Matayu 19
19
Yesuŋo Ŋanowekopze Mi Qeliŋongenane Don Rake
1Yesu eŋe don eya korop rawareki qoeki, eŋe Galili kepe qelige more, ari Yuda kepeo Yordan doku wane eri nat paromino arike. 2Ariki, ŋei ŋerep magu suwaine eŋe ŋadino ariu, zomarop yewa ma menaŋ-onge.
3Parisi natne eŋe eŋano liwe-kakei wane sari rakoi, “Ŋenze ra rokop donzeŋo ŋei mane rakok-kaki, ŋanomine qeliŋ-kawe ra, kine eya me eya wane ra, maine qeliŋ-kayake me?”
4Yesuŋo mainge rake, “Ŋine Kaisale wane ekapko don iwa yale pamaike, eya mi dapore det okanmami me? Ramaike, ‘Mokaka qei kino ma wakon ma wakonŋo ŋei so ŋerep orodoŋka ma wakon-otke.’ 5Paki Kaisaleŋo rake, ‘Eya wane ŋei maneŋo naga magaine qeliŋ-otki paki, ŋanominano takot-keyake, pakimo ere koto so sola mo weku okangeik.’ 6Eso na ramaile, ere koso etke mi okane more, weku okangeik, Kaisaleŋo maturaŋ-otkane, ŋeiŋo maine misuk mapok-osikei.”
7Raki Parisi eŋe qesonka rakoi, “Pakimo, Mose eŋe onoka wane ra rokop don ebonge, ŋei mane eŋe ŋanomine qeliŋ-kayakane okane, kibi mane qe maneso esop-kaki ariyake?”
8Rau Yesuŋo edange, “Moseŋo ŋanowekopŋine qeliŋ-ongei wane dere rakoke ŋibonge, yemo yaup ŋinŋine wetŋine zok togogole, daleo kito ŋibongi desikei, eya wane raki paki dere rakoke ŋibonge. Ŋo qei Kaisaleŋo kiyeke more ma wakonge, naso yewao yemo numa iwa yaline mane mi pake. 9Eya wane na ŋidanbe detpi, ŋei mane eŋe ŋanomine sot midaine maine geki, qeliŋ-kaki paki, ŋerep natne ebu-yakeo, eŋe zokit eya kitatmaike, paki ŋei eya eŋe sotkorop okaniyake.”
10Eŋine dokoine edo dere olale rakoi, “Numa yale ŋei mane so ŋanomine erane keruwetno pamaikeo, yemo ŋerep mi mama yaup maine gekene.”
11Rau Yesuŋo edange, “Don iwa ŋerep mi mama yemo ŋei ŋerep korop eŋane mi ramaile, ŋo yemo don iwa dere wetke magekei wane zonom pa ebon maike, edoka weku magekei wane Kaisaleŋo ebonge. 12Ŋei eŋe ŋerep onoka wane mi ebukei, eya wane kine loutne pamaike, ŋei natne eŋe yemo onoka wane yalewa oken gekei wane wakonmami, natne yemo onoka wane ŋei edom ŋerep midaine gekeiwane kitat onmami, so natne ŋerep mi ebumami, yemo onoka wane eŋe qeli gege togon don wane ra more, yemo ŋei yaline eŋane biŋek eya wane eŋe yaup gemami. Mane eŋe iwa maine okaniyakeŋo don iwa dere ma nogan-kayake.”
Yesuŋo Medep Nigatne Mosop Onge
13Ŋei ŋerep natne eŋe medewekopene Yesuŋo metine leweeno more, meŋen-kayakane eŋano ebu-arikoi, ŋo dokoine edo yemo ŋei ŋerep eya rawot-ongoi. 14Yale okanbi, Yesuŋo rake, “Ŋine qeliŋ-onbi medep nigatne eŋe naŋano sariu, so mi kitat-onbi, onoka wane ŋei ŋerep eya medep nigatne yaline, eŋe qeli gege togon eya mo biŋek qe ebonge.”
15Yale raki paki metine leweeno more so, kepe eya qelige maneo arike.
Ŋei Qaluwit Aboŋine Suwaine Gege Togon Wane Numa Ziyaŋkake
16Naso maneo ŋei maneŋo Yesu wano sari olale rake, “Kito ŋebo ŋebon, nolatnom detpe, na onokaka maine mane okanbe paki, gege togon maratkakale?”
17Raki Yesuŋo olale rake, “Ge kine kine mainane qeson-nanmaine? Maine welaine eŋe weku gemaike, ge gege togon kotino waketkenane okaneso, yemo Kaisale wane ra rokop don eya tewekkene.”
18Eŋe mainge olale rake, “Ra rokop don diyawa?”
Yesuŋo olale rake, “Ge ŋei mi qem seukeyake, ŋao ŋanom ŋire mi qeliŋ-nagukeik, ge kobu mi makene, ge isi mi rakene. 19Ge naga magaŋone ewe etne kitokene, so ge geŋonane ganmaike, yalewaka ŋei kimakopŋone eŋane ganiyake.”
20Ŋei qaluwit eŋe mainge rake, “Iwa mo korop okan-warekole, onokaka mane koso okanikale?”
21Yesuŋo olale rake, “Ge sot midaine gekenane dereso, yemo ari yeye kine kineŋone ma gemaine, eya korop ŋei natne ebon warekene, paki wesiwa eyamo, ŋei aboŋene midaine gemami, eŋe ebon-warenom, pakiso ge qeliwo riwe moriyan pamaike, eya marat-kakene, pakiso ŋadeno mogatnane sarikene.”
22Ŋei qaluwit eŋe don eya dere wetine boriki arike, onoka wane eŋe aboŋine suwaine pamange eya wane mi qeliŋ-kayakane kake.
23Pakiso Yesuŋo dokoine edane rake, “Na rawe detpi, ŋei mane aboŋine suwaineŋo qeli gege togon wane numa marat kayakane, qeka makaine zok okanmaike. 24Na koso don mane ŋidanbe, kameleŋo samap aŋaino wake waket, eyamo numa ewekine, ŋo ŋei mane aboŋine suwaineŋo qeli gege togon wane numa marat kayakane, eyamo zok umatne, so qeka qekaine okanmaike.”
25Dokoine eŋe don iwa detpi paki, oŋaene zok qaeki, qesonka rakoi, “Pakimo maŋo maine qeli gege togon marat kayake?”
26Rau Yesuŋo deine pore on-luke more, edane rake, “Iwamo ŋei edo okaokan, yemo ŋaŋaemami, ŋo siluŋ Kaisaleŋo yeye kine kine mane mawe ra, yemo rokouno ma-wareyake.”
27Rakiso Petoroŋo olale rake, “Ŋene yeye kine kineze korop qeliŋ-wareŋem paki, geŋane ŋadeŋono sarikone, eya wane ŋene onokaka lewine mane maine makene?”
28Raki Yesuŋo edane rake, “Na iwa rawe detpi, ŋado yeye kine kine korop musele wakon wareyake, naso yewao Ŋei Wawainane Gipole eŋe ŋei waom met metine qeli ewe zonominerop eya wane kutno pese mesiyake, paki naŋane dokone 12 ŋadeno sarikoi, ŋine baŋ yaleka ŋei waom met metko pese metwareu paki, Israel magu 12 eya wane kine ma wanok-onikei. 29Paki, ŋei ŋerep deo edo naŋane rau paki, matene me ŋolekopene, me kiyarokopene, me magaene, me nagaene, me medewekopene, me eu menamene me kepe mateene qeliŋwarekoi, eŋe baŋ lewine moriyan manerop marat-kakei, so gege togon baŋ eboniyake. 30Ŋo siluŋ ŋei loutne kepo naso iwao lewine alakanmami, eŋe baŋ ŋado kitokei, ŋo ŋei loutne kepeo naso iwa ŋado kitomami, eŋe baŋ naŋane qeli kepe museleo, lewine alakangei.”
सध्या निवडलेले:
Matayu 19: onsNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2012, Wycliffe Bible Translators, Inc. All rights reserved.