Genesis 3
3
Say Impankasalanan na Too
1Say oleg so sankasiliban ed saray amin ya ayayep a pinalsay Katawan a Dios. Tinepet na oleg ed samay bii, “Imbaga tan tua na Dios ya ag yo kanen so bunga na dinanman a kiew ed tanamanan?”
2Inmebat imay bii, “Nayarian min kanen so bunga na dinanman a kiew ed tanamanan, 3likud ed bunga to may kiew a walad pegley to. Imbagay Dios ed sikami ya ag mi kanen odino diwiten so bunga to man a kiew; no kanen mi o diwiten mi, ompatey kami.”
4Inkuanto may oleg, “Aliwan tua tan; ag kayo ompatey. 5Imbagay Dios itan ta amta to a no kanen yo, magmaliw kayon singa Dios#3:5 Dios; odino diriyos. ya amta yo no anto so maung tan maoges.”
6Anengneng na samay bii a marakerakep imay kiew tan masamsamit a kanen so bunga to, tan sakey a pampilpilalekan a pakagamuray kakabatan. Kanyan amorbor na bunga, insan to kinan. Initdan toy asawa to, tan kinan to met. 7Kapangan da, naitdan iray pakatalus tan naamtaan da a labus-lakseb ira; kanyan nandadait iray bolung na igos, insan da intapi-tapi.
8Nen ngarngarem la arengel da so tanul na panaakar na Katawan a Dios ed tanamanan, kanyan inamutan dad otel na kakiewan. 9Balet tinawag na Katawan a Dios imay laki, “Iner so kawalaan mo?”
10Inmebat imay laki, “Arengel ta kad tanamanan; antakot ak ta labus-lakseb ak, kanyan inamutan ta ka.”
11Tinepet na Dios, “Siopay angibagad sikan labus-lakseb ka? Kinan mo sirin imay bunga ya imbagak ed sikan ag mo kanen?”
12Inmebat imay laki, “Samay biin inter mon kaibak et inter tod siak imay bunga, insan ko kinan.”
13Tinepet na Katawan a Dios ed samay bii, “Akin et ginawam so ontan?”
Inmebat imay bii, “Pinalikdo ak na samay oleg, et angan ak na samay bungay kiew.”
Dinusa na Dios ira may Totoo
14Insan inkuan na Katawan a Dios ed samay oleg, “Nadusa ka lapud sayan ginawam; sika labat so nisamba ed amin da ray ayayep. Saya so dusam: Manlapud natan manilak-ilak ka, tan say dabuk so kanen mo legan mon mambilay. 15Pambosulan ta ka tan samay bii; mambosulan lawas so anak mo tan say anak to. Temeken na anak to so olom tan ketketen mo so mokur da.”#3:15 da; odino to.
16Inkuanto natan ed samay bii, “Aruman koy gunigon mo no manlokun ka tan nairapan ka ed pananak mo. Anggaman ontan, pampilalekan mo nin siansiay asawam tan sikatoy manoley ed sika.”
17Inkuantod samay laki, “Dinengel moy asawam tan kinan moy prutas ya imbagak ed sikan ag mo kanen. Lapud sayan ginawam, nisambay dalin. Nakaukolan a mansagput kay baleg legan mon mambilay, pian mangiter so dalin na malaem a taganom. 18Patuboen to ray dika-rika tan sabisabit, tan mangan ka ray tantanaman a balang. 19Nakaukolan moy manlinget tan mansagput na baleg, pian makaiter so dalin na antokaman a napambilay ya anggad ipatey tan ipawil mod dalin a nanlapwan mo. Nanlapu kad dalin, tan magmaliw ka lamet a dalin.”
20Eva#3:20 EVA: Say tanul na sayan ngaran kapara toy Hebreon salita a kabaliksan toy “mabilay” tan diad sayan partiy libro kabaliksan toy “katoowan.” so impangingaran nen Adan#3:20 ADAN: “Katoowan” so kabaliksan na sayan ngaran diad salitay Hebreo. ed samay asawa to, ta sikatoy ina na amin a katoowan. 21Insan say Katawan a Dios nanggawa na saray kawes a katat a para si Adan tan samay asawa to, tan kinawesan to ra.
Apataynan ed Tanamanan si Adan tan si Eva
22Insan inkuan na Katawan a Dios, “Nagmaliw la a singa sakey ed sikatayo so too, tan wala lay pakaamta tod maung tan maoges. Nakaukolan a sebelan a mangala na bungay kiew na bilay, ta no mangala tan mangan, mambilay ya anggad angga.” 23Kanyan say Katawan a Dios pinataynan tod tanamanan na Eden imay too, pian nadalusan toy dalin a nanlapwan na laman to. 24Diad bandad bokig na tanamanan na Eden angipasen na saray kirubin#3:24 KIRUBIN: Nengneng yoy glosario. tan sakey a mandarlang ya ispada a manwasiwas ed amin a dapag, pian anggapoy makaasingger ed samay kiew na bilay.
सध्या निवडलेले:
Genesis 3: MBBPAN83
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Maung a Balita Biblia © Philippine Bible Society, 1983