Matayu 21
21
Yesuŋo Ŋei Waom Yale Doŋki Kutnoka Yerusalem Matko Waketke
1Eŋe ari mage, Yerusalem mat osino lotke more, sari Betpage mat Oliwa Bonaga kino metke, eya lotkekoi, eya lotke more, Yesuŋo dokoine eŋane keuweno ŋine etke lewine alakane arikeik wane taleotke. 2Don iwa yale etane more taleotki arikoik, “Ŋire ari more mat mane arikeik woken, eya metmaike, eso ŋire yewa doŋki mane medeunerop mulapŋo lukkau okoramaike, eya esatka marat osikeik, paki siwot ore moreso, naŋano epu sarikeik. 3Ŋo ŋei maneŋo eya wane don mane rayakeo, yemo ŋire iwa yale olasikeik, ‘Suwaineŋo eya wane raki sarimaite’, rauk eŋe baŋ detŋutki, esatka epu sarikeik.”
4Masi iwa yemo propetŋo don mane iwa yale rake, eya wane wele wakonge,
5“Zion mat welainane suwaine olatpi, ukude ŋei waomŋone geŋano umaike, eŋe wetne pese-kakatneŋo doŋki mane wane kutnoka umaike, so metmaike.”
6Eso medewetkine ere lewine alakane ari Yesuŋo okangeik wane etange, eya wane kop okangoik. 7Ere doŋki medeune epu sariuk so, eŋe takotene kutetno lamekeuso, Yesu eŋe kutno wa metke. 8Pakiso, ŋei ŋerep magu suwaine eŋe takotene kito qoke numao lameke arikoi, ŋo natne eŋe komu metine kitare numao tegoke arikoi, 9paki ŋei ŋerep magu Yesu wane qomino arikoi, so ŋadino arikoi, eŋe iwa yale rau paki, oi bakom okankakoi. “Yaiyo, Dawit qerakine mawakaŋem! Eŋe Waom wane eŋetko sarimaikane, Kaisaleŋo mosopkakep! Bakom mawa mawa yemo weti qeliwo Kaisale wane!”
10Yesu eŋe Yerusalem mat kotino waketki ŋei ŋerep korop mat suwaine eya wane kotino ukat suwaine wakonge, eŋe qeson nagu more rakoi, “Ŋei iwa ma?”
11Rau ŋei ŋerep magu iwen-kakoi eŋe edane rakoi, “Iwamo propet Yesu, Nazaret matko Galili kepeo ŋine.”
Yesu Eŋe Ŋei Bakom Urumgo Waket, Ŋei Qole Qole Urata Makoi, Eya Esop-onge
12Yesu eŋe Bakom Urum koto wake, paki ŋeiwa aboŋ so osom qole qole, so amanagu qenagu okangoi, eya esop-ongi qeinat ketkoi, paki eŋe wesi zakeo more mainge ebon okangoi, eŋane zake, so naŋi zonom eŋane met metene eyao metpi qole-nagukoi, eya kito surubaŋgi ket giŋ qiririŋ arike. 13Pakiso edane rake, “Kaisale wane ekapko Kaisaleŋo iwa yale raki qekoi, ‘Naŋane urum yemo meŋe meŋen urum.’ Ŋo ŋine yemo okanbi mo eŋe kobu mama ŋei eŋane siu siuk kise yale okanmaike!”
14Pakiso, Yesu eŋe yewa metki ŋei depilik so kiye wawetene qoi qoine eŋano sariu, ma menaŋonge. 15Pris ŋetne so ra rokop don kito ebon ebon ŋei, eŋe Yesuŋo urata mayakakatne eya maki kakoi, so medep nigatne edo Bakom Urum koto boka bakom kito rakoi, “Yaiyo Dawit wane qerakine!” Eya wane eŋe dere worik okankakoi. 16Pakiso eŋe Yesu olale rakoi, “Ge eŋe don ramami, eya detmaine?”
Rauso, Yesuŋo rake, “O, na detmaile, ŋine Kaisale wane ekapko don iwa yale pamaike, eya mi dapore det okanmami me? ‘Ge medep nigatne so medep abubu eŋe bakom koboboine kitokei wane ma ewek-onmaine.’ ”
17Yesuŋo eŋe qeliŋ-oneso, mat suwaino ŋine ari Betani lotkeki, ruwo kereki, eya pake.
Yesuŋo Pik Eki Soakkaki Seukke
18Qaeki sakoka eŋe koso zinge numaine ari mat suwaino lotke more, Yesu ŋarainane seukke. 19Paki, eŋe kaki pik eki mane wele midadaine metineŋoka weku metke, eso eŋe eki eya olale rake, “Ge baŋ koso weleŋone manerop mi qekene!” Rakiso, eyaka pik eki eya seuke toroge more marapkeke.
20Dokoine eŋe eya kau paki, qisekoi, so welelepke more qesone rakoi, “Eki eya daleo okane ikopka seuke marapkemaike?”
21Rau Yesuŋo kito edange, “Na welekatne ŋidanbe detpi! Ŋine wet etkeka mi okane more, mali malip korop gekeiwo, yemo ŋine wet etke mi okanikei, paki na pik eki iwa wane okanmaile, yale ŋine maine eweke more, baŋ masi togole okanikei, so eya pik waneka weku mida, ŋine maine baŋ eweke more, bonaga iwa wane yaleka olale rakei, ‘Ge wiyenom paki, goŋomka ari kiwetko ketnom,’ rau eŋe kine kine eya eŋe baŋ maine okaniyake. 22Ŋine malipka gekeiwo yemo, yeye kine kine mane wane rau paki meŋe meŋengo more qesonkau paki, ŋine wele baŋ marat-kakei.”
Yesu Eŋe Maŋo Raki Urata Mamaike, Eya Wane Kinane Qesonkakoi
23Yesu eŋe koso Bakom Urumgo zinge sari kisi maep don kito edane metki, pris ŋetne so Yuda ŋei suwaine eŋe Yesu wano sari qesonka rakoi, “Ge kine kine iwa okan okanmaine, eyamo zonom so dereret kine kine suwaine yewa maŋano ŋine makone, so ge makenane, maŋane don wane okan okanmaine? Maŋo iwa ra ginge?”
24Rau Yesuŋo mainge edange, “Na baŋ qeso qeson mide weku qeson-ŋunbe, eso ŋine wele mainge nolasikeiwo yemo, na baŋ maŋane don wane masi kine kine iwa mamaile, eya ŋidanikale. 25Yohane wane doku tau tau urataine eya diyao ŋine sarike? Eya eŋe qeliwo Kaisale wano ŋine sarike, me kepeo ŋei eŋano ŋine sarike?”
Eŋe kiyeke edomka auye kito qok okane rakoi, “Ŋene don diyawa raikene ŋene olale rakene, ‘Kaisale wano ŋine sarike’, yale raikeneo, eŋe baŋ ŋedane rayake, ‘Pakimo ŋine onoka wane Yohane wane don mi malipkakoi?’ 26Ŋo ŋene raikene, ‘Ŋei eŋano ŋine sarike,’ yale raikeneo yemo, ŋene kaet-ŋonmaike, ŋei ŋerep eŋe daleo okanikei, onoka wane eŋe koropŋo Yohane wane ramami, eŋe propet.” 27Eso eŋe yale rau pakiso, eŋe Yesu wane don mainge olale rakoi, “Ŋene mi detmaine.”
Pakiso Yesu eŋe edane rake, “Na yale waka, maŋane don wane urata kine kine iwa mamaile, eya mi ŋidangale.”
Magak Mane Wane Gipoletkine Erane Don Naŋengo Rake
28Yesuŋo pris wawaine ŋetne suwaine so ŋei eŋane ware warekopene edange, “Ŋine donkisi iwa wane daleo wetkemami? Baŋ kine nolatpi desikale. Ŋei mane geke, eŋe medewetkine etke gekoik, magaetne eŋe ari gipole suwaine olale rake, ‘Gipon, ge ukude ari wain euwo urata makene.’ 29Eŋe olale rake, ‘Na baune wamaike,’ ŋo siluŋ eŋe koso wetne maingeki paki, wain euwo arike. 30Pakiso, magaine eŋe koso gipole mane wano ariki paki don wekuka olatke, pakiso eŋe rake, ‘O maine, Magane,’ ŋo siluŋ eŋe mi arike. 31Medep etke iwa erane keuwo ŋine diyawaŋo magaineŋo urata mayakane wetkeke, eya maine okange?”
Eŋe rakoi. “Medep suwaine oŋo!”
Rauso, Yesuŋo edane rake. “Na iwa ŋidanbe detpi! Ŋei takis mama so borikine mama so bailalaŋ ŋerep eŋe Kaisale wane qeli gege togon so qeli ewe zonom kotino alakane waketpi, ŋine ŋadine okangei. 32Onoka wane Yohane Doku Tau Tau eŋe ŋinano sariki paki, numa koboboine makei wane sikan-ŋunge, eso ŋine done dere mi malip-kakoi, ŋo siluŋ ŋei takis mama so bailalaŋ ŋerep edo yemo done dere malip-kakoi, ŋine iwa mokakoi, ŋo wetŋine mane mi maingeu paki, ŋado eŋe mi malip-kakoi.”
Wain Urata Wane Ware Ware Borikine Eŋane Don Naŋengo
33Yesuŋo koso ŋei suwaine kito edane rake, “Na don naŋengo mane koso iwa rawe detpi, ŋei mane eŋe kepeine suwaine eyao wain waetne ebot wareki paki, ŋadino sen qeyare lolike make. Paki lom mane wain kiza-kaniyakane ma more, diyam metmet mat mane bakine kiroine make. Pakiso, wain eu yewa ŋei natne edo warekei wane eŋane meteeno more so, mat qelige numa arike. 34Ŋado wain wele menaŋgi makeiwane naso bomile sariki, eu welaine eŋe qelit ŋeikoune raongi wain eu ware ware eŋano arikoi, wele natne eŋe eŋine ma mangei wane. 35Ŋo wain urata ware ware ŋei eŋe qelit ŋeikoune ebu more, mane pun pun dimekoi, mane qeu seukke, eso mane wesiŋo qekoi. 36Ŋei eŋe koso qelit ŋeikoune natne alakan biraongi arikoi, eŋane rokop mida, yemo zok manerop biraongi arikoi, paki ŋei wain eu ware ware eŋe alakan okan-ongoi, rokop yewaka koso okangoi. 37Ŋado bisop, eya yemo eŋine gipole eya eŋano birakaki ketke, paki rake, ‘Welekatne eŋe baŋ nae medepne eya wane ewine kitokei.’ 38Ŋo siluŋ wain eu ware ware eŋe eŋine gipole kau paki, edomka auye rakoi, ‘Iwa eŋe wain eya welainane gipole, sariu, ŋene eŋe qeŋem seukkep, paki, ŋene baŋ wain euine eya maŋem ŋenze biŋek okani-yake.’ 39Eso eŋe yale rau pakiso, kito puk masatka more wain euwo ŋine ma birakau qeinat waketki, qe kito ma ari mage, qebirau seuke pake.”
40Yesuŋo qesone rake, “Ŋine daleo ramami, yekuwat namo wain eu wane welaine, eŋe sariki paki, eu ware ware eya eŋe baŋ daleo okan oniyake?”
41Eŋe mainge rakoi, “Eŋe ŋei borikine eya, baŋ engu matali-ongi seukkei, paki wain eu eya baŋ omakone more, ware ware natne ebongi, edo wareka geu wele menageyake, naso eyao eŋe baŋ wele ma more welaine eŋine mangei.”
42Yesuŋo takotke koso edane rake, “Ŋine Kaisale wane ekapko don iwa yale kito ŋidane ramaike, eya mi mane det okanmami?
‘Wesi eya mat mama ŋei eŋe waluke qeliŋgoi, eyaŋo zinge more wesi wele okange, paki eyaŋo mat wane solaine ma togoleki okoramaike, Waomŋo maki kine kine iwa wakonmaike, paki ŋene kaŋem masi weku mane okanmaike!’ ”
43Yesu eŋe takotke rake, “Eso eya wane na rawe detpi, Kaisale wane qeli gege togon eyamo, ŋinano ŋine ŋibu ma more, ŋei natne baŋ ebongi edo maine urataine mau wele maine wakoniyake. 44Ŋei mane eŋe wesi eya wane kutno ra soroke ket kito more, baŋ din bun wiri izi muzuŋ kitoyake, so wesi eyaŋo ŋei mane wane kutno ket kitomaikeo, yemo ŋei yewa kito pelekki baŋ qentake more lube lube okaniyake.”
45Pris ŋetne so Parisi eŋe Yesuŋo don naŋen beŋen rake, yewa detpi paki wetkeu, eŋane ramaike, yale okange. 46Eso eŋe ma luk-kakeiwane okangoi, ŋo siluŋ eŋe ŋei ŋerep magu eŋane kaet-onge, edo Yesu wane propet ramaŋkoi, eya wane qeliŋ-kakoi.
सध्या निवडलेले:
Matayu 21: onsNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2012, Wycliffe Bible Translators, Inc. All rights reserved.