SOERA MOZE I. FAZA 4.
FAZA 4.
I. Kaʼino ba Habeli. Soemange andrõ nibeʼera. II Iboenoe Habeli Kaʼino. Fanegoe Lowalangi Kaʼino. III. Ngaʼõtõ Gaʼino. IV. Seti ba Enosi. Bõrõta weʼangarõfi li tõi Lowalangi.
1I. Ba oroedoe niha chõ woʼomonia, ba manabina ba madono, Kaʼino dõi nononia, ba imane: No oesõndra niha, itolo Lowalangi. 2Ba ifoeli moʼono, Habeli dõi, achi Gaʼino. Ba sangoeri biribiri Habeli ba sangahalõ Gaʼino. 3Ba ara maʼifoe, ba ibeʼe zoemange Jehowa Kaʼino boea nowi chõnia. 4Ba ibeʼe gõi Habeli, ono goerifõnia si aʼa, tawõ ibeʼe. Ba omasi Jehowa Habeli ba soemange chõnia; (Heb. 11, 4); 5ba Kaʼino ba soemange andrõ chõnia, ba lõ omasi ia. Ba mofõnoe sibai Gaʼino ba abao mbawania. 6Ba imane Jehowa chõ Gaʼino: Hana wa mofõnoe ndraʼoegõ, ba hana wa abao mbawaoe? 7Tenga si manõ: na satoelõ õlaoe, ba tola õfaõga mbawaoe; ba na tenga satoelõ nilaoemõ, ba no so moroi tooe horõ, itarogõ ndraʼoegõ be iʼisõʼõ; ba jaʼoegõ, ba hondrõgõ ia.
8II. Ba imane Kaʼino chõ nachinia: Taboe ba mbenoea! ba me no laroegi mbenoea, ba maoso Gaʼino chõ nachinia Habeli, iboenoe. (Mat. 23, 35. Joh. I. 3, 12. Joed. a. 11). 9Ba imane Jehowa chõ Gaʼino: Heza so nachioe Habeli? Ba imane: Lõ oeʼila; hadia, samaigimaigi achigoe andrõ ndraʼodo? 10Ba imane: Hadia nilaoemõ? Hiza, moeʼao chõgoe ndro nachioe andrõ moroi ba danõ tooe. (Heb. 12, 24). 11Ba iadaʼe, ba niʼelifi ndraʼoegõ, nifofanõ ba danõ andrõ, si no mamokai bawania, ba wamadoe do nachioe andrõ, moroi ba dangaoe. 12Na monowi ndraʼoegõ ba danõ, ba lõʼõ saʼae ibeʼe chõoe mboeania; si lõ hinaoma ndraʼoegõ ba goeli danõ! 13Ba imane Kaʼino chõ Jehowa: Si tebai oetaha loealoea horõgoe andrõ. 14Õfofanõ ndraʼo maʼṍchõ, moroi ba danõ, ba saminiʼõ jaʼia fõnaoe ndraʼodo ba si lõ hinaoma ba goeli danõ, ba ha niha zi faloecha chõgoe, ba iboenoedo. 15Ba imane chõnia Jehowa: Hiza, mewitoe lalaoe mbalõ ba zamoenoe Kaʼino. Ba ifotandra Gaʼino Jehowa, fa bõi iboenoe si faloecha chõnia. 16Ba mofanõ Gaʼino, iʼerogõ Jehowa; ba danõ Nodi soso ia dania, tánõ ba gatoemboecha loeo, iʼotarai Gedena.
17III. Ba oroedoe Gaʼino chõ woʼomonia, ba manabina ba madono, Chanoki dõi nononia. Ba itaroeʼõ mbanoea ba ibeʼe tõi mbanoea andrõ dõi nononia andrõ, Chanoki. 18Ba ono Chanoki, ba Iradi. Ba ono Giradi ba Mehoejaʼeli, ba ono Mehoejaʼeli, ba Metoezaʼeli, ba ono Metoezaʼeli ba Lameki. 19Ba samodomboea dongania Lameki andrõ, Ada dõi zi samboea ba Sila dõi zi samboea. 20Ba moʼono Gada, Jabalo dõi nononia, toea zi so baosi, sangoeri hadia ia daʼõ. 21Ba achinia Joebalo, toea zolaoe biola ba sigoe. 22Ba moʼono gõi Zila, Toebakaʼino nononia, toea ziamboe daʼõ, ba talifoesõnia alawe, ba Naʼama. 23Ba imane Lameki chõ woʼomonia andrõ si daroea: Jaʼoegõ Ada ba jaʼoegõ Sila, mifondrongondrongo wehedegoe andre! Jaʼami foʼomo Lameki, jaʼaboto ba dõdõmi niw̃aʼõgoe! Oeboenoe niha, balõ zocho andre chõgoe ba ono niha balõ zelezitõ andre. 24Na fitoe winaeta wolaoe balõ Gaʼino, ba fitoe ngafoeloe a fitoe winaeta mbalõ Lameki andre.
25IV. Ba ifoeli oroedoe Gadamo chõ woʼomonia, ba moʼono ia ono matoea, ba ibeʼe tõinia Zeti (Teʼali). [Imane]: Noa sa ibeʼe chõgoe ngaʼõtõ bõʼõ Lowalangi, fangali Habeli andrõ, niboenoe Gaʼino. 26Ba moʼono gõi Zeti andrõ, ba ibeʼe tõi nononia Genosi. Ba me loeo daʼõ, ba labõrõtaigõ weʼangarõfi li dõi Jehowa.
सध्या निवडलेले:
SOERA MOZE I. FAZA 4.: NIA
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.