyisi ebiri

(Luk 13:24)

13«Mundaa mwêngirira mwa lwisi lwa lùfundeerere. Bushi elwisi lwa lwèrekere mwa muero lutúla lùneneire, ne'njira ye'kuya'mo ìtatusa byângiko. Ne'i njira, ebandu ba bénjire bárenga'mo, bàli banene. 14Si elwisi lwa lwèrekere mwa kalamo lweke, lutúla lùfundeerere. Ne'njira ye'kuya'mo itúsa byângiko. Ne'i njira, ebandu ba bénjire bárenga'mo, bàli baeke.»

Ebarebi be'bisha

(Luk 6:43-44)

15«Mundaa mwáchilanga kwa barebi* be'bisha. Bushi bénde bábaikira bàchiirire nga mbuli, si mwa michima yabo bàli nga nyishibwabwa sa sìkaliire busese. 16Abu barebi, mungénde mwábamenyerera kurengera emyanya yabo. Bushi etutenge-tenge tùteka bifuma bya misabibu* nesi bya tini. 17Kubinali, chira muchi mubuya, énde êka bifuma bibuya. Na chira muchi mubi, énde êka bifuma bibi. 18Emuchi mubuya àtangeka bifuma bibi. Ne'muchi mubi, àtangěka bifuma bibuya. 19Chira muchi ola ùteka bifuma bibuya, énde ákonjibwa na kuumwa mwa muliro. 20Bushi no'ku, abu barebi be'bisha, mungénde mwábamenyerera kurengera emyanya yabo.»

Ebandu ba batákêngirire mwa Bwami bo'kwa nguba

(Luk 13:25-27)

21«Atá chira mundu ola wénde wányibura mbu: ‹Enawetu, Enawetu!› i'ùkêngirira mwa Bwami bo'kwa nguba, si ola wénde wáira ekuhonda kwa Tata ola ulí kwanguba. 22Mango elusuku lwe'buchinjibusi lukáika, bandu banene bakányibura mbu: ‹Enawetu, Enawetu! Si kwe'sina lyao ku twéndee twáreba, na kwe'ri sina ku twéndee twâmbula ebihwasi na kuira bisomerano binene!› 23Chasinda, nyikábabura mbu: ‹Mwabo, ndàfuraa kubamenya chiro na hicha! Muténgaa mwa meho manyi, mu bakosi be'mabi.›»

Emuanyi we'báimbi babiri

(Luk 6:47-49)

24«Rero chira mundu ola wômva kwene myasi yanyi na kuitunda, àngahuhanyisibwa na mundu wa bwenge, ola wáimbaa enyumba yai kwe'koi. 25Emvula yera kutowa, enyishi sera kwêhula, ne'chusi chìkaliire chera kuchihuta kwe'i nyumba. Si chiro bacha, itákundukaa, bushi yábaa isímikire kwe'koi.

26«Si chira mundu ola wòmvire kwe'i myasi yanyi, busira kuitunda, yeke ahúhanyisibwe ne'mbuta, era yáimbaa enyumba yai kwa mishee. 27Emvula yera kutowa, enyishi sera kwêhula, ne'chusi chìkalìire chera kuchihuta ku'i. Unao-unao era nyumba, kuna kukunduka na yáhandukala.»

Ebuashi bwa Yesu

(Mar 1:22; Luk 4:32)

28Mango Yesu ábaa era àmalaa kukangirisa ebandu ei myasi, bera kusanwa busese. 29Básanwaa, bushi yeke aténdee ábakangirisa nge'bakangirisi babo be'Mwaso*, si éndee ábakangirisa nga mundu ola wète buashi.

Одоогоор Сонгогдсон:

Matayo 7: tbt

Тодруулга

Хуваалцах

Хувилах

Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү

Echilaano Chiyayaya-ийн талаар илүү ихийг мэдэж авах