Lucas 19
19
Chꞌin Jesús la ko Zaqueo
1A̱ndá chꞌin Jesús kꞌuíxehen chjasin Jericó la kꞌuatsínka ti chjasin a. 2Ndá ntiha itjen ijnko chojni rico itꞌin Zaqueo; jehe chꞌan mé tꞌe̱tue̱hen chꞌan ti sin nchekjènki̱. 3La tjinkaon chꞌan chrókjuatso̱an ti chꞌin Jesús, kjánchó xitjahya tꞌikon chꞌan kixin nte̱tohya chꞌan la nchónhña chojni siín. 4Ndá kuinká chꞌan kuitaón chꞌan nti̱a kixin la kꞌuátsé chꞌan ijnko inta sicómoro kixin tjinkaon chꞌan tsꞌikon chꞌan ti tsꞌatsínka chꞌin Jesús. 5A̱ndá ti ó kꞌuatsínka chꞌin Jesús ntiha la konta ti inta la ndáchro:
―Zaqueo, tjoka tꞌinka̱jña kixin ndo̱a tsito̱na ijie.
6Ndá chꞌin Zaqueo la tjoka kꞌuinkajin chꞌan la imá kóchéhe̱ chꞌan. 7Ndá kaín ti sin kꞌuíkon la kjuankíxin tjontá sin ti chꞌin Jesús, ndáchro sin kixin tsito̱he chꞌan ndo̱e jnko chojni chónta nchónhña ijie̱. 8Ndá chꞌin Zaqueo kjuákꞌexín to̱té ndáchro:
―Ìnchéni, tihín kixin tsotjahá nko̱siñe ti nkehe chonta tsákja ti sin nóa. A̱ndá ti nkojín nkexro kjui̱tꞌayaha̱, kuaáha la noó vece tsꞌókja̱ha̱n sin.
9A̱ndá chꞌin Jesús ndáchro:
―Ijie ti ña̱o tsaá chojni ti nchia i kixin ti nkexro i, la chaxín tsíkꞌaxrjeníxin Abraham. 10#Mt. 18:11.*Kixin ti Xje̱en Díos kꞌóna Chojni la kuikjeyá la ko sinchekaá ti chojni chónta ijie̱.
Ti sin kꞌuáyéhe̱ chichaon sichꞌeko ixra̱
(Mt. 25:14-30)
11A̱ndá ti chojni siín ntiha la na̱xa̱ tjejótihin sin nkehe tjechronka chꞌin Jesús, ndá kjuíncheyóe̱xin chꞌan jnko nkehe kixin ó chjinaxón Jerusalén itjen chꞌan, la jehe sin kjuénka̱yáxin sin kixin ti kjuachaxin kuènté Díos la ó tuénxín itsi. 12Ndá ndáchro chꞌan:
―Ijnko nkexro tsíkꞌaxrjeníxin ijnko nkexro imá tꞌe̱to̱an. Ndá ti nkexro a la sákjuí ókjé nación kixin tsꞌáyéhe̱ kjuachaxin tsꞌóna rey, ndá chrꞌéxi̱n la xíkjan. 13A̱ndá ti ó chjina sátsji la kꞌuéye̱he̱ ite ti sin chꞌexín ixra̱ kixin tsochjéhe chꞌan sin nkojnko chichaon tjete sínkí. Ndá kꞌue̱to̱an chꞌan ndáchro chꞌan: “Chꞌekoara ixra̱ ti chichaon í hasta ti ó tsꞌinka janhan.” 14Kjánchó ti sin chjasén chꞌan la nínkakohen sin ti nkexro, la ichrꞌán sin iso chojni sákjuí sin kixin tsochenka sin ti nkexro tꞌe̱to̱an kixin tjinkakonhña sin ti nkexro a tsꞌóna rey tsꞌe̱tue̱hen ti jehe sin. 15Kjánchó kjónté xi̱kaha ichro sin, la kꞌuáyéhe̱ chꞌan kjuachaxin tsꞌóna chꞌan rey. Ndá ti ó ikjan chꞌan chjasén chꞌan, la kꞌue̱to̱an chꞌan tsíxrakoa ti sin chꞌexín ixra̱, tsíkꞌayéhe̱ ti chichaon, kixin tso̱nohe chꞌan nkekja̱ín kjuacha ti chichaon kꞌuáyéhe̱ sin. 16A̱ndá ti nkexro sa̱oxén kóchjina la ndáchro: “Jaha lamoéni, ti chichaon kjuánjua la kjuacha íjnko ite chichaon.” 17A̱ndá ti rey la ndáchro: “Ó ncho̱xon, jaha la ijnko chojni jína ichꞌe ixra̱. Kjuákoxián kixin jína kjui̱chꞌe ixra̱, kjónté jehya ixra̱ ijié, la ijie tsjánjua kjuachaxin tséto̱an ite chjasin”, ichro ti rey. 18A̱ndá kóchjina íjnko nkexro la ndáchro: “Jaha lamoéni, ti chi̱cha̱ko̱an kjuánjua la kjuacha íjnko inꞌó chichaon.” 19Ndá ti rey la ndáchro: “Tso̱tja̱há kjuachaxin tséto̱an inꞌó chjasin.” 20A̱ndá kóchjina ti níxin nkexro, la ndáchro: “Ntihi itjen ti chi̱cha̱ko̱an. Kuankintani ti panitoéni#19:20 kuankintani ti panitoéni lo guardé en mi pañuelo 21kixin chrakonhani kixin jaha la jia̱ha la tákjá ti nkehe jehya kjuaké la ko itja̱a ti nkehe jehya jaha kjuénka̱xian.” 22A̱ndá ti rey ndáchro: “Jaha jehya chojni jína ichꞌe ixra̱. Ti nkehe ndáchrua la tsjanchaxián ijie̱. Ti ó noha kixin jia̱na la ko tákjá ti nkehe kjuakéhya la ko itja̱a ti nkehe kjuénka̱xinhña. 23La, ¿nkekuènté kixin chrꞌaxénhña ti chi̱cha̱ko̱na ijnko banco chrókjuíchꞌexín ixra̱?, kixin ti ó ikjan ndo̱na la chrókꞌuayáha̱ ti nkehe chrókjuacha ti chi̱cha̱ko̱na”, ichro ti rey. 24Ndá ndáche chꞌan ti sin tjejó ntiha: “Takítsjehéra chꞌan ti chichaon chónta chꞌan la chje̱héra ti nkexro chónta ite chichaon.” 25A̱ndá jehe sin ndáchro sin: “¿Nkekuènté chrókꞌuáyéhe̱ ti nkexro a kixin ó chónta chꞌan ite chichaon?” 26#Mt. 13:12; Mr. 4:25; Lc. 8:18.*A̱ndá ti rey ndáchro: “Chaxín ndáxrja̱n kixin ti nkexro chónta itsjé la a̱ntsí tsꞌáyéhe̱. A̱ndá ti nkexro chóntahya, la kjónté ti intsí chónta, la tsꞌaxrjehe. 27#Mt. 25:14-30.*Kja̱xin ti sin nínkaon tjinkakonhña kixin janhan chrókꞌóna rey la tsjiko̱ara sin ti itjen ntihi la tꞌochrínjinra ikja sin.”
Chꞌin Jesús kꞌuíxehen chjasin Jerusalén
(Mt. 21:1-11; Mr. 11:1-11; Jn. 12:12-19)
28Ndá ti ó kjuixin ndáchro chꞌin Jesús tíhi la sákjui̱ chꞌan nó Jerusalén. 29Ndá ti ó kjuíji sin chjinaxón ti chjasin Betfagé la ko Betania chokꞌèxín#19:29 chokꞌèxín en frente de ti ijna̱ Olivo, ndá kꞌue̱tue̱hen chꞌan yaá ti sin kꞌuájiko chꞌan 30ndáchro chꞌan:
―Sátjira ti chjasin intsí itjen chokꞌèxín ntihi, ndá ti ó tsjasánra ntiha la tsꞌikonra ijnko kolócho tjechroé na̱xa̱ ninkexró tjakꞌekjenhña. Tjasinta̱nke̱héra va la tsjikuanara va ntihi. 31A̱ndá ti nkojín nkexro tsjanchankí kixin nkekuènté tjasinta̱nke̱héra va la ndáchera sin: “Ìnchéni tichánxi̱hin va.”
32Ndá jehe sin sákjuí sin la kꞌuitja sin éxi ndáchro chꞌin Jesús. 33A̱ndá ti ó tjejótjasinta̱nke̱he sin va, la ti ìnché va kjuanchankí:
―¿Nkekuènté tjasinta̱nke̱héra ti kolócho?
34Ndá jehe sin ndáchro sin:
―Ìnchéni tsichánxi̱hin va.
35Ndá sákjuíko sin ti kolócho ti itjen chꞌin Jesús, la ti ika tꞌitsáte sin kjuínchekamá sin va, ndá kjuákꞌekjen chꞌan. 36Ndá tinkákji ti kolócho tjekjen chꞌin Jesús, la tinkákꞌekjínxi̱n#19:36 tinkákꞌekjínxi̱n extender tjasinkjinxin sin sin ti iké sin nti̱a tsꞌatsínka ti kolócho tjekjen chꞌan. 37Ndá ti ó kjuíjichjina sin ti tꞌinkaji̱nxi̱n chojni ti ijna̱ Olivo, ndá kaín ti sin chréhe̱ chꞌin Jesús kjuankíxin sin itsen nixja sin, chéhe̱ sin chjéhe sin kjuasáya Díos kixin kaín ti kjuaxroan kꞌuíkonxín ikon sin. 38#Sal. 118:26.*La ndáchro sin:
―Jína ti nkexro Rey kui̱xi̱n kjuachaxíen ihni̱é Díos. Kjuaxróxin ti tsjakꞌe nka̱jní la ko kjuasáye Díos itjen nkaya nka̱jní.
39Ndá iso ti sin fariseo tjejóyákjan ti chojni tjejónchexroan ntiha, la ndáchro:
―Maestro, tétue̱hén ti sin chréhe̱ kixin tsotání sin.
40A̱ndá chꞌin Jesús kjuáte̱he ndáchro:
―Ti tsotání ti sin i la ti ixro̱ tsotsje.
41A̱ndá ti ó kjuíjichjina chꞌin Jesús ti chjasin Jerusalén ndá kꞌuíkon chꞌan la tsjánka chꞌan kixin kuítekakonhña sin, 42la ndáchro chꞌan:
―Ti chrókiénxian la ko chrókónoha nkexrín chrókꞌuayehé ti kjuaxróxin, kjánchó kuitekákonhña. La ó kjuixin kꞌuatsínka ti kjuaxróxin chrókꞌuikuan la í xitjahya tsꞌikuan ijie. 43Kixin itsi ti ña̱o tso̱nínkakohan chojni la tsa̱ntatjen ti chjasin tjejora la tsꞌinkakonha̱ra sin kixin xitjahya tsꞌaxrjéxi̱nra ti chjasin, 44ndá tsꞌóxika sin kaín ti tja̱tꞌo̱ siín la ko tsꞌóñá sin kaín ti chojni siín ntiha la ko tsíto̱ehya sin kixin ninkehó ixro̱ na̱xa̱ tsꞌejókjen kícho, kixin kjuátso̱anhñara ti ña̱o kuitsjehe Díos ti chjasin tjejora.
Kótjóá ti ni̱nko
(Mt. 21:12-17; Mr. 11:15-19; Jn. 2:13-22)
45A̱ndá chꞌin Jesús kꞌuíxehen ti ni̱nko, la kjuankíxin kuakitsje kaín ti sin nchekjixin nkehe ntiha la ko ti sin tꞌe̱na nkehe. 46#Is. 56:7; Jer. 7:11.*La ndáchro chꞌan:
―Ndáchro xroon itén Díos: “Ti ndo̱na mé itꞌin nchia tsochjéxin chojni Díos kjuasáya”, a̱ndá jahara tsíkji̱chꞌénara itjue̱é xíche̱e.
47 #
Lc. 21:37. *Ndá ti ni̱nko a kjuákꞌe chꞌin Jesús kjuako kaín ña̱o. Kjánchó ti sin ncha̱tꞌá tꞌe̱to̱an la ko ti sin tjako ley la ko ti sin tꞌe̱to̱an ti chjasin a mé kjueyá sin nkexrín chrókꞌóñá sin ti chꞌin Jesús, 48kjánchó kꞌuitjahya sin nkexrín kixin kaín chojni kóxríhi̱n sin tjejótihin sin ti nkehe tjako chꞌan.
सध्या निवडलेले:
Lucas 19: poeNTplus
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2016, Wycliffe Bible Translators, Inc. All rights reserved.