LUK 23
23
Pilat Miki Jisu Bedarükhi
(Mt 27.1-2,11-14; Mk 15.1-5; Jhn 18.28-38)
1Judüki boto alala tsahmusu tüsho Pilat miki api bedarü. 2Tüsho arünü api chikhide athapü tankih, “Ha buhnü trükshih bemüchihkhi isanü ngüdo, tüsho api ju Khrista, kiulongthsüpuh de thade Kaesar kilim ruk jihpü tukloshihdo.” 3Jumonü Pilatnü api ki keokhi, “Nü Jihudarü kiulongthsüpuh a de?” Tüsho apinü anihbuh ki alo, “Nünü athakhi nangde ah.” 4Judüki Pilatnü amükeam putungrübo tüsho boto ki tha, “Inü ha mihtsürü kheak amülim tümü müyimkhit.” 5Tüshe arünü alü mulong zhipzhipde tha, “Apinü Judea alala, Galilee chingnü ha dangpung khiungde thsangyude mihtsürübo thurumusuchoh.”
Herod kilim Jisu Yüshihkhi
6Küyimki Pilatnü ha sokhea, mihtsürü ju Galileerü a shi de keokhi. 7Tüsho api ju Herod bukkhüp ah de apinü mükheah akede, anihbuhnü api ju, ju kim ching Jirusalem ching labuh Herod kilim yüshih. 8Küyimki Herodnü Jisu ngükhea, apinü khide asüh; tümüde kim ashang chingnü apinü anihbuh ngüpü künde la, tümütüsho api dünkheak ahihdo so, tüsho apinü khinthiyinbe rhimokhi ngüpü mükin thsü. 9Judüki apinü anihbuh ki thiyu ahihdo keokhi, tüshe api ki tümü malojih. 10Tüsho amükeam putungrübo le yakzan thsangyurübonü zhipbah api khide chikhi. 11Judüki Herod tüsho api bonungrübonü api luhmünede mükhemükim thsü; tüsho api kheak khimmih atsü yihkihjihbah Pilat kilim yüloshih. 12Ju nimungnü Pilat le Herod büne müyamrü kam, tümüde akhuhlima ane thiriri lakheah.
Jisu Sheshihkhi
(Mt 27.15-26; Mk 15.6-15; Jhn 18.39—19.16)
13Küyimki Pilatnü amükeam putungrübo, yakzanshuhrübo, tüsho mihtsürübo rukhüh jimukhungkheanü, 14arü ki tha, “Nüsanü ha buhnü mihtsürübo bemüchihchoh de I kilim bedarü. Tüsho nüsa mikinü api ajamakheahbah nüsanü api chikhikhi dünkheak amülim ha mihtsürü kheak inü müyimkhit; 15Herodnü she jude müthsü, tümüde inü nüsa api kilim yüloshih; tüshe ashepü thülünde apinü rhimoa müla. 16Jumonü inü api rhapbah adükhebah”– 17(tümüde thünio ching apinü arü kilim khülang dükhepü yihnüpü lakheah).
18Tüsho arü alalanü zhide tha, “Ha mihtsürü laksahang, tüsho isa kilim Baraba dükheang”– 19api ju kiuto ching athsümünimkhi tüsho mihkhukmonü rihyam ching zokheah. 20Jumonü Pilatnü Jisu dükhepü mulongde kheaküshe arü ki tha; 21tüshe arünü zhide tha, “Api yümkihang, api yümkihang!” 22Tüsho apinü mahsam kipü arü ki tha, “Tümü thsükhi, apinü amütsü tümü rhimoa la? Inü api kheak ashepü thsüde amütsan tümü müyimkhit. Jumonü inü api rhapbah atsoshihbah.” 23Tüshe arünü thsokihde düsheak achangnü api yümkihpü tha. Tüsho harü mihtsürübo le amükeam putungrübo düsheaknü kukabah. 24Jumonü arünü akheangkhi Pilatnü mülüjih. 25Arünü amushukhi azhih tüsho mihlaksahrü rihyam ching labuh apinü arü kilim dükhe; tüshe apinü Jisu ju arü mulongkhi ching jihabah.
Jisu Yümkihkhi
(Mt 27.32-44; Mk 15.21-32; Jhn 19.17-27)
26Kheakü arünü api bede ayüchoki, lomi chingnü arüde alakhi mihtsürü khülang Serenerü Simon tholo tüsho Jisu dunglim hanbah atsahpü api kheak sangkim yihkihjih. 27Tüsho mihtsürü yimto atonü api dunglim yan tüsho aliberübonü she api thsungkheak tripde tüzho. 28Tüshe Jisunü arü kilim rholobah tha, “Jirusalem liberübo, I thsungkheak dütrip, tüshe nüsa le nüsa tsührübo thsungkheak tripang. 29Tümüde arünü athapü nimungbo arüchoh, ‘Bünkeangberü, khungarü müzüberü, tüsho küyimkishe niuh muduhrü müngühmühi!’ 30#Ami 6.16Judüki arünü müzüngbo ki, ‘Isa kheak keamang!’ tüsho awungbo ki, ‘Isa zhidoang!’ de athapü tankihbah. 31Sangdung phüyakde alachoki harü rhimosho, ju akung lachoki tümü dünjiba?”
32Ju ching athsümünimrü mahne api lung sheshihpü bedarü. 33Tüsho küyimki arübo Kalvari de ajikhi dangpung ching arükhea, ju ching arünü athsümünimrü mahne ju khülang akhah tsülim tüsho püpü ju huzulim thsübah api yümkih. 34Judüki Jisunü tha, “Abuh, arü neak bahjang, tümütüsho arünü tümü rhimochonü mümükheah.” Tüsho arünü azan thsüde api khimmihbo chama lu. 35Tüsho mihtsürübonü kheahde zhip. Tüshe yakzanshuhrübonü she luhmünede tha, “Apinü mührü khümkhitdo; api Thrünpuhnü amokhitkhi Khrista a sho aküdah thsüde khümkhitshang.” 36Tüsho bonungrübonü she api mükhemükimde arübah asan ke duh, 37tüsho tha, “Nü Jihudarü kiulongthsüpuh a sho, nü küdah thsüde khümkhitang.” 38Tüsho api kumung Greek, Latin, tüsho Ibri yunü thrüta zo: Ha jihudarü kiulongthsüpuh.
39Judüki yümkih-a lakhi athsümünimrü lung khülangnü api mükhemükimde tha, “Nü Khrista a sho, nü tüsho ike khümkhitang.” 40Tüshe püpü junü api thürühde alode tha, “Nü rukhüh ashepü ching lah de ngübah, nünü Thrünpuh mütre de? 41Ike a lungkide thsümüchido, tümüde ikenü arhimokhi dün ike thsambah leangkhichoh; tüshe ha mihtsürünü amülim tümü mürhimo.” 42Judüki apinü Jisu ki tha, “Atungpuh, nü kiulongthsü ching nü arüchoki I lümkhitang.” 43Tüsho Jisunü api ki tha, “Atsütsü inü nü ki thachoh, khihni nü I lung asühpung ching labah.”
Jisu Shekhi
(Mt 27.45-56; Mk 15.33-41; Jhn 19.28-30)
44Kheakü 12 king ngüm lakheah, tüsho 3 king khiungde alomi alala ching amiting lakheah. 45Judüki ani mitingde kam, tüsho arüngyam zhindokhim mahne thsüde thorüp. 46Jisunü düsheak achangnü zhide tha, “Abuh, nü khah ching I me zojihchoh.” Tüsho ha thabah api sheak kheamabah. 47Kheakü küyimki bonungrü torünü ju dünjikhi ngükhea, apinü Thrünpuh shijihde tha, “Atsütsü ha thiyuro-lungki mihtsürü thsüa lah!” 48Tüsho ju ching mukhungkhi boto alalanü ju dünjikhi ngübah arü khühbo yüm tüsho alode tso. 49#Lk 8.2,3Tüshe api müyamrü alala Galilee chingnü api dunglim yande arükhi aliberübo jurübo kheahde limshu ching zhip.
Jisu Mi Bahkhi
(Mt 27.57-61; Mk 15.42-47; Jhn 19.38-42)
50Tüsho kheahang, kiuthsübinkiu ching kheyukrü, mihtsürü atsü tüsho thiyuro larü amung Josep lakheah. 51Apinü arü kiuthsübinkiunü pungkhikhi ching mümulungde alakheah. Api ju Jihudarü kiuto Arimathea chingnü ah tüsho api she Thrünpuh kiulongthsü aleangde alakheah. 52Ha mihtsürünü Pilat ki yü tüsho Jisu mi dünkheak keokhi. 53Jushu apinü ju yihkhibah khimthünak chingnü hing tüsho püpü ki she müyapkhi lungnü akiukhi kung ching yapshih. 54Ju nimung ju athsakhampü tüsho Amuni khiungde alakheah. 55Tüsho Galilee chingnü api dunglim arürü aliberübonü api yan, tüsho arünü kiuyuk le api pang yapkhi kheahyuka zo. 56Jushu arünü alode arübah thüneathürabebo tüsho rhümthünea müdangkebo thsakham. Tüsho arünü thiyuzüng yande Amuni sühakhim.
सध्या निवडलेले:
LUK 23: YIMCBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.