Lucas 20
20
Ti kjuachaxin chónta chꞌin Jesús
(Mt. 21:23-27; Mr. 11:27-33)
1A̱ndá ijnko ña̱o kjuákꞌe chꞌin Jesús ti ni̱nko la kjua̱ko̱he̱ chꞌan chojni ti itan jína tsaáxin sin. Ndá ikui ti sin ncha̱tꞌá tꞌe̱to̱an la ko ti sin tjako ley la ko kja̱xin ti sin tꞌe̱to̱an kuènté ni̱nko. 2Ndá kjuanchankí sin:
―Chro̱nka nke kjuachaxin chonta kixin xi̱kaha ichꞌe tíhi. ¿Nkexro kjuajon ti kjuachaxin a? ―ichro sin.
3Ndá chꞌin Jesús kjuáte̱he, ndáchro:
―Kja̱xin janhan tsjánchánkíhara ijnko nkehe la tsjate̱héra. 4¿Nkexro kꞌue̱tue̱hen Juan kixin tsi̱ki̱te chꞌan chojni? ¿Á Díos ní o̱ chojni ó?
5Ndá kjuankíxin ikjo kícho sin, ndáchro sin:
―¿Nkehe chrókjuate̱heni? Ti tsondáchroni kixin Díos ichrꞌán ti chꞌin Juan ndá tsjanchankí chꞌan nkekuènté kuitekakuenhñani ti chꞌin Juan. 6A̱ndá ti tsondáchroni kixin chojni ó la kaín chojni tso̱nínkaon sin la tsꞌóñáxin sin ixro̱ ti jeheni kixin kaín sin nohe sin kixin Juan la chaxín kꞌuékjako itén Díos.
7Ndá kjuáte̱he sin ndáchro sin kixin noehña sin nkexro tsíchrꞌán ti chꞌin Juan. 8Ndá ndáchro chꞌin Jesús:
―Kja̱xin janhan tso̱xrja̱nkahya nkexro kjuajon kjuachaxin tjétꞌa̱ tíhi.
Éxi ti sin chꞌehya ixra̱ jína
(Mt. 21:33-44; Mr. 12:1-11)
9 #
Is. 5:1. *Ndá tuénxín kjuankíxin chꞌin Jesús nixje̱he̱ chojni kjuíncheyóe̱xin jnko nkehe, ndáchro chꞌan:
―Ijnko chojni kjue̱nka̱xin inta to uva ti no̱nte̱e, ndá chrꞌéxi̱n kjuínchekjen iso chojni kixin sichꞌe ixra̱. Ndá kjuixin la sákjuí chꞌan ikjín la imá isé kꞌoxrjehen chꞌan ntiha. 10Ndá ti ó ikui ti ña̱o tsotjá sin ti ito uva, ndá ti nkexro no̱nte̱e la kꞌue̱tue̱hen ijnko nkexro chꞌexín ixra̱ kixin tsjikjanchehe ti sin chꞌexín ixra̱ ti nonte kixin tsjajon sin ti ito tóhen chꞌan tókan. Kjánchó ti sin tꞌayakuenxín ti nonte la kꞌuínkíté sin la ninkehó chjéhya sin sákjuíko. 11Ndá ti nkexro no̱nte̱e la ichrꞌán íjnko nkexro chꞌexín ixra̱. A̱ndá kja̱xin tíhi kꞌuándaxíhi̱n sin la ko kjuate sin la kja̱xin ninkehó tsíchjéhya sin. 12Ndá ti nkexro no̱nte̱e la ichrꞌán íjnko nkexro. La kja̱xin xi̱kahó tsíkjichꞌehe sin ti nkexro a ínaá, la tsíkꞌinkítéxin ti ntiha.
13’Ndá ti nkexro kuènté ti nonte la ndáchro: “¿Nkexrín si̱tꞌa ijie? Tsochrꞌan ti xja̱na imá tjua̱ha̱. Ákue chrókuitekakohen sin chꞌan, la chróchóntehe sin chꞌan kjuasàya.” 14Kjánchó ti ó kꞌuíkon ti sin tꞌayakuenxín ti nonte la ikjo kícho sin ndáchro sin: “Ti nkexro i mé tsꞌáyéhe̱ kaín ti nkehe kuènté ti itꞌé. Tsꞌóñáni chꞌan kixin jeheni tsíto̱ekoni kaín ti nkehe”, ichro sin. 15Ndá xi̱kaha kuakitsjexín sin chꞌan ti nonte la kꞌóñá sin chꞌan.
A̱ndá kjuanchankí chꞌin Jesús, ndáchro:
―¿Ndá nkehe tjénka̱yáxinra sichꞌe ti ìnché nonte kixin xi̱kaha kóhen ti xje̱en chꞌan? 16Itsi chꞌan la sinchekꞌitjáña chꞌan kaín ti sin tꞌayakuenxín ti nonte kixin xi̱kaha kjuíchꞌe sin, ndá chróchjéhe íso nkexro ti nonte kixin sichꞌe sin ixra̱ ―ichro chꞌin Jesús.
Ndá ti ó kuíhin sin xi̱kaha, la ndáchro sin:
―Díos tsjajonhña kjuachaxin xi̱kahña tso̱hen ―ichro sin.
17 #
Sal. 118:22. *Kjánchó chꞌin Jesús komá ti jehe sin la ndáchro:
―¿Nkehe tꞌaxrjexín ti nkehe ndáchro xroon itén Díos?:
Ti ixro̱ náxrjónhña kuíto̱enta ti sin chꞌéna tja̱tꞌo̱,
mé ijie kꞌóna ti ixro̱ a̱ntsí tjetoan.
18La kaín ti nkexro tsꞌitsínka chritaón ti ixro̱ la tso̱kuen. A̱ndá ti tsꞌánótjen ti ixro̱ i tsoxratja ijnko chojni la tso̱kuen, tsꞌóna inche.
Ti tsje̱nke̱he sin gobierno
(Mt. 21:45-46; 22:15-22; Mr. 12:13-17)
19A̱ndá ti ncha̱tꞌá tꞌe̱to̱an la ko ti sin tjako ley tjinkaon sin chrótsé sin chꞌin Jesús tuénxín ti hora a, kixin ó nohe sin kixin jehe sin ti kjuíncheyóe̱xin chꞌan ti nkehe nixja chꞌan, kjánchó xitjahya tsotsé sin chꞌan kixin chráko̱nhe̱n sin ti chojni siín ntiha. 20Ndá kꞌue̱tue̱hen sin chojni tsotsáyehe sin chꞌin Jesús, tsꞌejó sin éxi chojni jína kixin áchꞌe nkojín nkehe nduáhya tsonixja chꞌan. A̱ndá jína tsjanchaxín sin ijie̱ tsjikaán sin chꞌan ti itjen ti gobernador. 21Mé xi̱kaha ti sin a kjuanchankí, ndáchro:
―Maestro, ó noheni kixin kaín ti nkehe ndáchrua la ko tjàkua la chaxín ndoá la ko jehya nkexrín tsjehe chojni tjénka̱yáxixián á jína sin o̱ náhí, la ko ndoá tjàkua nti̱e Díos. 22Chro̱nka, ¿á jína tsje̱nke̱heni César ti nkehe tjanchia ní o̱ náhí? ―ichro sin.
23Kjánchó chꞌin Jesús ó nohe kixin nduáhya tjenka̱yáxin sin la ndáchro: 24―Tjákora ijnko chichaon. ¿Nkexro tsíkꞌaxrjexín ti chichaon i la ko nkexro ihni̱é chónta?
Ndá kaín sin kjuáte̱he sin:
―Ti nkexro tꞌe̱to̱an.
25Ndá ndáchro chꞌin Jesús:
―Chje̱héra ti chꞌin gobierno ti nkehe kuènté chꞌan; a̱ndá ti nkehe kuènté Díos la chje̱héra Díos.
26Ndá kjuachahya sin kjuachaxin sin chꞌin Jesús, ti nkehe ndáchro chꞌan ti tjejó itsé chojni. La chrákon sin kuíhin sin kaín ti nkehe kjuáte̱he chꞌan, la tání sin, í kohya nkehe ichro sin.
Kjuanchankí sin kuènté ti tsoxechón chojni
(Mt. 22:23-33; Mr. 12:18-27)
27 #
Hch. 23:8. *A̱ndá chrꞌéxi̱n ikui iso ti sin saduceo kuitsjehe sin ti chꞌin Jesús, jehe sin la titekakonhña sin kixin tsoxechón ti chojni tsíkꞌen. Ndá xi̱kaha kjuanchankíhi sin chꞌin Jesús, ndáchro sin:
28 #
Dt. 25:5. *―Maestro, Moisés tsíkjin xroon ndáchro kixin ti ó itsꞌen ijnko chojni ndá na̱xa̱ itjen ti ichjién chꞌan, la tsíkꞌikonhña sin ixjan, la ti kícho ti nkexro tsíkꞌen mé tsákja ti tjan kꞌán, ndá ti ixjan tsochónta sin la tsꞌóna éxi xje̱en ti nkexro tsíkꞌen. 29A̱ndá ntihi kꞌuejó yato sin nkoko̱a kícho sin. Ndá ti nkexro sa̱o la kóte̱he̱ ndá ikꞌuén la kóchóntahya ixjan. 30Ndá ti nkexro yaáxin kuákja chꞌan ti tjan kꞌán, ndá kja̱xin chꞌan ikꞌuén chꞌan la kóchóntahya sin ixjan. 31Ndá ti nkexro níxin mé kuákja chꞌan ti tjan a, la xi̱kaha kóhen ínaá. Ndá kaín ti yato sin kꞌuéchónta sin ti tjan a la kaín sin ikꞌuén sin la ninkehó ixjan kóchóntahya sin. 32Ndá kjuixixíen la kja̱xin tjan ikꞌuén tjan. 33A̱ndá ti ó tsoxechón kaín ti chojni tsíkꞌen, ¿la nkexro tsꞌóna xìi tjan kixin kaín ti yato sin kóte̱he̱ sin tjan? ―ichro sin.
34Ndá chꞌin Jesús kjuáte̱he ndáchro:
―Ntihi chjasintajni la ti chojnindoa la ko ti chojnichjin la tóte̱he sin takja kícho sin. 35Kjánchó ti sin kuitekaon Díos la tsoxechón sin ínaá la í tso̱te̱ehya sin la ko í tso̱te̱ehya ti xje̱en sin. 36Kixin í xitjahya itsꞌen kixin tsꞌejó sin éxi ti sin ángel kixin jehe sin mé xje̱en Díos kixin Díos kjuínchexechón ti jehe sin. 37#Ex. 3:6.*Kja̱xin Moisés kjuako ti ó chrónka kuènté ti inta tjeche kjuínchenohe ti jeheni kixin ti sin tsíkꞌen tsoxechón sin. Ndáchro chꞌan kixin Ìnchéni Díos mé ti Díos tinkáchónki Abraham la ko Isaac la ko Jacob. 38Méxra̱ Díos la jehya Díos tinkáchónki ti chojni tsíkꞌen. Náhí. Jehe chꞌan mé Díos tinkáchónki ti sin tjejóchón, la Díos mé tꞌikon kixin kaín chojni la tjejóchón sin.
39A̱ndá iso ti sin tjako ley, ndáchro:
―Maestro jína ndáchrua.
40Ndá chrákon sin la í ninkehó kjuanchankíhya sin.
¿Xá nkexro ti itꞌé ti Cristo?
(Mt. 22:41-46; Mr. 12:35-37)
41Ndá ndáchro chꞌin Jesús:
―¿Nkexrín kixin ndáchro sin kixin ti Cristo mé tsꞌaxrjeníxin David? 42#Sal. 110:1.*Ndá David ikjin chꞌan ti xroon Salmos la ndáchro chꞌan:
Ìnchéni Díos ndáche ti Ìnchéni:
“Tjakꞌe tjaná chjina hasta tsétua̱njña
43kixin tsjixinjña kaín ti sin nínkakohan la tsjachahya sin tsꞌe̱to̱an sin kixin jahuá tséto̱an.”
44¿Xá nkexrín kixin Cristo chrókꞌóna xje̱en David, kixin David ndáchro chꞌan kixin Ìnché chꞌan ti Cristo? ―ichro chꞌin Jesús.
Chꞌin Jesús kjuanchia ijie̱ ti sin tjako ley
(Mt. 23:1-36; Mr. 12:38-40; Lc. 11:37-54)
45Kaín chojni tjejótihin sin ti ó nixje̱he̱ chꞌin Jesús ti sin kꞌuájiko ndáchro:
46―Chrokóxakohanra chrókuankíehyara ti sin tjako ley, kixin jehe sin tóxrínhi̱n sin chrókꞌuinkáya sin ika kjíjin la tjinkaon sin kixin kaín chojni tsjikosáyehe ti jehe sin ti ó tsoxéta sin ndasin la ko tjeyá sin ti silla a̱ntsí tjetoan chrókꞌuejótja̱xi̱n sin nkaxehen ni̱nko la ko tjeyá sin kixin jína chrókꞌuejó sin ti sátsji sin ijnko kia, 47la ko kja̱xin takitsjehe sin ndo̱e ti chojnichjin ikꞌán. Ndá ti ó tjixin chꞌiyehe sin ti chojni, la náxrjón nixje̱he̱ sin Díos. Kjánchó Díos a̱ntsí sinchekjasóte ti jehe sin kixin xi̱kaha chꞌia sin.
सध्या निवडलेले:
Lucas 20: poeNTplus
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2016, Wycliffe Bible Translators, Inc. All rights reserved.